Read idoma UJƐ́MĪSI 1 Bible Online

UJƐ́MĪSI 1 - idoma bible

UJƐ́MĪSI 1

¹ Ami Ujémīsi, n cɛ̄ Ɔwɔicō ɛhɔ̄, n klla kē cɛ̄ Óndú, Ujísɔ̄si Ohɔ́nyɛtá ɛhɔ̄ dúú. N hokónu tū ɛjɛ̄ɛ̄jī ācɔ̄lóhɔ́nyɛtá nēe pahila bá ɛjɛ̄ɛ̄jī ɛcɛ ā.

²Aá gwéeyē, ayínɛ́ um, eko dúú nɛ̄ ɛdɔ kú ojámá ɛyɛ́ɛyɛ́yí yɔ̄ gē yá aá.

³Ohígbū ka ɔ́dāŋ́ ka aá lɛ ōwē má nɛ̄ɛ̄nɛ̄hi nɛ̄ aá yɔ̄ ī cɛ̄lɔ̄ɔwɔicō kpɔ́, ɔ́ɔmá gē cābɔ̄ ka aá lɔfú bū ipú ɛdɔ ōwē dóódu glá.

⁴Aá kē yá kú ɔtū nɛ̄ aá lé ā kóō lɛ aá bī gajaajɛ, kóō híī kwɛjī ɔwɛ ŋ́, cɛ́ɛ́ ká aā le jōōjīla, ɔdā dúú kóō hile lɛ aá ɛga dúúmā ŋ́.

⁵Ɔ́dāŋ́ nɛ̄ ɔ̄cɛ dúú ka anúɔ í jééyī ŋ́, ɔ̄cɛ ɔ́ɔmā kóō ba Ɔwɔicō nōo ī je ŋmá ɔtū oyēŋēē, nōo ī kiífulá ŋ́ mā.

⁶Amáŋ ɔ̄cɛ dúúmā nōo gē ba ŋmá ɛgiyí Ɔwɔicō, ɔ̄cɛ ɔ́ɔmā kóō cɛ̄ ŋmá ɔtū ékpó kú nū ka Ɔwɔicō ɔ́ɔ í je lɛ anúɔ. Kóō híī lɛ ɔtōbɛ́ɛpa ŋ́, ohígbū ka ɔ̄cɛ nōo ī lɛ ɔtōbɛ́ɛpa ā, lɛbɛ̄ɛka úgbagwú kú ísu nɛ̄ owu gē kpó ga ɛga dóódu, gē tá ɔ̄ gicō, gē tá ɔ̄ wāajɛ ā.

⁷Ɔ̄cɛ ɛ́gɔ́ɔmā nōó lɛ ɔtū kú nū yéékpó glá ŋ́, gē pīya ɔtū abɔ̄ piyóó ipú ɔdā dúú nɛ̄ ó ī yá ā,

⁸óō híī gbɛlá ka anúɔ géē mīyɛ ɔdā nōo yɔ̄ ī ba ŋmá ɛgiyí Ɔwɔicō ā glá ŋ́.

⁹Ācɔ̄lóhɔ́nyɛtá nōo lɛ agbénú ŋ́ mā kéē gwéeyē eko nɛ̄ Ɔwɔicō lɛ ɔ́ je gicō.

¹⁰ Ɔ̄cɔ̄lóhɔ́nyɛtá nōo kē lɛ agbénú ā kóō gwéeyē eko nɛ̄ abɔ̄ kú nū gāajɛ. Ohígbū ka agbénú ī mɛtāajɛ bɛ̄ɛka ododó kú ɔcí ipácí ā.

¹¹Eko nɛ̄ ɛnɔ le bɛ̄cɛ, le ɔkɔ nwūla yɔ̄ ī kpáákpá, cɛ́ɛ́ idɔlá nɛ̄hi kú ɛnɔ ā lɛ ɔcí ā yi tāajɛ, ododó kú nū kē le kpó wúla wāajɛ, cɛ́ɛ́ ɔhi kú nū kē mɛ. Ɔwɛ ɛ́gɔ́ɔmā nɛ̄ olagbénú géē mɛtāajɛ ābɔ̄ ō yɔ̄ ī yúklɔ́ kú nū á.

¹²Ācɛ nēe gē lɔtūlé ká nēé cɔ̄nyā eko nɛ̄ ojámá yɔ̄ ī yá uwā ŋ́ mā, ákú uwā kwú lɔhi ɛɛ́. Ohígbū ka eko nɛ̄ ó lɛ ojámá ā yálé glá, ó géē mīye ulé kú oyēeyi nōó ī mɛ ŋ́, nɛ̄ Ɔwɔicō cokónu lɛ ācɛ nēe yíihɔtū tá ɔ̄ ā.

¹³Eko nɛ̄ ojámá dúú nōo ī yá kú ɔ̄cɛ kóō bīyíne, gbɔɔ́ ō yá ɔ̄cɛ dúúmā, ɔ̄cɛ ā kóō híī ka ka, Ɔwɔicō ɔ́ɔ yɔ̄ ī yá anúɔ ojámá ā ŋ́, ohígbū ka ɔdā dúú í já Ɔwɔicō má kóō yá obɔ̄bí glá ŋ́.

¹⁴Amáŋ ɔ̄ce ī lɛ ojámá eko nɛ̄ ó le púla tá ukpa kú ɔdā nōó ī tíne lɔfú lɔfú abɔ̄yīnū ā.

¹⁵Unwū olɔfúlɔfú kú ɔdōbɔ̄bí ō yá ī ma ɔyí kú ínoōbīya ɛ́gɛ́nɛ̄ ɔ̄cɛnya ī ma ɔyí ā. Ínoōbīya, eko nōó kē le jɛ̄ kwɛyí ɛɛ́, ó gē bī ikwū opiyóó wā.

¹⁶Ayínɛ́ um, ācɔ̄lóhɔ́nyɛtá o he um ɔtū, aá cɛ̄ lɛ ɔ̄cɛ dúú pllá aá ŋ́.

¹⁷Ɛhi olɔhi dóódu mɛ́mla ɛhi dúúmā nōo ī jōōjīla ā, gē ŋmá ɔkpáncō, ó ī wā ŋmá ɛgiyí Ɔwɔicō nōo yá ɛnɔ, ɔyā mɛ́mla aínyílɔ́wɔ, nōó lɛ opīyabɔ̄ gbóógbóō ŋ́ mā. Ó gē jíliyē ɛ́ɛ́ nōó gē pīyeyī tá ɛga ɔhá ŋ́, ohígbū ɔ́ɔmā ó gáā cɛ̄ lɛ obū kóō wā í klá alɔ glá ŋ́.

¹⁸Ó ŋmá ɔtū kú nū nōo gbonɛnɛ ā nōó yá alɔ ŋmá lɛ ɛlā ɔkwɛ̄yi kú nū, cɛ́ɛ́ ká ālɔ̄ le pīya īkpō aflɛ́yí kú ɔdā dóódu nōó yá á.

¹⁹Ayínɛ́ um, o he um ɔtū, aá blla kwu ɛnyā, odúúdú aá kéē jāhɔ̄ kéē pó ɛlā fíyaa, amáŋ aá ŋmúléyīkwū kɛlā fíyaa ŋ́. Aá kóō híī cɔ̄ɔ̄nū fíyaa ŋ́ dúú.

²⁰Ohígbū ka ɔ̄cɛ o cɔ̄nū í gē mīyɛ ɔdā olɔhi nɛ̄ Ɔwɔicō miya táajɛ lɛ ɔ́ ā ŋ́.

²¹Abɔ̄ ó le lɛ ā ā, aá lɛ ucē obɔ̄bí mɛ́mla ucē ɔ́bíipú dóódu kpó bónū ŋmá ɛgiyí aá. Aá tū iyī aá wāajɛ lɛ Ɔwɔicō, cɛ́ɛ́ ká aá mīyɛ ɛlā kú nū nōó nyi tū ipú ɔtū kú aá, nōo lɔfú nya aá tá glá ā.

²²Aá gē plla iyī aá ɔ́dāŋ́ ka aá gē jāhɔ̄ lɛ ɛlɔ̄ɔwɔicō icííci, aá cíkā ō bī ɔ̄ le yúklɔ́ dúú.

²³Ɔ̄cɛ dúú nōo ī jāhɔ̄ lɛ ɛlā ā, amáŋ nōó bī ɔ̄ le yúklɔ́ ŋ́, lɛbɛ̄ɛka ɔ̄cɛ nōo má iyī nū ipú ogigo kóō jé ɛ́gɛ́nɛ̄ ó lɛ ā.

²⁴Ó plleyī tū iyī nū lɔɔlɔhi ipú ogigo ā, anɔ́ɔ ó kwú ogigo ā ú táajɛ á, ɔkwɔɔkwu ɔ́ɔmā ó kwú mlanyī ɛ́gɛ́nɛ̄ ó lɛ ā.

²⁵Ɔkōolɔhi ā wɛ íne ojōjīla kú Ɔwɔicō nōó gē bī le hɛ́ ācɛ tá. Ɔ́dāŋ́ ka ɔ̄cɛ dúúmā lɛ ɔtū tá ɔdā nōo yɔ̄ ipú nū ā, lɛ ɔ́ kílɔ́cɛ lɔɔlɔhi nōo mlanyī ɔdā nēé nwū ā ŋ́, amáŋ nɛ̄ ó bī ɔ̄ le yúklɔ́, ó lɛ ā, ɔ̄cɛ ɔ́ɔma í jɛ̄ gɔbū ipú ɔdā dóódu nɛ̄ ó ī yá ā.

²⁶Ɔ̄cɛ dúúmā gbɛlá ka anúɔ ī gbā Ɔwɔicō ɛ̄gbā íbí īī? Ɔ̄cɛ ɔ́ɔmā kóō lɛ ɛlā nōo gē ka ā kwútū, ámáŋ ó ī yá iyīnū bɛ̄ɛka olíla ā, cɛ́ɛ́ ɛ̄gbā nɛ̄ ó gē gbā Ɔwɔicō ā kwú pīya áncā.

²⁷Ɔdā nɛ̄ Ɔwɔicō ádā je kóō wɛ ɛ̄gbā-ōgbā olɔhi dúúdú nōó lɛ ɛnyá ŋ́ mā yɔ̄ á, ká aá tá anyōkwū mɛ́mla ayōkwū abɔ̄ ipú ōwē nɛ̄ é bá yɔ̄ ī má ā. Ɔ̄cɛ ā géē lɛ iyínu tū ŋmá ɔdōbɔ̄bí kú ipú ɛcɛ nyā ā.