Read idoma 2 UTÍMŌTI 3 Bible Online

2 UTÍMŌTI 3 - idoma bible

2 UTÍMŌTI 3

¹Upɔ́lu ka ɔ́ɔ cíkā kóō lɛ jé ka eko kú uwalu í yɔ̄ eko nɛ̄ ɛcɛ gáā mɛ ā.

²Ācɛ géē gbɛlá iyi uwā ōfōōfūnū, é í yá unwū ije, ācɛ í bá ī hágágā, ācɛ géē yɔ́bɔ́bɔ́cɛ nɛ̄hi, ācɛ géē jīiyi uwā eyī, ācɛ í gáā lɛ ojīlīmā ce ádā mɛ́mla ɛ́nɛ́ ŋ́, nɛ̄ ɔdā dúúmā í gáā jɛ̄ uwā eyī ŋ́, ācɛ géē je pīya ācɛ o cɛ́ɛcá, ɔdā dúúmā í gáā tīihɔ tū uwā gɛ ŋ́, ācɛ géē tá ka aá gbā Óndú ɛ̄gbā gɛ ŋ́,

³ācɛ í gáā gbonɛnɛ gɛ ŋ́, é kē gáā ményinyi ɔ̄cɛ dúúmā ŋ́, ācɛ o bī ācɛ ɔhá iyē, ācɛ o yíkpɛ́lā eko dóódu, ācɛ nēe lɛ cē ōcɛ ɔhá táajɛ i tútū kéē yíkpɛ́lā eko dóódu, mɛ́mla ācɛ nɛ̄ ɔdā olɔhi í he uwá ɔtū ŋ́.

⁴Ācɛ nɛ̄ ɔ̄cɛ í lɛ ɔtūce uwá glá ŋ́, ācɛ nēé lɛ ɛlá wu ɔdā dúúmā ŋ́, ācɛ nɛ̄ ɔbɔ́ɔcɛ le mu uwá ipú hile, ācɛ nēe géē piyɔtū abahi fíyɛ́ Ɔwɔicō.

⁵É gē yá uce bɛ̄ɛka ɔdā nēé pó ɛlɔ̄ɔwɔicō ā, amáŋ ɔdā nēé gē yá ā, ī mafu ka é wɛ ɔdā nēé ka ka aá wɛ ā ŋ́. Aá lɛ tú gɛcɛ ŋmá ɛgiyí ɛdɔ ācɛ ɔ́ɔmā.

⁶Ācɛ ɔ̄hī kú uwā ge bēé ga ipú ɔlɛ́ ācɛ ōhī ge nyɔ̄ ī kwú ācɛnyā nɛ̄ ɔtū kú uwa ī lɔfú ɛgiyí ínōbīya ŋ́ mā, ācɛnyā nɛ̄ ɛdɔ únwū dóódu gē nū uwā tɔ́ɔwɛ á.

⁷Ācɛnyā nēe bá nyā ī dɔɔ̄kā kéē jé odée, amáŋ é kē gáā je ɔkwɛ̄yi ā gbóógbóō ŋ́.

⁸Ɛ́gɛ́nɛ̄ Ujannisi mɛ́mla Ujámbresi tá Umósīsi áafú ā ɛ́gɔ́ɔmā nɛ̄ ācɛ nēe bá nyā ge tá ɛlā ɔkwɛ̄yi lɛ á. Ācɛ nɛ̄ ɔtū kú uwā í gē yúklɔ́ ŋ́, oōwɛ ɔ̄cōlóhɔ́nyɛtá kú uwā í tīile lɛ uwá ŋ́.

⁹Amáŋ é gáā yɛ gɔbū ligbo mla ucē íla kú uwā ŋ́, ohígbū ka eko kpii ɛjɛ̄ɛ̄jī ācɛ géē jé ɛdɔ ācɛ nēé wɛ ā. Ɔdā ékpó nōo yá Ujannisi mɛ́mla Ujámbresi ā.

¹⁰Amáŋ awɔ Utímōti a jé ɔdā nɛ̄ n nwū, a jé ucē kú um lɔɔlɔhi, a kē jé ɔdā nōo kwu um ɔtū kú n̄ yá ipú ɛcɛ nyā āa, a jé ɔdā nɛ̄ n miyɛ cɛ̄ āa. É kē le da uwɔ ɛ́gɛ́nɛ̄ n le ɔtūlé eko kú ōwē lɛ ā, ɛ́gɛ́nɛ̄ n cīībū kú unwalu lɛ ā.

¹¹ A le má ɛ́gɛ́nɛ̄ é yá um ŋmó lɛ āa, mɛ́mla ɛjɛ̄ɛ̄jī ōwē ɛyɛ́ɛyɛ́yí nɛ̄ n ma āa. A jé ɛjɛ̄ɛ̄jī aɔ́dā nɛ̄ é yá um ipú Ántiyɔ̄ku, Ikoniyium mɛ́mla Ulistra ā, ɛ́gɛ́nɛ̄ e yá um ŋmó bɔ̄bíbɔ̄bí lɛ a! Amáŋ Óndú ā lɛ um hɛ́tá ŋmá ipú odúúdú uwā kpɛ́m.

¹²É géē yá ɛjɛ̄ɛ̄jī ācɛ nēe dɔɔ̄kā o lā oyēeyī olɔhi kú ācɔ̄lóhɔ́nyɛtá ipú opīyatɔ̄há mla Ohɔ́nyɛtá Ujísɔ̄si ā ōwē piíí.

¹³Amáŋ ācɛ obɔ̄bí mɛ́mla ācɛ o je iyī ce ɔdā nēé wɛ ŋ́ ma, géē yɔ̄ i gɔbū ŋmá obɔ̄bí ga obɔ̄bí tōōtɔ̄ɔ̄, é gē pllá ācɛ, ācɛ ke í plá uwá.

¹⁴Amáŋ awɔ ā, lɛ abɔ̄ bī ɛlā ɔkwɛyi nēé nwū uwɔ mɛ́mla ɛ̄nɛ̄ a miyɛ cɛ̄ ā kli, abɔ̄ a jé ācɛ nēe nwū uwɔ aɔ́dā nēe bá āa.

¹⁵Bla ka oŋmá eko ɔyípɛ̄ obene kú uwɔ, nāa jé ɛlɔ̄ɔwɔicō otīīhɔ ā nōo lɔfú je íjééyī nōo mafú ɔwɛ nāa géē nyatá ā fú gā uwɔ o ŋmá lɛ o cɛ̄ɛ̄lā kú Ohɔ́nyɛtá Ujísɔ̄si.

¹⁶Ɔwɔicō je ɛjɛ̄ɛ̄jī ɛlɔ̄ɔwɔicō tá ipú ɔtū kú ācɛ á, ó kē tīile kéē le ɔ́ nwū ɛlā ɔkwɛyi, kéē bī ɔ le yá kú alɔ jé ɔdā nɛ̄ ó lɛ ɔhi ŋ́. Ó gē nā alɔ tá ɔwɛ, o kē īī nwū ācɛ ɔwɛ nēé géē lā oyēeyī kú uwā ɛ́gɛ́nɛ̄ oōcɛ kú Ɔwɔicō lɛ ā.

¹⁷Cɛ́ɛ́ kú ɔ̄cotɛhɔ̄ kú Ɔwɔicō kóō lɛ oklɔ́ɔcɛ́ yá lɔɔlɔhi kú ō bī ɔdā nɛ̄ ó jé ā le yá ɛjɛ̄ɛ̄jī ɛdɔ kú úklɔ́ olɔhi dóódu.”