Read idoma 2 UPÍTA 2 Bible Online

2 UPÍTA 2 - idoma bible

2 UPÍTA 2

¹Amáŋ ācomɛ́ɛbɛ ɛ̄kɛ̄mgbɛ̄ yɔ̄ ipú Ísrɛ̄lu dúú ɛ́gɛ́nɛ̄ aítíca ɛ̄kɛ̄mgbɛ̄ kē géē bɛ̄cɛ ipú aá ā. É géē bī ɔdā ōnwū ɛ̄kɛ̄mgbɛ̄ nēe géē ŋmó ɛlɔ̄ɔwɔicō tāajɛ glá ā wā í nwū aá, nɛ̄ aá gáā jé obɔ̄bi kú nū fíyaa ŋ́. É géē tá ɛlā kú Ujísɔ̄si nōo nyā uwā tá ā. Ohígbū ɔ́ɔmā é géē bī ífi wā gé lɛ iyī uwā fíyaa.

²Abɔ̄ ó lɛ ā, ācɛ alɛwa géē yá ɛdɔ kú ucē obɔ̄bi nɛ̄ aítíca ɛ̄kɛ̄mgbɛ̄ ā ge yá ā, ohígbū ucē obɔ̄bi nēé gē yá ā, ācɛ géē gbɔɔ́ ō kɛlā obɔ̄bí kú ɛlɔ̄ɔwɔicō ɔkwɛ̄yi ā.

³Ohígbū ágágā kú aítíca ɛ̄kɛ̄mgbɛ̄ nēe bá nyá, é géē ka ɔ̄kā ɛ̄kɛ̄mgbɛ̄ nēé miya táajɛ ā, o yá ɛ́ɛ́ kéē yá ije ŋmá ɛgiyí aá. Ɔwɔicō lɛ uwa ŋmɛ́pɔ̄bi klla le ikwū miya tū uwā gbojī ɛɛ́. Ɔwɔicō í gē gbɔlā ŋ́, ó kē í yá uwā italā ɛ́gɛ́nɛ̄ ó ka lɛ ā.

⁴Aá gbɛlá kwu ɔdā nēe yá aálelékwū otɛhɔ nēe bīyíne ā, Ɔwɔicō í mabɔ̄ uwā tá ŋ́, ó le italā yá uwá. Ó lɛ uwá tá tū ipú ɔlíkɔtɔ, ɛga nēé lɛ agbá kwu uwá ipú ajoodobū jāā gbó ɛ̄cī nɛ̄ Ɔwɔicō géē hɛ́pɔ̄ kú uwā ā.

⁵ Alɔ jé ka Ɔwɔicō yá ācɛ nēe yɔ̄ eko kú íkííkée nēé pó ɛlā kú nu ŋ́ mā italā dúú. Ó le enyi nɛ̄ɛ̄nɛ̄hi tū klá uwá, anɔ́ɔ ó le uwā kpó ŋmó á. Amáŋ ó lɛ Unówa nōo tɔ́ɔna kú ācɛ kéē yá ɔdā okpaakpa ā hɛ́tá, anú mɛ́mla ācɛ ahāapa ɔhá.

⁶Alɔ jé ka Ɔwɔicō lɛ aígelī nɛ̄hi kú Usɔ́dɔm mɛ́mla Ugomora ŋmɛ́pɔ̄bi, anɔ́ɔ ó bī ɔlá lɛ uwá kpó yi gbewo á. Ɔwɔicō bī ɔwɛ nyā le uwā yá ɔdā ō bī le kwu ita kú ɔdā nōó géē yá ācɛ nēé jé Ɔwɔicō ŋ́ mā ā.

⁷Ɔwɔicō le Ulɔ́tu ɔ̄cɛ o yá olɔhi hɛ́tá, ohígbū ucē obɔ̄bí ká ācɛ Usɔ́dɔm ā tū Ulɔ́tu íwɔ́tū nɛ̄hi.

⁸Ɔ̄cɛ olɔhi ɔ́ɔmā lā ɔtāhɛ ācɛ obɔ̄bí nɛ̄hi. Otú kwu ɛnɔ, ɔtū gē bīya lɛ ɔ́ nɛ̄hi, ohígbū ɛlā obɔ̄bí nɛ̄ ó gē pó mɛ́mla ucē obɔ̄bí nɛ̄ ó gē bī ikpēyī abɔ̄yīnū ī má ā.

⁹Ɛjɛ̄ɛ̄jī aɔ́dā nēe bá nyā gē mafú ka Ɔwɔicō jé ɛ́gɛ́nɛ̄ ó gē nyā ācɛ o lɛyítáajɛ lɛ ɔ́ tá ŋmá ojámá kú uwā lɛ ā. O klla jé ɛ́gɛ́nɛ̄ ó gē je ācobɔ̄bíipú ā tā ipú italā jāā gbó ɛ̄cī ɛpɔ̄ ā.

¹⁰Ɔwɔicō yá lɔfúlɔfú mla ācɛ nēe gē yɛce únwū obɔ̄bí kú ɔkpíyē kú uwā mɛ́mla ɔwɛ kú ɔ́bíipú kú uwā. É klla gē leyī gwō ɔfú kú Ɔwɔicō bónū. Aítíca nēe bá nyā lɛ ɔtūkpɔ́ nɛ̄hi, e klla yúufi ŋ́, é klla lɛ ojīlīma ce aálelékwū nēe bá ɔkpáncō ā ŋ́.

¹¹Aálelékwū-ōtɛ̄hɔ̄ nēe kōō lɔfú klla nwuné nɛ̄hi fíyɛ́ aítíca nēe bá nyā ā, í bī ɛcá ō cá le kpó ɛlā ce uwá iyɔ̄bū Óndú ā nóó ŋ́.

¹²Amáŋ ācɛ nēe bá nya lɛbɛ̄ɛka aɛ́bɛ́ ipácí nēe gē gbɛlá ŋ́ mā, é ma uwá kéē kwú uwá í ŋmó icííci, é gē ka ɛlā obɔ̄bí ká ɔdā dúú nēé jé ɛyí nū ŋ́ mā. É géē kpó uwā yíífi bɛ̄ɛka aɛ́bɛ́ ipácí ā.

¹³É klla géē bī ōwē le cíla uwā ulé kú ōwē nēé yá ācɛ ɔhá ā. Abahi nēé jé ā wɛ ka o yɔ̄ gē yá ɔdā dóódu nōo géē yá kú ɔtū kóō he únwū kú ɔkpíyē kú uwā ɔlɛ́ɛnɔ cāā. Ó wɛ ɔdā uwēyī lɛ uwá abɔ̄ nēé gē wā ī lé ɔdōlé mla aá ā. Ɔwɛ nēé bī le plá aá ā he uwá ɔtū nɛ̄hi.

¹⁴É dɔɔ̄kā ō gwutá mla ɔnyā dúú nɛ̄ ikpēyī kú uwā má ā. É gē jē ukpa lɛ ācɛ nēé lɔfú iyē ipú ɛlɔ̄ɔwɔicō ŋ́ mā, cɛ́ɛ́ kéē lɛ íne bīya, cɛ́ɛ́ é kwú yíífi. Ɔtū kú uwā gē kweyī ɔ̄dā eko dóódu. Ɔwɔicō géē yá uwā italā piíí.

¹⁵É nyɛ̄ɛ̄ ŋmá ɔwɛ olɔhi ā, le pɛ́ gebí ga ɔwɛ kú Ubálam ɔyínɔ̄nyīlɔ kú Ubéyɔ, ɔ̄cɛ nɛ̄ ije ō lɛ ŋmá ɔdōbɔ̄bī ō yá le he uwá ɔtū.

¹⁶Amáŋ é lɛ ɛgba dɛ̄ tū ɔ ohígbū íne nōo bīya ā. Ijakī nɛ̄ ó gē kɛlā ŋ́ mā, bī ɔkɔ kú ɔ̄cɛ ɔlamu le kɛlā lɛ ɔ́, anɔ́ɔ ó le Ubálam ucē ɛ́lɛ́ kú nū ɔ́ɔmā ci á.

¹⁷Ācɛ nēe bá nyā lɛbɛ̄ɛka njɔlɔ nɛ̄ ó ī bū éŋkpɔ̄ ŋ́, é klla lɛbɛ̄ɛka ojuja nɛ̄ owu nɛ̄hi ī kpó ga mu ga anú ā, Ɔwɔicō lɛ ɛga odobū nɛ̄ɛ̄nɛ̄hi kú ipú ɔlíkɔtɔ ā tútū gbēyī uwā ɛɛ́.

¹⁸É lɛ ɔkɔ cɛyí gē bī ɛlā kú íla kú uwā gwō. É gē bī únwū obɔ̄bí kú ɔkpíyē ī le kwú ācɛ nēe yɔ̄ gē kwu ŋmá oyēeyī kú ínoōbīya nēé tɛtɛ yɔ̄ anú ā.

¹⁹Aítíca ɛ̄kɛ̄mgbɛ̄ ā gē cokónu lɛ ācɛ ka aá géē yá kéē wɛ abɔ̄ nōo ī lɛ iyī uwā, nááná nɛ̄ uwá abɔ̄yī uwā kē wɛ ɔfiyɛ kú ínoōbīya ā, ohígbū ka ɔdā dúúmā nōo lɛ ɔ̄cɛ yálé nɛ̄ ɔ̄cɛ ā gē wɛ ɔfiyɛ kú nū á.

²⁰Ɔ́dāŋ́ nɛ̄ Ɔwɔicō lɛ ācɛ hɛ́tá ŋmá ínoōbīya nōo ī lɛ ɔ̄cɛ blínyī ipú ɛcɛ nyā ohígbū keé lɛ Óndú alɔ Ujísɔ̄si ohɔ́nyɛtá jé. Amáŋ ɔdāŋ́ keé kwúcē ga ɔwɛ nɛ̄ncɛ̄ kú uwā ā kpɔ́ nēe klla kwú pīya ɔfiyɛ kú ucē kú ínoōbīya kpɔ́, oyēeyī kú igbīhāajɛ kú uwā géē bɔ̄bí fíyɛ́ eko nēe je Ujísɔ̄si Ohɔ́nyɛtá jééjē ɛ́ɛ́ ŋ́ mā á.

²¹Ó géē yɛ ī lɔhi lɛ ācɛ nēe bá nyā fíyɛ́ ɔ́dāŋ́ keé jé ɔ̄kōolɔhi nōo gē mafú ɔwɛ nɛ̄ Ɔwɔicō dɔɔ̄kā kú ācɛ kéē yɛ ā fúlufúlu ŋ́, ikɔkɔ nēé lɛ ɔ̄kōolɔhi ā jé klla le cīgbīhi ŋmá olɛhɔ̄ otīihɔ nēé cɛ̄ lɛ uwá ā.

²² Ɔdā nōo yá uwā ā le mafú ka ita nēe kwu ā wɛ ɔ̄kwɛ̄yi. “Ewō gē kwúcē ga ɛga nɛ̄ ó gba bá ā, anɔ́ɔ ókóome nɛ̄ ācɛ le kwu ŋmá ipú ɔ́tɔ̄ le ɔ́ iyē gwā ā, gē kwúcē nyɔ̄ í míya blibli ipú ɔ́tɔ̄ kpɔ́.” Oyēeyī kú aɛ́bɛ́ ɛplɛ́ɛpa ā le bɔ̄bí fíyɛ́ eko aflɛ́yí ā.