Read idoma UJƐ́MĪSI 5 Bible Online

UJƐ́MĪSI 5 - idoma bible

UJƐ́MĪSI 5

¹Aá wā ɛ́ɛ́, aá nēe wɛ ācɛ olagbénú ā, aá jikwū, cɛ́ɛ́ ká aá dīíbá ohígbū ōwē nɛ̄hi nōo gáā wā ɛgiyí aá ā.

²Agbénú kú aá géē je gblífi, ɛha kē í kpó īlī ká aá lé.

³Ugóolu mɛ́mla oje nɛ̄hɛ́ ká aá kwú kpó tɛ́kla ɛɛ́. Ɛ́kla kú uwā ke ī cījáalí tū aá. É kē í je ɔkpíyē ká aá lé, í je ɔ́ yi bɛ̄ɛka ɔlá ā. Aá yɔ̄ gē kpó agbénú ká aá tū ipú ɛcɛ nyā nōo géē mɛ ānāānā ā.

⁴Á kē gbā ulé lɛ ācɛ nēe yúklɔ́ ipú ɛhɔ̄ kú uwɔ ā ɛɛ́ ŋ́. Jāhɔ̄ ta ífulá kú uwā. Ɔwɔicō nōo lɔfú fíyɛ́ dúú ā, le ikwū nɛ̄ é bá ī je ā pó ɛɛ́.

⁵Aá lā ipú ɛcɛ nyā yɔ̄ ī ŋmó ije kú aá tū ɔdā nōo géē je abahi lɛ aá. Aá lɛ iyē kú aá yá jɔ̄kwū gbēyī ɛ̄cī ɛpɔ̄ ā ɛɛ́.

⁶Aá lɛ ɛpɔ̄bí ŋmó ɔ̄cɛ nɛ̄ ó jíkpó ɔdā dúúmā ŋ́ mā, lɛ ɔ́ ŋmó ɛɛ́. Ó kē nya mla aá ŋ́.

⁷Ayínɛ́ um, aá lɛ ɔtūlé gbéeko nɛ̄ Óndú ā géē wā. Aá má ɔ̄, ɛ́gɛ́nɛ̄ ɔglɛjí gē lɔtūlé gē gbēyī ajɛ kú nū kóō yá īkpō ōgbɔɔ́lá kú nū wɛ̄ɛcɛ ā. Ó gē gbēyī ɔwɔ aflɛ́yí mɛ́mla ɔwɔ kú igbīhāajɛ ā kéē yá klá ɔdɛ̄hɔ̄ ā.

⁸Aá géē lɔtūlé piíí dúú. Aá háyi kli, ohígbū ka ɛ̄cī nɛ̄ Óndú ā géē wā ā má kwajaajɛ ɛɛ́.

⁹Aá híī kiífilá tū iyī aá ŋ́, ayínɛ́ um, cɛ́ɛ́ kú Ɔwɔicō kóō kɛpɔ̄ tū aá ŋ́ dúú.

¹⁰Aóklóbīya um, aá gbɛlá kwu ācomɛ́ɛbɛ kú eko nɛŋ́cɛ̄ nēe cɛ̄hɔ̄ kú Óndú ā, kéē wɛ ocābɔ̄ kú ɔtōolé ipú ōwē ō má lɛ aá.

¹¹ Alɔ hī ācɛ nēe lɔtūlé ipú ōwē ō má ā ka ācɛ nɛ̄ ákú uwā lɔhi. Aá kē pó ɔ̄kā kú ɛ́gɛ́nɛ̄ Ujóbu lɔtūlé lɛ ā. Aá kē jé ɛ́gɛ́nɛ̄ Óndú ā gbonɛnɛ, klla kē ī méyinyinyi ɔ̄cɛ ā.

¹²Ofíyɛ́ ɔdā dúúdú ā, ayínɛ́ um, aá híī gbo ɔkpáncō ŋ́, aá híī gbo ajɛ ŋ́, ɛ́ɛ́ nɛ̄ aá ī gbo ɔdā dúúmā ɔhá eko nɛ̄ aá ī cokónu lɛ ācɛ ŋ́. Amáŋ, ɔ́dāŋ ka a í cɛ̄, a cɛ̄, ɔ́dāŋ ka a í tá a kē tá. Cɛ́ɛ́ kú Ɔwɔicō kóō híī ŋmó aá ɛpɔ̄bí ŋ́.

¹³Ɔ̄cɛ dúúmā yɔ̄ ipú aá nōo yɔ̄ ipú unwalu uu? Ɔ̄cɛ ɔ́ɔmā kóō gbɔ̄ɔkɔ lɛ Ɔwɔicō kóō tá ɔ̄ abɔ̄. Ɔtū he ɔ̄cɛ dúúmā ā? Ɔ̄cɛ ɔ́ɔmā kóō gwííjē ocɛ̄tra Ɔwɔicō.

¹⁴ Ɔ́dāŋ́ ka ɔ̄cɛ dúúmā yɔ̄ ipú aá yɔ̄ ī doōce, ɔ̄cɛ ɔ́ɔmā kóō lɛ ɛhɔ̄ tū fu anyākwɔ́cɛ kú icɔ́ɔci, kéē wā í gbɔ̄ɔkɔ lɛ Ɔwɔicō ohígbū nū, cɛ́ɛ́ kéē lɛ anɔ̄ kú ólīfu nya ɔ́ iyē, cɛ́ɛ́ kú Óndú ā kóō tá ɔ̄ abɔ̄.

¹⁵Ɔkɔ nyā nēé géē gbā ŋmá ɔtū ékpó klla cɛ̄ ka Ɔwɔicō ɔ́ɔ le pó ɛɛ́ mā, géē cɛ̄ lɛ Óndú hɛ́ odoōcē ɔ́ɔmā tá ŋmá ōcē kú nū. Ó kē í je íne dúú nōó bīya ā yá ɔ́ ɛhi.

¹⁶Abɔ̄ Ɔwɔicō ī pó ɔkɔ nɛ̄ ācɛ ī gbā ā, aá ka íne nɛ̄ aá bīya ā tɛ́ɛcɛ lɛ ɔ́mpa aá, cɛ́ɛ́ ká aá gbɔ̄ɔkɔ lɛ Ɔwɔicō ohígbū ācɛ ɔ́mpa aá, ká Ɔwɔicō kóō lɛ ɔ̄cɛ ɔdoōcē ā hɛ́tá. Ɔkɔ nɛ̄ ɔ̄cɛ o yá ɔdā okpaakpa ā gē gbā í yúklɔ́ nɛ̄ɛ̄nɛ̄hi.

¹⁷Ɛláyíja wɛ ɛdɔ ɔ̄cɛ ɔlamu bɛ̄ɛka alɔ ā. Ó gbɔ̄ɔkɔ lɔfúlɔfú lɛ Ɔwɔicō, cɛ́ɛ́ kú ɔwɔ kóō híī yā ŋ́, anɔ́ɔ ɔwɔ í kē yá klá ajɛ ā ŋ́ iháyí ɛtá cɛ ɔyā ɛhīlī.

¹⁸Anɔ́ɔ ó klla le ɔkɔ gbā igbɔhá lɛ Ɔwɔicō, anɔ́ɔ ɔwɔ kē le yā ŋmá ɔkpáncō, anɔ́ɔ ɔdɛ̄hɔ̄ kē lɛ kpó bū ŋmá ipú ajɛ á.

¹⁹Ayínɛ́ ɔ́dāŋ́ ka, ɔ̄cɛ dúú ká ipú aá le nyíleyī ŋmá ɔwɛ okpaakpa kú ɛlɔ̄ɔwɔicō ā, anɔ́ɔ ɔ̄cɛ ɔhá lɛ ɔ́ kwúcē igbīhi kpɔ́ á,

²⁰ɔ̄cɛ nōo je ɔ̄cobīyíne ā cīgbīhi ŋmá ɔwɛ obɔ̄bi kú nū aá, géē nyā ɔ̄cɛ ɔ́ɔmā tá ŋmá ikwū opiyóó ipú ɛcɛ nyā, ó klla í yá kéē je íne alɛwa nōó bīya ā yá ɔ̄ ɛhi.