Read idoma 1 UPÍTA 2 Bible Online

1 UPÍTA 2 - idoma bible

1 UPÍTA 2

¹Abɔ̄ ó i lɛ ā, aá lɛ ɛjɛ̄ɛ̄jī ɔbíipú, ɛ̄kɛ̄mgbɛ̄ ōkā ámāŋ ka ula ō yá, ámāŋ imálānyī ámāŋ ɛcá ō cá kpɔ́ bónū ŋmá ɛgiyí aá.

²Ɛ́gɛ́nɛ̄ ɔyípɛ̄ obene gē yúnwū amɛ̄ nɛ̄ɛ̄nɛ̄hi ā, aá yúnwū ɛlā kú Ɔwɔicō nōo lɛbɛ̄ɛka amɛ̄ oyēŋēē nɛ̄ alelékwū kú Ɔwɔicō ī je ā. Ɔ́dāŋ́ ka aá lɛ ɛlā kú Ɔwɔicō nōo lɛbɛ̄ɛka amɛ̄ ɔ́ɔmā jé, aá géē jɛ̄ lɔhi, ó kē í nya aá tá.

³Ɛ́gɛ́nɛ̄ ɛlā kú Ɔwɔicō ka ā, aá le jé abɔ̄yī aá ɛ́gɛ́nɛ̄ Óndú ā gbonɛnɛ ā.

⁴Aá yɔ̄ gē túblá Óndú Ujísɔ̄si, anú nōo lɛbɛ̄ɛka ɛcɔ̄ nōo yēeyī nɛ̄ ācɛ o ma inu tá tónū kóō lɛ ɔhí ŋ́ mā, amáŋ Ɔwɔicō lɛ ɔ́ má ka ó lɔhi, anɔ́ɔ ó kwú ɔ̄ ú á.

⁵Aá wā bɛ̄ɛka ɛcɔ̄ nɛ̄ Ɔwɔicō je oyeeyi lɛ ɔ́ ā, cɛ́ɛ́ kóō lɛ aá gwó tū ipú Agblīihɔ-nɛ̄hi, ɛga nɛ̄ aá géē yúklɔ́ bɛ̄ɛka ācogwɛ́ɛya o tīihɔ ā. Cɛ́ɛ́ ká aá gwɛ́ɛya otīihɔ nɛ̄ Ɔwɔicō mīyɛ glá, o ŋmá lɛ iyē kú Ujísɔ̄si Ohɔ́nyɛtá.

⁶Ɔwɔicō ka ipú ɛlā kú nū kahíníī, “N lɛ ɛcɔ̄ o tīile nɛ̄hi éyi piyɛ, ɛ̄nɛ̄ n yɔ̄ gē le kwu ɔkíkā kú Ujerúsālɛm, ɔ̄cɛ dúúmā nōo lɔtūce Ohɔ́nyɛtá nɛ̄ n fu ā, uwēyī ī gáā kwú ɔ́ ŋ́.

⁷Ɛcɔ̄ nyā tīile nɛ̄hi lɛ aá nōo cɛ̄ɛ̄lā Ohɔ́nyɛtá ā, amáŋ ācɛ nēé cɛ̄ ŋ́ mā. “Ɛcɔ̄ nɛ̄ ācɛ o gwíinu tá kóō lɔhi ŋ́ mā, klla kwú pīya ɛcɔ̄ o cɛgbá nɛ̄hi nōo cɛgbá fíyɛ́ dúú lɛ ɛjɛ̄ɛ̄jī ācɛ.”

⁸ Anɔ́ɔ ɛlā kú Ɔwɔicō kahíníī, “Ɛ̄nyā wɛ ɛcɔ̄ nɛ̄ ācɛ géē lɛ ikpó gbo ɔ́ í túgagá kē í gwōnū.” É túgagá í gwōnū ohígbū ɔdā nɛ̄ Ɔwɔicō miya lɛ uwa á.

⁹ Amáŋ aá wɛ ācɛ nɛ̄ Ɔwɔicō fu, ācogwɛ́ɛya nēe gē cɛ̄ Ɔwɔicō nōo wɛ ɔcɛ́ ā ɛhɔ̄. Aá wɛ éwo nɛ̄ Ɔwɔicō le tū kéē yúklɔ́ lɛ ɔ́, aá wɛ ācɛ nēe wɛ ákú Ɔwɔicō ōfūnū. Anú ā hī aá igwú ŋmá ipú obū kú ínoōbīya ga ipú kú ɔlá ofiyajɛ nōo nya aá tá ā á. Ó fu aá ká aá ka ɔdā idáagó nɛ̄ ó yá ā tɛ́ɛcɛ.

¹⁰Otɛtɛ ā, aá wɛ ācɔ̄lóhɔ́nyɛtá ŋ́, amáŋ abālɔbányā aá wɛ ācɛ ɔlɛ́ nū. Eko éyi Ɔwɔicō í ményīnyi aá ŋ́, amáŋ abālɔbányā, Ɔwɔicō gbɔɔ́ ō ményīnyi aá ɛɛ́.

¹¹N lɛ abɔ̄ tɛ́yīpɛ̄ lɛ aá, ācɛ o cɛ̄ɛ̄lā Ɔwɔicō mla um, abɔ̄ aá wɛ ugbɔga mɛ́mla aílɔ́wá nēé gáā lā ipú ɛcɛ nyā gbojī ŋ́ mā ā, aá le kwu ŋmá únwū kú ɔkpíyē nōo lɛbɛ̄ɛka aólɛlā nēe bá gē nuunu tá odo kú aá ā.

¹²Aá yá ucē olɔhi ɛgiyí ācɛ nē é pó ɛlā Ɔwɔicō ŋ́ mā. Cɛ́ɛ́ eko nēe lɛ ije ce bá aá, ka aá wɛ ācɛ ō yá ɔdōbɔ̄bí, amáŋ eko nēé lɛ olɔhi nɛ̄ aá yá ā má, é géē mīyɛ cɛ̄ ka aá wɛ ācɛ olɔhi. Anɔ́ɔ é géē tá Ɔwɔicō ahínyá ɛ̄cī nōó géē hɛ́pɔ̄ kú ācɛ ā.

¹³Ohígbū ojīlīma kú Óndú ā aá lɛyítáajɛ lɛ ɔcɛ́ óndú ajɛ kú ɔlɛ́ aá nɛ̄ ofú kú nū fíyɛ́ dúú ā.

¹⁴Aá géē lɛyítáajɛ lɛ igbómína, nɛ̄ ɔcɛ́ óndú ajɛ fu kú ō yá ācɛ o yá ɔdōbɔ̄bí italā cɛ́ɛ́ kóō kē cɛ̄tra ācɛ o lɛyítáajɛ lɛ íne ā.

¹⁵Ɔwɔicō dɔɔ̄kā ká aá yá ɔdā olɔhi, cɛ́ɛ́ ká aógwuda mɛ́mla aólíla ā kéē má ɛga ka obɔ̄bí lɛyíkwu aá ŋ́.

¹⁶Aá bī iyī aá bɛ̄ɛka ācɛ nēe lɛ iyī uwā ā, amáŋ aá híī lɛ abɔ̄ bá iyī aá ō lɛ nyā, le yá ɔdōbɔ́bí ŋ́. Amáŋ aá yɔ̄ bɛ̄ɛka ācɛ nēe gē cɛ̄ Ɔwɔicō ɛhɔ̄ ā.

¹⁷Aá lɛ ojīlīmā cɛ ɛjɛ̄ɛ̄jī ācɛ, aá yíihɔtū tá ācɔ̄lóhɔ́nyɛtá ɔ́mpa aá, aá lɛ ojīlīmā ce Ɔwɔicō. Aá lɛ ojīlīmā ce ɔcɛ́ abɔ̄ nōo lɛ ajɛ.

¹⁸Aá nēe wɛ ɔfiyɛ ā géē tɛ́yí wāajɛ lɛ aɔ́kpani aá piíí. Aá lɛ ojīlīmā ce uwá dúúdú. Abɔ̄ aá gē yá ɛ̄nyā ā, kóō híī wɛ eko nɛ̄ ɔkpani aá wɛ ɔ̄cɛ ogbonɛnɛ ōfūnū ŋ́, amáŋ aá géē yá lɛ a lɛ ɔ̄cɛ o lɔnɔ ɔtū dúú.

¹⁹Ɔwɔicō ī hɔ́hā ce aá, ɔ́dāŋ́ ka aá lɛ ɔtū lé ipú ōwē nɛ̄ aá cíkā ō má ŋ́, nɛ̄ aá yɔ̄ gē má, ohígbū ka aá le miya ka aá géē yɛce ɔdā nɛ̄ Ɔwɔicō cɛ̄ ā.

²⁰Ile nyá nɛ̄ aá géē lɛ ɔ́dāŋ́ ka aá lɛ ɔtū lé eko nɛ̄ ɔkpani aá lɛ aá ŋmíje ohígbū ɔdōbɔ̄bī nɛ̄ aá yá ā. Amáŋ ɔ́dāŋ́ ka ɔkpani aá lɛ aá ŋmíje ohígbū ɔdā olɔhi nɛ̄ aá yá, Ɔwɔicō géē hɔ́hā ce aá.

²¹Ɔwɔicō hī aá igwú ohígbū ōwē ō má ɛ́gɛ́nyā nɛ̄ n, ohígbū ka Ohɔ́nyɛtá abɔ̄yī nū kē móōwe ohígbū aá, ó i lɛ ā, aá géē gbla anú yá ɔwɛ nōó lɔtū lé ipú ōwē kú nū ā.

²²Ó bīyíne ɔwɛ dóódu ŋ́, ɛ́ɛ́ nɛ̄ ɔ̄cɛ dúú pó ɛ̄kɛ̄mgbɛ̄ ō kā ŋmá okónu kú nū ŋ́ má.

²³Eko nɛ̄ ācɛ ɔhá cá ɔ̄ ɛcá ā, ó lɛ ɛcá cíla ulé kú ɛcá ŋ́. Eko nɛ̄ ācɛ yá ɔ̄ ōwē ā, ó tū uwā ufi ka anúɔ géē yá uwā odée igbīhāajɛ ŋ́, ikɔkɔ ɔ́ɔmā o kwú oyēeyi kú nū ú tū Ɔwɔicō abɔ̄.

²⁴Ohɔ́nyɛtá abɔ̄yī nū kwú íne nɛ̄ alɔ bīya ā ú ce iyī nū ga ɔcóonyɔ́kpá ɛga nōó kwú ā, o yá kú ālɔ̄ le hɛ́tá ŋmá ɔfú kú ínoōbīya, cɛ́ɛ́ ká ālɔ̄ yɔ̄ ɛ́gɛ́nɛ̄ Ɔwɔicō dɔɔ̄kā kú alɔ yɔ̄ ā. Abɔ̄ é kwu Ohɔ́nyɛtá ú nyɔ́kpá ā, alɔ le lɔfú iyē ipú alelékwū.

²⁵Aá lɛbɛ̄ɛka aálá nōo le lé ligbó gaá gebí ā, amáŋ Ohɔ́nyɛtá nōo wɛ ogbāálá mɛ́mla ɔ̄cɛ o gbō odo ká aá ā, abālɔbányā, lɛ aá kpó kwúcē igbīhi wā, cɛ́ɛ́ kú aá yɛce ɔ́.