Read idoma ĀCOHƐ́PƆ̄ 1 Bible Online

ĀCOHƐ́PƆ̄ 1 - idoma bible

ĀCOHƐ́PƆ̄ 1

¹Igbīhi ikwū kú Ujósuwa ā, ācɛ kú Ísrɛ̄lu le ɔ̄kā da Óndú ā ka ipɔ́ɔma kú aá nyá géē nyɔ̄ í kpɛ́fú tá ācɛ Ukénan aflɛ́yí āa?

²Óndú ā tá uwá ohi ka ipɔ́ɔma kú Ujúda géē nyɔ̄ aflɛ́yí á. Ó ka anúɔ géē je ajɛ ā lɛ uwá.

³Anɔ́ɔ ācɛ kú Ujúda da ācɛ ipɔ́ɔma kú Usímīyɔn kéē wā mɛ́mla aá, cɛ́ɛ́ kú aá lɛ ɛfú kpó tá ācɛ Ukénan nēe bá ipú ajɛ nēé je lɛ aá ā. É ka aá géē nyɔ̄ mla uwá í kpɛ́fú tá ācɛ nēe lā ipú ajɛ kú uwā ā dúú. Anɔ́ɔ ipɔ́ɔma kú Usímīyɔn ā le yɛ mla

⁴ācɛ Ujúda gaá le ɛfú kpó tɔ̄há ta ācɛ Ukénan ā á. Óndú ā cɛ̄ lɛ uwá le ācɛ Ukénan mɛ́mla ācɛ Upɛ́risi kpó yálé. Anɔ́ɔ é le ācɛ ulá ofu ce ɛhɔ̄ (10,000) kú ācɛ ā yálé ipú ajɛ kú Ubɛ́sēki.

⁵É lɛ Adonibɛ́sēki má Ubɛ́sēki, anɔ́ɔ é le unu nu tá ɔ̄ á. É le ācɛ Ukénan mɛ́mla ācɛ Upɛ́risi yálé abɔ́ɔ.

⁶Adonibɛ́sēki lɛ inya kwu, amáŋ é nū ɔ̄ inya gāá lɛ ɔ́ kwú. É le ocúgbɔ̄du íkpó mɛ́mla ocúgbɔ̄du kú abɔ̄ kú nū kpó gwó.

⁷Adonibɛ́sēki ka aɔ́cɛ́ ofɛtá cigwó nɛ̄ ocúgbɔ̄du īkpó mɛ́mla ocúgbɔ̄du abɔ̄ kú uwā le kpó gwó ā géē wā í yā iwili kú ɔdōlé lé ŋmá ɛháajɛ itébulu kú anúɔ. Ó klla ka ka Ɔwɔicō ɔ́ɔ le ulé kú ɔda nɛ̄ anúɔ yá ā cíla anúɔ ɛɛ́. É kwú ɔ̄ ú ga Ujerúsālɛm. Anɔ́ɔ ó gekwú abɔ́ɔ á.

⁸Ācɛ kú Ujúda le ɛfú kpó tá ācɛ Ujerúsālɛm klla lɛ uwá yálé. É lɛ ācɛ ā kpó ŋmó, lɛ ɔlɛ́ ā tɔ̄lá.

⁹Igbīhi ɛ̄nyā ā, ācɛ kú Ujúda le pɛ́ nyɔ̄ í kpɛ́fú tá ācɛ Ukénan nēe lā ɛyí ɛfu mɛ́mla ikpɛ́fu ā. É klla lā ajɛ ɛfā o yɛ ga ɛháajɛ ā dúú.

¹⁰É yɛ lɛyíkwu ācɛ Ukénan nēe lā Uhɛ́brɔn, nēé tɛtɛ hī iyē kú uwā ka, Ukiriyati Ába ā. É le aípɔ́ɔma kú Ussésāyí, Ahíman mɛ́mla Utálimāyi ā kpó yálé.

¹¹Oŋmá abɔ́ɔ ā, ācɛ kú Ujúda yɛ lɛyíkwu igelī kú Udébiyɛ nēé hī ka Ukiriyati Usífa ā.

¹²Ɔ̄cɛ éyi kú uwā nēé hī ka Ukálɛ̄bu ā ka anúɔ géē je ɔyí anúɔ nɔ̄nyā, Ákīsa, lɛ ɔ̄cɛ dúúmā nōo lɛ Ukiriyati Usífa ā yálé, cɛ́ɛ́ ɔyínɔ̄nyā ā kwú pīya ɔnyā nū.

¹³Ótínīyɛlu, ɔyí kú Ukɛ́nāsi, ɔyínɛ́ nɛ̄ŋcɛ́ kú Ukálɛ̄bu ā, mīyɛ igelī nɛ̄hi ā abɔ̄fú. Anɔ́ɔ Ukálɛ̄bu kwú Ákīsa, ɔyínɔ̄nyā kú nū ú lɛ ɔ́ kóō wɛ ɔnyā nū á.

¹⁴Ícíícɛ nēé yá uculo kú ɔnyā ō lɛ kú uwā ā, Otínīyɛlu da ɔ́ kóō lɛ ajɛ o bī hɛ́hɔ̄ ba ádā nū kpɔ́. Ó le hīlatá ŋmá ɛyí ijakī ā, anɔ́ɔ Ukálɛ̄bu le ɔ̄kā da ɔ́ ka ɔdí ɔ́ɔ ce ɔ́ ɛgbá āa?

¹⁵Anɔ́ɔ ó tá ádā nū ohi ka anúɔ gē dɔɔ̄kā njɔlɔ kú éŋkpɔ̄, ohígbū ka ajɛ nɛ̄ ɔ́ɔ je lɛ anúɔ ā í lɛ éŋkpɔ̄ ŋ́. Anɔ́ɔ Ukálɛ̄bu kwú njɔɔlɔ kú ɛhíícō mɛ́mla ákú ɛháajɛ ā ú kpó lɛ ɔ́ á.

¹⁶Ācɛ kú aípɔ́ɔma kú ohilí kú Umósīsi, ācɛ Ukéni ā, le yɛ mɛ́mla ācɛ kú Ujúda ŋmá Ujérīko, igelī nēé hī ka igelī kú ɔcí alī ā, ipú ajɛ ɛfā kú ɛháajɛ kú Árādi ipú Ujúda. É nyɔ̄ í lā mɛ́mla ācɛ Ámālɛ̄ki.

¹⁷Ācɛ kú Ujúda le pɛ́ i yɛ mɛ́mla ācɛ Usímīyɔn, anɔ́ɔ é le ācɛ kú Ukénan nēe lā igelī nɛ̄hi nēé hī ka Uséfāti ā yálé á. É lɛ okónu tá lɛ igelī nɛ̄hi ɔ́ɔmā, le ɔ́ wúlatāajɛ dúúdú, anɔ́ɔ é kwú iyē ú ce abɔ́ɔ ka Uhɔ́ma. Ɛyí kú iyē nyā lé ka ogblífi.

¹⁸É klla mīyɛ Ugása, Ásskɛ̄lɔn, Ékrɔn mɛ́mla aípɔ́lɛ́ nōo yɛ uwá jīla tá ā.

¹⁹Óndú ā yɔ̄ mla ācɛ Ujúda, anɔ́ɔ é mīyɛ ajɛ kú ɛyí ɛfu ā á. Amáŋ, é nū ācɛ nēe lā okónu ísu ā glá ŋ́ ohígbū ka ācɛ abɔ́ɔ lɛ aúgbɔ́ɔnya o kpɛ́fú kú oje.

²⁰É kwú Uhɛ́brɔn ú lɛ Ukálɛbu ɛ́gɛ́nɛ̄ Umósīsi tū ukɔ́ lɛ ā. Anɔ́ɔ ó lɛ ipɔ́ɔma kú Ánāki ɛtá ā kpó nū bɛ̄cɛ ŋmá ɛga nēé lā ā á.

²¹Amáŋ ācɛ kú ipɔ́ɔma kú Ubɛ́njamīn í nū ācɛ kú Ujɛ́būsi nēe lā Ujerúsālɛm ā bɛ̄cɛ ŋ́. Ācɛ kú Ujɛ́būsi ā lā tɔ̄há mla ipɔ́ɔma kú Ubɛ́njamīn jāā kwu eko nēé tá ɔkpá nyā ā.

²²Aípɔ́ɔma kú Ɛ́frem mɛ́mla ákú Umanásɛ le yɛ gaá le ɛfú kpó tá igelī nēe hī ka Ubɛ́tɛlu. Éko ɔ́ɔmā é hī iye nū ka Ulúsi. Óndú ā tá uwá abɔ̄.

²³É lɛ ācɛ tū wɛɛlɛ ga Ubɛ́tɛlu,

²⁴anɔ́ɔ ācɛ nēé tɛ̄hɔ̄ ā má ɔ̄cɛ éyi yɔ̄ ī wɛ̄ɛcɛ ŋmá igelī nɛ̄hi ā. Anɔ́ɔ é da ɔ́ kóō lɛ ɔwɛ nɛ̄ aá géē bū ga igelī nɛ̄hi ā máfú lɛ aá, cɛ́ɛ́ ká aá yá ɔ̄ ɔdā dúúmā ŋ́.

²⁵Anɔ́ɔ ó lɛ ɔwɛ máfú lɛ uwá. Anɔ́ɔ ācɛ kú Ɛ́frem mɛ́mla ācɛ Umanásɛ le yɛ gāá lɛ odúúdú ācɛ kú igelī nɛ̄hi ā kpó ŋmó, ɔ̄cɛ nōo ma ɛga nēé bū wā ipú igelī nɛ̄hi ā fú lɛ uwá ā ōfōōfūnū hile yēeyī á.

²⁶Igbīhāajɛ ā, ɔ̄cɛ ɔ́ɔmā ā, le yɛ tá ajɛ kú Uhɛ́ti, lɛ ɔlɛ́ gwó abɔ́ɔ. Anɔ́ɔ, ó kwú iyē í ce ɔ́ ka Ulúsi á. Iyē ɔ́ɔmā nɛ̄ ɔlɛ́ ā lé jāā kwu eko nɛ̄ é tɔ́kpá nyā á.

²⁷Ipɔ́ɔma kú Umanásɛ í nū ācɛ nēe lā aígelī nɛ̄hi nēe bá nyā bɛ̄cɛ ŋ́. Aígelī ā wɛ Ubɛtíssán, Utáánāki, Údɔ, Ublím, Umegído mɛ́mla aígelī nɛ̄ŋcɛ́ nēe kwu uwá ajaajɛ ā. Ācɛ kú Ukénan lā abɔ́ɔ kpɔ́

²⁸Amáŋ, eko nɛ̄ Ísrɛ̄lu lɔfú lɛ tōōtɔ̄ɔ̄ nɛ̄hi ā, é kwú ācɛ Ukénan ú pīya aɔ́fiyɛ kú uwā. Amáŋ Ísrɛ̄lu í nū uwā bɛ̄cɛ dúúdú ŋ́.

²⁹Ācɛ Ukénan nēe lā aígelī kú Ugésa ā, ipɔ́ɔma kú Ɛ́frem í nū uwā bɛ̄cɛ ŋ́ jāā kwu eko nēé tá ɔkpá nyā ā. É lā mla uwá kpɔ́.

³⁰Ipɔ́ɔma kú Usébūlɔn í nū ācɛ nēe lā aígelī nɛ̄hi kú Ukítrɔn mɛ́mla Unahálālu ā bɛ̄cɛ ŋ́. É lā abɔ́ɔ mla uwá, amáŋ é wɛ aɔ́fiyɛ kú ācɛ Usébūlɔn.

³¹Aípɔ́ɔma kú Ássa í nū ācɛ nēe lā ipú aígelī nɛ̄hi kú Ákoo, Usídɔn, Áhīlābu, Ákīsibu, Uhɛ́lāba, Áfɛ̄ki mɛ́mla Uréhɔ̄bu ā bɛ̄cɛ ŋ́.

³²Ācɛ kú Ássa lā mla uwá jāā kwu eko nēé tá ɔkpá nyā, abɔ̄ é nū uwā bɛ̄cɛ ŋ́ mā.

³³Ipɔ́ɔma kú Unáfutāli í nū ācɛ nēe lā ipú aígelī nɛ̄hi kú Ubɛtánāti ā bɛ̄cɛ ŋ́. É lā mlá uwá jāā kwu eko nēé tá ɔkpá nyā, amáŋ é wɛ aɔ́fiyɛ kú ācɛ Unáfutāli.

³⁴Ācɛ kú Ámɔ̄ri lɛ ācɛ kú ipɔ́ɔma kú Udáni kwu ga ɛyí ɛfu. É cɛ̄ lɛ uwá tú wā ajɛ ɔlamu ā ŋ́.

³⁵Ācɛ kú Ámɔ̄ri lā Áíjālɔn, Usáalubím, mɛ́mla ɛyí ɛfu kú Uhɛ́rɛ̄si, kpɔ́. Amáŋ ācɛ kú ipɔ́ɔma kú Ɛ́frem mɛ́mla Umanásɛ, gbō uwā klla lɛ uwá yá aɔ́fiyɛ kú uwā jāā kwu eko nēé tá ɛkpá nyā ā.

³⁶Ɛjī kú ācɛ ajɛ kú Ɛ́dɔm gāá bū Akrabím ɛhícō kú Usíla.