Read idoma ĀCOHƐ́PƆ̄ 15 Bible Online

ĀCOHƐ́PƆ̄ 15 - idoma bible

ĀCOHƐ́PƆ̄ 15

¹Igbīhāajɛ ā Usámsin nyɔ̄ gaá má ɔnyā nū eko nēé gē cē īkpɔ̄dɛ̄hɔ̄ ā. Anɔ́ɔ ó le ɛwū bī gé lɛ ɔnyā nū ā. Ó da ádā ɔnyā nū ā ka anúɔ tíne ō gwutá mla ɔnyā anúɔ ipú inu ɔlɛ́ ɛ́nɛ́ nū ícíícɛ ɔ́ɔmā. Amáŋ, ádā ɔnyā nū ā í cɛ̄ lɛ ɔ́ ŋ́.

²Ó da Úsámsin ka anúɔ gbɛlá ka ɔnyā nū ā ɔ́ he ɔ́ ɔtū gɛ ŋ́. Ohígbū ɔ́ɔmā anúɔ kwú ɔ̄ ú lɛ oklóbīya nū ā. Ó da ɔ́ ka, amāŋ, ɔyínɛ́ ɔnyā ā nɛ̄ŋ́cɛ́ ɔ́ɔ kē jɔ̄ɔ́ncɛ̄nyā fíyɛ́ ɔ̄ á. Ká ɔ̄ kwú ɔ̄ ú kwɛyí nū mɛ́ɛ́nɛ.

³Anɔ́ɔ Usámsin ka igbɛ́ɛ̄nyā, anúɔ í gáā lɛ́pɔ̄bí kú ɔdā dúúmā nɛ̄ anúɔ géē yá ācɛ kú Ufílístiya ā gɛ ŋ́.

⁴Anɔ́ɔ ó gaá le ɛpā ofu igwɛ́ɛhɔ̄ (300) kwú. Ó le uwá ugbé kpó gbō bá ɔhá ɛpɛɛpa, anɔ́ɔ ó le ácí kwú hílá pla uwá ugbé á.

⁵Anɔ́ɔ ó lɛ ɔlá hɛ́ kwu ácí kú ugbé kú uwā á. Anɔ́ɔ ó mā uwá tá i tá ipú ɛhɔ̄ kú ācɛ Ufilístiya. Ó bī ɔwɛ nyā le odúúdú īkpɔ̄dɛ̄hɔ̄ kú ācɛ Ufilístiya kpó yɔlá. Kwu ɛ̄nɛ̄ é cē bá ɛhɔ̄ ā mɛ́mla ɛ̄nɛ̄ ó tá icō, nēé cē ɛ́ɛ́ ŋ́ mā, kwu ɛhɔ̄ kú ɔcí nēé hī ka ólīifu nēé tū ā kpó wúlatāajɛ.

⁶Eko nɛ̄ ācɛ Ufilístiya lɛ ɔkwu ɔdā nyā bū ā, é le jé ka Usámsin ɔɔ́ kē yá ɔdā nyā á, ohígbū ka ádā ɔnyā nū, ɔ̄cɛ Utímna ā, ɔ́ɔ kwú ɔnyā nū ú lɛ oklóbīya Usámsin. Anɔ́ɔ ācɛ Ufilístiya le yɛ gaá le ɔnyā ā mɛ́mla ācɛ ɔlɛ́ ádā nū mɛ́mla ɔlɛ́ ádā nū ā kpó yɔlá tāajɛ á.

⁷Anɔ́ɔ Usámsin da uwá ka ɔwɛ nēé gē yá ucē ā ɔ́ɔ yɔ̄ áā. Anɔ́ɔ ó le ɔkpá gbo ka anúɔ géē gwō uwā ɔ́ci kú ɔdā nēé yá ā. Ó ka eko nɛ̄ anúɔ lɛ ɔ́ci ā gwó uwā, cɛ́ɛ́ anúɔ nyɛ̄ɛ̄.

⁸Anɔ́ɔ ó nuunu tá uwā le uwá kpó ŋmó tīkwū klá ajɛ gónóó. Anɔ́ɔ ó nyɔ̄ í lā ipú ɔ̄gɛ̄cɔ̄ kú Étam ā.

⁹Ācɛ Ufilístiya wā í le aáklɔ̄kpɛ kú ɛfú kwu Ujúda, le ɛfú kpó tá ācɛ Ulɛ́hi.

¹⁰Anɔ́ɔ ācɛ kú Ujúda ā da uwá ɔ̄kā ka ɔdíyá nēé wā í kpɛ́fú tá aá āa? Anɔ́ɔ é tá ācɛ Ujúda ā ohi ka aá wā í kwú Usámsin, cɛ́ɛ́ kú aá yá ɔ̄ ɛ́gɛ́nɛ̄ ó yá aá ā.

¹¹Anɔ́ɔ ācɛ úlā ahāapa cofigwó (3,000) kú Ujúda ā le tá ɔ̄gɛ̄cɔ̄ kú Étam ā, gaá da Usámsin ka ɔ́ɔ jé ka ācɛ Ufilístiya gē gbō aá déēē? Ɔdí nɛ̄ ɔ́ɔ yá aá yɔ̄ āa? Anɔ́ɔ Usámsin tá uwā ohi ka ɔdā nēé yá anúɔ ā, nɛ̄ anúɔ yá uwā á.

¹²É da Usámsin ka aá wā abɔ́ɔ, cɛ́ɛ́ kú aá lɛ ɔ́ gbō, cɛ́ɛ́ ká aá kwú ɔ̄ ú lɛ uwá. Usámsin tá uwā ohi ka, kéē le okónu ce lɛ anúɔ ka uwá abɔ̄yī uwā í gáā ŋmó anúɔ ŋ́.

¹³É da ɔ́ ka aá í gáā ŋmó ɔ̄ ŋ́. Amáŋ ka aá géē gbō ɔ̄ ōfōōfūnū, kú aá kwú ɔ̄ ú lɛ uwá. Anɔ́ɔ é le Usámsin gbō mla ɔ́ŋgbá ɛ̄yīpɛ̄ ɛpa, anɔ́ɔ é le ɔ́ bī wɛ̄ɛcɛ ŋmá ipú ɔ̄gɔ̄ ā á.

¹⁴Eko nōó gā Uléhi ā, ācɛ Ufilístiya kwinya lɛyíkwu ɔ́, bá ī cíla okwúlu tū ɔ̄. Anɔ́ɔ igbeékpónú Alelékwū kú Óndú ā wā í le ɔfú tū ɔ̄ iyē nɛ̄hi, anɔ́ɔ ó kwú ɔ́ngbá nēé le gbō ɔ̄ abɔ̄ ā í kpó hɛ́ bɛ̄ɛka ɔdā nɛ̄ ɔlá je ɔ́ yi ŋmá abɔ̄ kú nū āa.

¹⁵Anɔ́ɔ ó le ikpokwú ágáa kú ijakī éyi, nōó kwú gbojī ɛ́ɛ́ ŋ́ má. Ó túkpɛɛ́ kwú ɔ̄ ú ŋmá ajɛ. Anɔ́ɔ ó bī ɔ̄, le ācɛ Ufilístia úlā ɛpa ce ofigwó (1,000) kpó ŋmó á.

¹⁶Anɔ́ɔ Usámsin gwéeyē klla gwííjē ka, “N bī ikpokwú ágáa kú ijakī, le ācɛ úlā ɛpa ce ofigwó (1,000) kpó ŋmó. N bī ikpokwú ágáa kú ijakī, n le okwū kú uwā tīkwū klá ajɛ.”

¹⁷Igbīhi ɛ̄nyā ā, ó kwú ikpokwú ábáa kú ijakī ā ú tá tónū. Ɔdā nyā yá Urámati Uléhi.[3]

¹⁸Anɔ́ɔ ijēēnyi gbɔɔ́ ō ŋmó Usámsin nɛ̄hi á. Anɔ́ɔ ó hī Óndú ā igwú, da ɔɔ́ ka ɔ́ɔ cɛ̄ lɛ anúɔ le ācɛ yálé nɛ̄hi ɛɛ́, ka ɔ́ɔ géē cɛ̄ lɛ ijēēnyi kóō ŋmó anúɔ cɛ́ɛ́ kú ācɛ Ufilístiya, aólufíyé ā kéē wā í lɛ anúɔ kwú nɛɛ?

¹⁹Anɔ́ɔ Óndú ā lɛ ajɛ hɛ́bū Uléhi abɔ́ɔ, anɔ́ɔ éŋkpɔ̄ le bɛ̄cɛ ŋmá anú á. Usámsin le éŋkpɔ̄ ā gwá. Ijēēnyi kú nū mɛ. É hī éŋkpɔ̄ ɔ́ɔmā ka “Ɛn-hákɔ́ɔ.”[4] Ó yɔ̄ Uléhi abɔ́ɔ jāā kwu eko nēé tá ɔkpá nyā ā.

²⁰Usámsin hɛ́pɔ̄ lɛ ācɛ kú Ísrɛ̄lu iháyí ofu, eko nɛ̄ ācɛ kú Ufilístiya bá ī gbō ajɛ kú Ísrɛ̄lu ā.