Read idoma 1 UPÍTA 4 Bible Online

1 UPÍTA 4 - idoma bible

1 UPÍTA 4

¹Abɔ̄ Ohɔ́nyɛtá móōwē ipú ɔkpíyē eko nēé ŋmó ɔ̄ ā, aá gbla Ohɔ́nyɛtá yá ipú ɛdɔ kú ucē nɛ̄ ó yá ɔ́ɔmā ā. Ohígbū ka ɔ̄cɛ dúú nōo lɛ ɛdɔ kú ōwē ɔ́ɔmā má, o gáā yɔ̄ gē bīyíne gɛ ŋ́.

²O ŋmá abālɔbányā gɔbū ā, aá lā oyēeyī kā aá eko nōo hile lɛ aá ɛcɛ nyā ā ɛ́gɛ́nɛ̄ Ɔwɔicō tíne ā, ó híī wɛ ɛ́gɛ́nɛ̄ alɛɛcɛ tíne ā ŋ́.

³Aá le eko táajɛ otɛtɛ ā gē yá ɔdā nɛ̄ ācɛ nēé jé Ɔwɔicō ŋ́ mā gē yá ā. Aá yɔ̄ gē lā oyēeyi obɔ̄bí bɛ̄ɛka unwū kú ɔnyā ō yá icííci, ejé ō gwá otú gbɔ́ɔ̄cī kóō kwú aá mɛ́mla ɛdɔ kú ɛcí nɛ̄ aá gē pā nōo ī tūwēyī ā.

⁴Anɔ́ɔ abālɔbányā ācɛ nēé pó ɛlā Ɔwɔicō ŋ́ mā, ó le hɛ́ uwā idáagó abɔ̄ aá gē yɛ mla uwá gē lā oyēeyī obɔ̄bí mla uwá gɛ ŋ́ mā, anɔ́ɔ é gbɔɔ́ ō cá aá ɛcá á.

⁵Amáŋ é géē kɔkɔ kú ɔdā nēé yá ā lɛ Ɔwɔicō, nōo le tútū ō hɛ́pɔ̄ kú ācɛ oyēeyī mla ācɛ o gekwú ā.

⁶Ɔ́ɔmā yá ɛ́ɛ́ nɛ̄ Ujísɔ̄si Ohɔ́nyɛtá nyɔ̄ gaá le ɔna kú ɔ̄kōolɔhi ā tá lɛ ācɛ nēe gekwú āá. Ikwū kú uwā bɛ̄ɛka ákú alɛɛcɛ o hile ā ŋmá lɛ ɛpɔ̄ nɛ̄ Ɔwɔicō gē ka tū ācɛ ā nɛ̄ n. É tɔ́ɔna kú ɔ̄kōolɔhi ā lɛ uwá, o yá ɛ́ɛ́ kéē lá ipú alelékwū ɛ́gɛ́nɛ̄ Ɔwɔicō tíne ā.

⁷Eko nɛ̄ ɛcɛ nyā géē mɛ ā, gáā kwu ajaajɛ ɛɛ́. Ohígbū ɔ́ɔmā aá cē iyī aá bī kú aá klla leyī kwɛcɛ cíí, cɛ́ɛ́ ká aá lɔfú gbɔ̄ɔkɔ glá.

⁸Ɔdā nōo cɛgbá fíyɛ́ kpɛ́mm ā, ɔ̄cɛ ɔ́mpa aá kóō he aá ɔtū, ohígbū ka ihɔtū gē cɛ̄ lɛ ɔ̄cɛ ī je ínoōbīya yɛ́ɛhi.

⁹Aá mīyɛ ɔ́mpa aá tū ɔlɛ́, aá híī ka iŋiŋi ŋ́.

¹⁰Ɔwɔicō lɛ ɛhi ɛyɛ́ɛyɛ́yí kɔ̄ lɛ ɔnyɔɔnyɛ kú aá, ohígbū ɔ́ɔmā aá leyīkwu ɔ́ lɔɔlɔhi cɛ́ɛ́ kú aá bī ɛhi ā le tá ɔ́mpa aá abɔ̄.

¹¹Ɔ̄cɛ dúú nōo gē tɔ́ɔna kú ɛlā Ɔwɔicō, géē ka ɔdā nɛ̄ Ɔwɔicō le tū ɔ̄ ɛhɔ̄ ā piíí. Ɔ̄cɛ dúú nōo gē cɛ̄hɔ̄ ipú icɔ́ɔci géē bī ɛjɛ̄ɛ̄jī ɔfú nɛ̄ Ɔwɔicō je lɛ ɔ́ ā le cɛ̄hɔ̄ piíí, cɛ́ɛ́ ipú ɛjɛ̄ɛ̄jī ɔdā dúú nɛ̄ aá gē yá ā, ācɛ géē cɛ̄tra Ɔwɔicō ó ŋmá lɛ iyē kú Ujísɔ̄si Ohɔ́nyɛtá, ɔ̄cɛ nɛ̄ ofu mɛ́mla ɔfú wɛ ákú nū ā.

¹²Ācɔ̄lóhɔ́nyɛtá ō he um ɔtū, abālɔbányā aá yɔ̄ gē móowē olɔnɔ nɛ̄hi, nōo yɔ̄ gē jé ɔtōkpóce kú aá má. Óō híī hɛ́ aá idáagó ŋ́, aá kē gbɛlá ka ɛ̄nyā wɛ ɔdā oyēyījii ŋ́.

¹³Amáŋ aá gwéeyē abɔ̄ aá yɔ̄ gē móowē ɛ́gɛ́nɛ̄ Ohɔ́nyɛtá má ā. Cɛ́ɛ́ ɔtū géē he aá nɛ̄ɛ̄nɛ̄hi abɔ̄ nɛ̄ aá géē má ɔfú kú nū eko nōó géē wā igbɔhá ā.

¹⁴Aá gwéeyē ɔ́dāŋ́ ka ācɛ gē cá aá ɛcá ohígbū ka aá wɛ ācɔ̄lóhɔ́nyɛtá, ɛ̄nyā cābɔ̄ ka ɔfú nɛ̄hi mɛ́mla alelékwū kú Ɔwɔicō ā yɔ̄ mla aá.

¹⁵Ɔ́dāŋ́ ka ɔ̄cɛ dúú ká aá í móowē, óō híī wɛ ohígbū ɔ̄cɛ nɛ̄ ó ŋmó ā ŋ́, uwī nɛ̄ ó wī ā ŋ́, ámāŋ ka íne nɛ̄ ó bīya a ŋ́, ámāŋ tá Ɔwɔicō ahínyá abɔ̄ ācɛ gē hī aá ka ācɔ̄lóhɔ́nyɛtá ā.

¹⁶Amáŋ ɔ́dāŋ́ ka a móōwē ohígbū ka aá wɛ ācɔ̄lóhɔ́nyɛtá, ɔ́ɔmā kóō híī tū uwɔ uwēyī ŋ́, amáŋ tá Ɔwɔicō ahínyá ohígbū ka a líiyē kwu Ohɔ́nyɛtá.

¹⁷Ɛ̄cī nɛ̄ Ɔwɔicō géē hɛ́pɔ̄ kú ācɛ ā, gaá kwajaajɛ ɛɛ́. Ɔwɔicō géē gbɔɔ́ aflɛ́yí ŋmá ācɛ ɔlɛ nū. Ɔ́dāŋ́ ka ɛpɔ̄ gbɔɔ́ ŋmá ɛgiyí alɔ, ɔdí kē í wɛ oŋmɛ̄yi kú ācɛ nēé jāhɔ̄ lɛ ɔ̄kōolɔhi nōo ŋmá ɛgiyí Ɔwɔicō ā ŋ́ mā ā.

¹⁸Ɛ́gɛ́nɛ̄ ɛlɔ̄ɔwɔicō ka ā, ɔ́dāŋ́ ka ó lɔnɔ nɛ̄hi lɛ ācɛ olɔhi kéē le nyatá, ɔdí kē í yá ācobīyíne nēé jé Ɔwɔicō ŋ́ mā ā.”

¹⁹Ohígbū ɔ́ɔmā ācɛ nēe gē móowē ɛ́gɛ́nɛ̄ Ɔwɔicō miya lɛ uwá ā, kéē kwú iyī uwā ú tū Ɔwɔicō nōó gē kɛ̄mgbɛ̄ ŋ́ mā abɔ̄ dúúdú mla ucē olɔhi ō yá kú uwā.