Read idoma ĀCOHƐ́PƆ̄ 10 Bible Online

ĀCOHƐ́PƆ̄ 10 - idoma bible

ĀCOHƐ́PƆ̄ 10

¹Igbīhi ikwū kú Abímɛ́lɛ̄ki ā, Utóla ɔyí kú Upúwa, ɔyí kú Udodo wā í lɛ ācɛ kú Ísrɛ̄lu hɛ́tá. Ó ŋmá ipɔ́ɔma kú Ísāka, ó lā Ussámɛ, ɔlɛ́ kú ɛyí ɛfu kú Ɛ́frem ā.

²Ó wɛ ɔ̄cohɛ́pɔ̄ mɛ́mla otrɛ̄yí kú Ísrɛ̄lu, iháyí ofu cɛtá. Ó gekwú anɔ́ɔ é lɛ ɔ́ nyi Ussámɛ á.

³Igbīhi Utóla ā, Ujáyɛ gā, ŋmá ipɔ́ɔma kú Ugílɛ̄di. Ó leyīkwu ācɛ Ísrɛ̄lu iháyí ofu cɛpa.

⁴Ó ma ayí ofu cigwó, nēe gē ce aíjakī ofu cigwó. É lɛ aígelī nɛ̄hi ofu cigwó, ipú ajɛ kú Ugílɛ̄di, nēé gē hī ka aípɔ́lɛ́ kú Ujáyɛ ā jāā kwu ícɛ.

⁵Ujáyɛ gekwú, anɔ́ɔ é le ɔ́ nyi Ukámɔn á.

⁶Ācɛ kú Ísrɛ̄lu le íne kú Óndú ā bīya igbɔhá kpɔ̄. Oŋmá lɛ o pā ojibó kú Ubáalu, Ásitātesi, mɛ́mla ɛcí kú ācɛ Usiríya, Usídɔn, Umówābu, Ámɔ̄ri, mɛ́mla ojibó kú ācɛ Ufilístiya. É le igbīhi ce kwu Óndú ā, anɔ́ɔ é gbā ɔ̄ ɛ̄gbā gɛ ŋ́ má.

⁷Anɔ́ɔ Óndú ā kwú cɔ̄nū mla ācɛ kú Ísrɛ̄lu á, anɔ́ɔ ó cɛ̄ lɛ ācɛ kú Ufilístiya mɛ́mla ācɛ Ámɔ̄ri le ɛfú kpó tú uwā, le uwá yálé á.

⁸É yá ācɛ kú Ísrɛ̄lu nēe lā ɔlɛ́ kú ācɛ Ámɔ̄ri, ogbeé kú Ujɔ́dan, ajɛ kú Ugílɛ̄di ā, ōwē iháyí igwáahātá, ohígbū ucē kú ɔ́bíipú kú uwā ā.

⁹Ācɛ kú Ámɔ̄ri le bēhé ísu kú Ujɔ́dan nyɔ̄ í le ɛfú kpó tá aípɔ́ɔma kú Ujúda, Ubɛ́njamīn mɛ́mla Ɛ́frem. Ísrɛ̄lu yɔ̄ ipú ákanya mɛ́mla ōwē nɛ̄hi.

¹⁰Anɔ́ɔ ācɛ kú Ísrɛ̄lu le ikwū je klá Óndú ā ka aá le íne kú nū bīya ɛɛ́. Ohígbū ka aá nyɛ̄ɛ̄ ŋmá ɛgiyí anú nōo wɛ Ɔwɔicō kú uwā ā klla gāá bá ī pā ojibó kú Ubáalu, ɔwɔ ɔhā ā ɛ̄gbā.

¹¹Óndú ā tá uwā ohi da uwā ɔ̄kā ka ācɛ kú Íjīpiti, Ámɔ̄ri, Ámɔn, Ufilístiya,

¹²Usídɔn, Ámālɛ̄ki, mɛ́mla ācɛ Umówābu, tɛtɛ yá uwā ōwē. Ɛ́ɛ le ikwū je wā gaá klá anúɔ. Anúɔ í nya uwá tá ŋmá abɔ̄ kú uwā ŋ́ nɛɛ?

¹³Nááná ɛ́ɛ nyɛ̄ɛ̄ gwū anúɔ tá, nyɔ̄ í pā ojibó kú Ubáalu, mɛ́mla aɛ́cí ɔhá. Ó ka anúɔ í gáā hɛ́ uwā tá ɛ́ɛ́ gɛ ŋ́.

¹⁴Ó klla da uwá kéē nyɔ̄ gāá jikwū klá aɛ́cí nēé jé, gē pā ūwā ā, cɛ́ɛ́ kéē hɛ́ uwā tá ŋmá unwalu ā mɛ́ɛ́nɛ.

¹⁵Amáŋ, ācɛ kú Ísrɛ̄lu klla da Óndú ka aá le íne kú nū bīya ɛɛ́. Ɔdā dúúmā nōo he ɔ́ ɔtū ā, kóō yá aá. Amáŋ ɔ́ɔ lɛ aá hɛ́tá ícɛ ɛ́ɛ́.

¹⁶Anɔ́ɔ é kwú aójibó kú aéwo ɔhá nēé gē pā ā ú kpó bónū, le ɛ̄gbā gbā Óndú ā. Anɔ́ɔ ákanya kú ācɛ Ísrɛ̄lu ā gbɔɔ́ ō je unwalu lɛ ɔ́ á.

¹⁷Anɔ́ɔ ācɛ kú Ámɔ̄ri le tútū ɛfú lɛyíkwu ācɛ Ísrɛ̄lu á. É gāá lɛ aáklɔ̄kpɛ kú ɛ́fú cē ce Ugílɛ̄di.

¹⁸Anɔ́ɔ ācɛ Ísrɛ̄lu mɛ́mla aótrɛ̄yí kú ipɔ́ɔma kú uwā da īyī uwā ɔ̄kā ka ɔ̄nyɛ géē kpó aá tɔ̄ɔkwu ga ɔgbɛ́fú gaá nuunu mla ācɛ Ámɔ̄ri āa? É ka ɔ̄cɛ dúúmā nōo géē kpó aá tɔ̄ɔkwu ga ɔgbɛ́fú ā, géē je pīya otrɛ̄yí kú odúúdú ācɛ kú Ugílɛ̄di mɛ́ɛ̄ á.