Read idoma 2 UTÍMŌTI 1 Bible Online

2 UTÍMŌTI 1 - idoma bible

2 UTÍMŌTI 1

¹Ami Upɔ́lu, wɛ ɔ̄cocɛ̄hɔ̄ kú Ohɔ́nyɛtá Ujísɔ̄si o ŋmá lɛ ɛ́gɛ́nɛ̄ Ɔwɔicō miyɔ ɔ́ lɛ ā. Ó tū um ɛhɔ̄ gɛcɛ ká n̄ kɛlā lɛ ɔ̄cɛ ɔhá lɛyíkwu oyēeyī nɛ̄ ó cokónu ká o je lɛ alɔ nēe ge yɛce Ohɔ́nyɛtá Ujísɔ̄si ā.

²N tɔ́kpá nyā fu Utímōti, ɔyí um nōo he um ɔtū. N gbɔ̄ɔkɔ kú Ɔwɔicō ádā ā mɛ́mla Ohɔ́nyɛtá Ujísɔ̄si Óndú alɔ kú e ményinyi uwɔ kéē gbonɛnɛ gā uwɔ, cɛ́ɛ́ kéē klla yá kú ā lɛ ɛbɔ́ lɛ.

³N tá Ɔwɔicō, nɛ̄ n cɛ ɔ̄ ɛhɔ̄ ŋmá ɔtū ékpó kú um ɛ́gɛ́nɛ̄ aádáádā um cɛ ɔ̄ ɛhɔ̄ ā ahínyá. N gē blakwu uwɔ ipú ɔkɔ nɛ̄ n ge gbā lɛ Ɔwɔicō ɔtū mɛ́mla ɔlɛ́ɛnɔ ā.

⁴Eko nɛ̄ n blakwu agīje kú uwɔ̄ nɛ̄, eyī gē tū um nɛ̄ɛ̄nɛ̄hi kú um lɛ uwɔ má, cɛ́ɛ́ kú ɔtū kóō le he um.

⁵N gē blakwu ɛlā ā nɛ̄ a cɛ̄ ŋmá ɔtū ékpó nāa lɛ ā, ɛdɔ kú ɛ́gɛ́nɛ̄ ɛ́nɛ́ uwɔ nɔnyakwɔcɛ Ulɔyísi mɛ́mla ɛ́nɛ́ uwɔ Iyunís kē cɛ̄ɛ̄lā ā lɛ ā. N kē jé kpɔ́cii ka a cɛ̄ɛ̄lā ā ɛ́gɔ́ɔmā dúú.

⁶Ɛnyā yá ɛ́ɛ́ nɛ̄ n tú uwɔ ɛlá kwu ɔ́ ka ā bī ɛhi kú alelékwū Ihɔ nāa miyɛ ŋmá ɛgiyí Ɔwɔicō eko nɛ̄ n lɛ abɔ̄ ce wɔ ɛyí ā yúklɔ́ lɔɔlɔhi.

⁷Ohígbū kā, alelékwū nɛ̄ Ɔwɔicō je lɛ alɔ ī yá kú ālɔ̄ yúufi ŋ́, ikɔkɔ ɔ́ɔmā alelékwū kú Ɔwɔicō lɛ alɔ yá ācɛ o lɔfú nɛ̄hi, ó gē cɛ̄ lɛ alɔ gē yíihɔtū ta ācɔ̄lóhɔ́nyɛtá ɔ́mpa alɔ, o klla gē yá ká ālɔ̄ cīyī alɔ bī glá.

⁸Ohígbū ɔ́ɔmā, lɛ ɔtū lɛ cɛ́ɛ́ kú a ciijaali kú ɔ̄kōolɔhi kú Óndú alɔ. Ā ke yúwēyī kú ami nōo je pīya olagbá ohígbū ka n cɛ̄ Ohɔ́nyɛtá Ujísɔ̄si ɛhɔ̄ ŋ́. Ikɔkɔ ɔ́ɔmā, le tútū kú a móōwē ohígbū ɔ̄kōolɔhi ā ɛ́gɛ́nɛ̄ n yɔ̄ gē má āa. Ɔwɔicō kē ī je ɔfú gā uwɔ ká ā lɛ ɔtulé.

⁹Ɔwɔicō lɛ alɔ nyatá, o klla lɛ alɔ fu ká alɔ wɛ ācɛ o lā oyēeyī otiihɔ. Ó wɛ ohígbū úklɔ́ kú abɔ̄yī alɔ yá ɛɛ́ nōo yá ɛnyā ā ŋ́, amáŋ ohígbū ihɔtū mɛ́mla ɔdā nōo tɛtɛ miya táajɛ ā ōfūūnū nɛ̄ n. Alɔ le he Ɔwɔicō ɔtū táajɛ gbɔbū nōo yá ɛcɛ nyā á.

¹⁰Amáŋ abālɔbányā nɛ̄ Ujísɔ̄si, Ohɔ́nyɛtá kú alɔ gā ipú ɛcɛ nyā ɛɛ́ māa, alɔ lɛ ihɔtū nɛ̄hi kú Ɔwɔicō má ɛɛ́. O ŋmá ɛlā nēé ka ipú ɔ̄kōolɔhi ā, alɔ le je ka Ohɔ́nyɛtá Ujísɔ̄si míyɛ ɔfú ŋmá abɔ̄ kú ikwū ɛɛ́, anɔ́ɔ ó lɛ ɔ́ yá tɔ́ɔtɛ́ lɛ alɔ kú alɔ lɛ oyēeyī opiyóó lɛ.

¹¹ Ɔwɔicō lɛ um fu ɔ̄cotɛ̄hɔ̄ mɛ́mla itíca, cɛ́ɛ́ kú um bī ɔkōolɔhi ā tɔ́ɔna,

¹²Ohígbū ɔ́ɔmā yá ɛ́ɛ́ nɛ̄ um yɔ̄ ī móówē ipú agbá yɔ̄ á. Amáŋ n yúufi ŋ́ ohígbū ka n lɛ ɔtūce Ohɔ́nyɛtá Ujísɔ̄si, n ke jé cāā ka ó lɔfú gbo olɛhɔ̄ kú ɔkōolɔhi nɛ̄ ó lɛ tū um abɔ̄ ā jāā gbó ɛ̄cī ɔ́ɔmā glá.

¹³Lɛ abɔ̄ bī ukɔ́ nɛ̄ n tū uwɔ ā lɔfú lɔfú kóō wɛ ocābɔ̄ kú ɔna kú ɛlā Ɔwɔicō nāa géē tá kpaakpa mɛ́mla ɔdā okpaakpa nāa géē nwū ācɛ, cɛ́ɛ́ kú ā yɔ̄ ipú ɔtōoce ā mɛ́mla ihɔtū nēe wɛ ákú alɔ ipú opiyatɔha mɛ́mla Ohɔ́nyɛtá Ujísɔ̄si ā.

¹⁴Oŋmá lɛ ɔfú kú alelékwū Ihɔ, nōo lā ipú alɔ ā, lɛ aɔ́dā ocɛgba nɛ̄hi nɛ̄ Ɔwɔicō kpó tū uwɔ abɔ̄ ā tū lɔɔlɔhi.

¹⁵Á kē jé ka ɛjɛ̄ɛ̄jī ācɔ̄lóhɔ́nyɛtá nēe bá okwúbɔ́há kú aɔ́lɛ́ nɛŋcɛ éyi kú Ésiya, Ufigélɔ̄si mɛ́mla Uhamojínesi, le pɛ́ kwu ŋmá ɛgiyí um.

¹⁶Óndú ā kóō ményinyi ācɛ ɔlɛ́ kú Onesífɔ̄rɔsi, ohígbū ka ó tū um ɔtū kwu ɔtū igbo alɛwa. Ó yúwēyī kú um ohígbū ka n yɔ̄ agbá ŋ́.

¹⁷Amáŋ obōōbū nɛ̄ ó ga ajɛ Uróm amānyā a, o gbɔɔ́ ō tíne um jāā gbéeko nɛ̄ ó lɛ um pīyɛ̄.

¹⁸Óndú ā kóō lɛ eyīnyinyi nu má ɛci ámōmɛ ā! A kē jé lɔɔlɔhi ɛjɛ̄ɛ̄jī ɔdā nɛ̄ ó yá ga um ajɛ kú Ɛ́fēsɔsi ā.