Read idoma UTÁYÍTƆ̄SI 1 Bible Online

UTÁYÍTƆ̄SI 1 - idoma bible

UTÁYÍTƆ̄SI 1

¹Ami Upɔ́lu, ɔ̄cocɛ̄hɔ̄ kú Ɔwɔicō mɛ́mla ɔ̄cotɛ̄hɔ̄ nōo kwɛyí Ujísɔ̄si Ohɔ́nyɛtá. Ó tū um ɛhɔ̄ ká n̄ yá ká ācɛ nɛ̄ ó fu ā kéē lɔtū ce ɔ̄, ká n̄ klla lɛ uwa bī ipú ɛlā ɔkwɛ̄yi nɛ̄ ɛ̄gbā ō gbā Ɔwɔicō ká alɔ gē nwū ā.

²Ɔkwɛ̄yi nyā hútu ŋmá eyīyōce ká oyēeyi opiyóó nɛ̄ Ɔwɔicō nɛ̄ ó ge kɛmgbɛ ŋ́ mā cokónu nū lɛ alɔ gbɔbū nɛ̄ ó yá ɛcɛ ā.

³Eko nɛ̄ eko le yá, o lɛ ɔ́ mafú ipú olɛhɔ̄ kú nū nɛ̄ ó le tū um abɔ̄ ka n̄ cɛ̄ tɛ́ɛcɛ ā. N kē le ɛhɔ̄ ā cɛ̄ tɛ́ɛcɛ ŋmá lɛ ɔfú kú Ɔwɔicō, Óndú alɔ.

⁴N tɔ́kpa nyā fu Utayitɔsi ɔyí um ɔkwɛyi ohígbū ɛlā Ɔwɔicō nɛ̄ ami mɛ́mla anú cɛ̄ tɔ̄há āa. Ɔwɔicō ádā mɛ́mla Ohɔ́nyɛtá Ujísɔ̄si, nōo hɛ́ alɔ tá ā je ɛbɔ́, ɛhi nɛ̄hi ga awɔ.

⁵N cɛ̄ gā uwɔ klá Ukréti, o yá ɛ́ɛ́ ká aá lɛ aɔ́dā nōo lɔhi ŋ́ mā kpó yá lɔhi. Ká ā klla bī ɔwɛ nɛ̄ n nwū uwɔ ā lɛ fu anyākwɔ́cɛ kú icɔ́ɔci kú igelī nɛ̄ŋcɛ́ dóódu.

⁶Ɔnyākwɔ́cɛ ā í cíkā ō lɛ ɛcá dóódu ŋ́, ó í lɛ ɔnyā ékpónú, ayípɛ́ ɔlɛ́ nū cíkā ō wɛ ācɛ o pó ɛlɔ̄ɔwɔicō, nɛ̄ ācɛ í gáā lɛ okónu oyēeyī obɔ̄bí kwu uwá iye ŋ́. É gáā wɛ ācɛ o yíkpɛ̄yí olɔfú tú ɛ́nɛ́ mɛ́mla ádā uwā ŋ́.

⁷Abɔ̄ otrɛ̄yí kú icɔ́ɔci wɛ ɔ̄cɛ nōo gē leyīkwu úklɔ́ kú Ɔwɔicō ā, ó cíkā o lɛ ɛcá dóódu ŋ́. Ó cíkā ō wɛ ɔ̄cɛ o yɔ́bɔ́ɔ́cɛ ŋ́, ámāŋ ka ɔ̄cɛ o lɛ ánya ŋ́, ámāŋ ɔ̄cɛ o gwá ejé nɛ̄ɛ̄nɛ̄hi, ámāŋ ɔ̄cɛ o kpɔ́tūfúlú ŋ́, ámāŋ ɔ̄cɛ o yúnwū ije ŋ́.

⁸Ó í wɛ ɔ̄cɛ o miyɛ ugbɔga lɔɔlɔhí, ɔdā olɔhi ō yá í he ɔ́ ɔtū. Ó í wɛ ɔ̄cɛ nōo gē cīiyinu bī glá, ɔ̄cɛ o yá ɔdā o kpaakpa, ɔ̄cɛ o tīihɔ, o klla í wɛ ɔ̄cɛ ɔkwɛ̄yi.

⁹Ó í lɛ abɔ̄ flá tū olɛhɔ̄ ɔ̄kwɔ̄ɔ̄kwɛ̄yi kú Ɔwɔicō nɛ̄ é nwū ɔ̄ ā. Ɛ̄nyā í yá kó ō lɔfu tū ācɛ ɔhá iyē bū ipú ɛlā ɔkwɛyi nɛ̄ ó ge nwū ā. Cɛ́ɛ́ kó ō ma ɛga nɛ̄ ācɛ o táafú ā gwōnū ā fú lɛ uwá.

¹⁰Ohígbū ka ācɛ alɛwa nēe pīyabɔ̄ ŋmó ɔwɛ o gbō Ɔwɔicō ɛ̄gbā kú ācɛ Ujíyu ā, gbɔɔ́ ō yíkpɛ̄yí olɔfú, lɛ ācɛ alɛwa plla tū ɔdā icííci nɛ̄ é gē nwū ā ɛɛ́.

¹¹Ó cɛgbá ká ā le da uwá ké ē mā ɔdā nēé bá gē ka ɔ́ɔmā. Ohígbū ka ɔdā nēé bá gē nwū ā gē yá kú ipɔ́ɔnū alɛwa kéē lɔtū ce Ɔwɔicō gɛ ŋ́. É bī ɛnyā gē le yá ije ŋmá ɛgiyí ācɛ ā. Ɛnyā cíkā ō wɛ ɔdā uwēyī lɛ uwá.

¹²Ɔ̄cɛ o jɔ́dā nɛ̄hi éyi nɛ̄ ācɛ Ukréti gē hi ɔ̄comɛ́ɛbɛ eko ɔ́ɔmā ā kɛlā ɔkwɛ̄yi eko nɛ̄ ó kahíníī, “Ācɛ Ukréti wɛ ācɛ okɛ̄mgbɛ̄ piyóó, lɛbɛ̄ɛka aɛ́bɛ́ ipácí obɔ̄bíipú, ācɛ ujúlu nēé bayi ce ɔdōlé piyóó.”

¹³Ɛlā nɛ̄ ācɛ ɔ́ɔma ka ā wɛ ɔkwɛyi nɛ̄ n, ohígbū ɔ́ɔmā dɛ̄gba tū uwa lɔfúlɔfú, cɛ́ɛ́ kéē géē le lɔfú cɛ́ɛ́ kéē lɔtūce Ɔwɔicō.

¹⁴Ikɔkɔ nēé gē jāahɔ̄ tá ɔ̄cā kú ācɛ Ujíyu, ámāŋ́ ka aíne kú ācɛ nēe tá ɔ̄kwɛ̄yi ā.

¹⁵Ɔdā dóódu le yēŋēē tū ācɛ nēe le yēŋēē abɔ̄yī uwā ā, ámāŋ ɔdā dóódu í le yeŋēē tū ācɛ nɛ̄ íne ō bīya le ɔtū kú uwā bīya ā ŋ́. É klla cɛ̄ɛ̄lā ɔkwɛ̄yi glá gɛ ŋ́, ohígbū ka ɛlā ōgbo mla ɔtū kú uwā í le kpakpa ŋ́.

¹⁶É ge ka ka aá jé Ɔwɔicō ɔkwɛ̄yi, amáŋ ucē ó yá kú uwa í mafú ka é jé ɔ́ ŋ́. É gē wɔ́tū ɔdā olɔhi, é kē lɛ īkpɛ̄yí olɔfu, e cíkā lɛ úklɔ́ olɔhi dúúmā ŋ́.