Read idoma ĀCOHƐ́PƆ̄ 11 Bible Online

ĀCOHƐ́PƆ̄ 11 - idoma bible

ĀCOHƐ́PƆ̄ 11

¹Ujɛ́futa, ícɔ́ɔ́ja olɔtū nɛ̄hi ā ŋmá Ugílɛ̄di. Ó wɛ ɔyí kú akwuna éyi. Ugílɛ̄di, ádā nū

²lɛ ayínɔ̄nyīlɔ ɔhá nɛ̄ ɔnyā nū ma lɛ ɔ́. Eko nɛ̄ ayí ohile ā le kpó jɛ̄ ā, é le Ujɛ́futa nū ŋmá ɔlɛ́. É da Ujɛ́futa ka ɔ́ɔ gáā lɛ úgwū kú ɔdā dúúmā kú ádā aá ŋ́, ohígbū ka ɔ́ɔ wɛ ɔyí kú ɔnyā ɔhá nōo wɛ akwuna.

³Anɔ́ɔ Ujɛ́futa le kwu ŋmá ɛgiyí ayí ádā nū, gaá lā Utóbu á. Abɔ́ɔ ā, ó lɛ ígwu kú ācɛ oliikpó olɔfú nēe gbɔɔ́ ō yɛce ɔ́.

⁴Igbīhāajɛ, ācɛ kú Ámɔn nyɔ̄ gáā kpɛ́fú tú ācɛ Ísrɛ̄lu.

⁵Eko nɛ̄ ɛfú nyā gā ā, anyākwɔ́cɛ kú Ugílɛ̄di nyɔ̄ í lɛ Ujɛ́futa hīīgwú cīgbīhi wā ɔlɛ́ ŋmá Utóbu.

⁶Anɔ́ɔ é da ɔ́ kóō wā í kpó aá tɔ̄ɔkwu ga ɔgbɛ́fú, cɛ́ɛ́ ká aá kpɛ́fú tá ācɛ kú Ámɔn.

⁷Amáŋ, Ujɛ́futa tá uwā ohi kéē wɔ̄tū anúɔ nɛ̄ɛ̄nɛ̄hi nōo yá kéē kōō le anúɔ nū ŋmá ɔlɛ́ ádā anúɔ. Ka ɔdíyá nēé wā ɛgiyí anúɔ eko unwalu kú uwá aā gɛ?

⁸É tá ɔ̄ ohi ka aá wā ɛgiyí nū abālɔbányā, ohígbū ka aá tíne kóō kpó aá tɔ̄ɔkwu gāá kpɛ́fú tá ācɛ kú Ámɔn, cɛ́ɛ́ kóō kwú pīya otrɛ̄yí kú odúúdú ācɛ kú Ugílɛ̄di.

⁹Ujɛ́futa tá uwā ohi ka ɔ́dāŋ kéē kwú anúɔ í kwúcē ga ɔlɛ́ gaá lɛ ɛfú ā kpó tá ācɛ kú Ámɔn, nɛ̄ Óndú ā cɛ̄ lɛ uwá lɛ ācɛ ā yálé, ka anúɔ géē wɛ ɔcɛ́ kú uwā ā?

¹⁰Anɔ́ɔ é tá ɔ̄ ohi ka aá cɛ̄, ka Óndú kóō wɛ ijáalí kú aá mɛ́mla anú.

¹¹Anɔ́ɔ Ujɛ́futa le yɛ mla aótrɛ̄yí kú ācɛ Ugílɛ̄di á. Anɔ́ɔ ācɛ ā kwú ɔ̄ ú pīya ɔcɛ́ mɛ́mla otrɛ̄yí kú uwā á. Ujɛ́futa le ɔdā nōó dɔɔ̄kā ā kpó ka lɛ uwá Umíspa ipéyī kú Óndú ā.

¹²Anɔ́ɔ Ujɛ́futa le ɛhɔ̄ tū fu ɔcɛ́ kú Ámɔn kéē da ɔ́ ɔ̄kā ka ɔdí wɛ unwalu kú aá mɛ́mla anú ā? Ɔdíyá nɛ̄ ɔ́ɔ wā í nuunu tá ācɛ ajɛ kú ɔlɛ́ anúɔ āa?

¹³Anɔ́ɔ ɔcɛ́ kú Ámɔn tá Ujɛ́futa ohi ka eko nɛ̄ ācɛ kú Ísrɛ̄lu ɔ́ɔ bɛ̄cɛ ŋmá Íjīpiti ā, kéē mīyɛ ajɛ kú anúɔ ŋmá ísu kú Ánɔn ga ísu kú Ujábɔ̄ki, mɛ́mla ísu kú Ujɔ́dan. Ó ka ɛ́ɛ kwú ajɛ ā ú lɛ anúɔ abālɔbányā ɛbɔ́.

¹⁴Anɔ́ɔ Ujɛ́futa le ɛhɔ̄ tū cīgbīhi fu ɔcɛ́ kú Ámɔ̄ri.

¹⁵Anɔ́ɔ ó tá ɔ̄ ohi koó wɛ ɛlā ɔkwɛ̄yi ka ācɛ Ísrɛ̄lu mīyɛ ajɛ kú Umówābu, ámāŋ ka ó wɛ ajɛ kú Ámɔn ŋ́.

¹⁶Ó da ɔ́ ka ɔdā nōó yá ā yɔ̄ á. Eko nɛ̄ ācɛ Ísrɛ̄lu bɛ̄cɛ ŋmá Íjīpiti ā, é bū ígbíli gaá bū ísu igwɛ̄bɛ́ gā Ukɛ́dɛssi.

¹⁷Anɔ́ɔ é le ɛhɔ̄ tū fu ɔcɛ́ kú Ɛ́dɔm ka ɔ́ɔ̄ lɛ ɛga je lɛ aá kú aá le bū ajɛ kú nū. Amáŋ ɔcɛ́ kú Ɛ́dɔm í cɛ̄ lɛ uwá bū ajɛ kú nū ŋ́. É le ɛhɔ̄ ékpónú ɔ́ɔmā tū fu ɔcɛ́ kú Umówābu, ɔcɛ́ kú Umówābu tá dúú. Anɔ́ɔ ācɛ kú Ísrɛ̄lu má bá Ukɛ́dɛssi á.

¹⁸Anɔ́ɔ é gbɔɔ́ ŋmá abɔ́ɔ gāá bū ígbíli kwú pīya bá ajɛ kú Ɛ́dɔm mɛ́mla ajɛ kú Umówābu jāā gbéeko nēé gaá bɛ̄cɛ ɛnɔ̄ɔ̄cī kú Umówābu, āyā ɔhá kú ísu kú Ánɔn ā. Ó kéē kwu aáklɔ̄kpɛ abɔ́ɔ, amáŋ é bēhé ísu kú Ánɔn ŋ́, ohígbū koó kwu ɛjī kú ajɛ kú Umówābu

¹⁹Anɔ́ɔ ācɛ kú Ísrɛ̄lu le ɛhɔ̄ tū gāá fu Usíhɔn, ɔcɛ́ kú Ámɔ̄ri, nōo lā Uhɛ́ssbɔn ā, kóō lɛ ɛga je lɛ aá cɛ́ɛ́ kú aá le bū ipú ajɛ kú nū ɛbɔ́ ga ipú ajɛ kú aá

²⁰Amáŋ Usíhɔn tá, klla le odúúdú ācɛ ɔlɛ́ nū kpó wɛ̄ɛcɛ í le ɛfú kpó tá ācɛ Ísrɛ̄lu ajɛ kú Ujáhasi.

²¹Amáŋ Óndú ā, nōo wɛ Ɔwɔicō kú Ísrɛ̄lu ā, cɛ̄ lɛ Ísrɛ̄lu lɛ anú mɛ́mla aícɔ́ɔja kú ɔlɛ́ nū kpó yálé, klla mīyɛ odúúdú ajɛ kú ācɛ Ámɔ̄ri nēe lā ipú ajɛ ā.

²²Ó klla kéē mīyɛ ajɛ kú ācɛ Ámɔ̄ri ŋmá ísu kú Ánɔn ɛháajɛ ā ga Ujábɔ̄ku ipú ajɛ kú ɛhíícō nōo ŋmá ígbíli kú ɛnɔ̄ɔ̄cī kú Ujɔ́dan ā ga ɛnɔ̄ɔ̄nɛ̄ kú nū.

²³Óndú ā, nōo wɛ Ɔwɔicō kú Ísrɛ̄lu ā nū ācɛ Ámɔ̄ri bɛ̄cɛ ŋmá ajɛ kú uwá, hīla ācɛ kú Ísrɛ̄lu á.

²⁴Ó da ɔ́ ɔ̄kā ɔ́dāŋ koó tíne ō mīyɛ ajɛ ā cīgbīhi lɛ uwá. Ó klla da ɔ́ ka ɔdā dóódu nɛ̄ ɔwɔ kú uwā, Ukɛ́mɔ̄si ɔ́ɔ je lɛ uwá ā ɛ́ɛ bī ɔ̄. Amáŋ ɔdā dóódu nɛ̄ Óndú ā, nōo wɛ Ɔwɔicō kú aá je lɛ aá ā, aá géē bī, klla í lɛ ɔ́ tū.

²⁵Ó da uwá kéē gbɛlá ka uwá ɔ́ɔ lɔhi fíyɛ́ Ubálāki, ɔyí kú Usípɔ, ɔcɛ́ kú Umówābu ā á nɛɛ? Ó je unwalu lɛ ācɛ kú Ísrɛ̄lu ŋ́. Ó je unwalu lɛ uwá kóō jé ēē?

²⁶Ó klla da ɔ́ ka iháyí ofu igwɛ́ɛhɔ̄ yɔ̄ mɛ́ɛ̄ á, nɛ̄ ācɛ kú Ísrɛ̄lu húmáyī bī Uhɛ́ssbɔn, mɛ́mla Árōwɛ mɛ́mla aípɔ́lɛ́ kú uwā, mɛ́mla aígelī nɛ̄ŋcɛ́ kú uwā nēe bá okónu ogwu kú ísu kú Ánɔn ā. Ɔdíyá nɛ́ ɛ́ɛ húmáyī mīyɛ uwá ŋmá ɛgiyí ācɛ Ísrɛ̄lu ŋ́ mā ā?

²⁷Ó tá ka anúɔ í yá ɔ̄ ɔdōbɔ̄bí dúúmā ŋ́. Ó klla da ɔ́ ka ɔ́ɔ gē yá anúɔ ɔdōbɔ̄bí ŋmá lɛ o kpɛ́fú tá anúɔ. Anɔ́ɔ ó ka Óndú ā ɔ́ɔ í hɛpɔ̄ kú anúɔ mɛ́mla anú á. Ó kē í hɛpɔ̄ kú ācɛ Ísrɛ̄lu mɛ́mla ācɛ kú Ámɔn ɛ̄cī ɔ́ɔmā.

²⁸Amáŋ ɔcɛ́ kú Ámɔn í lɛ ɛlá wu ɛhɔ̄ nɛ̄ Ujɛ́futa tū fu ɔ́ ā ŋ́.

²⁹Anɔ́ɔ Alelékwū kú Óndú ā kwú Ujɛ́futa á. Anɔ́ɔ ó le yɛ tá Ugílɛ̄di mɛ́mla Umanásɛ klla pīyɛyí wā Umíspa ipú Ugílɛ̄di. Anɔ́ɔ ó klla le yɛ gɔbū ga ajɛ kú ācɛ Ámɔn á.

³⁰Ɛ̄cī éyi Ujɛ́futa le okónu ce lɛ Óndú ā ka ɔ́dāŋ ka ɔ́ɔ cɛ̄ lɛ anúɔ lɛ ācɛ kú Ámɔn yálé,

³¹ó ka anúɔ í je ɔ̄cɛ dúúmā nōó géē bɛ̄cɛ ŋmá inu ɔlɛ́ anúɔ aflɛ́yí wā í jīla anúɔ ɔwɛ, eko nɛ̄ anúɔ yɔ̄ ī pīyɛyí wā ɔlɛ́ ŋmá ɔgbɛ́fú lɛ ācɛ Ámɔn yálé ā, ka anúɔ géē je ɔ̄cɛ ɔ́ɔmā gwɛ́ɛya o yɔlá dúúdú lɛ Óndú ā.

³²Anɔ́ɔ Ujɛ́futa le bēhé ísu kóō kpɛ́fú tá ācɛ Ámɔ̄n á, anɔ́ɔ Óndú ā cɛ̄ lɛ ɔ́ le yálé á.

³³Ó gbɔɔ́ ō ŋmó uwā ŋmá Árōwɛ ga ajɛ Umínīti, aígelī nɛ̄hi ofú, jāā ga Ébɛ̄lu Ukeramím. Ācɛ nōó ŋmó ā wɛ ɛnɛ̄hi. Anɔ́ɔ ācɛ kú Ísrɛ̄lu lɛ ācɛ kú Ámɔn yálé á.

³⁴Eko nɛ̄ Ujɛ́futa yɔ̄ ī pīyɛyí wā ɔlɛ́ nū Umíspa ā. Adá kú nū nōo wɛ ɔyí nū ékpónú ōfōōfūnū nōó ma ā, wā ɔwɛ yɔ̄ ī jīījē, yɔ̄ ī gwō ɔjá mɛ́mla íyōyō í jīla ádā nū ɔwɛ.

³⁵Eko nɛ̄ Ujɛ́futa lɛ ɔ́ má ā, ó lɛ īlī kú nū híla bónū ipú ɔtūnōbí anɔ́ɔ ó kahíníī, “Kpáyi, adá um ee! A le um ɔtū bīya ɛɛ́. Ɔdíyá nōó géē wɛ awɔ géē je ɔtūnōbí mɛ́mla ɔnɔ nyā gā um āa? N le okónu ce lɛ Óndú ā ɛɛ́, n kē í yá ɔ̄ piíí.

³⁶Adá kú nū ā da ɔ́ ka ɔ́dāŋ ka ɔ́ɔ le okónu ce lɛ Óndú ā, koó kwú anúɔ ú yá ɔdā nōó ka anúɔ géē je anúɔ yá ɔ̄ ā lɛ Óndú ā mɛ́ɛ́nɛ, ɛ́gɛ́nɛ̄ Óndú ā cɛ̄ lɛ ɔ́ le ɔ́ci gwō aólɛlā kú aá, ācɛ Ámɔn, klla le uwá yálé ā.

³⁷Anɔ́ɔ ó da Ujɛ́futa,ádā nū ā, koó mā anúɔ tá ɔyā ɛpa ā, cɛ́ɛ́ kú anúɔ ga ɛyí ɛfu gāá yá ɔtūnōbí mɛ́mla aɔ́mpa anúɔ ɛ́gɛ́nɛ̄ anúɔ gáā kwú, nɛ̄ anúɔ í jé ɔ̄cɛnyīlɔ ɛ́ɛ́ ŋ́ mā ā.

³⁸Anɔ́ɔ ó da ɔ́ kóō nyɔ̄. Anɔ́ɔ anú mɛ́mla aɔ́mpānū le pɛ́ le yɛ ga ɛyí ɛfu, gaá yá otūnōbí ɛ́gɛ́nɛ̄ ó gáā kwú, nōó lɛ ɔbá ɛ́ɛ́, nōó gē lɛ ɔyí dúúmā ɛ́ɛ́ ŋ́ mā.

³⁹Eko nɛ̄ ɔyā ɛpa ā gā ā, ó le tá ɛgiyí ádā nū. Anɔ́ɔ ádā nū kwú ɔ̄ ú gwɛ́ɛya o yɔlá dúúdú lɛ Óndú ā, ɛ́gɛ́nɛ̄ ó cokónu lɛ ɔ́ lɛ ā. Anɔ́ɔ ó gekwú, í jé ɔ̄cɛnyīlɔ ŋ́ má. Ɛ̄nyā ɛga nɛ̄ uculo kú ācɛ Ísrɛ̄lu ā ŋmá á,

⁴⁰nɛ̄ ayípɔ̄ncɛ́nyā nēé lɛ ɔbá ɛ́ɛ́ ŋ́ mā gē nyɔ̄ í yá ɛ̄cī ōblatu ipú iháyí dóódu, ɛyí ɛfú kú Ugílɛ̄di á. E nyɔ̄ ī yēkwu mɛ́mla o yɔ́tūnōbí kú adá kú Ujɛ́futa ɛ̄cī ɛnɛ á.