Read idoma 1 UTÍMŌTI 5 Bible Online

1 UTÍMŌTI 5 - idoma bible

1 UTÍMŌTI 5

¹Upɔ́lu da ɔ́ kahíníī, “Ā híī dɛ̄gba tū ɔnyākwɔ́cɛ ŋ́, amáŋ kɛlā lɛ uwa bɛ̄ɛka ádā awɔ āa. Yá mla ayípɛ̄nɔ̄nyīlɔ bɛ̄ɛka ayínɛ́ uwɔ ā.

²Yá mla ācɛnyā nēe dēē hīla ā bɛ̄ɛka ɛ́nɛ́ uwɔ aā, bī ɔtū oyēŋēē yá mla ayípɛ̄nɔ̄nyā bɛ̄ɛka ayínɛ́ uwɔ nɔ̄nyā āa.

³Lɛ ojīlīmā ce anyōkwū nēe bá ōfōōfū ūwā ɔkwɔ̄ɔ̄kwɛ̄yi ā.

⁴Amáŋ ɔ́dāŋ ka ɔnyōkwu lɛ ayí, amáŋ ka ayááyí, ayí ā cíkā ō nwū úklɔ́ aflɛ́yí kú ɛlɔ̄ɔwɔicō kú uwā ŋmá lɛ eyī nēe géē lɛ kwu ācɛ kú ipɔ́ɔnū kú uwā ā. Cɛ́ɛ́ o bū ɔwɛ ɛ̄nyā a, é lɛ ulé kú oōbī nɛ̄ ɛ́nɛ́ mɛ́mla ɛ́nɛ́ɛ́nɛ́ uwā bī uwā ā cílá uwá. Ɛ̄nya wɛ ɔdā nōo hi Ɔwɔicō ɔtū á.

⁵Ɔnyōkwū nōo yɔ̄ ōfōōfūnū nōó lɛ ɔ̄cɛ dúú nōo ī tá ɔ̄ abɔ̄ ŋ́, ke kwú eyīyōce kú nū ú ce Ɔwɔicō, gē ga icɔ́ɔci ī gbɔ̄ɔkɔ ojigógó klla gē gbɔ̄ɔkɔ ɔtú mɛ́mla ɔlɛ́ɛnɔ kú Ɔwɔicō kóō tá ɔ̄ abɔ̄.

⁶Amáŋ ɔnyōkwū nōo ī lā oyēeyī kú ɔ̄cɛ ɔdāhá kōō gekwú ɛɛ́ nááná nōó yēeyī kpɔ́ ā.

⁷Lɛ ukɔ́ nēe bá nyā tū uwā mɛ́mla aíkonó ɔlɛ́ uwā, cɛ́ɛ́ kú ɔ̄cɛ dúú kóō ŋmó uwā okónu ŋ́.

⁸Amáŋ ɔ́dāŋ́ ka ɔ̄cɛ dúú í leyīkwu ācɛ ɔlɛ́ nu lɔhi glá ŋ́, ofíyɛ́dúú ācɛ nɛ̄ ŋmá ipɔ́ɔnū ékpó mla anú ā, ɔ̄cɛ ɛ́gɔ́ɔmā tá ɛlɔ̄ɔwɔicō ɛ́ɛ́, anú klla bɔ̄bí fíyɛ́ ɔ̄cɛ nɛ̄ ó pó ɛlɔ̄ɔwɔicō jéjéē ɛ́ɛ́ ŋ́ má.

⁹Ɔnyōkwū dúúmā nōó ga iháyí ofɛtá ɛ́ɛ́ ŋ́, a híī tá iyē kú nū tāajɛ ka ó wɛ ɔnyōwū ŋ́. Ɔnyōkwū abɔ̄yīnū géē wɛ ɔ̄cɛ nōo lɛyí táajɛ lɛ ɔbá nū eko nɛ̄ ó yēeyī ā. O klla kē í wɛ ɔ̄cɛ nōo lɛ ɔbá igbeékpónú ōfūnū.

¹⁰Ācɛ ke í cɛ ijáalí kú úklɔ́ olɔhi nɛ̄ ó yá ā. Ó í wɛ ɔnyā nōo bī ayí nū jɛ̄ lɔɔlɔhi, klla gē miyɛ ugbɔga wā ɔlɛ́ nū lɔɔlɔhi, ó gē yúklɔ́ o tá iyinu wāajɛ lɛ ācɔ̄lóhɔ́nyɛtá aɔ́mpānū. Ó klla ge tá ācɛ nēe lɛ unwalu abɔ̄, ó klla gē lɛ eko kú nū taajɛ i yá ɔdā olɔhi lɛ ācɛ ɔhá.

¹¹Ā híī mīyɛ ayípɛ̄ nɔ̄nyā kéē wɛ anyōkwū ipú icɔ́ɔci ŋ́, ohígbū ka eko nɛ̄ unwū kú ɔkpíye kú uwā le nwuné, é géē dɔɔ̄kā ká e lɛ ɔbá. Ɛ̄nyā kē í yá kéē cīgbīhi ŋmá ɛgiyí Ohɔ́nyɛtá,

¹²cɛ́ɛ́ é ké lɛpɔbí lé, ohígbū ka okónu nēé ce aflɛ́yí ka aá gáā lɛ ɔbá ɔhá gɛ ŋ́ mā, é kwú ɔ̄ ú bīya ɛɛ́.

¹³Ó wɛ ɔ́ɔmā ōfūnū ŋ́, é géē lɔfu je piya ācɛ újuulu, cɛ́ɛ́ é géē gbɔɔ́ ō bɔ́lɔ́ɔ́lɛ́ ŋmá ɔlɛ́ éyi ga ɔlɛ́ ɔhá géē yɔ̄ gē yúúwɔ́ɔkɔ, ge gwōtū ipú ɛlā kú ācɛ ɔhá, gē ka ɔdā nēé cíkā ō ka ŋ́.

¹⁴Ohígbū ɔ́ɔmā ó géē he um ɔtu fíyɛ́ ɔ́dāŋ ka ayípɔ̄nɔ̄nyā nēe wɛ anyōkwū ā lɛ ɔbá lɛ kpó, cɛ́ɛ́ kéē ma ayí, kéē ke leyīkwu ɔlɛ́ uwā, cɛ́ɛ́ kú ebilíi kóō má ɛga ka ɔdōbɔ̄bí lɛyíkwu alɔ ŋ́.

¹⁵Ohígbū ka anyōkwū le cīgbīhi ŋmá o yɛce Ohɔ́nyɛtá gwōtū ɔwɛ kú ebilíi ɛ́ɛ́.

¹⁶Ɔ́dāŋ́ ka ɔ̄cɛnyā dúúmā wɛ ɔ̄cɔ̄lóhɔ́nyɛtá nɛ̄ ó lɛ anyōkwū ipɔ́ɔnū ɔlɛ́ nū, ó géē leyīkwu uwā, cɛ́ɛ́ kó ō je iyó ā ce icɔ́ɔci ŋ́, o yá ɛ́ɛ́ kú icɔ́ɔci kóō mɛ́ɛga leyīkwu anyōkwū nēe bá ōfōōfū uwā nēé lɛ ācɛ nōo géē leyīkwu uwá ŋ́ mā a.

¹⁷Anyākwɔ́cɛ nēe wɛ otrɛ̄yi nēe kē yúklɔ́ kú uwā lɔɔhɔhi ā, acíkā ō leyī yɔɔ́ ka é cíkā ō miyɛ ulé ɔ́klá ɛpa, ofíyɛ́ dúú aá ɛ̄nɛ̄ e gē tɔ́ɔna kú ɔ̄kōolɔhi mɛ́mla o nwū ācɛ ɛlɔ̄ɔwɔicō ā.

¹⁸Ohígbū ka ɛlɔ̄ɔwɔicō kahíníī, “Ā híī lɛ odée gbō ɔbá ɛna okónu eko nɛ̄ ó yɛ ɛyí īkpɔ̄dā kó ō wú ɔ ŋ́.” É klla ka ipú nū kpɔ́ kahíníī, “Ɔcɛ dúúmā nōo ī yúklɔ́ cíkā kóō miyɛ ulé kú nū.”

¹⁹ Ā híī miyɛ ije nēé lɛ ce bá anyākwɔ́cɛ cɛ̄ icííci ŋ́, ń táafu ŋ́, ācɛ ɛpa ámāŋ́ ka ācɛ alɛwa lɛ ijáalí cɛ tū ɔ̄.

²⁰Ɔ̄cɛ dúú nɛ̄ ó pīyabɔ̄ ŋmá íne nɛ̄ ó gē bīya ŋ́, dɛ̄gba tū ɔ̄ ipéyí odúúdú ācɛ icɔ́ɔci o hile, cɛ́ɛ́ ká ācɛ o hile kéē yúufi.

²¹N hi Ɔwɔicō mɛ́mla Ohɔ́nyɛtá Jísɔs mɛ́mla aálelékwū otɛ̄hɔ ā ijáalí kú ukɔ́ nɛ̄ n gáā tū uwɔ nyā a. N dɔɔ̄kā ká ā lɛ ukɔ́ ā tū ká ā híī yúufi eyī kú ɔ̄cɛ dúúmā ŋ́, ámāŋ́ ka o gwó ɔwɛ ce abɔ̄ éyi, ipú ɔda dúúmā nāa ī yá ā ŋ́.

²²Ā híī ŋwúleyīkwū ká a lɛ abɔ̄ ce ɔ̄cɛ ɛyi je úklɔ́ kú Ɔwɔicō tū ɔ̄ abɔ̄ ŋ́. Ā híī wɛ ipú ínōbīya kú ɔ̄cɛ ɔhá ŋ́, lɛ iyī uwɔ tū yēŋēē.

²³Ā híī yɔ̄ ge gwá éŋkpɔ̄ ōfūnū gɛ ŋ́, amáŋ gwá ejé ligii dúú kóō tá ipú kú uwɔ abɔ̄ kú ɔdōlé ká o wī tū uwɔ ipú fíyɛ́, abɔ̄ nāa ge doōcē ojigógó ā.

²⁴Íne nɛ̄ ācɛ ōhī bīya ā, tɛ́ɛcɛ cāā, nɛ̄ ācɛ kē jé ka Ɔwɔicō í kɛpɔ̄ tū uwa piíí. Amáŋ ó lɛ ācɛ ōhī yɔ̄ nɛ̄ íne nēé bīya ā í tɛ́ɛcɛ cāā ŋ́ jāā gbéeko Igbīhāajɛ.

²⁵Ɔwɛ ékpó ɔ́ɔmā úklɔ́ olɔhi tɛ́ɛcɛ cāā, ó kōō ɛ̄nɛ̄ ó tá cāā ŋ́ nááná, í ke tayínū glá ŋ́.