Read idoma 2 UPÍTA 3 Bible Online

2 UPÍTA 3 - idoma bible

2 UPÍTA 3

¹Ācɛ o he um ɔtū, ɛ̄nyā wɛ ɔkpá ɔmpá nɛ̄ n tá fu aá yɔ̄ mɛɛ á. Ipú aɔ́kpá ɛplɛ́ɛpa ā n cēyītīkwū lɛ ɔtū oyēŋēē kú aá héyī, cɛ́ɛ́ ká n̄ tá aá ɛlā kwu aɔ́dā nēe bá nyā.

²N dɔɔ̄kā ká aá gbɛlá kwu ɛlā nɛ̄ ācomɛ́ɛbɛ otīihɔ ā ka eko nɛ̄ncɛ nōo yɛ ā, mɛ́mla íne nɛ̄ Óndú alɔ mɛ́mla ohɔ́nyɛ̄ta aá je lɛ aá ŋmá ɛgiyí ɔ̄cotɛ̄hɔ̄ ká aá ā.

³ Aflɛ́yí, aá géē jé ɛ̄nyā piíí ka eko ámōōmɛ ā, ācɛ nɛ̄ únwū obɔ̄bi kú ɔkpíyē gē bī tá ā, géē hɛ́ bɛ̄cɛ. É klla wɛ ācɛ nēe gē yá ācɛ ɛbɛ́.

⁴É géē yɔ̄ gē kahíníī, “Ujísɔ̄si cokónu ka anúɔ géē kwúcē wā ipú ɛcɛ nyā. Iní nɛ̄ ó yɔ̄ ā. O ŋmífi ɔ́ɔmā aádáádā alɔ le pɛ́ gekwú ɛɛ́, ɛ́gɛ́nɛ̄ ɛjɛ̄ɛ̄jī ɔdā dóódu lɛ eko nɛ̄ Ɔwɔicō yá ɛcɛ ā, nēé kē lɛ kpɔ́ ɛ́ɛ́ má.”

⁵ Ācɛ ā jégēdēē leyī gwū ɛlā ɔkwɛ̄yi ā bónū. Ɛlā nɛ̄ ó ka ka é yá ɔkpáncō ŋmá lɛ ɛlā nɛ̄ Ɔwɔicō ka íkííkée ā, é kē yá ɛcɛ ŋmá ipú éŋkpɔ̄, ó ke bī éŋkpɔ̄ le hɛ́ igá tū ɛcɛ.

⁶Ɔwɔicō bī éŋkpɔ̄ ō ocēenyi klá ɛcɛ ā lɛ ɛcɛ nɛ̄ncɛ̄ ā yíífi.

⁷Amáŋ o ŋmá lɛ ɛdɔ ɛlā éékpó kú nū ɔ́ɔmā nōo lɛ ɔkpáncō mɛ́mla ɛcɛ nōo yɔ̄ abālɔbányā tū gē gbēyī ká ɔlá kóō je uwá kpó yíífi á. É yɔ̄ gē lɛ uwá tū gbō ɛ̄cī nēé géē kɛpɔ̄ tū ācɛ nēé jé ɔ̄ ŋ́ mā ā. Ó klla géē kpó uwā yíífi.

⁸Amáŋ aá híī mlanyī ɔdā ékpó nyā ŋ́ ācɛ o he um ɔtū, ɛgiyí Ɔwɔicō ā ɛ̄cī éyi lɛbɛ̄ɛka iháyí úlā ɛpa ce ofu igwó, iháyí úlā ɛpa ce ofu igwó kē lɛbɛ̄ɛka ɛ̄cī ékpónú ā. Uwá ɛplɛ́ɛpa wɛ ékpónú tū Ɔwɔicō.

⁹Óndú ā í le tiiti ō yá okónu nōó ce ā ɛ́gɛ́nɛ̄ ācɛ ōhī gē gbɛlá ā ŋ́, amáŋ ó kē ī lɔtū ɛgiyí aá ohígbū kóō tíne kú ɔ̄cɛ dúúmā kóō le yíífi ŋ́, amáŋ ó géē tíne ka odúúdú uwā kéē le pīyabɔ̄ ŋmá íne nēé bīya ā.

¹⁰ Amáŋ Óndú ā géē kwúcē wā wɛɛlɛ ɛ̄cī nɛ̄ ācɛ í leyīce ŋ́, ɛ́gɛ́nɛ̄ uwī gē wā wɛɛlɛ ā. Ɛ̄cī ɔ́ɔmā ɔkpáncō géē bī tāajɛ mla uya nɛ̄ɛ̄nɛ̄hi, anɔ́ɔ ɔlá géē je aɔ́dā dóódu nēe bá ɔkpáncō ā kpó ja bónū, é klla í je kpó yíífi, anɔ́ɔ ɛcɛ mla aɔ́dā nēe bá ipú nū kpɛ́mm ā í kpó gblífi dúúdú.

¹¹Abɔ̄ alɔ jé ka ɛjɛ̄ɛ̄jī ɔdā dóódu géē je kpó yíífi ɔwɛ ɛ́gɛ́nyā ā ɛdɔ kú oyēeyī nyá nɛ̄ aá dɔɔ̄kā ō lā ā. Ɛ̄nyā cābɔ̄ ka aá cíkā ō la oyēeyī otīihɔ cɛ́ɛ́ kú aá lā ɛ́gɛ́nɛ̄ Ɔwɔicō dɔɔ̄kā ā.

¹²Abɔ̄ aá gē gbēyī ɛ̄cī kú Óndú ā, aá cēyītīkwū ká aá yá ká ɛ̄cī ā kóō gā fíyaa, ɛ̄cī nɛ̄ ɔkpáncō géē yɔlá klla í je gbliífi ā, ɛ̄cī nɛ̄ idɔlá géē je aɔ́dā nēe bá ɔkpáncō ā kpó ja bónū ā.

¹³ Amáŋ alɔ ī gbēyī ɔkpáncō mɛ́mla ɛcɛ ɛ̄yīpɛ̄ nɛ̄ Ɔwɔicō cokónu nū ā, ɛga nɛ̄ ɛjɛ̄ɛ̄jī ācɛ géē lɛyítáajɛ lɛ ɔ́ dúúdú ā.

¹⁴Ohígbū ɛ́gɔ́ɔmā, ācɛ o he um ɔtū, abɔ̄ nɛ̄ alɔ bá gē gbēyī ɛ̄cī ɔ́ɔmā ā, aá cēyītīkwū ká aá yɔ̄ ī yá ɔdā obɔ̄bí dúúmā ipú eyī nū eko nɛ̄ Ɔwɔicō í wā ā ŋ́, aá bá ɛbɔ́ mla anú.

¹⁵Ɔwɔicō lɛ ɔtū le nɛ̄hi, aá cíkā o jé ka ɔtū nōo lé nyā wɛ ɛga nɛ̄ ó je lɛ aá, cɛ́ɛ́ kóō lɛ aá nyatá á. Ɔyínɛ́ alɔ ohe alɔ ɔtū, Upɔ́lu, bī íjééyī nɛ̄ Ɔwɔicō je lɛ ɔ́ ā le tá ɔdā ékpó nyā ipú ɔkpá nōo tá fu aá dúú.

¹⁶Ɛ̄nyā wɛ ɔdā nōo ka ipú ɛjɛ̄ɛ̄jī ɔkpá kú nū nɛ̄ ó tá lɛyíkwu ɛlā nyā á. Ó lɛ aɔ́dā nōo tōō jé ɛyī uwā ŋ́ nōo yɔ̄ ipú ɔkpá ā, nɛ̄ aógwuda mɛ́mla ācɛ nēé háyi kpaakpa ipú ɛlɔ̄ɔwɔicō ɛ́ɛ́ ŋ́ mā, gē pīya ɛyí nū abɔ̄ ɛ́gɛ́nɛ̄ é gē pīya ɛga o hile kú ɛlɔ̄ɔwɔicō abɔ̄ ā. Ɔdā nēé yá nyā géē cɛ̄ lɛ Ɔwɔicō kpó uwā yíífi ɛ̄cī ɛpɔ̄ ā.

¹⁷Ācɛ o he um ɔtū, abɔ̄ aá lɛ aɔ́dā nēe bá nyā jé gbɔbū ɛ́ɛ́ mā, aá leyī kwɛcɛ cɛ́ɛ́ ká ācɛ obɔ̄bí ā kéē plla aá tū ɔdōbɔ̄bí dúúmā nōo géē yá, cɛ́ɛ́ ká aá nyɛ̄ɛ̄ ŋmá ɛga nɛ̄ aá háyi kpaakpa ā ŋ́.

¹⁸Amáŋ aá jɛ̄ gɔbū ká aā túblá Ohɔ́nyɛtá nōo gē yíihɔtū tū aá, kú ālɔ̄ yɔ̄ gē túblá anú ajaajɛ, o yá ká ālɔ̄ jɛ̄ fíyɛ́. Ālɔ̄ ī cɛ̄tra anú ká ālɔ̄ lɛ ojīlīma ce Ohɔ́nyɛtá abālɔbányā mɛ́mla eko nɛ̄ ó gē mɛ ŋ́ mā. Aamí.