Read idoma 2 UTÍMŌTI 4 Bible Online

2 UTÍMŌTI 4 - idoma bible

2 UTÍMŌTI 4

¹Ipú eyī kú Ɔwɔicō mɛ́mla Ohɔ́nyɛtá Ujísɔ̄si, nōo géē wā í ce ɔcɛ́ kóō géē kɛpɔ̄ tū ācɛ oyēeyī mɛ́mla ācɛ nēe kwú ā, n pi uwɔ ahɔ̄ lɔfúlɔfú

²ka ā bī olɛhɔ̄ ā tɔ́ɔna, ācɛ jāhɔ̄ gā uwɔ oo, é kōō jāhɔ̄ gā uwɔ ŋ́ nááná, bī ɛlā ā yɔ̄ ī tɔ́ɔna kpɔ́, kɛlā ā ɔwɛ nɛ̄ ācɛ í miyɛ ɔ́ cɛ̄ glá, bī ɔ̄ le mafú ɔdōbɔ̄bí nɛ̄ ācɛ yá ā fú lɛ uwá. Bī ɔ̄ le tá ācɛ ɔtú kwu ɔtú. Lɛ ɔtūlé ipú ɔdā dúú nāa í nwū ācɛ āa.

³Ohígbū ka eko í wā nɛ̄ ācɛ í gáā jāhɔ̄ lɛ ɛlā olɔhi kú ācɔ̄lóhɔ́nyɛtá nēé ī nwū ā ɛ́ɛ́ gɛ ŋ́. Ikɔkɔ ɔ́ɔmā a, é géē dɔɔ̄kā ō jāhɔ̄ lɛ ɔdā ɛyɛ́ɛ́yí nēe ī nwū āa. Ohígbū ɔ́ɔmā é géē tū aítíca bá nēe géē da uwá ɛdɔ kú ɛlā nēe lɛ ahɔ̄ coge kéē pó piíí āa.

⁴É géē kwúcē ŋmá oōjāhɔ̄ lɛ ɛlā ɔkwɛyi kú ācɔ̄lóhɔ́nyɛtá nēé ge nwū āa, cɛ́ɛ́ é gbɔɔ́ ō jāahɔ lɛ ɔ̄kā icííci.

⁵Amáŋ awɔ ā, yɔ̄ cíí ipú ɔdā dóódu, lɛ ɔtū lé ipú ōwē nāa géē má ā, yúklɔ́ kú ɔ̄cɛ nōo gē bī ɔ̄kōolɔhi ā tɔ́ɔna, yá ɛjɛ̄ɛ̄jī ɔdā nāa cíkā ó yá ā dúúdú abɔ̄ nāa wɛ ɔ̄cotɛ̄ɛhɔ̄ kú Ɔwɔicō ā.

⁶Ami āa, eko le yá nēe géē je um gwɛ́ɛya lɛ Ɔwɔicō bɛ̄ɛka ejé nēé gē le gwɛ́ɛya ī ce klá ɛyí ede āa. Eko nɛ̄ n gáā kwú ā le yá ɛɛ́.

⁷N lɛ ɛjɛ̄ɛ̄jī ɔfú kú um tīīye ipú ɔgbínya ā, n lɛ inya ā kwu gaajɛ ɛɛ́, n le ɔdā nɛ̄ ācɔ̄lóhɔ́nyɛtá ī nwū ā tū gajaajɛ.

⁸Ɔwɔicō kwu ɛhi kú um ú tá gbēyī um ɛɛ́, ɛhi kú oyálé nɛ̄ ó gē je lɛ odúúdú ācɛ nēe gē lā ɛ́gɛ́nɛ̄ Ɔwɔicō dɔɔ̄kā ā. Óndú Ujísɔ̄si Ohɔ́nyɛtá, nōo wɛ ohɛ́pɔ okpaakpa ā géē je ɛhi kú um gā um ɛ̄cī ɛpɔ̄ ā. Ɛ̄cī ɔ́ɔmā Ɔwɔicō géē je ɛdɔ kú ɛhi ékpó lɛ ɛjɛ̄ɛ̄jī ācɛ o hile nēe bá gē gbēyī lɔfú lɔfú kóō kwúcē wā a.

⁹Lɛ ɔfú tīyē ká ā gā ɛgiyí um fíya.

¹⁰ Ohígbū ka abɔ̄ nɛ̄ Udímasi gbɔɔ́ ō pi ɔtū ɔdā kú ɛcɛ nyā, anɔ́ɔ ó nyɛ̄ɛ̄ le ta Utesalónīka á. Ukrisens le tá Ugaletiya ɛɛ́, Utáyítɔ̄si kē le tá Udamatíya.

¹¹ Ulúkú ōfōōfūnū yɔ̄ mla um mɛ́ɛ̄ á. Dɔɔ̄kā Umáki kú awɔ mɛ́mla anú ká aá tīkpó wā, ohígbū ka ó géē tū um abɔ̄ ipú úklɔ́ kú ācɔ̄lóhɔ́nyɛtá.

¹²N lɛ Utakíkɔ̄si tɛ̄ɛhɔ̄ ga Ɛ́fēsɔsi.

¹³Eko nāa í wā, lɛ otógwō kú um nɛ̄ n kpo bá ɔlɛ́ Ukápusi ajɛ kú Utrɔ́wasi ā kpó wā gé um. A klla í kpó aɔ́kpá ā wā dúú n, ofúlufúlu aɔ́kpá kú ɔkpɛ́bɛ́ āa.

¹⁴Alesáŋda, onɔwá kú oje ā yá um ɔdōbɔ̄bí nɛ̄hi, Óndú géē cíla anú ulé ɛ́gɛ́nɛ̄ ɔdā nɛ̄ ó yá lɛ ā.

¹⁵Awɔ a Abɔ̄yī uwɔ, leyi kwɛcɛ gɛɛ ohígbū Alesáŋda, ohígbū ka ó ŋmó olɛhɔ̄ kú alɔ okónu lɔfúlɔfú. Ó ka ɔ́ɔ́ le kpaakpa ŋ́.

¹⁶Eko nēé bī um wā í kɔkɔ kú um aflɛ́yí ā, ɔ̄cɛ dúúmā í wā gaá tá um abɔ̄ ŋ́, odúúdú uwā le pɛ́ kwu hē um tá. N ge gbɔ̄ɔkɔ kú Ɔwɔicō kóō híī bī ɔ̄ lɛ kɛpɔ̄ tū uwa ŋ́.

¹⁷Amáŋ Óndú ā háyi pī um, ó kē je ɔfú gā um, ká n̄ tɔ́ɔna kú ɔ̄kōolɔhi ā lɛ odúúdú aílɔ́wá kéē le pó. Óndú ā lɛ um hɛ́tá, ó cɛ̄ lɛ ācɛ ā kɛpɔ̄ ɔ̄cɛ o ŋmó tū um ŋ́.

¹⁸Óndú ā kē í hɛ́ um tá ŋmá ɔdōbɔ̄bí dóódu. Ó kē í lɛ um tū ká n̄ gā ajɔ̄ɔ̄cɛ́ kú ɔkpáncō kú nū. Ocɛ̄tla mla owóofu kóō wɛ ákú nū eko dóódu! Aamí.

¹⁹Hokónu tū Uprisílla mɛ́mla Akwíla mɛ́mla ācɛ ɔlɛ́ Onesifórɔ̄si.

²⁰Erátūsi ā yɔ̄ Ukɔrinti, n habɔ̄ Utrofímɔ̄si tá Umáyítɔ̄si, ohígbū ka ó yɔ̄ i doōcē.

²¹Lɛ ɔfú tīīyē ká ā gā ɛ́ɛ́ ká owu kóō bū. Upúdensi, Ilínūsi, mɛ́mla Uklaudíya ka ami ɔ́ɔ hokónu tū uwɔ. Ɛjɛ̄ɛ̄jī ācɔ̄lóhɔ́nyɛtá nēe bá amānyā ā ka amíyɔ̄ hokónu tū wɔ dúú.

²²Óndú Ujísɔ̄si Ohɔ́nyɛtá kóō hɔ́hā ce uwɔ. Ɔhā kú Ɔwɔicō ā kóō yɔ̄ mla odúúdú aá.