Read idoma 1 UJƆ́ƆNI 3 Bible Online

1 UJƆ́ƆNI 3 - idoma bible

1 UJƆ́ƆNI 3

¹Aá má ɛ́gɛ́nɛ̄ Ádā ā yíihɔtū tū alɔ nɛ̄hi lɛ ā! Alɔ he ɔ́ ɔtū nɛ̄hi nōo cɛ̄ keé hī alɔ ka ayí Ɔwɔicō ā. Ayí Ɔwɔicō nɛ̄ alɔ kē wɛ ɔkwɛ̄yi á. Ɔ̄da nōo yá nɛ̄ ɛcɛ í jé alɔ ŋ́ mā, wɛ keé jé Ɔwɔicō abɔ̄yī nū ŋ́.

²Ācɛ ohe um ɔtū, abālɔbányā alɔ wɛ ayí Ɔwɔicō, ɔdā nɛ̄ alɔ í wɛ ɛ̄cɔ̄bū ā í tá péee ɛ́ɛ́ ŋ́, amáŋ alɔ kē jé ka eko nɛ̄ Ohɔ́nyɛtá gā, alɔ géē lɛbɛ̄ɛka anú ā, ohígbū ka alɔ géē má ɔ̄ ɛ́gɛ́nɛ̄ ó lɛ ɔkwɔ̄ɔ̄kwɛ̄yi ā.

³Odúúdú ācɛ nōo cɛ̄ɛ̄lā nyā, kē í lɛ iyī ūwā tū yēŋēē, ɛ́gɛ́nɛ̄ anú abɔ̄yī nū le yēŋēē ā.

⁴Ɔ̄cɛ dóódu nōo lɛ úgla kpó gē lɛpɔ̄bí kú ínoōbīya, úgla ō kpó kē wɛ ínoōbīya.

⁵Aá jé ka Ohɔ́nyɛtá wā kóō kpó úgla nɛ̄ ācɛ kpó ā bónū, anú abɔ̄yī nū í kē bīyíne dúúmā ŋ́.

⁶Ɔ̄cɛ dúúmā nōo yɔ̄ ī pīyatɔ̄há mla anú í kē ī bīyíne ŋ́, ɔ̄cɛ dúúmā nōo ī bīyíne í má ɔ̄ ɛ́ɛ́ ŋ́, ɛ̄nɛ̄ ó ī jé ɔ̄ ɛ́ɛ́ ŋ́.

⁷Ayípɛ̄ ɔlɛ́ um, aá cɛ̄ lɛ ɔ̄cɛ dúúmā kóō plla aá ŋ́! Ɔ̄cɛ dúúmā nōo í yá ucē okpaakpa, le kpaakpa ɛ́gɛ́nɛ̄ Ohɔ́nyɛtá abɔ̄yī nū le kpaakpa dúú ā.

⁸Ebilíi ma ɔ̄cɛ dóódu nōo ī bīyíne á, ohígbū ka ebilíi ā gbɔɔ́ ō bīyíne ŋmá ohútu kú ɛcɛ. Ohígbū ɛ̄nyā nēé ma Ɔyínɔ̄nyīlɔ kú Ɔwɔicō wā á. O yá cɛ́ɛ́ kóō lɛ úklɔ́ kú ebilíi bīya.

⁹Ɔ̄cɛ dóódu nɛ̄ Ɔwɔicō ma í gē bīyíne ŋ́, ohígbū kóō wɛ ɛ́gbla kú Ɔwɔicō, abɔ̄ Ɔwɔicō wɛ ádā nū ā, ó bīyíne glá ŋ́.

¹⁰Ɛ̄nyā wɛ ɔdā nēé ī bī le jé ayí Ɔwɔicō mɛ́mla ayí ebilíi á. Ɔ̄cɛ dúúmā nōó ī yá ɔdā nōó lɔhi ŋ́ mɛ́mla ɔ̄cɛ nɛ̄ ɔyínɛ́ nū í he ɔ́ ɔtū ŋ́, ayíka ó wɛ Ɔwɔicō mā ɔ́ ā ŋ́.

¹¹Olɛhɔ̄ nɛ̄ aá pó ŋmá eko aflɛ́yí ā kē yɔ̄ á, ālɔ̄ í yíihɔtū tū ɔ́mpa alɔ piíí.

¹² Ká ālɔ̄ híī lɛbɛ̄ɛka Ukén, nōo wɛ ákú ɔ̄cɛ obɔ̄bí ā, nōo je ɔyínɛ́ nū ŋmó ā ŋ́. Ɔdíyá nōó ŋmó ɔ̄ ā? Ohígbū ka ɔdā nɛ̄ anú abɔ̄yī nū yá ā bɔ̄bí, amáŋ ɔdā nɛ̄ ɔyínɛ̄ nū kē yá ā lɔhi.

¹³Ó híī hɛ́ aá idáagó ŋ́, ayínɛ́ um, ɔ́dāŋ́ ka ācɛ kú ipú ɛcɛ ī wɔ́tū aá ŋ́.

¹⁴Alɔ jé ka alɔ ī bɛ̄cɛ ŋmá ikwū i tá oyēeyī, alɔ jé ɔ̄ lɛ ā ohígbū ka alɔ yíihɔtū tū ayínɛ́ alɔ. Ɔ̄cɛ dúúmā nɛ̄ ó lɛ ihɔtū ipú ɔtū kú nū ŋ́, yɔ̄ ipú abɔ̄ kú ikwū kpɔ́.

¹⁵Ɔ̄cɛ dúúmā nōo ī wɔ́tū ɔyínɛ́ nū wɛ ɔ̄coŋmɔ́cɛ, aá kē jé ka ɔ̄cɛ dúúmā nōo wɛ ɔ̄coŋmɔ́cɛ, í kē lɛ oyēeyī opiyóó glá ŋ́.

¹⁶Ɛ̄nyā wɛ ɔdā nɛ̄ alɔ gē bī le jé ihɔtū á. Ohɔ́nyɛtá kwú oyēeyī kú nū tónū ohígbū alɔ, ohígbū ɔ́ɔmā ó cíkā nɛ̄ alɔ ī je oyēeyī kú alɔ tónū ohígbū ayínɛ́ alɔ ā.

¹⁷Amáŋ ɔ́dāŋ́ ka ɔ̄cɛ dúúmā lɛ agbénú kú ɛcɛ nyā, nɛ̄ ó lɛ ɔyínɛ́ nū nɛ̄ ɛgbá ī ce ɔ́ má, nɛ̄ ó kē lɛ ɔtū kú nū gwū ɛgiyí nū, ɛ́gɛ́nyā nɛ̄ ihɔtū kú Ɔwɔicō yɔ̄ ipú ɔtū kú nū ā?

¹⁸Ayípɛ̄ ɔlɛ́ um, alɔ híī yíihɔtū kú ígblɛ́nyī ámāŋ ákú akpokónu icííci ŋ́, amáŋ alɔ ī yíihɔtū nōo ŋmá lɛ ō yá abɔ̄ kú alɔ.

¹⁹O ŋmá ɛ̄nyā, nɛ̄ alɔ gē jé ka alɔ wɛ ákú Ɔwɔicō ɔkwɛ̄yi á, ɛ̄nyā yá ɛ́ɛ́ nɛ̄ alɔ í lɔtū ékpó ɛgiyí nū glá á.

²⁰Ɔ́dāŋ ka ɔtū kú alɔ le alɔ ŋmɛ́pɔ̄bí, alɔ jé ka Ɔwɔicō nwuné fíyɛ́ ɔtū kú alɔ á, ó kē jé ɔdā dóódu.

²¹Ācɛ ohe um ɔtū, ɔ́dāŋ́ ka ɔtū kú alɔ í ŋmó alɔ ɛpɔ̄bí ŋ́, alɔ lɔtū ékpó iyɔ̄bū Ɔwɔicō.

²²Ɔdā dóódu nɛ̄ alɔ kē i ba, alɔ ī mīyɛ ŋmá ɛgiyí nū, ohígbū ka alɔ ī lɛ íne kú nū tū, kē ī yá ɔdā dóódu nōo ī he ɔ́ ɔtū ā.

²³ Ɛ̄nyā wɛ íne kú nū á, ka alɔ cɛ̄ɛ̄lā Ɔyínɔ̄nyīlɔ kú nū, Ujísɔ̄si Ohɔ́nyɛtá, ká ālɔ̄ kē ī yíihɔtū tū ɔ́mpa alɔ, ɛ́gɛ́nɛ̄ ó je ɔ́da lɛ alɔ ā.

²⁴Ɔ̄cɛ dúúmā nōo kē lɛ íne kú nū tū, yɔ̄ ī pīyatɔ̄há mla anú, ó kē yɔ̄ ī piyatɔ̄há mla ɔ̄cɛ ɔ́ɔmā ā. Ɛ̄nyā wɛ ɔdā nɛ̄ alɔ kē ī bī le jé ko ó yɔ̄ ī pīyatɔ̄há mla alɔ ā, oŋmá lɛ Alelékwū Ihɔ nōó je lɛ alɔ ā.