Read idoma ĀCƐ UHÍBRU 3 Bible Online

ĀCƐ UHÍBRU 3 - idoma bible

ĀCƐ UHÍBRU 3

¹Ohígbū ɔ́ɔmā, ayínɛ́ um ācɔ̄lóhɔ́nyɛtá, nɛ̄ Ɔwɔicō hīgwú dúú ā! Aá gbɛlá kwu Ujísɔ̄si, nɛ̄ Ɔwɔicō tɛ̄hɔ̄ kóō le pīya Otrɛ̄yí kú Ācogwɛ́ɛya kú otōkpóce nɛ̄ alɔ ka tɛ́ɛcɛ ka alɔ lɛ ā.

²Ó lɛyí táajɛ lɛ Ɔwɔicō, nōo fu ɔ́ kóō yúklɔ́ nyā ā, ɛ́gɛ́nɛ̄ Umósīsi lɛyítáajɛ ipú ɛjɛ̄ɛ̄jī úklɔ́ kú nū ipú inu ɔlɛ́ Ɔwɔicō ā.

³Ɔ̄cɛ nōo gwó inu ā gē lɛ ojīlīmā fíyɛ́ inu nōó gwó āá. Ɔwɛ ékpónú ɔ́ɔmā Ujísɔ̄si cíkā ō lɛ ojīlīmā nɛ̄hi fíyɛ́ Umósīsi á.

⁴Ohígbū ka inu dóódu lɛ ɔ̄cɛ nōo gwó ɔ̄, amáŋ Ɔwɔicō gwó ɔdā dóódu á.

⁵Umósīsi lɛyítáajɛ ipú ɛjɛ̄ɛ̄jī inu ɔlɛ́ Ɔwɔicō, amáŋ ó lɛyítáajɛ bɛ̄ɛka ɔ̄cocɛ̄hɔ̄ ā nɛ̄ n, anɔ́ɔ ó kɛlā kú aɔ́dā nɛ̄ Ɔwɔicō géē kɛlā lɛyíkwu uwá ɛ̄cɔ̄bū.

⁶Amáŋ Ohɔ́nyɛtá yúklɔ́ kú nū ŋmá ɔtū ékpónú bɛ̄ɛka ɔyínɔ̄nyīlɔ nōo ī leyīkwu ɔlɛ́ Ɔwɔicō ā. Alɔ lɛbɛ̄ɛka inu ɔlɛ́ nū ā, ɔ́dāŋ́ ka alɔ lɔtū lɛ klla lɛ ɔtū ká alɔ yéékpónú kú ɔdā nɛ̄ alɔ ī ceyī nū ā.

⁷ Ohígbū ɔ́ɔmā, ɛ́gɛ́nɛ̄ Alelékwū Ihɔ ka kahíníī, “Ɔ́dāŋ́ ka aá lɛ ɔkɔ kú Ɔwɔicō pó ícɛ,

⁸aá híī yíkpɛ̄yí olɔfú tá ɔ̄, ɛ́gɛ́nɛ̄ aádáádā aá yá eko nēé bɛ́yí kwu Ɔwɔicō ā ŋ́, ɛ́gɛ́nɛ̄ é yá ɛ̄cī ɔ́ɔmā ipú ígbíli ā eko nēé já Ɔwɔicō má ā.

⁹Ɔwɔicō ka, abɔ́ɔ ā nɛ̄ aádā aá jé um má, nááná nēé le ɔdā nɛ̄ n yá iháyí ofɛpa ā má āa.

¹⁰Anɔ́ɔ n lɛ ɔnū cɛ̄ tū ipɔ́ɔma ɔ́ɔmā anɔ́ɔ n ka, ‘É gē lɛyí táajɛ gā um ojigóógó ŋ́, é klla kē tá kéē lɛyí táajɛ lɛ aíne kú um.’

¹¹N lɛ ɔnū cɛ̄, anɔ́ɔ n lɛ okónu tá ka, ‘É gáā ga ipú ajɛ ɛga nɛ̄ n géē yɛ í je omlɛ́nyɔ́ lɛ uwá ā ŋ́.’”

¹²Aá leyī kwɛcɛ, ayínɛ́ um ācɔ̄lóhɔ́nyɛtá, cɛ́ɛ́ ká ɔ̄cɛ dúú kú ipú aá kóō lɛ ɔtū obɔ̄bí nɛ̄ ó ī cɛ̄ɛ̄lā ŋ́ mā ŋ́, ohígbū nɛ̄ ó géē lɛ aá eyī pīya ŋmá ɛgiyí Ɔwɔicō nōo yēeyī āa.

¹³Amáŋ aá lɔfú tū ɔ́mpa aá iyē ɛ̄cī dóódu, ɔdā nōo yá ɛ́ɛ́ nɛ̄ ɛlā nēé tá ipú ɔkpá kú ɛlɔ̄ɔwɔicō ka “ɛ̄cī” ā, cɛ́ɛ́ ká ɛ́plá kú ínōbīya kóō je ɔtū ká aá yá lɔfú ŋ́.

¹⁴Ohígbū ka alɔ wɛ ācɛ o yúklɔ́ tɔ̄há mla Ohɔ́nyɛtá ɔ́dāŋ́ ka alɔ lɛ ɔtū kú alɔ yéékpónú, yɔ̄ ī kpɔ́tūce Ɔwɔicō lɔfú bɛ̄ɛka eko nɛ̄ alɔ cɛ̄ɛ̄lā nū aflɛ́yí āa.

¹⁵Ɛ̄nyā wɛ ɔdā nēé tá tū ipú ɔkpá kú ɛlɔ̄ɔwɔicō ka, eko dúúmā nēé ka, “Ɔ́dāŋ́ ka aá lɛ ɔkɔ kú Ɔwɔicō pó, aá híī yíkpɛ̄yí olɔfú tá ɔ̄ ɛ́gɛ́nɛ̄ aádáádā aá yá eko nēé bɛ́yí kwu Ɔwɔicō ā ŋ́.”

¹⁶Ānyɛ wɛ ācɛ nēe pó ɔkɔ kú Ɔwɔicō, anɔ́ɔ é bɛ́yíkwu ɔ́ ā? Odúúdú ācɛ nɛ̄ Umósīsi kpó tɔ̄ɔkwu ŋmá Íjīpiti ā nɛ.

¹⁷Ānyɛ wɛ ācɛ nɛ̄ Ɔwɔicō kē cɔ̄nū tū uwā iháyí ofɛpa ā? Ó cɔ̄nū mla ācɛ nēe bīyíne nēe kwú báajɛ ipú ígbíli ā nɛ.

¹⁸Ānyɛ nɛ̄ Ɔwɔicō kē tokónu lɛ uwá kéē gáā nyɔ̄ ipú ajɛ ɛga nōó je omlɛ́nyɔ́ lɛ uwá ŋ́ mā a? É wɛ ācɛ nēe bɛ́yí kwu ɔ́ ā nɛ̄ n.

¹⁹Alɔ má ka uwá í nyɔ̄ ipú ajɛ ā glá ŋ́ ohígbū kéē cɛ̄ɛ̄lā Ɔwɔicō ŋ́.