Read idoma ĀCƐ UHÍBRU 11 Bible Online

ĀCƐ UHÍBRU 11 - idoma bible

ĀCƐ UHÍBRU 11

¹O lɛ ɔtōōce wɛ o jé kpɔ́cíí kú aɔ́dā nɛ̄ alɔ leyīce ɔ́ ka ɔ́ɔ wɛ ɔkwɛ̄yi, ó wɛ o jé cāā ka ɔdā nɛ̄ alɔ í má ŋ́ mā ā kē yɔ̄.

²Ɔtōce ɛ́gɛ́nyā yá nɛ̄ Ɔwɔicō cɛ̄ɛ̄lā kú ācɛ kú Ísrɛ̄lu íkée ā á.

³ Oŋmá lɛ ɔtōce ā nɛ̄ alɔ jé kéē yá ɛcɛ nyā ŋmá lɛ ɛlā okónu kú Ɔwɔicō, é kē yá ɔdā nɛ̄ alɔ gē má ā ŋmá ɔdā nɛ̄ alɔ í má ŋ́ mā.

⁴ Oŋmá lɛ ɔtōōce nɛ̄ Ébɛ̄lu gwɛ́ɛya nōo lɔhi fíyɛ́ ɛ̄nɛ̄ Ukéni gwó lɛ Ɔwɔicō ā á. O ŋmá lɛ ɛya nōó gwó ā, é cɛ̄ ijáalí lɛ ɔ́ kóō wɛ ɔ̄cɛ olɔhi, Ɔwɔicō klla cɛ̄ ɔ̄ ijáalí ŋmá lɛ ɛhi kú nū nōó mīyɛ ā. Nááná nōó gekwú ā, ó gē kɛlā lɛ alɔ ŋmá lɛ ɔtōōce kú nū jāā kwu ícɛ nyā.

⁵ Oŋmá lɛ ɔtōōce ā Énɔ̄ku í kwú ŋ́, amáŋ é kwú ɔ̄ ú oyēeyī ga ɔkpáncō. Ɔ̄cɛ dúú í jé ɛgiyí nū ŋ́, ohígbū ka Ɔwɔicō kwú ɔ̄ ú gicō. Ofíílí kéē je ɔ́ nyɔ̄ ā, é cɛ̄ ijáalí lɛ ɔ́ kóō lɛ ɔdā nōo he Ɔwɔicō ɔtū ā yá.

⁶Ɔ́dāŋ́ ka ɔtōōce í yɔ̄ ŋ́, ɔwɛ í yɔ̄ nɛ̄ ɔ̄cɛ géē yá ɔdā ō he Ɔwɔicō ɔtū glá ŋ́. Ohígbū ka ɔ̄cɛ dúúmā nōo géē túblá Ɔwɔicō géē cɛ̄ kóō yɔ̄, kóō géē cíla ācɛ nēe dɔɔ̄kā nū ā ulé.

⁷ Oŋmá lɛ ɔtōōce nɛ̄ Unówa jāhɔ̄ eko nɛ̄ Ɔwɔicō tū ɔ̄ ukɔ́ ohígbū ɔdā nōó gáā yá ɛ̄cɔ̄bū nōó lɔfú má ɛ́ɛ́ ŋ́ mā á. Ó lɛyítáajɛ lɛ Ɔwɔicō anɔ́ɔ ó le úgbéenyi gwó nōo cɛ̄ le ācɛ ɔlɛ́ nū kéē le nyatá. Oŋmá lɛ ɛ̄nyā ó lɛ ācɛ kú ɛcɛ ŋmɛpɔ̄bí, nōó kwú pīya ɔ̄cɛ nɛ̄ Ɔwɔicō cɛ̄ɛ̄lā kú nū ohígbū ɔtū nōó le ce ɔ́ ā.

⁸ Oŋmá lɛ ɔtōce nɛ̄ Ébrahām lɛyítáajɛ eko nēé hī ɔ̄ igwú kóō ga ɛga nōó géē mīyɛ bɛ̄ɛka úgwū ā. Ó gbɔɔ́ ō nyɔ̄, nááná nōó jé ɛga nōó ī nyɔ̄ ā ŋ́ mā.

⁹ O ŋmá lɛ ɔtōōce ó lā bɛ̄ɛka ugbɔga ā ajɛ nēé cokónu lɛ ɔ́ kóō lā ā. Ó lā ipú áklɔ̄kpɛ mɛ́mla Áyísīki mɛ́mla Ujékɔ̄pu, ācɛ nēe wɛ aólúgwū mla anú ipú okónu nɛ̄ Ɔwɔicō ce lɛ ɔ́ ā.

¹⁰Ohígbū ka Ébrahām yɔ̄ ī gbēyī igelī nɛ̄ Ɔwɔicō miya klla le gwó, igelī nɛ̄ ikpóōtáajɛ kú nū le kpɔ́cíí.

¹¹ Oŋmá lɛ ɔtōōce nɛ̄ Usára abɔ̄yī nū mīyɛ ɔfú kóō yɔ̄ ipú eko nɛ̄ ó le gla ipú ō yɔ̄ nááná, ohígbū ka ó cɛ̄ ka ɔ̄cɛ nōo cokónu lɛ anúɔ ā wɛ ɔ̄cɛ o lɔtūce ɔ́.

¹² Nááná nɛ̄ Ébrahām le pīya bɛ̄ɛka okwū dúúdú ā, o ŋmá ɛgiyí nū, nēé ma ayí nēe lɛwa bɛ̄ɛka aínyílɔ́wɔ kú ɔkpáncō mla ɔjɛ kú okónu ísu, nɛ̄ ó tōō ka ŋ́ má.

¹³ Ɛjɛ̄ɛ̄jī ācɛ nēe bá ā gekwú ipú ɔtōōce, nááná é mīyɛ ɔdā nēé cokónu lɛ uwá ā ɛ́ɛ́ ŋ́, amáŋ é má ɔ̄ ŋmá ɛga oligbó, é kē gwéeyē nɛ̄hi, é klla cɛ̄ tɛ́ɛcɛ ka aá wɛ aílɔ́wá mɛ́mla aúgbɔga ipú ɛcɛ nyā.

¹⁴Ó tá péee ka ācɛ nēe kɛlā lɛ ā, yɔ̄ ī leyīce éwo nēé í hī ɔlɛ́ abɔ̄yī uwā ā.

¹⁵Ɔ́dāŋ́ kéē bá ī gbɛlá ɔlɛ́ nēé nyɛ̄ɛ̄ ŋmá ā nɛɛ, é géē yɛ í lɛ ɛga má kwúcē le yɛ.

¹⁶Amáŋ é gē tíne ɔlɛ́ nōo lɔhi fíyɛ́, ɔ́ɔmā léka ɔlɛ́ kú ɔkpáncō. Anɔ́ɔ ó tū Ɔwɔicō uwēyī kéē hī ɔ̄ ka Ɔwɔicō kú uwā ŋ́ má, ohígbū ka ó lɛ igelī tútū gbēyī uwā ɛɛ́.

¹⁷ Ɔtōce yá ɛ́ɛ́ nɛ̄ Ébrahām gáā je ɔyínɔ̄nyīlɔ kú nū Áyísīki gwɛ́ɛya eko nɛ̄ Ɔwɔicō yá ɔ̄ ojámá ā á. Ébrahām wɛ ɔ̄cɛ nɛ̄ Ɔwɔicō cokónu lɛ ɔ́ á, nááná ó le tútū kóō je ɔyínɔ̄nyīlɔ ékpónú kú nū gwɛ́ɛya.

¹⁸ Ɔwɔicō le da ɔ́ kahíníī, “O ŋmá iyē kú Áyísīki nāa géē lɛ ayááyí nɛ̄ n cokónu ō je gā uwɔ ā á.”

¹⁹Ébrahām le gbɛlá ipú ɔtū kú nū ka ɔ́dāŋ́ ka Áyísīki kōō gekwú, nááná Ɔwɔicō lɔfú je ɔ́ héyī ŋmá ɔlékwū glá kpɔ́. Ɛ́gɛ́nɛ̄ ɔ̄cɛ ī kɛlā ā, Ébrahām mīyɛ Áyísīki oyēeyī ŋmá ɔlékwū.

²⁰ O ŋmá lɛ ɔtōōce nɛ̄ Áyísīki hɔ́hā kú ɔdā nōo í yá ɛ̄cɔ̄bū ā ce Ujékɔ̄pu mla Ísɔ á.

²¹ O ŋmá lɛ ɔtōōce nɛ̄ Ujékɔ̄pu, eko nɛ̄ ó gáā kwú ā, le ɔhā hɛ́ ce ayí kú Ujósɛ̄fu nɔ̄nyīlɔ éyééye abɔ̄ ó túkpɛɛ́ gboce okwutɛ kú nū yɔ̄ ī tá Ɔwɔicō ɔ́gbá ā.

²² O ŋmá lɛ ɔtōōce, eko nɛ̄ Ujósɛ̄fu gáā kwú ā, nōó kɛlā lɛyíkwu oōnyɛ̄ kú ācɛ Ísrɛ̄lu ŋmá Íjīpiti mɛ́mla ɛ́gɛ́nɛ̄ é géē nyi ɔ́ lɛ ā.

²³ O ŋmá lɛ ɔtōōce, yá nɛ̄ ɛ́nɛ́ mɛ́mla ádā Umósīsi kwú ɔ̄ ú tayínū ɔyā ɛtá eko nēé le ɔ́ ma ā, ohígbū kéē má ka ɔyí ā héyīfuú, é yúufi ō tá íne nɛ̄ ɔcɛ́ tū ā nyílá ŋ́.

²⁴ O ŋmá lɛ ɔtōōce nɛ̄ eko nɛ̄ Umósīi le jɛ̄ ā, nōó tá kéē hī ɔ̄ ka ɔyí kú adá kú Uféro ŋ́ má.

²⁵Ó kwú ōwē nōó í má mla ācɔ̄lóhɔ́nyɛtá ikɔkɔ nōó géē má abahi kú ɔdā olɔnyɛ kú íneoōbīya nɛ̄ ó gē gbojī ŋ́ mā.

²⁶Ó gbɛlá kóō lɔhi fíyɛ́ kéē cá ɔ̄ ɛcá ohígbū Ohɔ́nyɛtá fíyɛ́ ɛjɛ̄ɛ̄jī agbénú kú Íjīpiti, ohígbū kóō leyī kú nū kwu ulé nōó í mīyɛ ɛ̄cɔ̄bū.

²⁷O ŋmá lɛ ɔtōōce nɛ̄ Umósīsi nyɛ̄ɛ̄ ŋmá Íjīpiti á, ó yúufi ka ɔcɛ́ ā í cɔ̄nū ŋ́. Ó lɔtū bɛ̄ɛka ɔdā nōó lɛ Ɔwɔicō nɛ̄ ɔ̄cɛ í gē má ŋ́ mā má ā.

²⁸ O ŋmá lɛ ɔtōōce nōó lɛ ɛ̄cī kú onyatá kwajɛ á, anɔ́ɔ ó le ɔ́da je kú ācɛ kéē lɛ oyī mī klá odūngwɔ̄wɛ, cɛ́ɛ́ ká alelékwū-ō-ŋmɔ́cɛ kéē híī ŋmó ayí aflɛ́yí kú ācɛ Ísrɛ̄lu ŋ́ má.

²⁹ O ŋmá ɔtōōce nɛ̄ ācɛ Ísrɛ̄lu le béhé ísu igwɛ̄bɛ́ ā bɛ̄ɛka ajɛ áncā ā. Amáŋ eko nɛ̄ ācɛ Íjīpiti, tíne kéē yá lɛ ā, é le pɛ́ gebí ipú éŋkpɔ̄

³⁰ O ŋmá ɔtōōce nɛ̄ ɔdɔ kú igelī nɛ̄hi kú Ujérīko je ca tāajɛ eko nɛ̄ Ācɛ Ísrɛ̄lu le yɛ jīla anú tá ɛ̄cī ahāapa ā á.

³¹ O ŋmá ɔtōōce nɛ̄ Uréhābu, nōo wɛ akwuna ā, í kwú mla ācɛ nēe lɛ ikpɛ̄yí olɔfú ā ŋ́, ohígbū ka ó mīyɛ ācɛ nēé tū kéē gaá jila ajɛ uwūūwī ā lɔhi.

³² Ɔdí nyá ɔhá nɛ̄ n klla géē ka ā? Eko í yɔ̄ nɛ̄ n géē kɛlā ohígbū Ugídiyɔn, Ubárāki, Usámsin, Ujɛ́futa, Udéfīdi, Usámūwɛ̄lu mɛ́mla ācomɛ́ɛbɛ ā gɛ ŋ́.

³³ O ŋmá lɛ ɔtōōce nɛ̄ ācɛ nēe bá ā kpɛ́fú tá aéwo dúúdú klla le uwá kpó yálé. É hɛ́pɔ̄ olɔhi, anɔ́ɔ é mīyɛ ɔdā nɛ̄ Ɔwɔicō cokónu ō je lɛ uwá ā. É le okónu kú aágábá gwū abɔ̄fú.

³⁴ É le ɔlá nōo cɛ̄ nɛ̄hi nyí, le bū ikwū kú ɔkpacaŋ́gelī acá. É le lɔfú ipú ahi, klla kwú pīya ācɛ olɔfú ipú ɛfú nɛ̄hi, klla le aícɔ́ɔja kú aéwo ɔhá yálé.

³⁵ O ŋmá lɛ ɔtōōce ācɛnyā mīyɛ ācɛ ɔlɛ́ uwā oyēeyī nēé héyī ŋmá ɔlékwū. É yá ācɛ ōhī ɛ́kɛma nɛ̄hi, amáŋ é tá kéē híī hɛ́ uwá tá ŋ́, ohígbū kéē leyīce ka aá géē héyī ŋmá ɔlékwū ga ipú oyēeyī olɔhi fíyɛ́.

³⁶ É yá ācɛ ōhī ɔdā uwēyī klla ŋmó uwā ijē, klla le agbá kpó kwu uwá, lɛ uwá kpó tū inu agbá.

³⁷ É tá ɛcɔ̄ klá uwá, é bī usɔ́ɔ le uwá hɛ́ ɛpa, é bī ɔkpacaŋ́gelī le uwá kpó ŋmó. É bá ī yɛ lɛ ɔkpá ɛwū mɛ́mla ɔkpá álá tū ohí. É bá ipú ɛhá mɛ́mla ɛ́kɛma, é klla yá uwā ōwē.

³⁸É wɛ ācɛ nɛ̄ ɛcɛ í lɔhi jɛ̄ nɛ̄ uwá ī lā gɛ ŋ́. É bá ī yɛ ipú ígbíli, é yɛ ɛyí ɛfu, kē lā ipú ɔ̄gɔ̄ kú ɛyí ɛfu mɛ́mla ajɛ bɛ̄ɛka ɔdā nēé lɛ ɔlɛ́ ŋ́ mā.

³⁹Ɔwɔicō mīyɛ ɛjɛ̄ɛ̄jī ācɛ nēe bá nyā lɔhi ohígbū ɔtū nēé kpóce ā, nááná uwá í mīyɛ ɔdā nɛ̄ Ɔwɔicō cokónu lɛ uwá ɔ́ɔmā ŋ́,

⁴⁰ohígbū ka Ɔwɔicō lɛ ɔdā olɔhi fíyɛ́ tútū lɛ uwá mla alɔ dúú. Ɔdā nōo kwu Ɔwɔicō ɔtū ā wɛ kóō lɛ uwá yájōjīla, ɔ́dāŋ́ kéē lɛ alɔ yájōjīla dúú.