Read idoma UJƐ́MĪSI 4 Bible Online

UJƐ́MĪSI 4 - idoma bible

UJƐ́MĪSI 4

¹Ɔdí ī tū unu mɛ́mla ɛfú ɔtāhɛ̄ aá ā? É ŋmá ɛgiyí ɔdā abahi nɛ̄ aá gē tine ā nōo yɔ̄ gē nuunu ipú aá ā ŋ́ nɛɛ?

²Aá ī dɔɔ̄kā odée, amáŋ aá lɛ ŋ́. Ohígbū ɔ́ɔmā aá le tútū o ŋmó ɔ̄cɛ. Aɔ́dā olɔhi ōhī kwu aá eyī ká aá lɛ, amáŋ aá lɛ uwá glá ŋ́, cɛ́ɛ́ aá gē yíkpɛ́lā klla ī nuunu. Aá lɛ ɔdā ā ŋ́, ohígbū ka aá ba ŋmá ɛgiyí Ɔwɔicō ŋ́.

³Anɔ́ɔ eko nɛ̄ aá le ba, aá kē mīyɛ ŋ́, ohígbū ka ɔdōbɔ̄bí nɛ̄ aá bī ɔtū gē le bā á. Aá gē ba ɔdā nāa géē bī le yá abahi lɛ iyī aá ofunu.

⁴Aá, ācɛ nēé gē gbɔ ɔwɔ ɔhá ɛ̄gbā ā, aá jé ka ɔ̄cɛ nōo wɛ ɔya kú ɛcɛ nyā wɛ olɛlā kú Ɔwɔicō ŋ́ nɛɛ? Ohígbū ɔ́ɔmā ɔ̄cɛ nōo le miya ka anúɔ í wɛ ɔya kú ɛcɛ nyā, kwú pīya olɛlā kú Ɔwɔicō.

⁵Aá jé ka ɛlɔ̄ɔwɔicō ā kɛlā ɔkwɛ̄yi ɛga nɛ̄ ó kahíníī, “Alelékwū nɛ̄ Ɔwɔicō ī tá alɔ ipú ā le mu mla ɔtū alɔ ō pī lɔfú lɔfú” ā y nɛɛ?

⁶ Amáŋ Ɔwɔicō ī ményinyi alɔ nɛ̄hi, ɔ́ɔmā yá ɛ́ɛ́ néē tá ɔ̄ ipú ɛlɔ̄ɔwɔicō ka Ɔwɔicō gē bɛ́yíkwu ācɛ oyɔ́bɔ́ɔcɛ, amáŋ ó ge ményinyi ācɛ nēe tá iyī uwā wāajɛ āá.

⁷Ohígbū ɔ́ɔmā, aá lɛyítáajɛ lɛ Ɔwɔicō. Aá tá ɛlā kú ebilíi ā, cɛ́ɛ́ ó kē le kwu ŋmá ɛgiyí aá.

⁸Aá túblá Ɔwɔicō, ó kē í túbla aá. Aá lɛ abɔ̄ kú aá na, ācobīyíne. Aá lɛ ɔtū ká aá tū yēŋēē ācɛ o leyīyɛpa.

⁹Aá yá ɔtūnōbí, ká aá jikwū ikɔkɔ nɛ̄ aá ī yɛhɛ. Aá jikwū, áa gwéeyē ŋ́, ámāŋ aá cɔ̄nū.

¹⁰Aá tū iyī aá wāajɛ eko nɛ̄ aá i gbɔ̄ɔkɔ lɛ Ɔwɔicō.

¹¹Ayínɛ́ um, aá híī ŋmó ɔ́mpa aá okónu icííci ŋ́. Ɔ̄cɛ dúúmā nōo gē ŋmó ɔyínɛ nū ācɔ̄lóhɔ́nyɛtá okónu ámāŋ ka o ka obɔ̄bí kú nū, íne ā nōo gē ŋmó okónu klla gē ka obɔ̄bí kú nū abɔ́ɔ á. Ɔ́dāŋ́ nāa ka íne ā í lɔhi ŋ́, ɔ́ɔmā cābɔ̄ ka á gē lɛyítáajɛ lɛ íne ā gɛ ŋ́, amáŋ a kwú pīya ɔ̄cɛ o ŋmó ɔ̄ okónu.

¹²Ɔwɔicō ōfōōfūnū ī je íne klla lɔfú kɛpɔ̄ tū ācɛ glá ā. Anú ōfūnū lɔfú ŋmó ɔ̄cɛ klla kē lɔfú nyā ācɛ tá glá á. Aá lɛ íkwu ká ā kɛpɔ̄ tū ācɛ ɔ́mpa aá ŋ́.

¹³ Aá jāhɔ̄ lɛ ɔdā nɛ̄ n gáā ka nyā, awɔ nōo ī kahíníī, “Ícɛ ámāŋ ka ócí n géē ga igelī nɛ̄hi nyā ámāŋ igelī nɛ̄hi ɔ́ɔmā ká n̄ yɔ̄ abɔ́ɔ iháyí éyi ká n̄ tɔ́ɔ́sú, ká n̄ yá ije nɛ̄hi.” ā

¹⁴Á kē jé ɛ́gɛ́nɛ̄ oyēeyī kú uwɔ géē wɛ óócí ā ɛ́ɛ́ ŋ́. Oyēeyī lɛbɛ̄ɛka ébú nōo yɔ̄ eko kpii nōo klla gē mɛ táajɛ ā.

¹⁵Ɔdā nɛ̄ a cíkā ō ka ā wɛ ka, “Ɔ́dāŋ́ ka Ɔwɔicō cɛ̄ ɛɛ́, alɔ géē yēeyī, alɔ kē í yá ɛ̄nyā, alɔ kē í yá ɔ́ɔmā.”

¹⁶Nááná, a gē yɔ́bɔ́ɔcɛ, a gē gwō. Ɛjɛ̄ɛ̄jī ɛdɔ kú oōgwō ɛ́gɔ́ɔmā í lɔhi ŋ́.

¹⁷Ɔ̄cɛ nōo je ɔdā olɔhi nōo cíkā ō yá, nōó kē yá ŋ́, ó wɛ ínoóbīya.