Read idoma ĀCOHƐ́PƆ̄ 13 Bible Online

ĀCOHƐ́PƆ̄ 13 - idoma bible

ĀCOHƐ́PƆ̄ 13

¹Ācɛ kú Ísrɛ̄lu le íne kú Óndú ā bīya igbɔhá kpɔ́, anɔ́ɔ Óndú ā cɛ̄ lɛ ācɛ kú Ufilístiya lɛ uwá yálé klla gbō uwā iháyí ofɛpa.

²Ɔ̄cɛ éyi yɔ̄, eko ɔ́ɔmā nēé hī ka Umánōwa. Ó ŋmá igelī nɛ̄ŋcɛ́ kú Usóra. Ó wɛ ɔ̄cɛ ipɔ́ɔma kú Udáni. Ɔnyā nū wɛ ɔdɔma.

³Anɔ́ɔ ɛ̄cī éyi lé ka ɛ̄cī éyi, alelékwū-ōtɛ̄hɔ̄ kú Óndú ā gā ɛgiyí ɔnyā nū ā, gāá da ɔ́ koó wɛ ɔdɔma, ó kē ma ɔyí dúúmā ŋ́, amáŋ ɔ́ɔ géē yīipú, í ma ɔyínɔ̄nyīlɔ eko kpií nōo gē wā ā.

⁴Ó ka ɔ́ɔ lɛ ɛlá kwu ɔ́, cɛ́ɛ́ kóō híī gwá ejé ŋ́ ámāŋ ejé olɔfú ŋ́. Ɛ́ɛ́ nōó gē lé ɔdōlé elihɔ dúúmā ŋ́.

⁵Ó klla da ɔ́ ka eko nɛ̄ ɔ́ɔ lɛ ɔyí ā ma, kóō híī lɛ igwu kwu ɔ́ ɛyí ŋ́. Ohígbū ka, oŋmá ɛ̄cī nɛ̄ ɔ́ɔ géē ma ɔ́ ā, é géē je ɔ́ tū céé lɛ Óndú ā abɔ̄ ó í wɛ ɔ̄cɛ nēé ī hī ka Unásāreti ā,[1] Ó ka ɔ́ɔ í gbɔɔ́ ō yúklɔ́ kóō hɛ́ ācɛ Ísrɛ̄lu tá ŋmá abɔ̄ kú ācɛ Ufilístiya.

⁶Anɔ́ɔ ɔnyā ā gaá le ka lɛ ɔbá nū ka Ɔ̄cɛ kú Ɔwɔicō éyi ɔ́ɔ wā ɛgīyí anúɔ, ɔ́ɔ tūufi oōmá. Eyī kú nū ɔ́ɔ lɛbɛ̄ɛka ákú alelékwū-ōtɛ̄hɔ̄ kú Óndá ā. Ó ka anúɔ í da ɔ́ ɔ̄kā ɛga nōó ŋmá ā ŋ́, ɛ́ɛ́ nɛ̄ ɔ́ɔ kē hī iyē kú nū lɛ anúɔ ŋ́.

⁷Amáŋ ó da anúɔ ka anúɔ géē yīipú gē ma ɔyínɔ̄nyīlɔ éyi. Ka anúɔ híī gwá ejé ɔlamu, ámāŋ kú ejé ō kwú ɔ̄cɛ dúúmā ŋ́, ɛ́ɛ́ nɛ̄ anúɔ gē lé ɔdōlé elihɔ dúúmā ŋ́. Ohígbū ka ɔyí anúɔ gáā ma ā wɛ (ɔ̄cɛ) ígwu kú Unásárēti, lɛ Óndú ā ŋmá eko nēé í ma ɔ́ jāā gbéeko nōó í kwú ā.

⁸Anɔ́ɔ Umánōwa le ɔkɔ gbā lɛ Óndú ā ká ɔ̄cɛ nɛ̄ ɔ́ɔ tɛ̄hɔ̄ wā í kɛlā lɛ aá ā ká ɔ̄ gā kpɔ́, eko nɛ̄ aá lɛ ɔyí ā ma, cɛ́ɛ́ kóō da aá ɔdā nɛ̄ aá géē yá ā.

⁹Ɔwɔicō le yá ɛ́gɛ́nɛ̄ Umánōwa gbɔ̄ɔkɔ lɛ ā. Anɔ́ɔ alelékwū-ōtɛ̄hɔ̄ kú Óndú ā gā ɛgiyí ɔnyā ā ipú ɛhɔ̄, eko nɛ̄ ɔbá nū í yɔ̄ abɔ́ɔ ŋ́ mā.

¹⁰Anɔ́ɔ ɔnyā ā lɛ inya kwu bōōbū gāá da ɔbá nū kóō wā gaá má ɔ̄cɛ nōo wā ɛgiyí anúɔ ícílɔ ā klla gā igbɔhá ɛɛ́.

¹¹Umánōwa cāŋjɛ le yɛce ɔnyā nū ga ɛgiyí ɔ̄cɛ ā. Anɔ́ɔ ó da ɔ́ ɔ̄kā ka anú wɛ ɔ̄cɛ nōo kɛlā lɛ ɔnyā anúɔ á nɛɛ? Anɔ́ɔ ó cɛ̄ ka anúɔ nɛɛ.

¹²Anɔ́ɔ Umánōwa da ɔ́ ɔ̄kā ka eko nɛ̄ ɛlā kú nū ā ɔ́ le cɛ̄, ɛdɔ ɔ̄cɛ nyā nɛ̄ ɔyí ā gáā wɛ āa? Ɔdí nōó géē yá ā. Ɛdɔ oyēeyī nyá nōó géē lā āa?

¹³Anɔ́ɔ alelékwū ōtɛ̄hɔ̄ ā, da ɔ́ ka ɔnyā nū géē má ka, ɔdā dóódu nɛ̄ anúɔ da ɔ́ ā, kóō lɛ ɔ́ yá.

¹⁴Ó ka ɔnyā ā ɔ́ híī gwá ejé ŋ́, ɛ́ɛ́ nōó gē lé ɔdōlé elihɔ dúúmā ŋ́. Ɔdā dóódu nɛ̄ anúɔ da ɔ́ ā, ɔ́ɔ géē yá uwā.

¹⁵Umánōwa í jé kóō wɛ alelékwū-ōtɛ̄hɔ̄ kú Óndú ā ŋ́, anɔ́ɔ ó da ɔ́ kóō híī nyɔ̄ ɛ́ɛ́ ŋ́, cɛ́ɛ́ kú anúɔ lɛ ɛbɛ́ kú ɛdrɔ́ kú ɛwū he lɛ ɔ́ ká ɔ̄ lɛ lé ɛ́ɛ́. Anɔ́ɔ alelékwū-ōtɛ̄hɔ̄ ā da ɔ́ ka, ɔ́dāŋ ka anúɔ í nyɔ̄ ŋ́ nááná, anúɔ í gáā lé ɔdōlé kú nū a ŋ́. Amáŋ ɔ́dāŋ kéē tíne ō yá ɔdōlé ā piíí nɛɛ, ɛ́ɛ̄ kwú ɔ̄ ú gwɛ́ɛya o yɔlá dúúdú lɛ Óndá ā.

¹⁷Umánōwa tá ɔɔ̄ ohi ka ɔ́ɔ lɛ iyē kú nū hī lɛ aá, cɛ́ɛ́ kú aá géē lɛ ojīlīmā ce ɔ́ eko nɛ̄ ɛlā kú nū le yá jīla.

¹⁸Alelékwū-ōtɛ̄hɔ̄ ā tá ɔ̄ ohi, klla da ɔ́ ɔ̄kā ka ɔdíyá nɛ̄ ɛ́ɛ tíne ō jé iyē kú anúɔ āa?

¹⁹Anɔ́ɔ Umánōwa kwú Ɛdrɔ́ kú ɛwū éyi ú mɛ́mla umu, anɔ́ɔ ó le ɛya gwó ɛyí ede kú ápátɛ́cɔ̄ ā lɛ Óndú ā, nōo gē yá ɔdā ohídáagó ā á[2]

²⁰Abɔ̄ ígblɛ́nyī ɔlá kú ɛya o yɔlá dúúdú ā yɔ̄ ī gicō ā, Umánōwa mɛ́mla ɔnyā nū má alelékwū-ōtɛ̄hɔ̄ kú Óndú ā yɔ̄ ī ga ɔkpáncō mɛ́mla ódūdū ā.

²¹Umánōwa le jé ka ɔ̄cɛ ā wɛ alelékwū-ōtɛ̄hɔ̄ kú Óndú ā, anɔ́ɔ anú mɛ́mla ɔnyā nū kwu eyī í pīya klá ajɛ. Anɔ́ɔ é klla má alelékwū-ōtɛ̄hɔ̄ kú Óndú ā ɛ́ɛ́ gɛ ŋ́ má.

²²Umánōwa da ɔnyā nū ka aá géē kwú piíí, ohígbū ka aá le Ɔwɔicō má eyī ɛɛ́.

²³Amáŋ, ɔnyā nū tá ɔ̄ ohi ka ɔ́dāŋ ka Óndú ā tíne ō kpó aá ŋmó nɛɛ, ɔ́ɔ géē yɛ í mīyɛ ɛya nɛ̄ aá gwó lɛ ɔ́ ā ŋ́, ó klla í yɛ í ma odúúdú ɔ́dā nōo mafú lɛ aá ā fú lɛ aá ŋ́, ɛ́ɛ́ nōó gē kɛlā nōó ka ā lɛ aá eko ɔ́ɔmā ŋ́.

²⁴Ɔnyā nū ā lɛ ɔyí ā ma, anɔ́ɔ é hī iyē nū ka Usámsin. Ɔyí ā le jɛ̄, Óndú ā kē le ɔhā hɛ́ ce ɔ́.

²⁵Ɔfú kú Óndú ā gbɔɔ́ ō kpɔ́ɔfú tū ɔ̄ iyē eko nōó yɔ̄ ɔtāhɛ̄ kú Usóra mɛ́mla Ɛ́ssitāwolu ɛgiyí ɛga nɛ̄ ipɔ́ɔma kú Udáni yɔ̄ ā.