Read idoma UJƐ́MĪSI 3 Bible Online

UJƐ́MĪSI 3 - idoma bible

UJƐ́MĪSI 3

¹Ayínɛ́ um, odúúdú aá í gáā je pīya aítíca glá ŋ́, ɛ́gɛ́nɛ̄ aá jé ka Ɔwɔicō géē kɛpɔ̄ olɔfú tū alɔ ācɔ̄lóhɔ́nyɛtá nēe gē nwū ɛlā kú nū ā fíyɛ́ ācɛ ɔhá ā.

²Odúúdú alɔ gē nyíleyī ojigógó. Amáŋ ɔ́dāŋ́ ka ɔ̄cɛ dúúmā í nyíleyī eko nɛ̄ ó ī kɛlā ŋ́, ɔ̄cɛ ɔ́ɔmā le jōjīla, ó kē klla í lɔfú í kwú odúúdú iyē kú nū tū glá.

³Alɔ gē lɛ anjámī wu ɔnya okónu o yá ɛ́ɛ́ kóō lɛyítáajɛ lɛ alɔ, cɛ́ɛ́ alɔ lɔfú pīya odúúdú iyē kú ɔnyā ā eyī ga ɛga dúú nɛ̄ alɔ dɔɔ̄kā ā glá.

⁴Ámáŋ aá gbɛlá kwu aúgbéényi, ɛ́gɛ́nɛ̄ é nwuné nɛ̄hi ā, nɛ̄ owu olɔfu nɛ̄hi kē ī pɛ́ ɔ̄ ā, nááná, óci nɛŋ́cɛ́ nɛ̄ ɔ̄copúgbényi ā ī bī le nā ɔ̄ tá ɔwɛ ga ɛga dúú nɛ̄ ó tíne á.

⁵Ɔdā éékpó ɔ́ɔmā nɛ̄ ígblɛ́nyī wɛ dúú á. Abɔ̄ nɛ̄ ó le lígíí ipú ɔkpíyē ā, nááná anú kē ī gwō gwō kú ɔdā nɛ̄hi dúú kpɛ́mm á. Aá gbɛlá ɛ́gɛ́nɛ̄ ɔlá nɛŋ́cɛ́ lígíí gē yi ūpū nɛ̄hi táajɛ ā.

⁶Ígblɛ́nyī lɛbɛ̄ɛka ɔlá ā. Ó klla lɛbɛ̄ɛka ɛcɛ kú ɔfú obɔ̄bí nōo gē bī odúúdú ɔkpíyē ohile kú ɔ̄cɛ yúklɔ́. Ó kē lɔfú bī ɔlá nōo ŋmá ɔlíkɔtɔ abɔ̄yīnū je odúúdú ɔlíkɔtɔ kú ɔ̄cɛ tɔ̄lá glá.

⁷Ɔ̄cɛ lɔfú yá kú ɛbɛ́ ipácí dóódu mɛ́mla aígbáanɔ dóódu mɛ́mla ɛbɛ́ o lipúpiyajɛ dóódu mɛ́mla ɛbéenyi dóódu kéē je pīya ɛbɛ́ ɔlɛ́ glá. Ācɛ kē lɛ uwá pīya ɛbɛ́ ɔlɛ́ lɛ ā dúú ɛɛ́.

⁸Amáŋ ɔ̄cɛ dúúmā í yá kú ígblɛ́nyī kú ō yɔ̄ cíí glá ŋ́. Ó kē lɔfú ŋmó ɔ̄cɛ glá ɛ́gɛ́nɛ̄ ɛgwā obɔ̄bí í ŋmó ɔ̄cɛ ā.

⁹Ígblɛ́nyī nɛ̄ alɔ ī bī le tá Óndú nōo wɛ ádā ā ahínyá ā, anú piíí ā nɛ̄ alɔ ī bī le tókónu obɔ̄bí lɛ ācɛ nɛ̄ Ɔwɔicō yá gbla iyī nū ā dúú á.

¹⁰O ŋmá ipú okónu ékpó nyā nɛ̄ alɔ ī le tá Ɔwɔicō ahínyá á, anú nɛ̄ okónu ō tá lɛ ɔ̄cɛ kē ī ŋmá anú dúú á. Ayínɛ́ um, ɛ̄nyā í cíkā ō lɛ ā ŋ́.

¹¹Éŋkpɔ̄ olɔhi mɛ́mla éŋkpɔ̄ obɔ̄bí gē bū ŋmá njɔlɔ ékpónú nɛɛ?

¹²Ɔcí ɔkpɔ́ɔmā gwá īkpō kú ɔcí nēé hī ka ólīfu ā glá ā, kɛ̄ɛ ka alemú gwá ikpō ɔkpɔ́ɔma glá? Ɔwɛ ékpó ɔ́ɔmā éŋkpɔ̄ ɔmā í yɔ̄ gbóógbó lɔfú je pīya éŋkpɔ̄ olɔhi ō gwá glá ŋ́.

¹³Ɔ̄cɛ dúú yɔ̄ ipú aá nōo jééyī klla jɔ́ɔ́dā ā? Ɔ̄cɛ ɛ́gɔ́ɔmā kóō le mafú kú anúɔ jééyī klla tōhílīpú o ŋmá lɛ ucē olɔhi nɛ̄ ó ī yá ā. Ó kē ŋmá lɛ úklɔ́ olɔfu nɛ̄ ó ī yá ipú ɔtū otúwāaje mɛ́mla íjééyī ā.

¹⁴Amáŋ ɔ́dāŋ́ ka aá gē mímálānyī obɔ̄bí nɛ̄hi ā, nɛ̄ ɔnyɔɔnyɛ ká aá ī cē olɔhi kwu iyī nū ōfūnū, óō híī gwō ka anúɔ jééyī ŋ́, ámāŋ ka o kɛ̄mgbɛ̄ ce ɔ̄kwɛ̄yi ā ɛyí ŋ́.

¹⁵Íjééyī ɛ́gɛ́nyā í ŋmá ɛgiyí Ɔwɔicō ŋ́. Ipú ɛcɛ amānyā nɛ̄ ó ŋmá á. Ó ŋmá ɛgiyí ɔ̄cɛ ɛcɛ o bīya íne nɛ̄, ó klla ŋmá ɛgiyí aálelékwū obɔ̄bí.

¹⁶Ɛga dúú nɛ̄ ímálānyī, olɔhi o cē kwu iyī ɔ̄cɛ ōfūnū yɔ̄, ɛdɔ kú ikpɛ́lā, ácɛ̄tɔ̄há ŋ́ mɛ́mla ɛdɔ kú ɔ́bíipú ɛyɛ́ɛyɛ́yí dúúdu gē le kpɔ.

¹⁷Amáŋ ācɛ o cɛ̄lɔ̄ɔwɔicō nēe lɛ íjééyī nōo ŋmá ɛgiyí Ɔwɔicō ā lɛ yēŋēē, é lɛ ɛbɔ́, é gbonɛnɛ, é i pó ɛlā ɔ̄cɛ, é ī ményinyi ācɛ, é lɛ eyīyɛpa ŋ́, é wɛ ācɛ ɔkwɛ̄yi eko dóódu.

¹⁸Ucē olɔhi lɛbɛ̄ɛka ɔdɛ̄hɔ̄ nōo bɛ̄cɛ ŋmá aíkpō nɛ̄ ɔ̄cɛ-o-yɛ́bɔ́ nyí ipú ɛbɔ́ ā.