Read idoma UTÁYÍTƆ̄SI 3 Bible Online

UTÁYÍTƆ̄SI 3 - idoma bible

UTÁYÍTƆ̄SI 3

¹Upɔ́lu klla ka ipú ɔkpá ā kpɔ́ kahíníī, “Tá ācɛ ɔlɛ́ uwɔ ɛlá kwu ɔ́, kéē lɛyítáajɛ lɛ ācɛ ogbāajɛ mɛ́mla aótrɛ̄yí, kéē lɛyítáajɛ lɛ uwá, ká aá le tútū ō yá ɔdā olɔhi ɔwɛ dóódu.

²Le da uwá kéē híī bīya ɔ́mpa uwā iye ŋ́, amáŋ kéē bá ɛbɔ́, kéē le saá saá mla ācɛ, kéē ke gbonɛnɛ lɛ ɛjɛ̄ɛ̄jī ācɛ dóódu.

³Ohígbū ka alɔ abɔ̄ alɔ ā tɛtɛ líla, lɛ ikpɛ̄yí olɔfú, alɔ í yá ɔdā nɛ̄ ó lɛ kpaakpa ŋ́. Alɔ wɛ ɔfiyɛ kú ɔdā ōtíne ɛyɛ́ɛyɛ́yí kú ɛcɛ nyā. Alɔ le eko táajɛ ge má ācɛ ímálānyī, bá gē hɔ́kɔ kú ɔdā kú ācɛ. Ɛjɛ̄ɛ̄jī ācɛ gē wɔ́tū alɔ, alɔ kē ī wɔ́tū uwā dúú.

⁴Amáŋ Ɔwɔicō ohɔ́nyɛtá lɛ ogbonɛnɛ kú nū mɛ́mla ɛ́gɛ́nɛ̄ alɔ he ɔ́ ɔtū lɛ ā mafú,

⁵ó nya alɔ tá ohígbū olɔhi dúúmā nɛ̄ alɔ yá abɔ̄yī alɔ ā ŋ́, amáŋ ó ményinyi alɔ icííci nɛ̄ n. Ó yá ɛ̄nyā bū ipú Alelékwū ihɔ nɛ̄ ó le na alɔ yēŋēē ā. Ó lɛ alɔ ma igbo ɔ́mpa klla lɛ alɔ yá ɛ̄yīpɛ̄.

⁶Ɔwɔicō cē alelékwū ihɔ ā klá alɔ gbɔɔ́ ō ŋmá lɛ iyē kú Ujísɔ̄si Ohɔ́nyɛtá nōo hɛ́ alɔ tá ā.

⁷Ohígbū ka alɔ he Ɔwɔicō ɔtū nɛ̄hi, anɔ́ɔ ó le ɛpɔ̄hi hɛ́ lɛ alɔ, cɛ́ɛ́ ká ālɔ̄ leyīce ka alɔ géē miyɛ oyēeyī opíyóó nɛ̄ ó cokónu o je ā.

⁸Ɛlā nēé ka nya wɛ ɔkwɛ̄yi, ó wɛ ɔtū kú um ká ā lɛ abɔ̄ flá tū aɔ́dā nēé ka ɔ́ɔma lɔfú, o yá ɛ́ɛ́ ká ācɛ nēe cɛ̄ɛ̄lā Ɔwɔicō ā, kéē kwú ɔtū kú uwā í kwu kú e yá ɔdā nōo lɔhi ā ōfūnū, aɔ́dā o lɔhi nēe géē tīile lɛ ɛjɛ̄ɛ̄jī ācɛ.

⁹Amáŋ ā híī yɔ̄ ge táafu bɛ̄ɛka olíla ā ŋ́, a híī yɔ̄ gē ka ɛma o likpō likpō ā ŋ́, ā ke yiikpɛ́lā mla ɔ̄cɛ dúúmā ŋ́. Ā nuunu ohígbū íne ā ŋ́. Ɔ́ɔmā í tīile ŋ́, e wɛ ɔdā áncā nɛ̄ n.

¹⁰Le ɔcí hɛ́ lɛ ɔ̄cɛ nōo gē yá ká ācɛ kéē le kpó kɔ̄ ā aflɛ́yí mɛ́mla igbɔɔ́mpa, cɛ́ɛ́ a le hɛ́ ŋmá ɛgiyí nū, ā lé tɔ̄há mla anú gɛ ŋ́.

¹¹A ke jé ka ɔ̄cɛ ɛ́gɔ́ɔmā nyɛ̄ɛ̄ ŋmá ɔwɛ okpaakpa gwō tū ipú ínōbīya nōo cɛ̄ lɛ ɔ́ lɛ ɛpɔ̄bí ŋmó iyīnū dúú ɛɛ́.

¹² Eko nɛ̄ n lɛ Átɛ̄masi ámāŋ Utayikíkɔ̄si tɛ̄hɔ̄ fu uwɔ, lɔfú tīyē ká ā gā ɛgiyí um Unikɔpɔ́lisi, ohígbū ka n lɛ ɔ́ kaŋmó ɔtū kú um ka abɔ́ɔ nɛ̄ n géē yɔ̄ jāā gbéeko nɛ̄ ofu ā mā á.

¹³ Lɛ ɔfú tīyē ká ā le yá kú Usínāsi Ulɔ́ya ā mɛ́mla Apólɔ̄si kéē gā fíya fíya. Lɛ ɔdā nēé dɔɔ̄kā kpɛ́m ā kpó lɛ uwá.

¹⁴Cɛ̄ lɛ ācōlóhɔ́nyɛtá ɔ́mpa alɔ kéē lɛ ɔda olɔhi éyi bī abɔ̄ gē yá, cɛ́ɛ́ kéē bī le yá ɛgbá ícíícɛ kú uwā, o yá ɛ́ɛ́ kéē géē tīīle lɛ iyí uwā mɛ́mla ācɛ ɔhá.

¹⁵Odúúdú ācɛ nēe bá pī um ā ge hokónu tū uwɔ. Hokónu tū ācōlóhɔ́nyɛtá ɔ́mpa alɔ. Ɔwɔicō kó ō hɔ́ɔhā ce aá kpɛ́m. Aamí.”