Read idoma ĀCƐ UHÍBRU 1 Bible Online

ĀCƐ UHÍBRU 1 - idoma bible

ĀCƐ UHÍBRU 1

¹Íkée ā, Ɔwɔicō kɛlā lɛ aádā alɔ ɔwɛ alɛwa ɛyɛ́ɛyɛ́yí bū okónu kú ācomɛ́ɛbɛ.

²Amáŋ ipú ɛ̄cī ámōōmɛ nēe bá nyā ó lɛ ɛlā ka lɛ alɔ bū okónu kú Ɔyínɔ̄nyīlɔ kú nū ɛɛ́, ɛ̄nɛ̄ ó je kóō lé úgwū kú ɔdā dóódu ā, anú ā nōó kē yá ɛcɛ yɛ iyē nū dúú á.

³Anú ā wɛ ɛ́gbla kú Ɔwɔicō á, ɔdā nɛ̄ Ɔwɔicō wɛ ā nōó wɛ á, ó bī ɛlā olɔfú kú nū le yá ká aɔ́dā nēe yɔ̄ ā kéē yɔ̄ ī yɔ̄ kpɔ́. Igbīyāajɛ nɛ̄ ó le yá kú Ɔwɔicō kóō kwú íne nɛ̄ alɔ bīya ā í yá alɔ ɛhi ā, ó gaá cīce abɔ̄lɔ́ná kú Ɔwɔicō nōo fíyɛ́ dúú ā ɔkpáncō.

⁴É le Ɔyínɔ̄nyīlɔ kú Ɔwɔicō yá kóō le nwuné fíyɛ́ aálelékwū otɛ̄hɔ̄ ā, ɛ́gɛ́nɛ̄ iyē nɛ̄ Ɔwɔicō je lɛ ɔ́ ā nwuné fíyɛ́ ákú uwā a.

⁵Ohígbū ka Ɔwɔicō í da alelékwū-ōtɛ̄hɔ̄ kú nū dúúmā kahíníī, “Awɔ wɛ Ɔyínɔ̄nyīlɔ kú um á, ícɛ nyā n le pīya Ádā uwɔ ɛɛ́ ŋ” Amáŋ eko nyá nɛ̄ Ɔwɔicō kɛlā lɛ alelékwū-ōtɛ̄hɔ̄ dóódu kahíníī, “N géē wɛ ádā nū, ó géē wɛ ɔyí um” ā?

⁶Amáŋ eko nɛ̄ Ɔwɔicō gáā tū ɔ́kplá kú nū ɛhɔ̄ wɛ̄ɛcɛ ā ó klla kahíníī, “Ɛjɛ̄ɛ̄jī aálelékwū otɛ̄hɔ̄ kú Ɔwɔicō í gbā ɔ̄ ɛ̄gbā piíí.”

⁷Amáŋ Ɔwɔicō kɛlā lɛyíkwu aálelékwū otɛ̄hɔ̄ ā kahíníī, “Ɔwɔicō le aálelékwū otɛ̄hɔ̄ kú nū ā yá kéē lɛbɛ̄ɛka owu ā, anɔ́ɔ ó kē le ācotɛ̄hɔ̄ kú nū yá bɛ̄ɛka ígblɛ́nyī ɔlá āá.”

⁸Amáŋ Ɔwɔicō kɛlā lɛyíkwu Ɔyínɔ̄nyīlɔ kú nū ā kahíníī, “Awɔ wɛ Ɔwɔicō á, ajɔ̄ɔ̄cɛ́ kú uwɔ í yɔ̄ ŋméko-téeko piyóó. Ɛpɔ̄ okpaakpa nāa gē bī le gbō ācɛ ɔlɛ́ uwɔ á.

⁹Ɔdā nōo lɔhi ā í he uwɔ ɔtū ō yá, ɔdōbɔ̄bí kē í wú uwɔ ɔtū ō yá. Ɔ́ɔmā yá ɛ́ɛ́ nɛ̄ ami nōo wɛ Ɔwɔicō kú uwɔ ā fu uwɔ á. Anɔ́ɔ n lɛ ojīlīmā je ga awɔ nōo cɛ̄ gā awɔ gwéeyē nɛ̄hi fíyɛ́ aɔ́mpa uwɔ kɔ́ɔ́ɔ́.”

¹⁰Ó klla kahíníī, “Awɔ, Óndú, yá ɛcɛ ŋmá ohútu á, a kē bī abɔ̄ kú uwɔ le ɔkpáncō yá.

¹¹É géē yíífi, amáŋ a géē yɔ̄ eko dóódu. Ɛjɛ̄ɛ̄jī uwā géē je gbɛnɛ̄ncɛ̄ bɛ̄ɛka úwé ā.

¹²A géē cē uwā bɛ̄ɛka īlī ogbɛnɛ̄ncɛ̄ ā, é géē pīya uwá abɔ̄ bɛ̄ɛka īlī. Amáŋ aá gē pīyabɔ̄ ŋ́, á gē kwū ŋ́.”

¹³ Amáŋ alelékwū-ōtɛ̄hɔ̄ nyá nɛ̄ Ɔwɔicō da ɔ́ eko dúúmā kahíníī, “Cīce abɔ̄lɔ́ná kú um jāā gbéeko nɛ̄ n lɛ aólɛlā kú uwɔ yá uka ō lɛ ikpó ce ɔ́ kú uwɔ̄” ā?

¹⁴Ānyɛ ā, kē wɛ aálelékwū otɛ̄hɔ̄ mɛ́ɛ̄ ā? É wɛ aálelékwū nēe ī cɛ̄ Ɔwɔicō ɛhɔ̄ nōó kē tɛ̄hɔ̄ kéē tá ācɛ nɛ̄ Ɔwɔicō í nyatá ā abɔ̄.