Read idoma ĀCOHƐ́PƆ̄ 12 Bible Online

ĀCOHƐ́PƆ̄ 12 - idoma bible

ĀCOHƐ́PƆ̄ 12

¹Anɔ́ɔ ācɛ kú Ɛ́frem le tútū kéē kpɛ́fú, anɔ́ɔ é le bēhé ísu kú Ujɔ́dan gā Usáfɔn gāá da Ujɛ́futa ɔ̄kā ka ɔdíyá ɛ́ɛ́ nɛ̄ ɔ́ɔ bū ɛjī kú aá gāá kpɛ́fú tá ācɛ Ámɔn, nōó ka lɛ aá ŋ́ mā? É ka aá géē je inu ɔlɛ́ nū tū ɔlá klá ɔ́ ɛyí.

²Ujɛ́futa tá uwā ohi ka ācɛ ɔlɛ́ anúɔ mɛ́mla ācɛ Ámɔ̄ni ɛ́ɛ bī ɛlā nɛ̄hi, ka anúɔ hī uwā igwú, amáŋ ɛ́ɛ tá ō wā í hɛ́ aá tá ŋmá abɔ̄ uwā.

³Ó ka eko nɛ̄ anúɔ má kéē gáā wā ŋ́ mā, anúɔ kwɛyí cikwū le bēhé gāá le ɛfú kpó tá aólɛlā ā. Óndú ā ɔ́ɔ cɛ̄ lɛ anúɔ lɛ ācɛ ā yálé. Ɔdíyá nēé gē wā í kpɛ́fú tá anúɔ ā gɛ?

⁴Anɔ́ɔ Ujɛ́futa lɛ odúúdú ācɛ kú Ugílɛ̄di túbá nyɔ̄ í lɛ ɛfú kpó tá ācɛ kú Ɛ́frem, klla le uwá yálé. Ācɛ kú Ɛ́frem tɛtɛ le ka ka uwá nēe wɛ ācɛ Ugílɛ̄di nēe bá ipɔ́ɔma kú Ɛ́frem mɛ́mla Umanásɛ ā, wɛ ācɛ nēe kwu ŋmá ajɛ kú ācɛ Ɛ́frem.

⁵Ooyá ɛ́ɛ́ ká ācɛ kú Ɛ́frem kéē híī má ɛga kwu ŋ́ mā, ācɛ kú Ugílɛ̄di gaá mīyɛ ɛga nēé gē bēhé ísu kú Ujɔ́dan ā. Eko nɛ̄ ɔ̄cɛ kú Ɛ́frem dúúmā tíne kóō kwu nɛ́ɛ, é gē mīyɛ ɛga kéē bēhé ísu ā, cɛ́ɛ́ ācɛ kú Ugílɛ̄di gē dɔɔ̄kā koó wɛ ɔ̄cɛ kú Ɛ́frem nɛɛ. Ɔ́dāŋ nōó tá,

⁶é gē da ɔ́ kóō ka ka Ussíbbɔ̄lɛti. Amáŋ ó gē ka ka Usibɔ́lɛti, ohígbū koó gáā hī ɔ́ lɔhi glá ŋ́, cɛ́ɛ́ é géē jé koó wɛ aá ŋ́, cɛ́ɛ́ é lɛ ɔ́ kwú le ɔ́ ŋmó, ɛgéyi nēé bēhé Ísu kú Ujɔ́dan ā. Eko ɔ́ɔmā ācɛ kú Ɛ́frem nēé ŋmó ā wɛ ācɛ úlā ofɛhɔ̄ ce ɛhɔ̄ (42,000).

⁷Ujɛ́futa kpó ācɛ kú Ísrɛ̄lu trɛ̄yí iháyí ɛhīlī, anɔ́ɔ ó gekwú á. É le ɔ́ nyi Ugílɛ̄di ɔlɛ́ nū.

⁸Igbīhi Ujɛ́futa ā, Íbisan nōo ŋmá Ubɛ́tilɛ̄hɛ̄m ā wɛ ɔcɛ́ kú Ísrɛ̄lu á.

⁹Ó ma ayínɔ̄nyīlɔ ofu cigwó mɛ́mla ayínɔ̄nyā ofu cigwó. Ó kwú ayínɔ̄nyā kú nū ā ú kpo lɛ ɔbá ipɔ́ɔma ɔhá, ó lɛ anyā lɛ lɛ ayí nū nɔ̄nyīlɔ ā ŋmá ipɔ́ɔma ɔhá.

¹⁰Ó gekwú anɔ́ɔ é lɛ ɔ́ nyi Ubɛ́tilɛhɛ̄m á.

¹¹Igbīhi Íbisan ā, Ɛ́lɔ̄n ŋmá ipɔ́ɔma kú Usébūlɔn kwú pīya ɔcohɛ́pɔ̄ kú Ísrɛ̄lu iháyí igwó.

¹²Ó klla gekwú, anɔ́ɔ é kwú ɔ̄ ú nyi Áyíjālɔn ipú ajɛ kú Usébūlɔn.

¹³Igbīhi Ɛ́lɔ̄n ā, Ábudɔn, ɔyí kú Uhílɛlu ŋmá ipɔ́ɔma kú Upírātɔn gbō ajɛ kú Ísrɛ̄lu.

¹⁴Ó ma ayí ofɛpa, klla lɛ ayí kú ayí ofu cigwó, nɛ̄ ɔnyɔɔnyɛ kú uwā gē ce aíjakī ofɛtá cigwó. Ábudɔn gbō ācɛ kú Ísrɛ̄lu iháyí ahātá.

¹⁵Ó gekwú, anɔ́ɔ é kwú ɔ̄ ú nyi Upírātɔn ipɔ́ɔma kú Ɛ́frem, ipú ajɛ kú ācɛ Ámālɛ̄ki á.