Read idoma ĀCƐ UHÍBRU 9 Bible Online

ĀCƐ UHÍBRU 9 - idoma bible

ĀCƐ UHÍBRU 9

¹Ɛka kú aflɛ́yí ā lɛ íne kú ɛ̄gbā ō gbā mɛ́mla ɛga o gbɛ̄ɛ̄gbā ipú ɛcɛ nyā dúú.

²É lɛ Áklɔ̄kpīihlɔ gwó. Ipú inu eyɛ̄ɛ̄cɛ kú nū ā, nēé hī ka Ɛga o tīhɔ. Ipú nū ā nēé kpó ɔdā ō lɛ agege ce ɔ́ mla ítéblu mla igbō kú Iyɔ̄bū Ɔwɔicō ā bá á.

³Igbīhi ukɔ́tim nēe kɔ̄ Áklɔ̄kpīihɔ ā, Áklɔ̄kpīihɔɛ ɔhá yɔ̄ abɔ́ɔ, é hī ɔ̄ ka ɛga otīihɔ fíyɛ́ dúú ā.

⁴Aɔ́dā nēe bá nyā bá ipú nū, ede kú ugóolu (oje ɔdɔ) nēé gē yi utulalī ɔlá ɛyí nū, ikpati kú okónu ō ce nɛ̄ ɛjɛ̄ɛ̄jī iyɛ̄cɛ kú nū wɛ ugóolu (oje ɔdɔ). Aɔ́dā nēe bá nyā bá ipú ikpati ā, ógo ugóolu (oje ɔdɔ) nɛ̄ umána yɔ̄ ipú nū, okwutɛ kú Árɔ̄ni nōo lū bɛ̄ɛka ɔcí ā, Usilétí nēé tá íne igwó tū ipú nū ā.

⁵Aɔ́dā ō lɛ acá ɛpa nēe kwɛyí Ɔwɔicō abɔ́ɔ nēé hī ka Ucérūbim ā, háyi ɛhícō kú ikpati ā, cɛ́ɛ́ acá kú uwā gbobobowú ce ɔ̄wū kú ikpati nēé hī ka ɛga oōyājɛ kú eyīnyinyi ā. Abālɔbányā í wɛ eko nɛ̄ alɔ ī kɛlā liyɛ́liyɛ́ lɛyíkwu aɔ́dā nēe bá nyā éyééye glá ɛ́ɛ́ ŋ́.

⁶Eko nɛ̄ ɔdā nēe bá nyā le tútū ā, ācogwɛ́ɛya ā gē nyɔ̄ ipú Áklɔ̄kpīihɔ eyɛ̄ɛ̄cɛ ā gē nyɔ̄ gaá yúklɔ́ kú uwā ɛ̄cī dóódu.

⁷Amáŋ otrɛ̄yí kú ācogwɛ́ɛya ōfōōfūnū gē nyɔ̄ ipú Áklɔ̄kpīihɔ ɔ́mpa á. Ó gē nyɔ̄ igbo éyi ipú iháyí. Ɔ́dāŋ́ kóō bī oyī nōó géē le gwɛ́ɛya ohígbū ínoōbīya kú iyī nū mɛ́mla ákú ācɛ ɔlɛ́ nū ā ŋ́, ó gáā nyɔ̄ ŋ́.

⁸Alelékwū Ihɔ gē nwū ɔdée péee ŋmá ɔdā nēé miya bá nyā ka é nwūla ɔwɛ o yɛ ga Ɛga otīhɔ dúú ā ɛ́ɛ́ ŋ́, ɔdā nōo yá ɛ́ɛ́ nēé yɔ̄ ī yúklɔ́ ipú Áklɔ̄kpīihɔ kú iyɛ̄cɛ ā kpɔ́ ɛ́ɛ́ mā.

⁹Ɛ̄nyā wɛ ɔdōcābɔ̄ nōo ī mafú ɔdā nōo ī yá eko nyā a. Odúúdú aɔ́dā nēe bá nyā mafú ka ɛhi mɛ́mla aɛ́bɛ́ nēé kpó gwɛ́ɛya lɛ Ɔwɔicō ā í lɔfú yá ɔtū kú ācɛ o gbɛ̄ɛ̄gbā kóō le jōjīla glá ŋ́.

¹⁰Aɔ́dā nēé le gwɛ́ɛya lɛ Ɔwɔicō ā wɛ ɔdōlé mɛ́mla ɔdā ō gwá mɛ́mla uculo kú iyē ō gwu ɛyɛ́ɛyɛ́yí. Aɔ́dā nēe bá nyā wɛ aíne kú uculo kú iyɛ̄cɛ kú ɔkpíyē ō gwu nɛ̄ n, ó kē ī yúklɔ́ kwɛjī eko nɛ̄ Ɔwɔicō kwú ɔ́da ɛ̄yīpɛ̄ ú kwaajɛ.

¹¹Abālɔbányā Ohɔ́nyɛtá gā bɛ̄ɛka otrɛ̄yí kú ācogwɛ́ɛya kú ɔdā olɔhi dóódu nēe yɔ̄ amānyā tɛtɛ ɛ́ɛ́ mā. Áklɔ̄kpīihɔ nōó yúklɔ́ ipú nū ā nwuné fíyɛ́, ó klla le jōōjīla fíyɛ́. Ó wɛ Áklɔ̄kpīihɔ nēé bī abɔ̄ kú ɔ̄cɛ gwó ŋ́, ɔ́ɔmā lé kōō wɛ ipú aɔ́dā nēé yá ipú ɛcɛ nyā ŋ́.

¹²Ó le bēhé ga ɛga otīihɔ fíyɛ́ dúú ā igbo ékpó ōfōōfūnū, ó bī oyī kú ɛwū mɛ́mla ákú ɔbá ɛna gaá le gwɛ́ɛya ŋ́. Ikɔɔkɔ ɔ́ɔmā ó kwú oyī kú abɔ̄yī nū ú gwɛ́ɛya, anɔ́ɔ ɔdā nōó yá ā cɛ̄ lɛ Ɔwɔicō le alɔ nyatá piyóó á.

¹³Ācogwɛ́ɛya ā gē mī oyī kú ɛwū mɛ́mla oyī kú ɔbá ɛna mɛ́mla ewo kú ɔyí ɛna o pá ɔlá dúúdú klá ācɛ nēe kpúúgla ā iyē, ɔdā nēé yá nyā gē le uwá gwu ŋmá úgla nēé kpó ā.

¹⁴Abɔ̄ ɔdā nēé yá nyā wɛ ɔkwɛ̄yi ā, oyī kú Ohɔ́nyɛtá nēé je gwɛ́ɛya ā géē yúklɔ́ nɛ̄hi. Ó kwú iyīnū ú gwɛ́ɛya okpaakpa lɛ Ɔwɔicō o ŋmá lɛ alelékwū nōo ī kwú ŋ́ mā. Ɔ́ɔmā yá ɛ́ɛ́ nɛ̄ oyī kú Ohɔ́nyɛtá géē gwu ɔtū kú alɔ ŋmá aɔ́dā obɔ̄bí mɛ́mla uculo ɛ̄kɛ̄mgbɛ̄ nɛ̄ alɔ yá ā, o yá ɛ́ɛ́ ká ālɔ̄ gbā Ɔwɔicō nōo yēeyī ā ɛ̄gbā.

¹⁵Ohígbū ɔdā nɛ̄ Ohɔ́nyɛtá yá ā, anú wɛ ɔ̄cɛ nōo miya ɛka ɛ̄yīpɛ̄, cɛ́ɛ́ ká ācɛ nɛ̄ Ɔwɔicō hīgwú ā kéē lɔfú mīyɛ ɔhā nōo yɔ̄ piyóó nɛ̄ Ɔwɔicō cokónu ō je ā glá. Ɛ̄nyā yá glá ohígbū ka Ohɔ́nyɛtá gekwú, cɛ́ɛ́ kóō lɛ ācɛ hɛ́tá ŋ́má ɔdōbɔ̄bí nēé yá eko nɛ̄ ɛka kú aflɛ́yí ā tīile kpɔ́ ā.

¹⁶Ká ɛlā ɔ̄kwɛ̄yi ā, ɛdɔ kú okónu ō ce ɛ́gɛ́nyā lɛbɛ̄ɛka ɔkpá kú úgwū ō tá ā. Ɛ̄nyā lɛ ā ohígbū ka ɔ̄cɛ nōo tá ɔkpá kú úgwū ā géē kwú gbɔbū ɛ́ɛ́ kú ɔkpá kú úgwū ā kóō lɔfú tīile glá.

¹⁷Ohígbū ka ɔkpá kú ɔ̄cɛ o lúgwū nyā í wɛ ɔdā dúú ŋ́ ɔdā nōo yá ɛ́ɛ́ nɛ̄ ɔ̄cɛ nōo tɔ́kpá ā yēeyī ā. Amáŋ ɔkpá ī gbɔɔ́ ō tīile eko nɛ̄ ɔ̄cɛ nōo tá ɔ̄ ā gekwú.

¹⁸Ɛ́gɔ́ɔmā ɛka kú aflɛ́yí ā í tīile ŋ́ jāā gbéeko nēé lɛ oyī nōo wɛ ijáalí kú ikwū ā má.

¹⁹Anɔ́ɔ eko nɛ̄ Umósīsi lɛ ɔdā dóódu nēé tá tū ipú íne ā jé tɛ́ɛcɛ lɛ ɛjɛ̄ɛ̄jī ācɛ ā, ó kwú oyī kú ɔbá ɛna mɛ́mla ɛwū í wīya tɔ̄há mɛ́mla éŋkpɔ̄, anɔ́ɔ ó bī ɔnwū álá nɔ̄wá mɛ́mla Uhísɔ̄pu lɛ ɔ́ mī klá ɔkpá kú íne ā mɛ́mla ɛjɛ̄ɛ̄jī ācɛ kú Ísrɛ̄lu.

²⁰Ó kahíníī, “Ɛ̄nyā wɛ oyī kú ɛka nɛ̄ Ɔwɔicō gbo mɛ́mla aá kú aá le tū á.”

²¹Ɔwɛ ékpó ā nōó mī oyī klá Áklɔ̄kpīihɔ mɛ́mla ɛjɛ̄ɛ̄jī ɔdā nēé gē bī le gbā Ɔwɔicō ɛ̄gbā ā.

²²Ɔkwɛ̄yi, ɛ́gɛ́nɛ̄ íne ā lɛ ā, ɔ́ɔmā lé kéē gē le oyī gwu ɛjɛ̄ɛ̄jī ɔdā dóódu kéē le tīihɔ. É gē je íneoōbīya yá ācɛ ɛhi ɔ́dāŋ́ kéē le oyī kú ɛbɛ́ fu bónū.

²³Ɔ́ɔmā yá ɛ́ɛ́ nōó cɛgbá kéē bī oyī kú aɛ́bɛ́ le gwu Áklɔ̄kpīihɔ kú ipú ɛcɛ nyā mɛ́mla ɛjɛ̄ɛ̄jī ɔdā nēe bá ipú nū ā nēe kōō wɛ omágbla kú aɔ́dā nēe bá ɔkpáncō ā á. Amáŋ aɔ́dā okpɔ́cíí nēe bá ɔkpáncō ā cɛgbá ɛya nōo lɔhi fíyɛ́ oyī kú aɛ́bɛ́.

²⁴Ohígbū kú Ohɔ́nyɛtá í ga ipú Ɛga otīihɔ nēé bī abɔ̄ gwó nōo wɛ omágbla kú ɔkwɛ̄yi ā ŋ́. Amáŋ ó le tá ipú ɔkpáncō abɔ̄yī nū, ɛga nɛ̄ ó ī nyɔ̄ iyɔ̄bū Ɔwɔicō, cɛ́ɛ́ kóō tá alɔ abɔ̄.

²⁵Aótrɛ̄yí kú ācogwɛ́ɛya kú ācɛ Ujíyu gē nyɔ̄ Ɛga otīīhɔ fíyɛ́ dúú iháyí dóódu mɛ́mla oyī kú ɛbɛ́. Amáŋ Ohɔ́nyɛtá í bēé ga ipú nū gaá je iyī nū gwɛ́ɛya igbo alɛwa ŋ́.

²⁶Ohígbū ka ɔ́dāŋ́ kóō lɛ ā nɛɛ, ó géē yɛ í yɔ̄ ī móōwē ojigógó oŋ́mífī nɛ̄ Ɔwɔicō yá ɛcɛ ā. Ikoko ɔ́ɔmā, abālɔbányā nɛ̄ eko kú aɔ́dā dóódu yɔ̄ ī wā í ŋmɛ́yí ɛ́ɛ́ mā, ó wā igbeékpónú ōfōōfūnū kóō kwú iyī nū ú gwɛ́ɛya, cɛ́ɛ́ kéē kwú íne nɛ̄ alɛɛcɛ bīya ā í yá uwā ɛhi.

²⁷Ɔ̄cɛ dóódu í kwú igbeékpónú piíí, anɔ́ɔ Ɔwɔicō í kɛpɔ̄ tū uwā igbīhi ikwū ā.

²⁸Ɔwɛ ékpónú ɔ́ɔmā é kwú Ohɔ́nyɛtá ú gwɛ́ɛya igbɛ ékpónú, cɛ́ɛ́ kóō lɛ íne nɛ̄ ācɛ alɛwa bīya ā kpó nyɔ̄. Ó géē wā igbɛ ɔ́mpa, ó gáā wɛ ohígbū ínoōbīya gɛ ŋ́, amáŋ kóō lɛ ācɛ nēe bá yɔ̄ ī gbēyī nū ā nyatá.