Read idoma 1 UPÍTA 1 Bible Online

1 UPÍTA 1 - idoma bible

1 UPÍTA 1

¹Upíta, ɔ̄cocɛ̄hɔ̄ kú Ujísɔ̄si Ohɔ́nyɛtá, ī tɔ́kpá nyā fú ācɛ nɛ̄ Ɔwɔicō fu ā, ācɛ nēe lā ɛgɛyɛ́yí gwā ɔlɛ́ abɔ̄yī uwā tá ā. É le pahīla bá ɛjɛ̄ɛ̄jī ɔlɛ́ ācɛ Uróm nēe bá ā, Upɔ́ntɔsi, Ugalésīya, Ukapadósīya, Ésīya mɛ́mla Ubitiníya.

²O ŋmá ɔdā nɛ̄ Ɔwɔicō ādā alɔ miya ipú ɔtū kú nū ā, ó lɛ aá yá ācɛ ɔlɛ́ nū. Alelékwū ihɔ lɛ abɔ̄ ce aá ɛyí, o yá ɛ́ɛ́ ká aá lɛyítáajɛ lɛ Ɔwɔicō, cɛ́ɛ́ kóō kwu íne nɛ̄ aá bīya ā í yá aá ɛhi ohígbū Ujísɔ̄si nēé nyɔ́kpá ā. N gē gbɔ̄ɔkɔ kú Ɔwɔicō kóō hɔ́hā ce aá fíyɛ́, cɛ́ɛ́ ká aá jɛ̄ gɔbū ipú alelékwū.

³Ālɔ̄ tá Ɔwɔicō nōo wɛ ádā kú Óndú ālɔ̄ Ujísɔ̄si Ohɔ́nyɛtá ahínyá, ohígbū kóō gē ményinyi nɛ̄hi, ó kwú oyēeyī ɛ̄yīpɛ̄ ú lɛ alɔ o ŋmá lɛ ō je Ujísɔ̄si héyī ŋmá ɔlékwū. Ɛnya yá cɛ́ɛ́ kú alɔ lɔtūce ɔ́ dúúdú.

⁴Ɔ́ɔmā yá ɛ́ɛ́ nɛ̄ alɔ yɔ̄ gē lɔtūce kú alɔ í mīyɛ ɔhā nɛ̄hi nɛ̄ Ɔwɔicō le tū gbēyī ācɛ ɔlɛ́ nū á. Ó kpó uwā bá ɔkpáncō ɛga nēé gáā wā ŋ́, é kē gáā bīya ŋ́, ɛ́ɛ́ nēé gē cá ŋ́.

⁵Ɔwɔicō gē bī ɔfú kú nū gē le gbō aá nēe cɛ̄ɛ̄lā Ohɔ́nyɛtá ā. Ó kē le tútū ō nya aá tá, ó kē í yá lɛ ā ɛ̄cī ámōōmɛ.

⁶Aá gwéeyē ohígbū ɛ̄nyā nááná nōó cɛgbá kú ɔtū kóō bīya lɛ aá ohígbū ɛdɔ kú ōwē ɛyɛ́ɛyɛ́yí alɛwa nɛ̄ aá má ā.

⁷Ɛyí kú ōwē nɛ̄ aá má ā wɛ o yá ɛ́ɛ́ kéē lɛ ɔkwɛ̄yi kú ɔtū nɛ̄ aá lɛ ce Ujísɔ̄si Ohɔ́nyɛtá ā jé. Ó kōō wɛ ugóolu nōo wɛ oje nōo lɔfú je yíífi glá ā, é gē bī ɔlá le jé ɔ̄ má dúú, ohígbū ɔ́ɔmā é géē jé ɔtōoce kú aá nōo gbɔɔ́lá fíyɛ́ ugóolu (oje ɔdɔ) ā má dúú, o yá ɛ́ɛ́ kéē le jé ka aá cībū glá. Cɛ́ɛ́ kéē géē cɛ̄tra aá, lɛ ojīlīmā ce aá eko nɛ̄ Ujísɔ̄si Ohɔ́nyɛtá gā.

⁸Aá yíihɔtū tū ɔ̄ nááná nɛ̄ aá kōō má ɔ̄ jéjéē ŋ́ mā. Aá cɛ̄ɛ̄lā nū nááná nɛ̄ aá kē má ɔ̄ jéjéē ɛ́ɛ́ ŋ́ mā, anɔ́ɔ aá kē gwéeyē nɛ̄ɛ̄nɛ̄hi nɛ̄ okónu í ka ɔ́ glá ŋ́.

⁹Ohígbū ka Ɔwɔicō yɔ̄ ī nya odo kú aá tá, ɔ́ɔmā kē wɛ ɛyí kú ɔtū nɛ̄ aá kpóce ɔ́ á.

¹⁰Ācomɛ́ɛbɛ, nēe mɛ́ɛbɛ ka ka Ɔwɔicō géē nya aá tá ā, tíne klla dɔɔ̄kā lɔfú lɛyíkwu ɛhi nɛ̄ Ɔwɔicō gáā je lɛ aá ā.

¹¹É cēyītīkwū nɛ̄hi kéē lɛ eko ā jé, kéē klla lɛ ɛ́gɛ́nɛ̄ ó géē yá lɛ ā jé. Ācomɛ́ɛbɛ nɛ̄ alelékwū kú Ohɔ́nyɛtá yɔ̄ mla uwá ā yɔ̄ gē ka táajɛ ɛ́ɛ́ kóō géē yá, ka Ohɔ́nyɛtá géē móōwē, amáŋ igbīhi ōwē nyā ó géē mīyɛ ojīlīmā.

¹²Ɔwɔicō le yá kú ācomɛ́ɛbɛ ā kéē le jé ka úklɔ́ kú uwā í gáā lɛ ile dúú lɛ uwá ŋ́, amáŋ ó géē tīile lɛ ɛjɛ̄ɛ̄jī ācɔ̄lóhɔ́nyɛtá ā. Abɔ̄ é kɛlā lɛyíkwu aɔ́dā nɛ̄ aá pó abālɔbányā ŋmá ɛgiyí ācotɛ̄hɔ̄, nēe bī ɔfú kú Alelékwū ihɔ nēé tɛhɔ ŋmá ɔkpancō ā, le ka ɔ̄kōolɔhi ā tɛ́ɛcɛ lɛ aá ā. Aálelékwū otɛ̄hɔ̄ ā tíne lɔfúlɔfú kéē lɛ aɔ́dā nēe bá nyā jé.

¹³Abɔ̄ ó i lɛ ā, aá lɛ ɔtū lɛ kú aá le tútū. Aá leyī kwɛcɛ, kú aá leyī kpóce ɔhā nɛ̄ Ɔwɔicō gáā hɛ́ ce aá dúúdú ā eko nɛ̄ Ujísɔ̄si í wā ā.

¹⁴Aá lɛyítáajɛ lɛ Ɔwɔicō, aá cɛ̄ lɛ únwū nɛ̄ aá tɛtɛ lɛ eko nɛ̄ aá pó ɛlā Ɔwɔicō ɛ́ɛ́ ŋ́ mā kóō yɔ̄ mla aá kpɔ́ gɛ ŋ́.

¹⁵Ikɔkɔ ɔ́ɔmā, aá lɛ iyī aá yá tīihɔ ɛ́gɛ́nɛ̄ anú nōo hī aá igwú ā tīihɔ ā.

¹⁶Ɔwɔicō da ācɛ ɔlɛ́ nū ipú ɛlɔ̄ɔwɔicō kahíníī, “Aá lɛ iyī aá yá tīihɔ ohígbū ka n kē tīihɔ.”

¹⁷Aá gē hī Ɔwɔicō ka ádā eko nɛ̄ aá gē gbɔ̄ɔkɔ lɛ ɔ́. Anú nōo gē ka ɛdɔ ɔdā nɛ̄ ɔnyɔɔnyɛ yá ā, ó gē méyīgoo kú ɔ̄cɛ dúúmā ŋ́, abɔ̄ ó ī lɛ ā, aá lɛ ojīlīma cɛ Ɔwɔicō ipú ɔdā dúúmā nɛ̄ aá gē yá ɛpléeko nōo hile lɛ aá ipú ɛcɛ nyā ā.

¹⁸Aá jé ɔdā nɛ̄ Ɔwɔicō bī le hɛ́ aá tá ŋmá oyēeyi icííci nɛ̄ aádáádā aá tɛtɛ lā ā, nēé kē kpó tū aá abɔ̄ ā, ó wɛ ije nōo gē yíífi ā nɛ̄ Ɔwɔicō bī le hɛ́ aá tá ā ŋ́.

¹⁹Amáŋ ó nya aá tá ŋmá lɛ ō je Ohɔ́nyɛtá nōo lɛbɛ̄ɛka omlede nōó lɛ ɔnyí ámāŋ ka ɛ́kpā dúú ŋ́ mā gwɛ́ɛya.

²⁰Ɔwɔicō lɛ Ohɔ́nyɛtá fú gbɔbū ɛ́ɛ́ nōó yá ɛcɛ ā, o yá kóō bī ɔ̄ le nya aá tá, abālɔbányā nɛ̄ ɛcɛ ī wā oŋmɛ́yí ā.

²¹O ŋmá ɛgiyí Ohɔ́nyɛtá aá cɛ̄ɛ̄lā Ɔwɔicō nōo je Ohɔ́nyɛtá héyī ŋmá ɔlékwū klla lɛ ɔfú nɛ̄ɛ̄nɛ̄hi kpó lɛ ɔ́ ā, cɛ́ɛ́ ká aá lɔtūce Ɔwɔicō, ká aá klla cɛ̄ ka ɛlā nōó ka ā géē yá jīla.

²²Aá lɛyítáajɛ lɛ ɔ̄kōōlɔhi ā, aá nēé lɛ aá na yēŋēē ā, aá kē gbɔɔ́ ō yíihɔtū ɔkwɛ̄yi tá ayínɛ́ aá dúú ɛɛ́. Aá yíihɔtū tū ɔ́mpa aá ŋmá ɔtū ékpó ɛ́gɛ́nɛ̄ ɔfú kú aá jɛ̄ lɛ ā.

²³Ɔwɔicō kwú oyēeyi ɛ̄yīpɛ̄ ú lɛ aá, anú nōo wɛ Ádā kú aá ā. Ó gē kwú ŋ́, ó yēeyī piyóó. Ó je oyēeyī lɛ aá ŋmá ɔfú kú ɛlā kú nū nōo yēeyī nōo klla ī yɔ̄ piyóó ā.

²⁴Ɛ́gɛ́nɛ̄ ɛlā kú Ɔwɔicō ā ka lɛ ā. “Ɛjɛ̄ɛ̄jī alɛɛcɛ lɛbɛ̄ɛka ácí ā, Ɛjɛ̄ɛ̄jī ɛgahi kú uwā lɛbɛ̄ɛka ododó kú ipácí ā. Ácí le pɛ gekwú anɔ́ɔ ododó ā le kpó wúla wāajɛ á,

²⁵amáŋ ɛlā kú Ɔwɔicō yēeyī piyóó.” Ɛlā nyā wɛ Ɔ̄kōolɔhi nɛ̄ ācotɛ̄hɔ̄ ā ka tɛ́ɛcɛ lɛ aá á.