Read idoma 1 UJƆ́ƆNI 2 Bible Online

1 UJƆ́ƆNI 2 - idoma bible

1 UJƆ́ƆNI 2

¹Ayí um, n tá aɔ́dā nēe bá nyā fu aá, cɛ́ɛ́ kú aá híī bīyíne gɛ ŋ́. Ɔ́dāŋ́ ka ɔ̄cɛ dúúmā lɛ íne bīya, alɔ lɛ ɔ̄cokɛ́pɔ̄ lɛ alɔ iyɔ̄bū ádā ā, Ujísɔ̄si Ohɔ́nyɛtá, olɛ́pɔ̄hi.

²Anú abɔ̄yī nū wɛ iyó ōgwu inyílɔ́lɛ́ kú alɔ á, amáŋ ó wɛ ílɔ́lɛ́ kú alɔ ōfūnū ŋ́, amáŋ inyílɔ́lɛ́ kú ɛjɛ̄ɛ̄jī ācɛ dóódu.

³Ɔ́dāŋ́ ka alɔ lɛ aíne kú Ɔwɔicō tū, alɔ ī jé kpɔ́cíí ka alɔ jé ɔ̄ okwɛ̄yi.

⁴Ɔ̄cɛ nōo ī ka ka anúɔ jé ɔ̄, anɔ́ɔ ó lɛ aíne kú nū tū ŋ́ mā, wɛ ɔ̄cɛ okɛ̄mgbɛ̄. Ó lɛ ɛlā ɔkwɛ̄yi dúúmā ipú ɔtū kú nū ŋ́.

⁵Amáŋ odúúdú ācɛ nēe lɛyítáajɛ lɛ ɛlā kú Ɔwɔicō ā wɛ ācɛ nēe yíihɔtū tá ɔ̄ ɔkwɛ̄yi á. Ɛ̄nyā wɛ ɔwɛ nɛ̄ alɔ géē bī jé ka alɔ le pīyatɔ̄há mla Ɔwɔicō á.

⁶Ɔ̄cɛ nōo ka ka anúɔ yɔ̄ ipú olétɔ̄há mla Ɔwɔicō ā cíkā ō lā oyēeyī kú nū ɛ́gɛ́nɛ̄ Ujísɔ̄si lā ā.

⁷Ācɛ ohe um ɔtū, ó wɛ aíne ɛ̄yīpɛ̄ nɛ̄ n tá tū ɔkpá fu aá ā ŋ́, amáŋ aíne nɛ̄ncɛ̄ nɛ̄ aá mīyɛ ŋmá eko aflɛ́yí ā. Aíne nɛ̄ncɛ̄ ā wɛ olɛhɔ̄ nɛ̄ aá tɛtɛ le pó ɛɛ́ mā á.

⁸Nááná ā, íne nɛ̄ n gē tá fu aá kpɔ́ɔ́kpɔ́ abālɔbányā ā wɛ ɛ̄yīpɛ̄, ohígbū keé ī má ɔkwɛ̄yi kú íne nyā bū ipú Ohɔ́nyɛtá mla ipú aá. Ohígbū ka ajoodobū ā yɔ̄ gē mɛ ɛɛ́, ɔlá-ofíyajɛ kú ɔkwɛ̄yi ā yɔ̄ gē fíyajɛ ɛɛ́.

⁹Ɔ̄cɛ dúúmā nōo ka ka anúɔ yɔ̄ mla ɔlá ofíyajɛ ā, nááná nɛ̄ ó kē ī wɔ́tū ɔyínɛ́ nū kpɔ́, ɔ́ɔmā léka ó yɔ̄ ipú ajoodobū ā kpɔ́ɔ́kpɔ́.

¹⁰Ɔ̄cɛ nɛ̄ ācɛ ɔhá he ɔ́ ɔtū, yɔ̄ mla ɔlá-ofíyajɛ ā, é kē gáā yá ɔdā dúúmā nōo géē yá kú ɔ̄cɛ ɔhá dúú kóō bīyíne ŋ́.

¹¹Amáŋ ɔ̄cɛ dúúmā nōo ī wɔ́tū ācɛ ɔhá, yɔ̄ ipú ajoodobū ā, ó kē ī yɛ ipú ajoodobū, ó jé ɛga nɛ̄ ó ī nyɔ̄ ā ŋ́, ohígbū ka ajoodobū ā lɛ ɔ́ eyī kpó pu ɛɛ́.

¹²N gē tɔ́kpá fu aá, ayípɛ̄ ɔlɛ́ um, ohígbū keé habɔ̄ íne nɛ̄ aá bīya ā tá lɛ aá ohígbū Ohɔ́nyɛtá ɛɛ́.

¹³N yɔ̄ ī tɔ́kpá fu aá, nēe wɛ aádā ā, ohígbū ka aá jé anú nōo yɔ̄ ŋmá eko aflɛ́yí ā. N yɔ̄ ī tɔ́kpá fu aá, ayípɛ̄ oklóbīya, ohígbū ka aá lɛ ɔ̄cɛ obɔ̄bí ā yálé ɛɛ́.

¹⁴N yɔ̄ ī tɔ́kpá fu aá, nēe wɛ ayípɛ̄ nɛ̄ŋ́cɛ̄, ohígbū ka aá jé Ádā á. N yɔ̄ ī tɔ́kpá fu aá, aɛ́nɛ̄ e wɛ aádā ā, ohígbū ka aá jé anú nōo yɔ̄ ŋmá eko aflɛ́yí ā. N yɔ̄ ī tɔ́kpá fu aá, ayípōklobīya, ohígbū ka aá lɔfú, ɛlā kú Ɔwɔicō kē lā ipú aá, aá kē lɛ ɔ̄cɛ obɔ̄bí ā yáŋmó ɛɛ́.

¹⁵Aá kóō híī piyɔtū ɛcɛ ɛ́ɛ́ nɛ̄ ɔdā dúúmā kú ɛcɛ kōō ī he aá ɔtū ŋ́. Ɔ́dāŋ́ ka ɛcɛ he ɔ̄cɛ dúúmā ɔtū, ayíbɛ ihɔtū kú ádā ā í yɔ̄ ipú ɔtū kú nū ŋ́.

¹⁶Ohígbū ka ɔdā dóódu nōo yɔ̄ ipú ɛcɛ ā, ɛgbá obɔ̄bí nɛ̄ ɔkpíyē ī dɔɔ̄kā ā, ɔdā nɛ̄ ācɛ ī má eyī mɛ́mla ɔdā nēé dɔɔ̄kā ō lɛ, mɛ́mla ɛjɛ̄ɛ̄jī ɔdā dóódu kú ipú ɛcɛ nyā nɛ̄ ācɛ ī bī lɛ yɔ́bɔ́ɔcɛ kú oyēeyī ā, í ŋmá ɛgiyí ādā ā ŋ́, amáŋ é ŋmá ipú ɛcɛ nyā.

¹⁷Ɛcɛ ā mɛ́mla ɛjɛ̄ɛ̄jī ɔdā dóódu nēe bá ipú nū, nɛ̄ ācɛ gē yúnwū nū ā yɔ̄ ī mɛ, amáŋ ɔ̄cɛ nōo kē ī yá ɔdā nōo ŋmá ɔtū kú Ɔwɔicō ā géē yɔ̄ piyóó.

¹⁸Ayí um, eko ámōōmɛ ā gā ɛɛ́! Aá tɛtɛ le pó ka ɔ̄cɛ obɛ́yíkwu Ohɔ́nyɛtá ā óo géē wā a, ɛ́gɔ́ɔmā nɛ̄ ācɛ nɛ̄ ī bɛ́yíkwu Ohɔ́nyɛtá alɛwa yɔ̄ abālɔbányā á, ohígbū ɔ́ɔmā, ālɔ̄ jé ka eko nɛ̄ ɛcɛ í mɛ ā le yá ɛ́ɛ́.

¹⁹Ācɛ nēe bá nyā bɛ̄cɛ ŋmá ipú alɔ, amáŋ é kē wɛ mla alɔ ŋ́, ohígbū ka ɔ́dāŋ́ keé wɛ mla alɔ nɛɛ, é géē yɛ í bá ipú alɔ kpɔ́. Amáŋ uwá kē le pɛ́ nyɛ̄ɛ̄ kóō mafú lɛ ācɛ péee ka ɔ̄cɛ dúúmā kú uwā í yɔ̄ mla alɔ ŋ́.

²⁰Amáŋ Ohɔ́nyɛtá le Alelékwū Ihɔ ā cē klá aá bɛ̄ɛka anɔ̄ ā, ohígbū ɔ́ɔmā odúúdú aá kē jé ɔdā dóódu.

²¹N yɔ̄ ī tɔ́kpá fu aá, ó wɛ ohígbū ka aá jé ɔkwɛ̄yi ā ŋ́ nɛɛ ŋ́, amáŋ ohígbū ká aá jé ɔ̄, ohígbū ká aá klla kē jé ka ɛlā ɛ̄kɛ̄mgbɛ̄ dóódu í bɛ̄cɛ ŋmá ɛlā ɔkwɛ̄yi glá ŋ́.

²²Ɔ̄nyɛ kē wɛ okɛ̄mgbɛ̄ ā? Ó wɛ ɔ̄cɛ nēe gē ka ka Ujísɔ̄si í wɛ Ohɔ́nyɛtá ŋ́ mā nɛ̄ n. Ɔ̄cɛ ɛ́gɛ́nyā wɛ ɔ̄cɛ obɛ́yíkwu Ohɔ́nyɛtá ā, ɔ̄cɛ nōo ī je Ádā ā mɛ́mla Ɔyínɔ̄nyīlɔ ā híhó.

²³Ohígbū ka odúúdú ācɛ nēe tá Ɔyínɔ̄nyīlɔ ā kē tá ádā ā dúú. Ācɛ nēe mīyɛ Ɔyínɔ̄nyīlɔ ā kē mīyɛ Ádā ā dúú.

²⁴Aá cɛ̄ ká ɔdā nɛ̄ aá pó ŋmá eko aflɛ́yí ā kóō yɔ̄ ipú ɔtū kú aá. Ɔ́dāŋ́ ka ɔdā nɛ̄ aá pó ŋmá eko aflɛ́yí ā yɔ̄ ipú ɔtū kú aá, aá géē yēeyī eko dóódu ipú opīyatɔ̄há mla Ɔyínɔ̄nyīlɔ ā mɛ́mla Ádā ā dúú.

²⁵Ɛ̄nyā wɛ ɔdā nɛ̄ Ohɔ́nyɛtá abɔ̄yī nū cokónu ō je lɛ alɔ á, oyēeyī opiyóó.

²⁶N yɔ̄ ī tá aɔ́dā nēe bá nyā fu aá ohígbū ācɛ nēe yɔ̄ ī plla aá ā.

²⁷Amáŋ aá ā, Ohɔ́nyɛtá le Alelékwū Ihɔ cē klá aá. Ɔdā nōo yá ɛ́ɛ́ nɛ̄ Alelékwū kú nū yɔ̄ ipú aá ā, aá klla cɛgbá nɛ̄ ɔ̄cɛ ɔhá dúúmā ī nwū aá ɛlā gɛ ŋ́, ohígbū ka Alelékwū Ihɔ kú nū ī nwū aá ɔdā dóódu, nōo kē wɛ ɔkwɛ̄yi ā, nōó wɛ ɛ̄kɛ̄mgbɛ̄ ŋ́ mā. Ohígbū ɛ́gɔ́ɔmā aá lɛ abɔ̄ bī ɔdā nōó ī nwū aá ā, cɛ́ɛ́ ká aá yɔ̄ ī pīyatɔ̄há mla Ohɔ́nyɛtá.

²⁸Abālɔbányā, ayípɛ̄ ɔlɛ́ um, aá yɔ̄ ī pīyatɔ̄há mla anú, cɛ́ɛ́ ká eko nēé ó í wā a, alɔ géē lɔtū, ká ālɔ̄ híī yúwēyī nōo í cɛ̄ lɛ alɔ kwu ŋmá ɛgiyí nū ɛ̄cī nɛ̄ ó í wā ā ŋ́.

²⁹Abɔ̄ aá kē jé ka Ohɔ́nyɛtá wɛ ɔ̄cɛ ō yá olɔhi ā, aá jé cāā ka ɔ̄cɛ dóódu nōo yá ɔdā olɔhi ā wɛ ɔyí Ɔwɔicō.