Read idoma UJƐ́MĪSI 2 Bible Online

UJƐ́MĪSI 2 - idoma bible

UJƐ́MĪSI 2

¹Ayínɛ́ um, abɔ̄ aá ke cɛ̄ɛ̄lā kú Óndú alɔ Ujísɔ̄si Ohɔ́nyɛtá ā, Óndú kú ɔfú, ɛgahi mɛ́mla ocɛ̄tla ā, aá híī je ɔ̄cɛ éyi fíyɛ́ ɔ̄cɛ ɔhá, ohígbū ɛ́gɛ́nɛ̄ aá má ɔ̄cɛ ā lɛ ā ŋ́.

²Ɔ̄cɛ í jé ŋ́ nɛ̄ olɔdu éyi lɛ eliká kú ugóolu (oje ɔdɔ) wu abɔ̄ klla lɛ úwé olɔhi wiiye le bēhé wā ipú ɛgogbɔ̄ɔkɔ kú aá, nɛ̄ ogbɛha o lɛ áhingílí wiiyē éyi kē le bēé wā ipú inu ā dúú.

³Ɔ́dāŋ nɛ̄ aá kwú ojīlīma ú ce ɔ̄cɛ o yá ifa lɔhi ā fíyɛ́, anɔ́ɔ éyi kú aá gē da ɔ́ ka óo wā í cīce ɛga olɔhi fíyɛ́ dúú amānyā, amáŋ ó kē da ogbɛhá ā ka, háyi abɔ́ɔ, ámāŋ́ kɔ́ɔ̄ cīce ajɛ amānyā pi ikpó kú anúɔ.

⁴Ucē nɛ̄ aá yá nyā, í cābɔ̄ ka aá yɔ̄ ī kɔ̄ ācɛ ígwíígwu ŋ́ nɛɛ? Ɔ́ɔmā léka ígwu kú ācɛ éyi lɔhi fíyɛ́ ígwu ɔhá á. Ɛ̄nyā cābɔ̄ ɔdōbɔ̄bí nɛ̄ aá bī ɔtū yɔ̄ ī le hɛ́pɔ̄ á.

⁵Aá jāhɔ̄, ayínɛ́ um o he um ɔtū, Ɔwɔicō í le ācɛ ogbɛhá kú ipú ɛcɛ nyā nēé wɛ ācɛ kú ɔlɛ́ Ohɔ́nyɛtá ā kéē jɛ̄ agbénú ipú o cɛ̄ɛ̄lā nū fíyɛ́ ŋ́ nɛɛ? Ka ó klla le uwá fu kéē lúgwū kú ajɔ̄ɔ̄cɛ́ nɛ̄ ó cokónu ō je lɛ ācɛ nēe yíihɔtū tá ɔ̄ ā.

⁶Amáŋ aá gē lɛ ojīlīma ce ācogbɛhá ā ŋ́. Ānyɛ ā gē yá aá ōwē ā? Ó wɛ aólagbénú ā ŋ́ nɛɛ? Ó wɛ uwá gē bī aá ga inɛ̄pɔ̄ ā ŋ́ nɛɛ?

⁷Uwā wɛ ācɛ piíí nēe gē ka ɔdōbɔ̄bí lɛyíkwu iyē olɔhi nēé je lɛ aá eko nɛ̄ aá je pīya ācɔ̄lóhɔ́nyɛtá āá.

⁸Ó géē wɛ ɔdā olɔhi nɛ̄ aá yɔ̄ ī yá ɔ́dāŋ́ ka aá lɛyitáajɛ lɛ íne kú Ɔwɔicō nōo yɔ̄ ipú ɛlɔ̄ɔwɔicō ā. Íne ā kahíníī, “yíihɔtū tá ɔ́mpa awɔ bɛ̄ɛka iyī uwɔ ā.”

⁹Ɔ́dāŋ́ ka aá gē je ācɛ éyi fíyɛ́ ācɛ ɔhá ohígbū o má eyī kú uwā, ɔ́ɔmā cābɔ̄ ka aá lɛ íne bīya ɛ́ɛ́, aá wɛ ācɛ o bīya íne ā.

¹⁰Ohígbū ka ɔ̄cɛ dúúmā nōo lɛ íne ékpónú bīya, ó lɛ ā odúúdú íne ā nōó bīya dúú á.

¹¹Ohígbū ka Ɔwɔicō ékpó nōo kahíníī, “Aá híī gbaajā ámāŋ́ o cikpó ɔnyā ɔhá ŋ́ mā” kē ka ka, aá híī ŋmó ɔ̄cɛ ŋ́ dúú á. Amáŋ ɔ́dāŋ́ ka aá kōō gbajā ŋ́, amáŋ nɛ̄ aá kē lɛ ɔ̄cɛ ŋmó, aá kwú pīya ācɛ o bīya íne ɛ́ɛ́.

¹²Ohígbū ɛ́gɔ́ɔmā, aá kɛlā cɛ́ɛ́ ká aá yá ucē bɛ̄ɛka ācɛ nēé géē bī íne nēé bī le hɛ́ uwā tá piíí le kɛpɔ̄ tū aá.

¹³Ohígbū ka Ɔwɔicō í gáā ményinyi ɔ̄cɛ nɛ̄ ó ge ményinyi ācɛ ɔhá ŋ́ mā ŋ́. Ɔwɔicō kōō ī ményīnyi eko nóō ī hɛ́pɔ̄ kú ācɛ.

¹⁴Aóklóbīya mɛ́mla áncɛ́nyā um, ɔ́dāŋ́ ka ɔ̄cɔ̄lóhɔ́nyɛtá dúú ka anúɔ cɛ̄ɛ̄lā Ɔwɔicō, amáŋ ó yá ɔdā dúúmā nōo í ma ɔ́ fú ŋ́, ɔdí wɛ ile kú nū ā? Ɛdɔ kú ɛlā ō cɛ̄ ɛgɔ́ɔmā hɛ́ ɔ̄ tá glá ā?

¹⁵Ɔ́dāŋ́ ka ɔyínɛnɔ̄nyīlɔ ámāŋ ɔyínɛ́nɔ̄nyā éyi í lɛ īlī o cɛgbá ō tū ohi ŋ́, nōo kē má ɔdōlé nɛ̄ ó ī lé ɛ̄cī ɔ́ɔmā ŋ́,

¹⁶anɔ́ɔ ɔ̄cɛ éyi ŋmá ipú aá da ɔ́ kóō nyɔ̄ ɛbɔ́ ká ɔ̄ jɛ̄ ɔlá, ká ɔ̄ kē lɛ ɔdōlé má i lé lɛ ipú nū Amáŋ nōo kē je ɔdā nōo cɛgbá kú oyēeyī dúú lɛ ɔ́ ŋ́ ɔdí wɛ ile kú ɛlā Ɔwɔicō nɛ̄ ó cɛ̄ ā?

¹⁷Ɛ́gɔ́ɔmā, nɛ̄ ó lɛ lɛ ɔ̄cɛ nōo cɛ̄ɛ̄lā Ɔwɔicō ōfūnū nōó yá ɔdā dúúmā nōo tɔ́ɔkwu ŋ́ dúú á, ɛlā Ɔwɔicō nōó cɛ̄ ɔ́ɔmā gekwú.

¹⁸Amáŋ ɔ̄cɛ éyi lɔfú kahíníī, “Ācɔ̄lóhɔ́nyɛtá ōhī cɛ̄ɛ̄lā Ɔwɔicō, ācɔ̄lóhɔ́nyɛtá ɔhá kē ī yúklɔ́ olɔhi.” N kahíníī, “Le mafú ga um ɔ́dāŋ́ nɛ̄ ó tá uwɔ ɔtɛ́, ka ɔ̄cɔ̄lóhɔ́nyɛtá éyi lɔfú cɛ̄lɔ̄ɔwɔicō anɔ́ɔ ó kē yá ɔdā olɔhi dúúmā ŋ́ glá. Amáŋ ami ā, úklɔ́ olɔhi nɛ̄ n yá ā géē mafú gā uwɔ ka n cɛ̄lɔ̄ɔwɔicō.

¹⁹Aá cɛ̄ ka Ɔwɔicō ékpónú yɔ̄ á, aá yá lɔhi. Aébilíi kē cɛ̄ lɛ ā, klla kē ī yúufi nū ī fīyégbúlú dúú.

²⁰Awɔ olíla, n géē yá ká ā le jé ka ɔ́dāŋ ka a cɛ̄ɛ̄lā Ɔwɔicō áncā, nɛ̄ ó lɛ ɔdā dúú nɛ̄ a gē yá kóō ma ɔ́ fú ŋ́, ó tīile dúúmā ŋ́.

²¹ É hɛ́pɔ̄hi lɛ Ébrahām, ádā alɔ ohígbū úklɔ́ eko nɛ̄ ó je Áyísīki ɔyí nū ce ɛyí ede kú ofidaka ā ŋ́ nɛɛ?

²²Aá má ka Ébrahām cɛ̄ɛ̄lā Ɔwɔicō, anɔ́ɔ ó kē le ɔdā nɛ̄ Ɔwɔicō dɔɔ̄kā ā yá á, anɔ́ɔ ɛlā Ɔwɔicō nɛ̄ ó cɛ̄ ā le jōjīla á.

²³Anɔ́ɔ ɛga kú ɛlɔ̄ɔwɔicō nɛ̄ é ka ka Ébrahām cɛ̄ɛ̄lā Ɔwɔicō, anɔ́ɔ Ɔwɔicō kē lɛ ɛpɔ̄hi hɛ́ lɛ ɔ́ ā wɛ ɔkwɛ̄yi. Anɔ́ɔ Ɔwɔicō ka Ébrahām ɔ́ɔ wɛ oklóbīya anúɔ á.

²⁴Aá má ɔ̄? Úklɔ́ ī yá kéē hɛ́pɔ̄hi lɛ ɔ̄cɛ, ó wɛ o ŋmá lɛ o cɛ̄ɛ̄lā Ɔwɔicō ōfūnū ŋ́.

²⁵Ó wɛ ɔwɛ ékpó ɔ́ɔmā nēé bī le hɛ́pɔ̄hi lɛ Urehábu, akwuna ā ŋ́ nɛɛ? Ɔwɔicō le ɛpɔ̄hi hɛ́ lɛ ɔ́ o ŋmá lɛ úklɔ́, ohígbū koó mīye ācocɛ̄hɔ̄ kú Ísrɛ̄lu ā, lɛ uwá bī yɛ ɔwɛ ɔhá le pɛ́kwú.

²⁶Abɔ̄ nɛ̄ ɔkpíyē nɛ̄ ó lɛ alelékwū ŋ́ gekwú ā, ɛ́gɔ́ɔmā nɛ̄ ɛlā Ɔwɔicō ō cɛ̄ nɛ̄ ó lɛ úklɔ́ ŋ́ kwú lɛ dúú á.