Read idoma ĀCƐ UHÍBRU 4 Bible Online

ĀCƐ UHÍBRU 4 - idoma bible

ĀCƐ UHÍBRU 4

¹Ɛ́gɔ́ɔmā, ɛ́gɛ́nɛ̄ okónu nōó ce ka alɔ géē nyɔ̄ ɛga nōó í je omlɛ́nyɔ́ lɛ alɔ ā kē yɔ̄ kpɔ́ ɛ́ɛ́ mā, alɔ leyī kwɛcɛ, yɔ̄ ī yúufi, cɛ́ɛ́ kéē híī ŋmó ɔ̄cɛ dúúmā kú aá ɛpɔ̄bí nɛ̄ Ɔwɔicō í gaá je omlɛ́nyɔ́ nōó cokónu kú nū ā lɛ ɔ́ ŋ́ nɛɛ ŋ́.

²Ohígbū ka alɔ le Ɔ̄kōōlɔhi ā pó ɛ́gɛ́nɛ̄ é pó dúú ā. Amáŋ ɛlā nēé ka lɛ uwá ā í tīile lɛ uwá ŋ́, ohígbū kéē kpɔ́tūce ɛlā kú omlɛ́nyɔ́ nēé gaá je lɛ uwá ā ŋ́.

³ Amáŋ alɔ nēe cɛ̄ ā le omlɛ́nyɔ́ ɔ́ɔmā lɛ, ɛ́gɛ́nɛ̄ ó ī ka kahíníī, “N le cɔ̄nū, anɔ́ɔ n lɛ okónu tá ka, ‘É gáā ga ipú ajɛ ɛga nɛ̄ n géē yɛ í je omlɛ́nyɔ́ lɛ uwá ā ŋ́.’” Ó ka ɛ̄nyā nááná nɛ̄ úklɔ́ kú nū mɛ ŋmá eko nōó yá ɛcɛ ā.

⁴4 Ohígbū ka ó kɛlā ɛga éyi ipú ɔkpá kú ɛlɔ̄ɔwɔicō ā lɛyíkwu ɛ̄cī ɔ́mahāapa kahíníī, “Anɔ́ɔ Ɔwɔicō mlɛ́nyɔ́ ŋmá ɛjɛ̄ɛ̄jī úklɔ́ kú nū ɛ̄cī ɔ́mahāapa á.

⁵ Anɔ́ɔ amānyā ó klla ka kpɔ́ kahíníī, “É gáā ga ipú ajɛ ɛga nɛ̄ n géē yɛ í je omlɛ́nyɔ́ lɛ uwá ā ŋ́.”

⁶É jɛga lɛ ācɛ nēe pó ɔkōōlɔhi aflɛ́yí ā kéē mlɛ́nyɔ́ ŋ́, ohígbū kéē kpɔ́tūce ɛlā kú omlɛ́nyɔ̄ nēé gaá je lɛ uwá ā ŋ́. Ó le ācɛ nɛ̄ Ɔwɔicō jɛga lɛ uwá ká mlɛ́nyɔ́.

⁷ Anɔ́ɔ Ɔwɔicō le ɛ̄cī ɔhá tū nōó í je ɛga lɛ ācɛ kéē mlɛ́nyɔ́, ɛ̄cī ɔ́ɔmā wɛ “ícɛ”. Iháyí alɛwa le gla ó kɛlā bū okónu kú Udéfīdi ipú ɔkpá kú ɛlɔ̄ɔwɔicō nēé tɛtɛ kɛlā ŋmá anú gbɔbū ā kahíníī, “Ɔ́dāŋ́ ka aá lɛ ɔkɔ kú Ɔwɔicō pó ícɛ, aá híī tá ō bī ɛlā nɛ̄ Ɔwɔicō ka ā le yúklɔ́ ŋ́.”

⁸ Ohígbū ka ɔ́dāŋ́ ka Ujóssuwa kwú omlɛ́nyɔ́ nɛ̄ Ɔwɔicō ce uwá okónu ō je ā ú lɛ uwá nɛɛ, Ɔwɔicō í géē yɛ í kɛlā igbīhāajɛ ohígbū ɛ̄cī ā ɔhá gɛ ŋ́.

⁹Ɛ́gɛ́nɛ̄ ó lɛ ā, omlɛ́nyɔ́ nɛ̄ Ɔwɔicō lɛ ɛ̄cī ɔ́mahāāpa ā, hile lɛ ācɔ̄lóhɔ́nyɛtá kpɔ́ ɛ́ɛ́.

¹⁰ Ɔ́dāŋ́ ka ɔ̄cɛ dúúmā nōo mīyɛ omlɛ́nyɔ́ kú Ɔwɔicō ó géē mlɛ́nyɔ́ ŋmá úklɔ́ kú nū, ɛ́gɛ́nɛ̄ Ɔwɔicō mlɛ́nyɔ́ ŋmá úklɔ́ kú nū ā.

¹¹Abɔ̄ ó lɛ ā, ālɔ̄ lɔfú tīyē ká ālɔ̄ mīyɛ omlɛ́nyɔ́ ā, cɛ́ɛ́ ká ɔ̄cɛ dúúmā kú alɔ kóō híī yíkpɛ̄yí olɔfú nōo géē ci ɔ́ ō mīyɛ omlɛ́nyɔ́ ɛ́gɛ́nɛ̄ ó ci aádáádā alɔ ohígbū ɔtū á kpóce ŋ́ kú uwā ā ŋ.

¹²Ohígbū ka ɛlā kú Ɔwɔicō yēeyī, ó klla lɔfú, anú kōō lulé fíyɛ́ ɔkpacaŋ́gelī nōo lɛ eyī ɛpa ā á. Ó ī gwū ɔ̄cɛ jāā ga eyīpú gaá kwu odo mla eko mla ogó kú ikpokwú kú nū, ó klla jé únwū ɔdā kú ɔtū mla ɛlá nɛ̄ ɔ̄cɛ gē gbo ipú ɔtū kú nū ā.

¹³Ó lɛ ɔdā dúúmā nēé le tayínū ŋmá ɛgiyí Ɔwɔicō glá ŋ́, amáŋ ɛjɛ̄ɛ̄jī ɔdā nɛ̄ Ɔwɔicō yá ā tóhɛ́ɛwa péee, klla tɛ́ɛcɛ áncā ikpēyī kú nū. Anú ā wɛ ācɛ nɛ̄ alɔ í kɔɔkɔ kú uklɔ́ kú alɔ iyɔ̄bū nū á.

¹⁴Ɛ́gɛ́nɛ̄ alɔ lɛ otrɛ̄yí nɛ̄hi kú ācogwɛ́ɛya nōo le tá ɔkpáncō iyɔ̄bū Ɔwɔicō ā, Ujísɔ̄si Ɔyínɔ̄nyīlɔ kú Ɔwɔicō ā, alɔ lɛ abɔ̄ fúlá tū ɔtū nɛ̄ alɔ kpóce ɔ̄ nɛ̄ alɔ cɛ̄ tɛ́ɛcɛ lɔfú lɔfú ā.

¹⁵Otrɛ̄yí kú ācogwɛ́ɛya nōo kwɛyí alɔ nyā wɛ ɔ̄cɛ nɛ̄ ahi nɛ̄ alɔ kwú ā kwú ɔ̄ iyē nɛ̄hi, ohígbū ka Ebilíi lɔfú tīyē le yá kóō lɛ íne bīya ɔwɛ dóódu nōó lɛ já alɔ má ā, amáŋ ó kē bīyíne ŋ́.

¹⁶Ohígbū ɛ́gɔ́ɔmā ká ālɔ̄ lɛ ɔtū kú alɔ yéékpó, cɛ́ɛ́ kú ālɔ̄ gā ɛgiyí Ɔwɔicō ō gbonɛnɛ. Abɔ́ɔ ā, ó géē méyinynyi alɔ, klla í tá alɔ abɔ̄ eko nɛ̄ alɔ cɛgbá otábɔ̄.