Read idoma 2 UPÍTA 1 Bible Online

2 UPÍTA 1 - idoma bible

2 UPÍTA 1

¹Usáyímɔni Upíta, ɔ̄cotɛ̄hɔ̄ mɛ́mla ɔyíkpó kú Ujísɔ̄si tɔ́kpá nyā fu ācɛ nɛ̄ Ɔwɔicō mɛ́mla Ujísɔ̄si Ohɔ́nyɛtá nēe gē yá ɔdā okpaakpa yá kéē lɔtūce Ɔwɔicō ɔwɛ nōo lɔhi bɛ̄ɛka ákú alɔ ā.

²N gē gbɔ̄ɔkɔ ka Ɔwɔicō géē hɔ́hā ce aá nɛ̄ɛ̄nɛ̄hi, cɛ́ɛ́ ká ɛbɔ̄ nɛ̄ aá lɛ ā kóō yɔ̄ ī jɛ̄ gɔbɔ̄ɔ̄bū o ŋmá ɛ́gɛ́nɛ̄ aá jé Ɔwɔicō mɛ́mla Ujísɔ̄si Óndú alɔ lɛ ā.

³O ŋmá ɔfú kú Ɔwɔicō, Ujísɔ̄si lɛ ɛjɛ̄ɛ̄jī ɔdā dóódu nɛ̄ alɔ cɛgbá ká ālɔ̄ yēeyī bɛ̄ɛka ācɔ̄lóhɔ́nyɛtá ā kpó lɛ alɔ. Ó yá ɛnyā ŋmá ɛ́gɛ́nɛ̄ alɔ jé ɔ́ lɔɔlɔhi lɛ ā. O klla hī alɔ igwú kú ālɔ̄ lɛ ukpɛ̄ kú ɔfú mɛ́mla ucē olɔhi ō yá kú nū lɛ.

⁴O ŋmá lɛ ɔwɛ nyā, ó kwú aɔ́dā nɛ̄ɛ̄nɛ̄hi mɛ́mla aɔ́dā olɔhi nɛ̄hi nēe bá nyā nɛ̄ ó cokónu ō je ā ú kpó lɛ alɔ. Cɛ́ɛ́, aɔ́dā nēe bá ā lɔfú yá ká ālɔ̄ hɛ́ ucē kú únwū nɛ̄hi kú aɔ́dā kú ipú ɛcɛ nyā nōo lɔfú ŋmó ɔ̄cɛ glá ā abɔ̄, cɛ́ɛ́ aá lɔfú lɛ ukpɛ̄ kú ucē kú Ɔwɔicō ā lɛ.

⁵Ohígbū aɔ́dā nɛ̄ Ɔwɔicō yá lɛ alɔ ā, aá cēyītīkwū ká aá kwú aúcē olɔhi ō yá ú búla ɔtū nɛ̄ aá kpóce Ohɔ́nyɛtá ā, aá kē kwú ɔdōōjé ú búla aúcē olɔhi ō yá,

⁶aá kwú o cē iyī ɔ̄cɛ bī glá ú búla ɔdōōjé. Aá kwú ɔtōōlé ipú ōwē ú búla o cē iyī ɔ̄cɛ bī glá. Aá klla í je oyēeyī kú ɔtū ō tá Ɔwɔicō ō gbɛ̄ɛ̄gbā búla ɔtōōlé ipú ōwē.

⁷Aá géē je ihɔtū kú ācɔ̄lóhɔ́nyɛtá ɔ́mpa aá ō pi búla oyēeyī kú ɔtū ō tá Ɔwɔicō ō gbɛ̄ɛ̄gbā, aá klla géē je ihɔtū búla ɔtū kú ācɔ̄lóhɔ́nyɛtá ɔ́mpa aá ō pi.

⁸Ɔ́dāŋ ka aá lɛ aúcē nēe bá nyā lɛ, nēé kē yɔ̄ gē nwuné nwuné, é géē yá ká aá yúklɔ́ olɔhi nōo géē gwá īkpō ɛ́gɛ́nɛ̄ aá jé Ujísɔ̄si Ohɔ́nyɛtá abɔ̄yī aá lɛ ā.

⁹Ɔ̄cɔ̄lóhɔ́nyɛtá dúú nɛ̄ ó lɛ aúcē nēé cɔ̄cí nēe bá nyā ŋ́ lɛbɛ̄ɛka ɔ̄cɛ nɛ̄ ó gē mɛ́ɛbɛ lɔhi ŋ́ mā, ámāŋ ka ɔ̄cɛ nɛ̄ ó gē mɛ́ɛbɛ ŋ́ fúlufúlu ā. Ɔ̄cɔ̄lóhɔ́nyɛtá ɛ́gɔ́ɔmā le mlanyī ka Ɔwɔicō kwú íne nōo bīya í yá ɔ̄ ɛhi klla lɛ ɔ́ na yēŋēē ɛɛ́.

¹⁰Abɔ̄ ó le lɛ ā ā, ayínɛ́ um nɔ̄nyā mɛ́mla anyīlɔ, aá cēyītīkwū nwuné ɛ́gɛ́nɛ̄ ɔfú ká aá jɛ̄ lɛ ā ká aá lɛ igwú nɛ̄ Ɔwɔicō hī aá nɛ̄ ó klla lɛ aá fu ā, yá kóō wɛ ɔdā ō yɔ̄ piyóó ipú oyēeyi kú aá. Ɔ́dāŋ́ ka aá le yá lɛ ā, aá gáā nyɛ̄ɛ̄ ŋmá ɛlā Ɔwɔicō nɛ̄ aá mīyɛ cɛ̄ ā glá gɛ ŋ́.

¹¹Cɛ́ɛ́ Ɔwɔicō géē nwūla ɔwɛ kú ɔkpáncō tɔ́ɔtɛ́ gbōdōō lɛ aá ká aá bēé nyɔ̄ ga ajɔ̄ɔ̄cɛ́ nɛ̄ ó lɛ ōmɛ ŋ́ kú Óndú alɔ Ujísɔ̄si Ohɔ́nyɛtá ā.

¹²Ohígbū ɔ́ɔmā ā, n géē yɔ̄ gē tá aá ɛlá kwu aɔ́dā nēe bā nyā ojígógó, nááná nɛ̄ aá kōō jé uwā klla kē háyi kpaakpa ipú ɔkwɛ̄yi nēé nwū aá ā.

¹³N gbɛlá ka ó cíkā ká n̄ yɔ̄ gē tá aá ɛlá kwu aɔ́dā nēe bá nyā abɔ̄ n yēeyī kpɔ́ ɛ́ɛ́ mā ā.

¹⁴N jé ka ikwū kú um í gbojī gɛ ŋ́, Óndú alɔ Ujísɔ̄si Ohɔ́nyɛtá le da um péee ɛɛ́.

¹⁵N géē yá ɔdā nɛ̄ n yá glá ká aá yɔ̄ gē blakwu aɔ́dā nēe bá nyā eko nɛ̄ n nyɛ̄ɛ̄ ŋmá ɛcɛ nyā.

¹⁶Eko nɛ̄ alɔ nwū aá ka Óndú alɔ Ujísɔ̄si Ohɔ́nyɛtá géē kwúcē wā ipú ɛcɛ nyā mla ɔfú nɛ̄hi kú nū ā, ó wɛ ɔ̄cā nɛ̄ alɔ ca lɛ aá ā ŋ́. Alɔ jé ɔdā nɛ̄ alɔ yɔ̄ gē ka lɛ aá ā, ohígbū ka alɔ bī ikpēyi abɔ̄yī alɔ lɛ ɔfú nɛ̄hi kú nū má,

¹⁷ Ɔwɔicō Ádā kwú ojīlīmā, ɛgahi, ocɛ̄tra mɛ́mla ɔfú ú kpó lɛ Ujísɔ̄si Ohɔ́nyɛtá eko nɛ̄ ɔkɔ ŋmá ɛgiyí ɔ̄cɛ nōo fíyɛ́ dúú ā yɔ̄ gē kahíníī, “Ɛnyā wɛ ɔyínɔ̄nyīlɔ nōo he um ɔtū á, ɛlā nū kē he um ɔtū nɛ̄hi.”

¹⁸Alɔ abɔ̄yī alɔ pó ɔkɔ ā eko nɛ̄ alɔ bá mla anú ɛyí ɛfu otīihɔ ɔ́ɔmā.

¹⁹Ohígbū ɔ́ɔmā, alɔ lɔtūce ɛhɔ̄ nɛ̄ ācomɛ́ɛbɛ ā cɛ̄ ā. Ó géē lɔhi lɛ aá fíyɛ́ ɔ́dāŋ́ ka aá lɛ abɔ̄ bī ɛlā kú uwā, ohígbū ka ɛlā ā lɛbɛ̄ɛka ɔlá nōo ī cɛ̄ ipú ajɛ odobū jāā gbéeko nɛ̄ eyī le nyā ā, cɛ́ɛ́ ɔlá kú Ohɔ́nyɛtá bɛ̄ɛka ɔlá kú ínyílɔ́wɔ kú ɔ̄cɔ̄ɔ̄cī ā, géē fíyajɛ ipú ɔtū kú aá.

²⁰O fíyɛ́ dúú ā, aá bla ka ɔ̄cɛ dúúmā í cɔ̄ɔ̄wɔ kú ɛbɛ oōmá kú ipú ɛlɔ̄ɔwɔicō abɔ̄yīnū glá ŋ́.

²¹Ohígbū ka, ɔ̄comɛ́ɛbɛ dúú ī gē cɛ̄ɛ̄hɔ̄ ká abɔ̄yī nū glá ŋ́, amáŋ ācɛ nɛ̄ alelékwū kú Ɔwɔicō gē bī tá ā, gē cɛ̄hɔ̄ nōo ŋmá ɛgiyí Ɔwɔicō á.