Read idoma ĀCOHƐ́PƆ̄ 14 Bible Online

ĀCOHƐ́PƆ̄ 14 - idoma bible

ĀCOHƐ́PƆ̄ 14

¹Usámsin le tá Utímna, anɔ́ɔ ó lɛ ɔyípɔ́ncɛ́nyā kú ācɛ Ufilístiya éyi má abɔ́ɔ á.

²Anɔ́ɔ ó wā í da ɛ́nɛ́ mɛ́mla ádā nū ka anúɔ le ɔyípɔ́ncɛ́nyā kú ācɛ Ufilístiya éyi má, Utímna. Ó da uwá kéē lɛ ɔ́ lɛ lɛ anúɔ, cɛ́ɛ́ kú ɔ̄ wɛ ɔnyā anúɔ.

³Amáŋ ɛ́nɛ́ nū mɛ́mla ádā nū da ɔ́ ɔ̄kā ka ɔnyā dúú ɔ́ɔ yɔ̄ ipú ayípáncɛ́nyā kú ācɛ ipɔ́ɔma kú ɔlɛ́ aá ŋ́ nɛɛ, ámāŋ ka ipú odúúdú ācɛ ɔlɛ́ aá ŋ́ nɛ̄ɛ, nɛ̄ ɔ́ɔ gáā lɛ ɔnyā ŋmá ipú ācɛ Ufilístiya nōo wɛ aólufíyē āa? Amáŋ Usámsin da ádā nū kóō lɛ ɔ́ lɛ lɛ anúɔ, ohígbū ka ɔ́ɔ he anúɔ ɔtū nɛ̄hi.

⁴Amáŋ, ɛ́nɛ́ nū mɛ́mla ádā nū í jé ka Óndú ā ɔɔ́ yɔ̄ ī bī ɔ̄ ga abɔ́ɔ ā ŋ́. Ohígbū ka Óndú ā yɔ̄ ī tínē ɛga nōó géē bū gaá nuunu tá ācɛ Ufilístiya ā. Ācɛ Ufilístiya ā bá ī gbō ācɛ Ísrɛ̄lu eko ɔ́ɔmā ā.

⁵Usámsin mɛ́mla ɛ́nɛ́ nū mɛ́mla ádā nū le pɛ́ tá Utímna. Abɔ̄ uwá bá ī nyɔ̄ ɔwɛ gáā bū ipú ɛhɔ̄ ufáyin kú ācɛ Utímna ā, ágábá éyi le oji tū lɛyíkwu Usámsin.

⁶Anɔ́ɔ igbeékpónú alelékwū kú Óndú ā, wā gaá kwú ɔfú ú tū Usámsin iyē nɛ̄ɛ̄nɛ̄hi, anɔ́ɔ ó bī abɔ̄ áncā le ágábá ā fā bɛ̄ɛka ɔyí ɛwū ā. Amáŋ ó da ɛ́nɛ́ nū mɛ́mla ádā nū ɔdā nōó yá ā ŋ́.

⁷Anɔ́ɔ ó nyɔ̄ í le ɔ̄kā da ɔyípɔ́ncɛ́nyā ā, anɔ́ɔ ɔtū kē le he ɔ́ lɛyíkwu ɔyípɔ́ncɛ́nyā ā nɛ̄hi á.

⁸Eko kpií ā, Usámsin le yɛ nyɔ̄ gáā kpó ije ɔnyā ā. Abɔ̄ ó yɔ̄ ī nyɔ̄ ɔwɛ ā, ó le nyā ce ɛga nōó ŋmó ágábá ā tá ā. Anɔ́ɔ ó má ka ɛnwú ɔ́ɔ le tū tū okwū kú ágábá ā.

⁹Anɔ́ɔ ó lɛ ɛnwú ā kla tū abɔ̄, anɔ́ɔ ó lé tú ɔwɔɔwɛ nyɔ̄ á. Ó le je lɛ ɛ́nɛ́ nū mɛ́mla ádā nū. Anɔ́ɔ é le lé, amáŋ ó da uwá ɛga nōó bī ɛnwú ā ŋmá ā ŋ́.

¹⁰Anɔ́ɔ ádā kú Usámsin le tá ɔlɛ́ ádā kú ɔnyā ā á. Usámsin le ucɛ yá abɔ́ɔ, ohígbū ka ɔ́ɔmā wɛ ucē kú ayípōklóbīya á.

¹¹Eko nɛ̄ ācɛ Ufilístiya le ɔ́ má ā, é le ayípōklóbīya ofu cigwó tū nyɔ̄ í bá mɛ́mla anú.

¹²Anɔ́ɔ Usámsin da uwá ka ka anúɔ lɛ ita éyi kwu lɛ uwá. Ka ɔ́dāŋ ka ipú ɛ̄cī ahāapa kú ucɛ ā, nēé lɛyí nū ka lɛ anúɔ, anúɔ géē kpó otóngwō ofu cigwó mɛ́mla īlī nēé yíifa tū ɔ̄ ofu cigwó lɛ uwá.

¹³Amáŋ ɔ́dāŋ kéē ka ɛyí ita ā lɛ anúɔ glá ŋ́, uwá ɔ́ɔ géē kpó otóngwō mɛ́mla īlī nēé yíifa tū ɔ̄ ofu cigwó lɛ anúɔ. Anɔ́ɔ é da ɔ́ kóō lɛ ita ā kwu kú aá pó.

¹⁴Anɔ́ɔ ó da uwá ka, “Ipú ɔdā nōó gē lé ɔdōlé ā nɛ̄ ɔdōlé gē ŋmá á. Ipú ɔdā olɔfú ā, nɛ̄ ɔdā olɔnyɛ gē ŋmá á.” Ɛ̄cī ɛtá nááná, é ka ɛyí ita nyā lɛ ɔ́ glá ɛ́ɛ́ ŋ́.

¹⁵Ɛ̄cī ɔ́mɛɛnɛ ā, é da ɔnyā kú Usámsin ā kóō lɛ ɔbá nū plá, cɛ́ɛ́ kóō lɛyí ita kú nū ā ka lɛ aá. É da ɔ́ ka ɔ́dāŋ ka ɔ́ yá ɔdā nɛ̄ aá da ɔ́ ā ŋ́, aá géē je anú mɛ́mla ācɛ ɔlɛ́ ádā anú kpó yɔlá. É klla da ɔ́ ka, ɔ́ɔ hī aá igwú wā abɔ́ɔ gaá yá aá ɛbɛ́ nɛɛ?

¹⁶Anɔ́ɔ ɔnyā kú Usámsin ā le ikwū je ga iyɔ̄bū Usámsin gaá da ɔɔ́ kóō gē wɔ́tū anúɔ. Ka anúɔ í he ɔ́ ɔtū ŋ́. Ó ka ɔ́ɔ le ita kwú lɛ ācɛ ɔlɛ́ ádā anúɔ, ɔ́ɔ kē da anúɔ ɛyí kú ita ā ŋ́. Anɔ́ɔ Usámsin tá ɔnyā nū ā ohi, da ɔɔ́ ka anúɔ í kōō ka ɛyí ita ā lɛ ádā anúɔ ɛ́ɛ́ nɛ̄ anúɔ ī ka lɛ ɛ́nɛ́ anúɔ ŋ́. Ó ka ɔ́ɔ lɛ ā anúɔ géē ka lɛ ɔ́ kɛ́ɛ̄?

¹⁷Ɔnyā nū ā jikwū iyɔ̄bū nū ɛ̄cī ahāapa, nɛ̄ eko kú ucɛ ā yɛ í kwu ā. Ɛ̄cī ɔ́mahāapa ā, abɔ̄ ɔnyā ā í cɛ̄ lɛ ɔ́ gɛ ŋ́ mā, ó le ɛyí ita ā ka lɛ ɔ́. Anɔ́ɔ ɔnyā ā le ka lɛ ācɛ Ufilístiya á.

¹⁸Abɔ̄ ɛnɔ yɔ̄ ī gaajɛ ɛ̄cī ɔ́mahāapa ā, ācɛ kú igelī nɛ̄hi ā wā í da Usámsin ka, ɛyí ita ā yɔ̄ á, “Ɔdí lɔnyɛ fíyɛ́ ɛnwú āa? Ɔdí kē lɔfú fíyɛ́ ágábá āa?” Anɔ́ɔ Usámsin tá uwā ohi ka ɔ́dāŋ kéē húmáyī ī je unwalu lɛ ɔnyā anúɔ ŋ́ nɛɛ, é géē yɛ í jɛ́yí ita ā glá ŋ́.

¹⁹Anɔ́ɔ alelékwū kú Óndú ā wā í le ɔfú tū ɔ̄ iyē nɛ̄hi, anɔ́ɔ ó le tá Ássikɛ̄lɔn, lɛ ācɛ ofu cigwó kú uwa kpó ŋmó, anɔ́ɔ ó le otóngwō mɛ́mla īlī nēé yíifa tū ɔ̄ kú uwā ofu cigwó kpó. Anɔ́ɔ ó kwú uwā ú kpó gē lɛ ācɛ nēe ka ɛyí ita kú nū ā á. Anɔ́ɔ Usámsin le cɔ̄nū nɛ̄hi le tá ɔlɛ́ ádā nū á.

²⁰Anɔ́ɔ é kwú ɔnyā nū ā í lɛ oklóbīya nū, nōo tá ɔ̄ ɔkwu eko kú ucɛ kú ɔnyā ō lɛ ā.