Read idoma 1 UTÍMŌTI 3 Bible Online

1 UTÍMŌTI 3 - idoma bible

1 UTÍMŌTI 3

¹Upɔ́lu yɔ̄ ī kɛlā gɔbú ipú ɔkpá ā kpɔ́ kahíníī, “Ɛlā nyā nēé ka ā wɛ ɔkwɛ̄yi nɛ̄. N kahíníī ɔ́dāŋ́ ka ɔ̄cɛ dúúmā ī dɔɔ̄kā ka ō wɛ otrɛ̄yí kú icɔ́ɔci, úklɔ́ olɔhi nɛ̄ ó dɔɔ̄kā á.

²Otrɛ̄yi kú icɔ́ɔci í cíkā ō lɛ ɛcá dúúmā ŋ́, ó í wɛ ɔ̄cɛ ō lɛ ɔnyā ékpónú, ó í gbēyī cíí, ó í wɛ ɔ̄cɛ nōo cīīyīnū bī glá. Ó í wɛ ɔ̄cɛ o miyɛ ugbɔga tū ɔlɛ́ glá. Ó klla cíkā ō jé ō nwū ācɛ ɛlā glá.

³O gáā wɛ ɔ̄cɛ gwá ejé cābɔ̄ bá ŋ́, ó híī wɛ ɔ̄cɛ o yá ɔdā abɔ̄fú ŋ́, amáŋ ó í wɛ ɔ̄cɛ ogbonɛnɛ mɛ́mla ɔ̄cɛ ɛbɔ́. Ó gáā wɛ ɔ̄cɛ o héyīfuúfuú kú ije ŋ́.

⁴Ó í wɛ ɔ̄cɛ nōo bī ācɛ ipɔ́ɔnū kú nū lɔhi glá. Ó klla kē í bī ayípɛ̄ ɔlɛ́ nū lɔɔlɔhi ɔwɛ nēé í lɛyi táajɛ lɛ ɔ́ glá.

⁵Ohígbū ka ɔ́dāŋ́ ka ɔ̄cɛ dúúmā í leyīkwu ɔlɛ́ nū lɔhi glá ŋ́, ɔwɛ nyá nɛ̄ ó gáā leyīkwu icɔ́ɔci kú Ɔwɔicō lɔhi glá āa.

⁶Ɔnyākwɔ́cɛ kú icɔ́ɔci í cíkā ō wɛ ɔ̄cɛ nōo pīya ɔ̄cɔ̄lóhɔ́nyɛtá ɛ̄yīpɛ̄ ŋ́, ohígbū nōo géē nū pitīī ipú ɔbɔ́cɛ nɛ̄ Ɔwɔicō géē ŋmó ɔ́ ɛpɔ̄bí bɛ̄ɛka ebilíi ā.

⁷Ó cíkā ō wɛ ɔ̄cɛ nɛ̄ ācɛ nēé wɛ ācɛ icɔ́ɔci ŋ́ mā cíkā ō ka olɔhi kú nū, cɛ́ɛ́ kóō híī gwō tū ukpa kú ebilíi kú uwēyī kóō lɛ ɔ́ kwú ŋ́.

⁸Ɔwɛ ékpónú ā, ācɛ o yúklɔ́ ipú icɔ́ɔci cíkā ō lɛ ucē o lɔhi. É gáā kɛ̄mgbɛ̄ ŋ́, ó híī wɛ ɔ̄cɛ o gwá ije nɛ̄ɛ̄nɛ̄hi ŋ́, ámāŋ ka ācɛ o hágágā ije ŋ́,

⁹é cíkā ō yɔ̄ ī cɛ̄ɛ̄lā ɔkwɛyi kú ācɔ̄lóhɔ́nyɛtá nēé mafu mla ɔtū ékpónú ā.

¹⁰E cíkā ō lɛ ojáma yá uwā, ɔ́dāŋ́ ka é má ɔdōbɔ̄bí dúúmā ɛgiyí uwā gɛ ŋ́, é kē lɔfú yúklɔ́ ipú icɔ́ɔci glá.

¹¹Ɔwɛ ékpónú ɔ́ɔmā, anyā uwā cíkā lɛ uce olɔhi, é gáā wɛ ācɛ o híla ācɛ ŋ́, amáŋ é cíkā o gbeeyī cíí, ɔtu kú uwā kóō le yēŋēē ipú ɛjɛ̄ɛ̄jī ɔdā dóódu.

¹²Ācɛ o táabɔ̄ ipú icɔ́ɔci ā cíkā ō lɛ ɔnyā ékpónú, é kē í bī ɔlɛ́ uwā mɛ́mla ayípɛ̄ ɔlɛ́ uwā lɔɔlɔhi.

¹³Ɔ́dāŋ nɛ̄ ācɛ otáabɔ nēe bá nyā lɛ úklɔ́ kú uwā yá lɔɔlɔhi, ācɔ̄lóhɔ́nyɛtá o hile géē lɛ ojīlīmā ce uwā nɛ̄ɛ̄nɛ̄hi, é klla í kɛlā mla íkwu lɛyí kwu ɔ̄kōolɔhi kú Ohɔ́nyɛtá Ujísɔ̄si.

¹⁴N yɔ̄ i tá aɔ́dā nēe bá ā fu uwɔ abālɔbányā, nááná nɛ̄ n jé ka n géē wā í má uwɔ eko kpií.

¹⁵Amáŋ ɔ́dāŋ́ ka ɔdā dúú lɛ um kwútū, ɔkpá nyā í mafú gā awɔ ucē nɛ̄ alɔ nēe wɛ otrɛ̄yí cíkā ō ya ipú icɔ́ɔci kú ɔlɛ́ Ɔwɔicō nōo yɔ̄ yēeyī piyóó á. Icɔ́ɔ́ci wɛ ákanaba nōo gē bī ɛlā ɔkwɛyi kú Ɔwɔicō yáyi kli á.

¹⁶Alɔ lɔfú mīyɛ cɛ̄ ka ɔdā ōnwū nɛ̄ Ɔwɔicō mafú ā wɛ ɔkwɛ̄yi dúúdú. “Ó wā ipú ɔkpíyē kú ɔ̄cɛ ipú ɔkpíyē kú alelékwū é le ɔ́ mafú ka ó wɛ ɔkwɛ̄yi, é tɔ́ɔna kú ɔ̄kōolɔhi kú nū lɛ éwo dóódu. Ɛjɛ̄ɛ̄jī ācɛ kú ɛcɛ cɛ̄ɛ̄lā kú nū. É kwú ɔ̄ ú gicō kú ō nyɔ̄ í yɔ̄ mla Ɔwɔicō.”