Read idoma 1 UTÍMŌTI 6 Bible Online

1 UTÍMŌTI 6 - idoma bible

1 UTÍMŌTI 6

¹Ācɔ̄lóhɔ́nyɛtá nēe wɛ ɔfiyɛ ā géē je aɔ́kpani uwā ka ācɛ nēé cíkā ō lɛ ojīlīmā ce uwā a piíí, cɛ́ɛ́ kú ācɛ ká ē kɛlā obɔ̄bí kú iye kú Ɔwɔicō mɛ́mla ɔdā nɛ̄ alɔ gē nwū ā ŋ́.

²Aɔ́fiyɛ nɛ̄ aɔ́kpani uwā wɛ Ācɔ̄lóhɔ́nyɛtá ā kéē nyi uwā ojīlīmā ŋ́, ohígbū ka é wɛ ayínɛ́ uwā nɛ̄. E kōō cíkā ō cē uwā ɛhɔ̄ lɔɔlɔhi fíyɛ́, ohígbū ka aɔ́kpani uwā nēe gē lɛ ile kú ɛhɔ̄ nēé ge cɛ uwā a wɛ ayínɛ́ uwā ipú Ohɔ́nyɛtá. Nwū ɛlā ɔkwɛ̄yi nēe bá nyā cɛ́ɛ́ a klla bī ɔ̄ tɔ́ɔna lɛ ācɛ.

³Ɔ́dāŋ ka ɔ̄cɛ dúúmā nwū ɔdā nōo wɛ ɛyɛ́ɛ́yí hī ɔwɛ nyā tá, anɔ́ɔ ó cɛ̄ɛ̄lā ɔkwɛ̄yi kú Óndú alɔ Jísɔs Ohɔ́nyɛtá mɛ́mla ɔdā nɛ̄ ɔwɛ o gbā Ɔwɔicō ɛ̄gbā kú alɔ ge nwū ā ŋ́,

⁴ó le mu pitīī mla ɔbɔ́ɔcɛ, ó kē jé ɔdā dúúmā ŋ́, o yá unwɔ̄dā ɛdɔ obɔ̄bí, ó yɔ̄ gē táafu mla ācɛ ɔhá mɛ́mla o yɔ̄ ge gbaapɔ̄ ohígbū ɛyí kú ɛlā oōjé, ɛnya ge yá kóō má ācɛ ɔhá ímálānyī kéē cá iyī uwā ɛcá, kéē ka obɔ̄bí kú iyi uwā, cɛ́ɛ́ kéē yíkpɛ́lā tá ɔ́mpa uwā, mɛ́mla eyī ō kpóce ɔ́mpa uwā ɛdɔ obɔ̄bí nɛ̄hi ā.

⁵É bá gē yíkpɛ́lā mɛ́mla o bá gē táafu ojigógó. É gē gbɛlá olɔhi glá gɛ ŋ́. É lɛ ɛlā ɔkwɛyi dóódu ipú kú uwā gɛ ŋ́. É gē gbɛlá ka ɛ̄gbā ōgbō Ɔwɔicō ɔ́ɔ wɛ ɔwɛ ō bī le yá ije nɛ̄.

⁶O lɔhi, ufi Ɔwɔicō nɛ̄ ɔ̄cɛ i yá ā i yá kú ɔ̄cɛ kóō lɛ agbénú, ɔ́dāŋ ká ɔdā nɛ̄ ó lɛ ā jɛ̄ ɔ̄ eyī.

⁷Ohígbū ka alɔ í bī ɔdā dúúmā wā ipú ɛcɛ ā ŋ́! Ɔdi nɛ̄ alɔ í je ŋmá ipú ɛcɛ āa. Ó wɛ ɔdā dúúmā ŋ́.

⁸Ohígbū ɔ́ɔmā ɔ́dāŋ́ nɛ̄ alɔ lɛ ɔlōlé mɛ́mla ɔdōowiiyē ɛ́ɛ́, ɔ́ɔmā cíkā ō jɛ̄ alɔ.

⁹Amáŋ ācɛ nēe ge tínē kéē jɛ agbénú ā ga ipú ojámá mɛ́mla o gwōtū ipú ukpa kú ɔdā otíne alɛwa kú olíla nōo lɔfú yá uwā ɔdōobɔ̄bí gla, ó klla lɔfú pi uwá wāajɛ ga ífi mɛ́mla ɔlékwū glá.

¹⁰Ohígbū ka ācɛ nēe ge yá unwū ije nɛ̄ɛ̄nɛ̄hi fíyɛ́ aɔ́dā ɔhá ā ge gwōtū ipú ɛdɔ kú unwalu kú ínōbīya ɛyɛ́ɛyɛ́yí a. Ācɛ ōhī tínē ije nɛ̄ɛ̄nɛ̄hi jāā gbéeko nēe nyɛ̄ɛ̄ ŋmá ɛlɔ̄ɔwɔicō, nyɔ̄ í lɛ ōwē o lɔnɔ alɛwa bī wā í klá iyē uwā.

¹¹Amáŋ awɔ, Utímōti, a wɛ ɔ̄cɛ otɛ̄hɔ̄ kú Ɔwɔicō, le kwu ŋmá ɛgiyí aɔ́dā obɔ̄bí nēe bá nyā āa, cɛ́ɛ́ ká ā yɛce ɔdā nōo le kpaakpa klla lɔhi. Cēyītīkwū ká ā yúufi Ɔwɔicō, ká ā cɛ̄ɛ̄lā kú nū. Yíihɔtū, lɛ ɔtū lé, cɛ́ɛ́ a klla kē gbonɛnɛ.

¹²Yá ɔdā dúú nāa yá glá ká ā le piya ɔ̄cɛ o tū Ohɔ́nyɛtá Ujísɔ̄di ɔkwu nōo cɛ̄ɛ̄lā nū, cɛ́ɛ́ ká ā lɛ abɔ̄ flá tū oyēeyī nɛ̄ ó lɛ oōmɛŋ́ mā. Oyēeyī wɛ ɔdā nɛ̄ Ɔwɔicō cokónu kú nū gā awɔ eko nōo hī uwɔ igwú nāa ka tɛ́ɛcɛ iyɔ̄bū ācɛ ijáalí alɛwa ka Ohɔ́nyɛtá Ujísɔ̄si ɔ́ɔ wɛ Óndú á.

¹³Iyɔ̄bū Ɔwɔicō nōo je oyēeyi lɛ ɛjɛ̄ɛ̄jī ɔdā dóódu āa, mɛ́mla iyɔ̄bū Ohɔ́nyɛtá Ujísɔ̄si, ɛ̄nɛ̄ o cɛ̄ ijáalí olɔhi iyɔ̄bū Upɔ́ntɔ̄si Upáyílēti ā, n je ɔ́da gā awɔ,

¹⁴ka ā lɛ íne ā tū, ká ā híī mlanyī odúúmā kú nū ŋ́, jāā gbéeko nɛ̄ Óndú alɔ Ujísɔ̄si Ohɔ́nyɛtá géē wā āa.

¹⁵Eko nɛ̄ eko okpaakpa ā le yá, Ɔwɔicō géē yá kú Ujísɔ̄si Ohɔ́nyɛtá kóō kwúcē wā. Anú ōfōōfūnū lɛ ojīlīmā á, ó wɛ ɔcɛ́ ékpónú ā, ɔcɛ́ kú aɔ́cɛ́, Óndú kú aóndú.

¹⁶Ɔwɔicō ōfōōfūnū í gē kwú ŋ́ má, ó lā ipú ɔlá o fíyaajɛ nɛ̄ɛ̄nɛ̄hi nɛ̄ ɔ̄cɛ dúúmā í túblá anú gllá ŋ́. Ɔ̄cɛ dúúmā í má ɔ̄ eyī jéjéē ɛ́ɛ́ ŋ́, ɛ́ɛ́ nɛ̄ ɔ̄cɛ dúúmā í ke gáā má ɔ gbóógbóō gllá ŋ́ má. Ojīlīmā mɛ́mla ɔfú ō lɛ piyóó kóō wɛ ákú nū.

¹⁷Da ācɛ nēe lɛ agbénú ipú ɛcɛ nyā ká e híī yá ɔbɔ́cɛ ŋ́, kéē kóō kpɔ́tūce ije kú uwā nōo géē mɛ ānāānā ā ŋ́. Amáŋ da uwá kéē kpɔ́tūce Ɔwɔicō nōo gē je ɔdā dóódu lɛ alɔ āa.

¹⁸Da uwā kéē yá ɔdā olɔhi, kéē lɛ agbénú kú úklɔ́ olɔhi nēe ge yá āa. Kéē nwūla abɔ̄ lɛ ācɛ nɛ̄ ɛgbá ī ce uwá ā. Kéē le tútu kéē kɔ̄ ɔdā dúú nɛ̄ Ɔwɔicō je lɛ uwá ā mla ācɛ ɔhá.

¹⁹Oŋmá lɛ ɛ́gɛ́nyā nēé ī yá ā, é géē yɔ̄ ī tá agbénú kú uwā tū nōo lɛbɛ̄ɛka ikpíinu olɔhi nēé le táajɛ kú ɛ̄cɔ̄bū ā. Cɛ́ɛ́ é géē lɔfú lɛ abɔ̄ bī oyēeyi nōo wɛ oyēeyi ɔkwɛ̄yi aā.

²⁰Utímōti leyīkwu ɔdā nēé kpó tū uwɔ abɔ̄ āa. Ā híī nyɔ̄ gaá ka ɔ̄kā icííci mɛ́mla o yɔ̄ ge táafu kú íla nɛ̄ ācɛ ōhī gē hī “ɔdōojé” ā ŋ́.

²¹Ācɛ ōhī le nyíleyī ŋmá ɛlā Ɔwɔicō, oŋmá lɛ ucē kú íla nēe miyɛ cɛ̄ āa. Ɔwɔicō kóō hɔ́ɔhā ce aá.