Read idoma UFÍLĪMƆN 1 Bible Online

UFÍLĪMƆN 1 - idoma bible

UFÍLĪMƆN 1

¹Ami, Upɔ́lu, olagbá ohígbū Ohɔ́nyɛtá Ujísɔ̄si, mɛ́mla Utímōti ɔyínɛ́ alɔ, gē tɔ́kpá nyā fu wɔ, Ufílīmɔn, oklóbīya alɔ mɛ́mla ɔ́mpa alɔ ipú úklɔ́ kú Ɔwɔicō,

² mɛ́mla ācɔ̄lóhɔ́nyɛtá nēe gē jīla ɔlɛ́ uwɔ ā, mɛ́mla Afíya ɔyínɛ́ alɔ nɔ̄nyā mɛ́mla Akípɔ̄si ícɔ́ɔ́ja ɔ́mpa alɔ ipú úklɔ́ ā.

³Ɔwɔicō Ádā alɔ mɛ́mla Óndú alɔ Ujísɔ̄si Ohɔ́nyɛtá ā kéē je ɛbɔ́ mɛ́mla ogbonɛnɛ kú uwā lɛ aá.

⁴Ɔyínɛ́ um Ufílīmɔn, n gē tá Ɔwɔicō kú um ahínyá eko dóódu nɛ̄ n le blakwu uwɔ eko nɛ̄ n gē gbɔ̄ɔkɔ aa.

⁵N pó ɔkā kú ihɔtū nāa lɛ lɛ ācɔ̄lóhɔ́nyɛtá mɛ́mla ɛ́gɛ́nɛ̄ a cɛ̄ɛ̄lā kú Óndú Ujísɔ̄si lɛ ā.

⁶N gē gbɔ̄ɔkɔ ká ā lɛ ɛdɔ kú ɔtōoce nāa lɛ ā kɔ̄ mla ācɛ ɔhá, cɛ́ɛ́ kú ā lɛyí kú ɛjɛ̄ɛ̄jī ɔhā nɛ̄ alɔ lɛ ipú opīyatɔ̄há mla Ohɔ́nyɛtá ā jé.

⁷Ɔyínɛ́ um ihɔtū nāa lɛ ā, cɛ̄ gā um gwéeyē nɛ̄hi, ó klla lɛ um ɔtū tú kwu ɔtū. A le ācɔ̄lóhɔ́nyɛtá alɛwa ɔtū tū kwu ɔtū.

⁸Ohígbū ɛdɔ ɔ̄cɛ nāa wɛ ā, n lɔfú tū uwɔ ukɔ́ kú ā yá ɔdā nāa cíkā ō yá ā glá ohígbū ka alɔ wɛ ayínɛ́ ipú Ohɔ́nyɛtá.

⁹Amáŋ ikɔkɔ ɔ́ɔma, n lɛ abɔ̄ tɛ́yīpɛ̄ gā uwɔ abɔ̄ a le he um ɔtū ā. Ami Upɔ́lu yá ɛ̄nyā nááná nɛ̄ n wɛ ɔnyakwɔ̄cɛ okwɛyí Ohɔ́nyɛtá Ujísɔ̄si ā, n kē klla yɔ̄ agbá ohígbū nū.

¹⁰N gē gbɔ̄ɔkɔ gā uwɔ ohígbū Onesímɔ̄si, nōo wɛ ɔyí um ipú Ohɔ́nyɛtá, ohígbū ka abɔ̄ nɛ̄ n klá agbá mla anú ā, n le pīya ádā nū ipú ɛlā Ɔwɔicō.

¹¹Eko éyi yɔ̄ nɛ̄ ó tīile dúú gā uwɔ ŋ́, amáŋ abālɔbányā ó tīile lɛ ami mɛ́mla awɔ.

¹²N yɔ̄ gē je ɔ́ cīgbīhi gé lɛ uwɔ. Ɔyí ɔtū kú um ī wā abɔ́ɔ á.

¹³Ó géē yɛ í he um ɔtū kú n lɛ ɔ́ kwú kláajɛ pi um abɔ̄ nɛ̄ n klá agbá ohígbū ɔkōōlɔhi ā, cɛ́ɛ́ kóō tá um abɔ̄ kwɛyí uwɔ.

¹⁴Amáŋ ń tíne ō pi uwɔ abɔ̄fú káā tá um abɔ̄ ŋ́, amáŋ n dɔɔ̄kā ká ā yá ɔ̄ ŋmá lɛ ɛ́gɛ́nɛ̄ a cɛ̄ lɛ ā, ohígbū ɔ́ɔma ń gáā yá ɔda dúú ŋ́, ń táafú ŋ́ a cɛ̄.

¹⁵Ikōhī ŋ́, Onesímɔ̄si nyɛ̄ɛ̄ ŋmá ɛgiyí uwɔ eko kpií o yá ɛ́ɛ́ kó ō cīgbīhi wā ī yɔ̄ mla uwɔ piyóó.

¹⁶Ó wɛ ɔfiyɛ icííci gɛ ŋ́, amáŋ ó lɛ nwuné fíyɛ́ ɔfiyɛ kɔ́ɔ́ɔ́ ɛ́ɛ́. Ó kwú pīya ɔyínɛ́ ipú Ohɔ́nyɛtá ɛɛ́. Ó tīile gā um nɛ̄hi, ó kē tīile gā awɔ nwuné nwuné fíyɛ́, eko nɛ̄ ó wɛ ɔfiyɛ ā mɛ́mla eko nyā nɛ̄ ó wɛ ɔyínɛ́ ipú Óndú ā.

¹⁷Ɔ́dāŋ́ ka ó ī lɛ ā nāa kē je um ɔ́mpa awɔ, mīyɛ anú ɛ́gɛ́nɛ̄ a géē mīyɛ um ā.

¹⁸Ɔ́dāŋ́ ka ó lɛ ɔdōbɔ̄bi dúúmā yá uwɔ ámāŋ ka ó bī uwɔ ulé dúúmā, lɛ ulé ā ka gā um ká n̄ bī uwɔ ulé.

¹⁹Ami Upɔ́lu géē tɔ́kpá ā abɔ̄yī um á, n géē gbā ulé ā gā awɔ (ń cíkā ō tū uwɔ ɛlá kwu ɔ́ gɛ ŋ́, a jé ka awɔ abɔ̄yī uwɔ bī um ulé oyēeyī kú úwɔ)

²⁰Abɔ̄ ó ī lɛ ā, ɔyínɛ́ um, yá ká n̄ lɛ odée lɛ ŋmá ɛgiyí uwɔ, abɔ̄ nāa wɛ ɔyínɛ́ ipú Ohɔ́nyɛtá ā, le yá kú ɔtū kóō he um.

²¹N cɛ̄ ka a géē yá ɔdā nɛ̄ n da awɔ ā, abɔ̄ nɛ̄ n yɔ̄ ī tɔ́kpá nyā fu uwɔ ā. N kōō jé ka a kē í yá fíyɛ́ ɛ̄nɛ̄ n ka gā awɔ āa.

²²Lɛ inu ugbɔga tútū gbēyī um, ohígbū ka n leyī ce ka Ɔwɔicō í pó ɔkɔ nāa gē gbā ā, cɛ́ɛ́ kéē lɛ um hɛ́tá lɛ aá.

²³Épafrāsi, olagbá ɔ́mpā um ohígbū Ohɔ́nyɛtá Ujísɔ̄si ā ī hokónu tū uwɔ.

²⁴Umáki, Arístākɔsi, Udímāsi mɛ́mla Ulúkú, ācɛ úklɔ́ ɔ́mpā um ī hokónu tū uwɔ dúú.

²⁵Ɛhi kú Óndú alɔ jísɔ̄s Ohɔ́nyɛtá kóō yɔ̄ kwu aá kpɛ́m. Aamí.