Read idoma ĀCƐ UHÍBRU 12 Bible Online

ĀCƐ UHÍBRU 12 - idoma bible

ĀCƐ UHÍBRU 12

¹Ó lɛ ā, ɛ́gɛ́nɛ̄ ɛwa nɛ̄hi kú ācɛ nēe wɛ ijáalí kú ɔtóōce lɛ alɔ yɛ jīlatá biílí bɛ̄ɛka ojuja āa, ká ālɔ̄ lɛ aɔ́dā dóódu nēe ī gbájí tū alɔ ikpó ā mɛ́mla ɛjɛ̄ɛ̄jī íne nēe ī he alɔ ɔtū ōbīya ā kpó bónū, cɛ́ɛ́ ká ālɔ̄ lɛ ɔtū kú alɔ yéékpó, cɛ́ɛ́ kú ālɔ̄ kwinya nēé tū lɛ alɔ ɔgbínya nēe yɔ̄ iyɔ̄bū ā.

²Ká ālɔ̄ yɔ̄ ī gbɛlá kwu Ujísɔ̄si ojigóógó, anú nōo yá ɔ̄ tɔ́ɔtɛ́ kú ālɔ̄ kpɔ́tūce Ɔwɔicō mɛ́mla o yɔ̄ ī kpɔ́tūce ɔ́ ŋmá eko nɛ̄ alɔ gbɔɔ́ ō kpɔ́tūce Ɔwɔicō ā jāā gaajaajɛ. Ó cɔ̄nyā ohígbū ikwū kú ɛyí ɔcóōnyɔ́kpá nōó gáā kwú ā ŋ́. Ikoko ɔ́ɔmā ohígbū éeyē nōó gáā gwó ā, ó gbɛlá kóō wɛ ɔdūwēyī kú anúɔ gekwú ɛyí ɔcóōnyɔ́kpá ŋ́, anɔ́ɔ abālɔbányā ó cīce abɔ̄lɔ́ná kú akpa kú ɔcɛ́ kú Ɔwɔicō.

³Aá gbɛlá kwu odúúdú ɔdā nōó má eko nɛ̄ ācobīyíne yá ɔ̄ ɔdōbɔ́bí nɛ̄ɛ̄nɛ̄hi ā, ohígbū ɛ́gɔ́ɔmā aá cɛ̄ lɛ ɔtū kú aá gbagbafú, cɛ́ɛ́ kú aá kwúcē ŋ́.

⁴Ipú ofɛ̄fú kú aá eko nɛ̄ ācobīyíne lɛ ɔfú kpó í gwu aá, é kē kpó aá ŋmó eko nɛ̄ aá yɔ̄ ī fɛ̄fú ŋ́.

⁵ Aá kwú mlanyi ɛlā ōtɔ́ɔ̄cɛ ɔtūkwɔtū nɛ̄ Ɔwɔicō ka lɛ aá bɛ̄ɛka ayí nū ā nɛɛ? Ó kahíníī, “Ɔyí um, ā híī je italā nɛ̄ Óndú ā ī yá uwɔ ā ɔdā nɛ̄ńcɛ̄ ŋ́, eko nōó le uwɔ nā tɔ́ɔ́wɛ ō híī bīya awɔ ɔtū ŋ́.

⁶Ohígbū ka Óndú ā gē yá ɔ̄cɛ nɛ̄ ɔtū nū he ɔ́ ā itala, ó klla gē pi ācɛ nōó mīyɛ ka ayí ɔlɛ́ nū ā ahɔ̄.”

⁷Aá lɛ ayīnu kwá akpókónu ká, cɛ́ɛ́ kú aá je ōwē kú aá bɛ̄ɛka italā nɛ̄ ádā gē yá ɔyí nū ā. Ōwē nɛ̄ aá yɔ̄ ī má ā gē mafú ka Ɔwɔicō yɔ̄ ī yá aá ōwē bɛ̄ɛka ayípɛ̄ ɔlɛ́ nū ā. Ó lɛ ɔyí dúú nōo yɔ̄ nɛ̄ ádā nū í yá ɔ̄ italā jéjéee ŋ́ nɛɛ ŋ́.

⁸Ɔ́dāŋ́ kéē yá aá italā bɛ̄ɛka ɛjɛ̄ɛ̄jī ayí nū ohile ā ŋ́, ɔ́ɔmā léka aá wɛ ayí abāābɔ̄yī nū ŋ́, amáŋ aá wɛ ayí obībá.

⁹Ó kōō wɛ ɛ̄nyā ŋ́ nááná, eko nɛ̄ alɔ wɛ ayípɛ̄ nɛ̄ŋcɛ́ ā, alɔ lɛ ádā nēe yá alɔ italā, alɔ kē lɛ ojīlīmā ce uwá. Alɔ í gáā lɛyítáajɛ lɛ ádā kú aálelékwū fíyɛ́ ká ālɔ̄ yēeyī ŋ́ nɛɛ?

¹⁰Ádā alɔ kú ipú ɛcɛ nyā gē yá alɔ italā eko kpií, ɛ́gɛ́nɛ̄ o he uwá ɔtū lɛ ā, amáŋ Ɔwɔicō gē yá alɔ italā o yá kóō le lɔhi lɛ alɔ, cɛ́ɛ́ kóō yá ká ālɔ̄ tīihɔ bɛ̄ɛka anú ā.

¹¹Abālɔbányā, ɛjɛ̄ɛ̄jī ōwē dóódu lɛbɛ̄ɛka ɔdā ōtū íwɔ́tū ā ikɔkɔ nōó géē wɛ ɔdā ō he ɔ̄cɛ ɔtū, amáŋ ekɔ̄bū ó géē gwá īkpō lɛ ācɛ nēe lɔtū kwu ɔ́ ā, īkpō ā wɛ ɛbɔ́ nōo ŋmá lɛ ɔdā olɔhi ō yá.

¹² Aá je abɔ̄ kú aá nōo le gbagbafú ā gico, ká aá lɔfu tū okwúukwu kú aá nēe ī fīyēgbúlú ā iyē!

¹³ Ká aá yá ucē ɔwɛ okpaakpa, cɛ́ɛ́ kú ikpó nōo gē cɛ̄ lɛ aá túkeŋ́gé ā kóō cē ŋ́, ikoko ɔ́ɔmā é lɛ kpó fúlá.

¹⁴Aá lɔfú tīyē cɛ́ɛ́ kú aá bá ɛbɔ́ mla ɛjɛ̄ɛ̄jī ācɛ. Aá klla lɔfú tīye ká aá lā oyēeyī ōtīihɔ, ɔ̄cɛ nōó lā lɛ ā ŋ́ í gáā má Óndú alɔ glá ŋ́.

¹⁵Aá leyī kwɛcɛ ká ɔ̄cɛ dúúmā kóō cīgbīhi kwu Ɔwɔicō nōo ményinyi ācɛ ā ŋ́. Aá leyī kwɛcɛ cɛ́ɛ́ kú ɔ̄cɛ dúúmā kú aá kóō je pīya bɛ̄ɛka ɔcí ohɔ́nɔ nōo í ci aá ɛlɔ̄ɔwɔicō ā, kóō híī bū ipú aá ŋ́, ohígbū ka eko nōó le jɛ̄ ɛ́gɛ́nɛ̄ ɔcí ī jɛ̄ ā, ó géē bī ɛ́fa kú nū le bī ācɛ nyíleyī.

¹⁶ Aá má ka ɔ̄cɛ dúúmā ká aá kóō híī yá unwū ɔnyā bɛ̄ɛka opī ā ŋ́, ámāŋ kóō híī wɛ ɔ̄cɛ nōó ī yúufi Ɔwɔicō ŋ́ lɛbɛ̄ɛka Ísɔ nōo kwú ɔnyākwɔ́cɛ kú nū í lá ohígbū ɔdōlé ā ŋ́.

¹⁷ Igbīhāajɛ ā, aá jé ka, ó tíne kú ádā nū kóō le ɔhā hɛ́ ce ɔ́, amáŋ é le ɔ́ nū Ohígbū kóō má ɔwɛ dúúmā nōó géē lɛ ɔdā nōó yá ā pīyabɔ̄ ŋ́. Ó bī agīje le tíne ɛga nōó géē pīyabɔ̄, nááná ó má ɛga ŋ́.

¹⁸Aá kē wā ɛgiyí ɛfu kú Usáyínāyi nɛ̄ ɔ̄cɛ lɔfú lɛ abɔ̄ kwu ɔ́ glá ā ŋ́, ɛga nɛ̄ ɔlá yɔ̄ ī cɛ̄, ɛga odobū, ɛga nɛ̄ ofúlutu gē tá, ɛ́gɛ́nɛ̄ ācɛ Ísrɛ̄lu yá eko nɛ̄ Ɔwɔicō yɔ̄ ī je íne lɛ uwá ā ŋ.

¹⁹Ɔkɔ kú opo, mɛ́mla ɔkɛ̄la kú ɔ̄cɛ éyi. Eko nɛ̄ ācɛ ā le ɔkɔ ā pó ā, ē gbɔ̄ɔkɔ cɛ́ɛ́ kéē híī pó ɔkɛ̄lā ā igbɔhá gɛ ŋ́.

²⁰Ohígbū kéē lɛyítáajɛ lɛ ɔ́da kú nū ā glá ŋ́. Ɔ́da kaníníī, “Ɔ́dāŋ́ nōó kōō wɛ ɛbɛ́ le iyē kwu ɛfu ā, é í tá ɛcɔ̄ klá anú jāā gbéeko nōó gekwú.”

²¹Ɔkwɛ̄yi nɛ, ɛbɛ ā tūūfi nɛ̄hi nɛ̄ Umósīsi ka á, “N fīyégbúlú mla ufi.”

²²Amáŋ aá gā ɛyí ɛfu kú Usáyɔn, ɛgiyí igelī nɛ̄hi kú Ɔwɔicō oyēeyī, nōo wɛ Ujerúsālɛm kú ɔkpáncō, ɛga nɛ̄ aálelékwū otɛ̄hɔ̄ nēé lɛ áluka ŋ́ le jīla bá.

²³Aá gā ipú ōjīla kú aɔ́kplá nēé lɛ iyē uwā tá ɔkpáncō ā, ɛgiyí ɔ̄cohɛ́pɔ̄ nōo wɛ Ɔwɔicō kú ɔdā dóódu ā, ɛgiyí aálelékwū kú ācɛ oyá olɔhi, nēe le yá jīla ā.

²⁴Aá klla gā ɛgiyí Ujísɔ̄si nōo tá ɔtāhɛ̄ kú ɛka ɛ̄yīpɛ̄ kú Ɔwɔicō mɛ́mla ācɛ, mla oyī nēé mī, ɛ̄nɛ̄ o je íneoōbīya yɛ́ɛhi, ikoko ō dɛ̄gba kú ɔ́ci ō gwō ɛ́gɛ́nɛ̄ oyī kú Ébɛ̄lu yá ā.

²⁵Aá lɛlá kwu ɔ́ kú aá jāhɔ̄ lɛ ɔ̄cɛ nōo kɛlā ā. Ohígbū kóō le bɔ̄bí nɛ̄hi lɛ ācɛ Ísrɛ̄lu nēe tá ō pó ɛlā kú Umósīsi, ɔ̄cocɛ̄hɔ̄ eko nōó kɛlā lɛ uwá ɛfu kú Usáyínāyi ā. Ohígbū ɔ́ɔmā, aá híī gbɛlá ka aá lɔfú kwu glá eko nɛ̄ aá tá kóō jāhɔ̄ lɛ ɔkɔ kú ɔ̄cɛ nōo gē kɛlā ŋmá ɔkpáncō ā.

²⁶Ɔkɔ kú nū jíla ajɛ iyē eko ɔ́ɔmā. Amáŋ abālɔbányā ó lɛ okónu cē kahíníī, “N géē jíla ajɛ iyē igbɔhá ɛ́ɛ́, amáŋ ó wɛ ajɛ ōfōōfūnū ŋ́, ɔkpáncō dúú.”

²⁷Ɛlā nyā “igbɔhá ɛ́ɛ́ “mafú péee ka é géē jíla aɔ́dā néē yá ā iyē klla í kpó uwā ŋmá ajɛ, cɛ́ɛ́ kú aɔ́dā nēé jíliyē glá ŋ́ mā í báajɛ.

²⁸Ohígbū ɔ́ɔmā, alɔ tá ahínyá ohígbū ka alɔ mīyɛ ajɔ̄ɔ̄cɛ́ nōó tū oōjíliyē ŋ́, ɔwɛ ɛ́gɛ́nyā alɔ gē gbā Ɔwɔicō ɛ̄gbā nōo cíkā lɛ ɔ́ mla ojīlīmā mla ufi.

²⁹Ohígbū ka Ɔwɔicō kú alɔ lɛbɛ̄ɛka ɔlá nōo gē yi ɔdā dóódu tāajɛ ā.