Read idoma ĀCƐ UHÍBRU 8 Bible Online

ĀCƐ UHÍBRU 8 - idoma bible

ĀCƐ UHÍBRU 8

¹Ɛyí ɔdā nɛ̄ alɔ gē ka nyā wɛ ka alɔ lɛ otrɛ̄yí kú ācogwɛ́ɛya nōo lɛbɛ̄ɛka ɔ̄cɛ nɛ̄ alɔ húmáyī ka ā, nōo cīce abɔ̄lɔ́ná kú úgādā ɔcɛ́ kú Ágábáidu ɔkpáncō.

²Abɔ́ɔ ā, ó yɔ̄ ī yúklɔ́ lɛbɛ̄ɛka otrɛ̄yí kú ācogwɛ́ɛya ipú inu eyīpú otīihɔ, nōo wɛ ipú áklɔ̄kpīihɔ ɔkwɛ̄yi, nɛ̄ Óndú alɔ gwó ā, nōó wɛ ɔ̄cɛ bī abɔ̄ gwó ŋ́.

³É gē fu otrɛ̄yí kú ācogwɛ́ɛya dóódu kéē je ɛhi mɛ́mla o gwɛ́ɛya lɛ Ɔwɔicō. Ɛ́gɔ́ɔmā ó cɛgbá ká otrɛ̄yí kú ācogwɛ́ɛya nyā kóō lɛ odée nōó géē yá piíí.

⁴Abālɔbányā, ɔ́dāŋ́ ka ó yɔ̄ ɛcɛ nɛɛ, ó gáā wɛ ɔ̄cogwɛ́ɛya fúlufúlu ŋ́, ohígbū ipú ɛcɛ amānyá, é gē fu ācogwɛ́ɛya kéē gwɛ́ɛya o ŋmá lɛ ɛ́gɛ́nɛ̄ íne kú ācɛ Ujíyu ka lɛ ā.

⁵Ɔdā nɛ̄ ācogwɛ́ɛya nēe bá nyā gē yá ā lɛbɛ̄ɛka omágbla mɛ́mla ofu kú ɔdā nōo yɔ̄ ipú ɔkpáncō ā. Ohígbū ka eko nɛ̄ Umósīsi gáā gwó áklɔ̄kpīihɔ ā, Ɔwɔicō le ukɔ́ tū ɔ̄ kahíníī, “Má ka a lɛ ɔdā dóódu yá bɛ̄ɛka ɛ̄nɛ̄ é mafú gā awɔ ɛyí ɛfu ā.”

⁶Amáŋ abālɔbányā, Ɔwɔicō kwú úklɔ́ kú ɔ̄cogwɛ́ɛya nōo lɔhi fíyɛ́ ákú ācɛ ohile ā ú lɛ Ujísɔ̄si ɛɛ́. Ó wɛ ɔwɛ ékpó mlá ɛka nōó yā tū ɔtāhɛ̄ kú Ɔwɔicō mɛ́mla ācɛ ɔlɛ́ nū ā lɔhi fíyɛ́, ohígbū kóō ŋmá lɛ okónu kú aɔ́dā olɔhi fíyɛ́ ā.

⁷Ohígbū ka ɔ́dāŋ́ ka ɛka kú aflɛ́yí ā í lɛ unwalu ŋ́ nɛɛ, ó géē yɛ í cɛgbá kéē je ɔ́mpa gɛ ŋ́.

⁸Amáŋ, Ɔwɔicō má ka ɛka ā í yá ɛgbá ŋ́ mā, nōó da ācɛ Ujíyu kahíníī, “Óndú ā ka ɛ̄cī ā géē wā, nɛ̄ n géē gbo ɛka ɛ̄yīpɛ̄ mla ācɛ Ísrɛ̄lu mɛ́mla ācɛ Ujúda.

⁹Ó gáā lɛbɛ̄ɛka ɛka nɛ̄ n gbo mla aádáádā uwā ŋ́ eko nɛ̄ um lɛ abɔ̄ tū uwā abɔ̄ ŋmá ajɛ kú Íjīpiti ā ŋ́. Ohígbū ka é lɛ ɛka nɛ̄ n gbo mla uwá tū ŋ́. Óndú ā ka, ɔ́ɔmā ɔ́ɔ yá nɛ̄ anúɔ í lɛlá wu uwá gɛ ŋ́ má.

¹⁰Abālɔbányā, ɛ̄nyā wɛ ɛdɔ kú ɛka nɛ̄ n géē gbo mla Ācɛ kú Ísrɛ̄lu, ɛ̄cɔ̄bū, Ami nōo wɛ Óndú ā yɔ̄ ī kɛlā ka, n géē kpó íne kú um tū ipú ɔtū kú uwā, klla géē lɛ íne ā tá bá ɔtū kú uwā. N géē wɛ Ɔwɔicō kú uwā, é géē wɛ ācɛ ɔlɛ́ um.

¹¹Ɔ̄cɛ dúúmā kú uwā í gáā nwū ɔ̄cɛ ɔlɛ́ nū ámāŋ ɔyínɛ́ nū ka, ‘Jé Óndú alɔ ā’ ŋ́. Ohígbū ka ɛjɛ̄ɛ̄jī uwā géē jé um, o ŋmá ɔ̄cɛ nɛ̄ŋcɛ́ fíyɛ́ dúú kú uwā ga ɔ̄cɛ nɛ̄hi fíyɛ́ dúú ā.

¹²N géē je íne nēé bīya ā yá uwā ɛhi. Ń kē gáā blakwu íne nēé bīya ā gbóógbóō gɛ ŋ́.”

¹³Eko nɛ̄ Ɔwɔicō gē kɛlā ɛka ɛ̄yīpɛ̄ ā, ɔ́ɔmā lé ka ɛka kú aflɛ́yí ā í tīile gɛ ŋ́. Ɔdā nōó tīile ŋ́, nōo klla gbɔɔ́ ō gbo ɛnɛ̄ncɛ̄, le bá oōmɛ ɛɛ́.