Read idoma 2 UTÍMŌTI 2 Bible Online

2 UTÍMŌTI 2 - idoma bible

2 UTÍMŌTI 2

¹Upɔ́lu yɔ̄ ī kɛlā ipú ɔkpá nɛ̄ ó tá ā kpɔ́ kahíníī, “Awɔ ā, ɔyí um, ihɔtū nɛ̄hi kú Ɔwɔicō ā nɛ̄ alɔ lɛ o ŋmá lɛ opīyatɔ̄há mla Ohɔ́nyɛtá Ujísɔ̄si ā kóō lɛ ɔfú tū wɔ iyē.

²Lɛ abɔ̄ bī aɔ́dā nɛ̄ n nwū nāa pó iyɔ̄bū ācɛ alɛwa nēe wɛ ijáalí, lɛ aɔ́dā ā kpó tū ācɛ ɔ̄kwɛ̄yi abɔ̄, ācɛ nēe géē nyɔ̄ gaá nwū ācɛ ɔhá dúú.

³Le tútū ká ā móōwē dúú bɛ̄ɛka ícɔ́ɔ́ja olɔhi kú Ohɔ́nyɛtá Ujísɔ̄si ā.

⁴Ícɔ́ɔ́ja nōo yɔ̄ ī yúklɔ́ kpɔ́ ɛ́ɛ́, ge dɔɔ̄kā kóō yá ɔdā dúú nɛ̄ ɔtu í he otrɛ̄yi kú nu, ohígbū ɔ́ɔmā ó gáā nyɔ̄ í je iyi nu wu ipú unwalu kú ācɛ ɔlamu ŋ́.

⁵Ɔ̄cɛ okweyī kú ijā dúú nōo yɔ̄ ge kweyī mla ācɛ ɔhá í gáā miyɛ ɛhi nēe ge je lɛ ācɛ nēe yálé ā ŋ́, ń táafu ŋ́, ó lɛ ɛjɛ̄ɛ̄jī íne kú ijā ā tū lɔɔlɔhi.

⁶Ɔgɛ́ɛji nōo yúklɔ́ lɔfú ā cíkā ō lɛ ukpɛ̄ kú ɔdɛ̄hɔ̄ aflɛ́yí nēé ī ce á.

⁷Gbɛlá kwu aɔ́dā nɛ̄ n yɔ̄ ī ka ā, ohígbū ka Óndú ā géē je ɔfú gā uwɔ ká ā jɛ́yí ɛjɛ̄ɛ̄jī nū.

⁸Bla kwu Ujísɔ̄si Ohɔ́nyɛtá nōo ŋmá ipú ɔ́mā kú Ɔcɛ́ Udéfīdi āa, Ɔwɔicō lɛ ɔ́ héyī ŋmá ɔlékwū ɛ́gɛ́nɛ̄ ɔ̄kōolɔhi nɛ̄ n tɔ́ɔna nū ka lɛ āa.

⁹Ohígbū ɔ̄kōolɔhi nɛ̄ n tɔ́ɔna kú nū ā nɛ̄ n yɔ̄ ī móōwē yɔ̄ á. É kóō lɛ agbá kwu um bɛ̄ɛka ɔ̄cɛ o yá ɔdōbɔ̄bí ā nááná, ɔ̄cɛ dúúmā í kwú ɔna ō tá kú ɔ̄kōolɔhi ā tū glá ŋ́.

¹⁰Anɔ́ɔ ohígbū ɛ̄nyā n gē lɔtūlé lɔhi ipú ōwē dóódu ohígbū ācɛ nɛ̄ Ɔwɔicō fu āa, cɛ́ɛ́ kú uwá kéē lɛ nyatá ŋmá lɛ o cɛ̄ɛ̄lā kú Ohɔ́nyɛtá Ujísɔ̄si nōo ī bī ɛgahi mɛ́mla ocɛ̄tra opiyóó wā ɛgiyí Ɔwɔicō.

¹¹Ɛlā nyā nēé ka ā wɛ ɔkwɛ̄yi nɛ, “Ɔ́dāŋ́ ka alɔ gekwú mla anú ɛɛ́, alɔ kē í yēeyī mla anú.

¹²Ɔ́dāŋ́ ka alɔ lɛ ɔtūlé, alɔ kē í ce ɔcɛ́ mla anú ajɔ̄ɔ̄cɛ́ piyóó. Ɔ́dāŋ́ ka alɔ híhó ka alɔ í jé ɔ̄ ŋ́, ó kē í híhó ka anúɔ í jé alɔ ŋ́ dúú.

¹³Ɔ́dāŋ́ ka alɔ í lɛ ɔtūce ɔ́ ŋ́, anú abɔ̄yī nu í gáā lɛ ɔtūce alɔ ŋ́ dúú. Ohígbū ka ó gáā pīyabɔ̄ ŋmá o wɛ ɔhɔnyɛtá glá ŋ́.”

¹⁴Tú ācɛ ɔlɛ́ uwɔ ɛlá kwu ɔdā nyā, lɛ uwá ɔhɔ̄ pi lɔɔlɔhi iyɔ̄ɔ̄bū Ɔwɔicō, ká ē híī yíkpɛ́lā ohígbū ɛlā ŋ́, ohígbū ka o túile dúúmā ŋ́, amáŋ ó i ŋmó alelékwū tū iye kú ācɛ nēe i jāahɔ̄ ā.

¹⁵Cēyītīkwū ká ē yá ɔdā nɛ̄ Ɔwɔicō ī cɛ̄tra uwɔ bɛ̄ɛka ɔ̄cōlóhɛ́nyɛtá o yúklɔ́ nɛ̄ uwēyī i gáā kwú ɔ̄ ŋ́. Nwū ācɛ olɛhɔ̄ kú Ohɔ́nyɛtá ɔwɛ okpaakpa.

¹⁶Le túgɛcɛ ŋmá ɛlā icííci mɛ́mla áafú olíla kú ācɛ nēé jé Ɔwɔicō ŋ́ mā, ohígbū ka ó gē nū ācɛ ŋmá ɛgiyí Ɔwɔicō fíyɛ́.

¹⁷Ɛdɔ kú ɛlā ɛ́gɛ́nyā lɛbɛ̄ɛka ámata nōo gē nyīla tū ɔkpíyē nɛ̄ ó gē jé ŋ́ mā a. Ācɛ ɛpa nēe gē kɛlā ɛ́gɔ́ɔmā wɛ Uhumenáyɔ̄si mɛ́mla Ufilétūsi.

¹⁸É le nyā ŋmá ɔwɛ kú ɛlā ɔkwɛ̄yi ā, anɔ́ɔ é bá gē je ɔdā nɛ̄ ācōlóhɔ́nyɛtá mīyɛ cɛ̄ ā bīya tū uwā iyē. É bá gē ka ka ohéyī ŋmá ɔlékwū kú ācōlóhɔ́nyɛtá í wɛ ɔdā nōo géē ya ɛ̄cɔ̄bū ŋ́, amáŋ ɔ́ɔ wɛ ɔdā nōo le yá le yɛ ɛɛ́.

¹⁹Amáŋ ikpíinu olɔfú nɛ̄ Ɔwɔicō le táajɛ ā háyi kli, é lɛ ɛlā nēe bá nyā tá tū ɛyí nū, “Óndú ā jé ācɛ nēe wɛ ákú nū āa. Ɔ̄cɛ dúúmā nōo ka ka anúɔ wɛ ákú Óndú ā kóō le kwu ŋmá íne ō bīya.”

²⁰Ɔlɛ́ ɔ̄cɛ o lɛ agbénú, ɛdɔ ógo mɛ́mla ocííbú ɛyɛ́ɛ́yí bá abɔ́ɔ á, é bī ugóolu (oje ɔdɔ) le yá aóōhī, é bī oje nɛ̄hɛ́ le yá aóōhī, é klla ke bī ɔmɛ le ma aóōhī dúú, o ke lɛ aóōhī nēé bī ɔcí le gbā uwā. Ó lɛ aógo ōhī nēé ge kpó wɛ̄ɛcɛ eko nɛ̄ ugbɔga ojīlīmā gā. Ó kē lɛ aóōhī nēe ge kpó wɛ̄ɛcɛ eko nɛ̄ ācɛ ɔlamu gā.

²¹Ɔ́dāŋ́ ka ɔ̄cɛ dúúmā lɛ iyīnū yá yēŋēē ŋmá aɔ́dā nɛ̄ n̄ húmáyī i kɛlā lɛyíkwu ɔ́ ā, ó géē lɛbɛ̄ɛka aógo nēé gē kpó wɛ̄ɛcɛ eko kú ugbɔga ōjīlīmā āa, ohígbū ka ó i tīile le ɔkpani nū. E ke í lɛ uwa tūtu kéē bī uwa yúklɔ́ olɔhi dóódu.

²²Le kwu ŋmá únwū obɔ̄bí kú aɛ́drɔ́ nōo gē bī uwā tá āa. Lɛ ɔtū kú uwɔ kwu o lā oyēeyī okpaakpa, cɛ̄ɛ̄lā kú Ohɔ́nyɛtá Ujísɔ̄si, ācɛ kéē hi uwɔ ɔtū, lā ɛbɔ́ mla ācɛ nēe bī ɔtū oyéŋēē gē ba Óndú ā kóō tá uwā abɔ̄ ā.

²³Lɛ iyi uwɔ tugɛcɛ ŋmá áafú nɛ̄ ólila mɛ́mla aógwuda gē tá āa. A jé ka áafú ā gē ŋmɛyí tá ikpɛ́ɛla.

²⁴Ɔ̄cɛ ɔ̄cɛhɔ̄ kú Óndú ā í cíkā o yíkpɛ́lā ŋ́. Ó cíkā ō gbonɛnɛ lɛ odúúdú ācɛ. Ó cíkā ō wɛ itíca olɔhi nōo í lɛ lɔtulé glá.

²⁵Ɔ̄cɛ nōo gē yá ɛmɛɛma kóō nā ācɛ nēe gē kwu uwá ɛyí ā tɔ́ɔwɛ. Eko ohi Ɔwɔicō yɔ̄ ī je ɛga lɛ uwá kéē le pīyabɔ̄, cɛ́ɛ́ kéē lɛ ɔkwɛyi kú ɛlā kú Ohɔ́nyɛtá Ujísɔ̄si ā jé.

²⁶Anɔ́ɔ eyī í gbo uwá gɔɔ, cɛ́ɛ́ é le pɛ́ kwu ŋmá ukpa kú ebilíi nōo kwú uwā gbɔbū klla lɛ uwá yá kéē cɛ̄ɛ̄lā kú nū āa.”