Read idoma 1 UTÍMŌTI 4 Bible Online

1 UTÍMŌTI 4 - idoma bible

1 UTÍMŌTI 4

¹Alelékwū Ihɔ ā ka tɛ́ɛcɛ péee ka ācɛ ōhī í gáā mīyɛ ɛlɔ̄ɔwɔicō nēé gē nwū ā gɛ ŋ́. Ikɔkɔ ō mīyɛ ā, é géē mīyɛ ɛlā ɛ̄kɛ̄mgbɛ̄ nɛ̄ ebilíi o kɛ̄mgbɛ̄ ā gē bī wɛ̄ɛcɛ ā.

²Ācɛ nēe nwū ɛlā ɛ̄kɛ̄mgbɛ̄ ā wɛ ācɛ o yúulā nēe klla wɛ ācɛ okɛ̄mgbɛ̄ nɛ̄hi, nɛ̄ ɔtū kú uwā í gē gbɛlá ɔdā olɔhi ō yá gbóógbōō ŋ́ mā.

³Ɛdɔ ācɛ ɛ́gɛ́nyā ge nwū ācɛ ka ɔ́ɔ wɛ ɔdōbɔ̄bí kéē lɛ ɔbá ámāŋ ka o lɛ ɔnyā. É ka ācɛ kéē híī lé ɛdɔ ɔdōlé ɔhi ŋ́ dúú. Amáŋ Ɔwɔicō yá ɛjɛ̄ɛ̄jī ɔdōlé ká ācɛ kéē lé, ɔ́dāŋ́ ka ācɛ nēe cɛ̄ɛ̄lā Ɔwɔicō ā wā í bá tɔ̄há lɛ ɔkɔ gbā lɛ ahínyá tá Ɔwɔicō.

⁴Ɛjɛ̄ɛ̄jī ɔdā dóódu nɛ̄ Ɔwɔicō yá kpɛ́m ā lɔhi. É cíkā ō tá ɔdā dúúmā ŋ́, amáŋ alɔ miyɛ ɛjɛ̄ɛ̄jī ɔ́dā dóódu ɔ́dāŋ́ nɛ̄ alɔ lɛ ɔkɔ gbā lɛ ahínyá tá Ɔwɔicō.

⁵Ohígbū ka ɛlā kú Ɔwɔicō mɛ́mla ɔkɔ nɛ̄ ācɛ gbā ā lɛ ɔ yá tiihɔ ɛɛ́.

⁶Ɔ́dāŋ́ nāa lɛ ukɔ́ nyā tū ācɔ̄lóhɔ́nyɛtá ɔ́mpa awɔ kwɛyí, a géē je pīya ɔ̄cɛ-ocɛ̄hɔ̄ kú Ohɔ́nyɛtá Ujísɔ̄si. Lɛ iyi uwɔ tū lɔfú ipú alelékwū abɔ̄ a yɔ̄ ī kllocɛ́ ɔwɛ kú ācɔ̄lóhɔ́nyɛtá nēe cɛ̄ɛlā Ɔwɔicō ā. Lɛ abɔ̄ bī ɔdā nēé tɛtɛ nwū uwɔ nāa kē húmáyī ī yɛce ɔ́ ā lɔfú.

⁷Ā híī tū iyi uwɔ kwu ɔ̄cā icííci nōo ge bɛ́yí kwu ɔkōolɔhi ā ŋ́. Ɔ̄cā nēé tīile nɛ̄ ɔ̄cɛ ī cā ŋ́ mā. Yɔ̄ gē kllɔcɛ́ ká ā yɔ̄ ī nū iyē daa ipú alelékwū o yá ká ā géē lā oyēeyī olɔhi kú ācɔ̄lóhɔ́nyɛtá ā.

⁸Ɔkpíyē ō nādaa ī tá iyē abɔ̄ kóō lɔfú, ohígbū ɔ́ɔmā o tīile dúú, amáŋ o nā okpíyē daa ipú alelékwū ā tīile ɔwɛ dóódu, ohígbū ka ó gē bī ile kú oyēeyī nyā mɛ́mla oyēeyī kú ɛcɔ̄bū wɛ̄ɛcɛ.

⁹Ɛlā nɛ̄ n ka nyā wɛ ɔkwɛyi nɛ̄ n, ɛjɛ̄ɛ̄jī ācɔ̄lóhɔ́nyɛtá cíkā ō miyɛ ɛlā ā cɛ̄.

¹⁰Alɔ gē cēyītīkwū ī yúklɔ́ lɔfú nɛ̄hi ohígbū ka ālɔ̄ lɛ ɔtū kpóce Ɔwɔicō nōo yēeyī ā dúúdú, anú kē wɛ ohɔ́nyɛtá kú odúúdú ācɛ á. O fíyɛ́ dúú ācɛ nēe cɛ̄ɛ̄lā ā.

¹¹Tū uwā ukɔ́ nēe bá nyā, ká ā klla nwū uwā aɔ́dā nēe bá nyā a.

¹²Ā cɛ̄ lɛ ɔ̄cɛ dúúmā lɛ uwɔ gwéeyē ohígbū ka a wɛ ɔyipɛ ŋ́, amáŋ lɛ iyi uwɔ yá ɔdōcāabɔ̄ lɛ ācɔ̄lóhɔ́nyɛtá ipú ɛlā nɛ̄ ī ka ā, ipú ucē kú uwɔ, ɛ́gɛ́nɛ̄ ācɛ í he uwɔ ɔtū lɛ, ɛlā ō cɛ̄ kú uwɔ mɛ́mla oyēeyī o yéŋēē ō lā kú uwɔ.

¹³Jāā gbéeko nɛ̄ n gā abɔ́ɔ, lɛ eko táajɛ ká ā yɔ̄ ī jé ɛlɔ̄ɔwɔicō ā tɛ́ɛcɛ, yɔ̄ ī nwū ɛjɛ̄ɛ̄jī ācɛ ká ā klla bī ɛlɔ̄ɔwɔicō ā tɔ́ɔna lɛ uwá.

¹⁴Bī ɛhi kú ɔfú kú Alelékwū Ihɔ nāa lɛ ā yúklɔ́, ɛhi nɛ̄ Ɔwɔicō je gā awɔ eko nɛ̄ ācomɛ́ɛbɛ ā kɛlā, nɛ̄ anyākwɔ́cɛ lɛ abɔ̄ ce uwɔ ɛyí ā.

¹⁵Lɛ ɛlā kwu aɔ́dā nēe bá nyā, lɛ ɔtū mɛ́mla eko kú uwɔ táajɛ ká ā yɔ̄ ī yá uwā, o yá ɛ́ɛ́ kú ɛjɛ̄ɛ̄jī ācɛ kéē má ɛ́gɛ́nɛ̄ a ī jɛ gɔbū lɛ ā.

¹⁶Lɛ ɛlá kwu iyī uwɔ mɛ́mla ɔdā nāa gē nwū ā. Ɔ́dāŋ ka a yɔ ī yá aɔ́dā ɛpa nēe bá nyā glá, a géē lɔfu nya iyi uwɔ mɛ́mla ācɛ nēe gē jāhɔ̄ gā awɔ ā tá glá.