Read idoma 1 UPÍTA 5 Bible Online

1 UPÍTA 5 - idoma bible

1 UPÍTA 5

¹Ami abɔ̄yī um nōo wɛ ɔnyākwɔ́cɛ dúú ā, n klla wɛ ijáalí kú ōwē nɛ̄ Ohɔ́nyɛtá má ā, n kē géē lɛ ukpɛ̄ kú ɔfú kú nū nɛ̄ ācɛ dóódu géē má ānāānā ā. N gē lɛ abɔ̄ tɛ́yīpɛ̄ lɛ anyākwɔ́cɛ kú icɔ́ɔci nēe bá ipú aá ā kéē leyīkwu ígwu nɛ̄ Ɔwɔicō kpó tū uwā ipú icɔ́ɔci ā,

²ɛ́gɛ́nɛ̄ ācogbāálá gē leyīkwu aálá kú uwā ā. Óō híī lɛbɛ̄ɛka é pī uwá bá ɔ̄ ā ŋ́. Óō kē wɛ ohígbū ije nōo géē bɛ̄cɛ ŋmá anú ā ŋ́, amáŋ óō ŋmá ɔdā nēé tíne ō yá ŋmá ɔtū nɛ̄hɛ́ kú uwā.

³Aá híī lɛ ogbló wu abɔ̄ gē lɛ gbō ācɛ nɛ̄ Ɔwɔicō kpó tū aá abɔ̄ ā ŋ́, amáŋ aá yá ɔdā nēé géē má gbla glá.

⁴Cɛ́ɛ́ eko nɛ̄ Ohɔ́nyɛtá otrɛ̄yí kú ācogbāálá ā gā, aá géē mīyɛ ɔfulā kú ɔfú nōó gē cá ŋ́ mā.

⁵Ɔwɛ ékpó ɔ́ɔmā, aá nēe wɛ ayípōklóbīya ā, aá lɛyítáajɛ lɛ anyākwɔ́cɛ dúú, ká aá cɛ̄ ācɔ̄lóhɔ́nyɛtá ɔ́mpa aá ɛhɔ̄ mla ɔtū otú wāajɛ, ohígbū ka ɛlɔ̄ɔwɔicō ā kahíníī, “Ɔwɔicō gē bɛ́yí kwu ācɛ oyɔ́bɔ́cɛ, amáŋ ó gē gbonɛnɛ lɛ ācɛ o tū iyī uwā wāajɛ.”

⁶Aá tū iyī aá wāajɛ ɛháajɛ ɔfú nɛ̄hi kú Ɔwɔicō, cɛ́ɛ́ kóō géē je aá gicō ipú ojīlīmā eko nōo he ɔ́ ɔtū ā.

⁷Aá lɛ ɛjɛ̄ɛ̄jī unwalu mɛ́mla ɔtōplicō ká aá kpó ka lɛ Ɔwɔicō, ohígbū kóō gē lɛ ɛlā wu aá.

⁸Aá gbēyī cíí, ká aá leyī kwɛcɛ, olɛlā ká aá ebilíi ā yɔ̄ gē gicō gaajɛ ī tōoji bɛ̄ɛka ágábá, nōō gē tíne ɔ̄cɛ nōó géē kwú lé ā.

⁹Aá í tá ɛlā kú ebilíi, ká aá lɔtūce Ɔwɔicō lɔfúlɔfú, aá jé ka ɛjɛ̄ɛ̄jī ācɔ̄lóhɔ́nyɛtá ɔ́mpa aá nēe bá ɛjɛ̄ɛ̄jī ɛcɛ nyā, bá gē má ɛdɔ kú ōwē nɛ̄ aá bá gē má nyā dúú.

¹⁰Amáŋ eko nɛ̄ aá lɛ ōwē má yɛɛ, Ɔwɔicō nōo yíihɔtū tá alɔ ojigógó ā, nōo hī aá igwú ká aá gaá lā ɛgiyí nū piyóó ipú opīyatɔ̄há mla Ujísɔ̄si Ohɔ́nyɛtá ā, géē yá ká aá le jōōjīla ipú alelékwū. Ó géē yá kú aá lɔtu ce ɔ̄ lɔfú fíyɛ́, ká aá háyi kli, ká ɔdā dúú kóō jíla aá iye ŋ́.

¹¹Ɔwɔicō kóō ce ɔ̄cɛ piyóó. Aamí.

¹²Usílāsi [1]ɔ̄cɛ nɛ̄ n lɔtūce ɔ́ ka ó wɛ ɔyínɛ̄ um ipú ɛlā Ɔwɔicō ā cɛ̄ um tɔ́kpá kpií nyā fu aá á. N tíne kú um tá aá ɔtū kwu ɔtū ká n̄ cē ijáalí kú ihɔtū ɔkwɛ̄yi kú Ɔwɔicō. Aá lɛ abɔ̄ bī ɔ̄ lɔfú.

¹³ Ācɛ o pó ɛlā Ɔwɔicō ɔ́mpa aá nēe bá Ubábīlɔn amānyā ā ka n̄ hókónu tū aá, Umáki, ɔyí um hókónu tū aá dúú.

¹⁴Aá bī ɔtū oōmá ɔtū kú ihɔtū le hókónu tū iyī aá. Ɛbɔ́ kóō yɔ̄ lɛ odúúdú aá nēe pīya tɔhā mla Ohɔ́nyɛtá ā.