Read idoma ĀCƐ UHÍBRU 7 Bible Online

ĀCƐ UHÍBRU 7 - idoma bible

ĀCƐ UHÍBRU 7

¹Ɔ̄cɛ nɛ̄ é hī ka Umɛlikísɛ̄dɛki nyā wɛ ɔcɛ́ kú Usálɛm mɛ́mla ɔ̄cogwɛ́ɛya kú Ɔwɔicō nōo lɔfú fíyɛ́ dúú ā. Eko nɛ̄ Ébrahām yɔ̄ ī pīyɛyí ŋmá ɔgbɛ́fú ɛga nōó yá aɔ́cɛ́ ɛnɛ lé ā, Umɛlikísɛ̄dɛki jīla ɔ́ ɔwɛ lɛ ɔhā hɛ́ ce ɔ́.

²Anɔ́ɔ Ébrahām lɛ éyi ŋmá ipú igwó kú ɔdā dóódu nōó kpó ŋmá ɔgbɛ́fú ā kpó lɛ Umɛlikísɛ̄dɛki á. Ɔdā nōo wɛ ɛyí kú iyē aflɛ́yí kú nū ā wɛ, “Ɔcɛ́ kú ɔdā okpaakpa ō yá”, abɔ̄ nōó kē wɛ ɔcɛ́ kú ɛga nēé hī ka Usálɛm dúú ā, ɛyí kú iyē kú nū ā klla wɛ “Ɔcɛ́ kú ɛbɔ́”.

³Ó lɛ ádā ŋ́, ó lɛ ɛ́nɛ́ ŋ́, ó klla lɛ ipɔ́ɔma ŋ́. Ó lɛ eko nēé ma ɔ́ ŋ́, ó kē lɛ eko nɛ̄ oyēeyī kú nū kē í mɛ ŋ́. Amáŋ abɔ̄ ó le lɛbɛ̄ɛka Ɔyínɔ̄nyīlɔ kú Ɔwɔicō ā, ó wɛ ɔ̄cogwɛ́ɛya piyóó.

⁴Aá má ɛ́gɛ́nɛ̄ Umɛlkísɛ̄dɛki lɔfú nɛ̄hi lɛ ā. Ébrahām nōo wɛ ádā nɛ̄hi nōo lóofu nɛ̄hi, nááná ā, lɛ ɔdā nōó bī ŋmá ɔgbɛ́fú ā kɔ̄ ɛga igwó, anɔ́ɔ ó kwú ɛga éyi ŋmá ipú igwó ú kpó lɛ ɔ́ á.

⁵Anɔ́ɔ é lɛ ɔ́da je lɛ ācogwɛ́ɛya nēe ŋmá ipɔ́ɔma kú ayí kú Ulífāyi ā ípú íne kú Umósīsi ā kéē mīyɛ éyi ŋmá ipú igwó ŋmá ɛgiyí ācɛ dóódu kú Ísrɛ̄lu, ɔ́ɔmā wɛ, o ŋmá ɛgiyí ācɛ ɔlɛ́ uwā, nááná nēé wɛ ayááyí kú Ébrahām dúú ā.

⁶Amáŋ Umɛlikísɛ̄dɛki nōó ŋmá ipɔ́ɔma kú ayí kú Ulífāyi ŋ́ mā, mīyɛ éyi ŋmá ipú igwó ŋmá abɔ̄ Ébrahām, anɔ́ɔ ó le ɔhā hɛ́ ce ɔ́ á, Ébrahām wɛ ɔ̄cɛ nɛ̄ Ɔwɔicō cokónu lɛ ɔ́.

⁷Ó lɛ áafú ŋ́ ka ɔ̄cɛ nōo ī hɔ́hā ce ɔ̄cɛ ā nwuné fíyɛ́ ɔ̄cɛ nēé hɔ́hā ce ɔ́ ā á.

⁸Ipú ɛlā kú ācogwɛ́ɛya ā, ācɛ nēe kwú glá gē mīyɛ éyi ŋmá ipú igwó á, amáŋ ipú ɛlā kú Umɛlikísɛ̄dɛki ā, é je éyi ŋmá ipú igwó lɛ ɔ̄cɛ nōo yēeyī piyóó, ɛ́gɛ́nɛ̄ é tá ipú ɔkpá kú ɛlɔ̄ɔwɔicō lɛ ā.

⁹Anɔ́ɔ ɛ́gɛ́nɛ̄ ɔ̄cɛ ī kɛlā ā, eko nɛ̄ Ébrahām gbā éyi ŋmá ipú igwó ā, ācɛ Ulífāyi nɛ̄ aádáádā uwā mīyɛ éyi ŋmá ipú igwó ā kē gbā ɔ̄ dúú.

¹⁰Ohígbū ka anú abɔ̄yī nū yɔ̄ ipú aádáádā nū, Ébrahām, eko nɛ̄ Umɛlikísɛ̄dɛki jīla Ébrahām ɔwɛ ā.

¹¹Ācogwɛ́ɛya nēe ŋmá ipú ayááyí kú Ulífāyi ā wɛ āyā nōo cɛgbá ipú íne nɛ̄ Ɔwɔicō je lɛ ācɛ Ísrɛ́lu ā. Abālɔbányā, ɔ́dāŋ́ ka ācogwɛ́ɛya nēe ŋmá ipɔ́ɔma kú Ulífāyi le ɔdā nēé cíkā ō yá ā yá nɛɛ, ó géē yɛ í cɛgbá kú ɔ̄cogwɛ́ɛya ɔhá bɛ̄ɛka Umɛlikísɛ̄dɛki kóō wɛ̄ɛcɛ gɛ ŋ́, ó lɛbɛ̄ɛka ɔ̄cogwɛ́ɛya nēe ŋmá ipɔ́ɔma kú Árɔ̄ni ā ŋ́.

¹²Ohígbū ka eko nēé lɛ ɔgba kú ācogwɛ́ɛya ā fūlabɔ̄, ofūlabɔ̄ gē yɔ̄ ipú íne ā dúú.

¹³Ohígbū ka, Óndú alɔ nēé ka odúúdú aɔ́dā nēe bá nyā ohígbū nū ā, wɛ ɔ̄cɛ ipɔ́ɔma ɔhá nɛ̄ ɔ̄cɛ dúúmā kú uwā í yá ofídákā jéjéē ɛ́ɛ́ ŋ́ mā.

¹⁴Ohígbū ka, ó le cāā ka Óndú alɔ ŋmá ipɔ́ɔma kú Ujúda, Umósīsi í kē ka ɔdā dúúmā ohígbū ɔ̄cogwɛ́ɛya nōo ŋmá ipɔ́ɔma ɔ́ɔmā ŋ́.

¹⁵Ɛlā nɛ̄ n húmáyī ka ā má tá péee, ɔ̄cogwɛ́ɛya ɔhá nōo lɛbɛ̄ɛka Umɛlikísɛ̄dɛki ā le bɛ̄cɛ ɛɛ́.

¹⁶Ó wɛ oŋmá íne mɛ́mla ɔ́da lɛyíkwu ipɔ́ɔma ɛga nōó ŋmá ā yá nōó je ɔ́ pīya ɔ̄cogwɛ́ɛya ā ŋ́, amáŋ o ŋmá lɛ ɔfú kú oyēeyī éyi nōó yɔ̄ piyóó ā nōó je pīya ɔ̄cogwɛ́ɛya á.

¹⁷ Ohígbū kéē cɛ̄ ijáalí kú nū kahíníī, “Awɔ wɛ ɔ̄cogwɛ́ɛya piyóó, bɛ̄ɛka Umɛlikísɛ̄dɛki ā.”

¹⁸Anɔ́ɔ é le íne nɛ̄ncɛ̄ ā ŋmónyí, ohígbū kóō lɔfú iyē ŋ́ ɛ́ɛ́ nōó kōō tīile gɛ ŋ́ má.

¹⁹Ohígbū ka íne kú Umósīsi í yá ɔdā dúúmā jīla glá ŋ́. Anɔ́ɔ abālɔbányā Ɔwɔicō le yá kú ālɔ̄ leyīce ɔdā nōo lɔhi fíyɛ́, nōo í cɛ̄ lɛ alɔ túblá Ɔwɔicō.

²⁰O ka tū ɔ̄ ipú ā, Ɔwɔico le ɔkpá gbo, amáŋ ó kē gbo ɔkpá eko nɛ̄ ó fu ācogwɛ́ɛya ɔhá ā ŋ́.

²¹Amáŋ Ujísɔ̄si le ɔkpá gwá ɛ́ɛ́ nēé fu ɔ́ ɔ̄cogwɛ́ɛya eko nɛ̄ Ɔwɔicō ka, “Óndú alɔ le ɔkpá gbo, ó gáā pīya ɔtū kú nū abɔ̄ ŋ́, ‘A wɛ ɔ̄cogwɛ́ɛya piyóó.’”

²²Ɔdā ɛyɛ́ɛ́yí lɛyíkwu ɛka ō gbo ā wɛ ka Ujísɔ̄si yá ɛ́ɛ́ nɛ̄ ɛka ɛ̄yīpɛ̄ nyā tɔ́ɔtɛ́ á.

²³Ɔdā ɛyɛ́ɛ́yí ɔhá ā wɛ ka ācogwɛ́ɛya ɔhá ā lɛwa, ohígbū ka é le pɛ́ gekwú, anɔ́ɔ é gɔbū mla úklɔ́ kú uwā glá gɛ ŋ́.

²⁴Amáŋ Ujísɔ̄si yēeyī piyóó ā, anɔ́ɔ é je úklɔ́ kú ɛya ōgwó kú nū ā lɛ ɔ̄cɛ ɔhá glá ŋ́ má.

²⁵Ɛ́gɔ́ɔmā ó lɔfú nyā ācɛ nēe gē yɛ iyē nū ga ɛgiyí Ɔwɔicō ā tá eko dóódu glá, ɛ́gɛ́nɛ̄ ó yēeyī eko dóódu cɛ́ɛ́ kóō yɔ̄ ī gbɔ̄ɔkɔ lɛ Ɔwɔicō ohígbū uwā ā.

²⁶Ujísɔ̄si wɛ otrɛ̄yí kú ācogwɛ́ɛya nōo yá ɛjɛ̄ɛ̄jī ɛgbá kú alɔ lɛ alɔ. Ó tīihɔ, ó yá ɔdōbɔ̄bí dúúmā ŋ́, ɛ́ɛ́ nōó kōō lɛ́pɔ̄bí eko dúúmā ŋ́ má. Ɔwɔicō lɛ ɔ́ hɛ́gɛcɛ ŋmá ɛgiyí ācobīyíne, anɔ́ɔ Ɔwɔicō kwú ɔ̄ ú gicō i tá ɔkpáncō á.

²⁷Ó lɛbɛ̄ɛka aótrɛ̄yí kú ācogwɛ́ɛya ohile ā ŋ́. Ó cɛgbá kóō gwɛ́ɛya lɛ Ɔwɔicō ɛ̄cī dóódu ohígbū iyī nū aflɛ́yí, cɛ́ɛ́ ó klla le yá ohígbū ācɛ ā gɛ ŋ́. Ó gwɛ́ɛya igbeékpónú ohígbū odúúdú ācɛ, eko nōó je iyī nū gwɛ́ɛya ā.

²⁸Ɛ́gɛ́nɛ̄ íne kú Umósīsi lɛ ā, ācɛ nēé jōōjīla ŋ́ mā nēé gē fu kéē je pīya aótrɛ̄yí kú ācogwɛ́ɛya á, amáŋ Ɔwɔicō lɛ Ɔyínɔ̄nyīlɔ kú nū nōo le yá jōōjīla piyóó ā fu ŋmá le ɛka nɛ̄ ó gbo igbīhāajɛ kú íne nōó je lɛ Umósīsi ā.