Read idoma ĀCOHƐ́PƆ̄ 16 Bible Online

ĀCOHƐ́PƆ̄ 16 - idoma bible

ĀCOHƐ́PƆ̄ 16

¹Ɛ̄cī éyi Usámsin le tá igelī nɛ̄hi kú ācɛ Ufilístiya, nēé hī kú Ugása ā. Ó le akwuna éyi má abɔ́ɔ, anɔ́ɔ ó le ikpó nū ce á.

²Ācɛ kú Ugása le jé ka Usámsin ɔ́ɔ yɔ̄ abɔ́ɔ. É le abɔ́ɔ yɛ jīla tá, anɔ́ɔ é bá ī gbēyī nū okónɔɔwɛ kú igá kú igelī nɛ̄hi ā otú gbɔ́ɔ̄cī. Ɔ̄cɛ dúúmā kú uwā í yá uya ŋ́, é bá símm. É da īyī uwā ka aá gbēyī gbéeko nɛ̄ eyī gbɔɔ́ ō nyā ɛ́ɛ́ kú aá géē ŋmó ɔ̄.

³Amáŋ, Usámsin gwutá jāā gbó ahāpotú, anɔ́ɔ ó cāŋjɛ, kwú ɔcí kú ɔwɛ kú okónɔɔwɛ kú igá kú igelī nɛ̄hi ā, le ɔ́ fu ŋmá ajɛ dúúdú mɛ́mla oje kú nū ā, kwú ɔ̄ ú ce ɔkɔ gāá tá ɛyí ɛfu kú Uhɛ́brɔn á.

⁴Igbīhi ɛ̄nyā ā, Usámsin kwú ihɔtū kú ɔnyā ɔhá nēé hī ka Udelíla ā ú. Ɔnyā ā lā ɔpɛ́ kú Usórēki.

⁵Ɛ̄cī éyi aɔ́cɛ́ kú Ufilístiya ɛhɔ̄ ā le pɛ́ tá ɛgiyí ɔnyā ā, gāá da ɔ́ ka ɔ́ɔ̄ le Usámsin plla, cɛ́ɛ́ kóō lɛ ɛga nɛ̄ ɔfú kú nū yɔ̄ ā ka lɛ ɔ́, mɛ́mla ɛ́gɛ́nɛ̄ aá géē kwú ɔ̄ í gbō ɔ̄, cɛ́ɛ́ kóō lɔfú ɛ́ɛ́ gɛ ŋ́ mā. É ka ɔnyɔɔnyɛ kú aá í je ije nɛ̄hɛ́ ulá ɛpa ce ofu igwɛ́ɛhɔ̄ lɛ ɔ́.

⁶Anɔ́ɔ Udɛlíla da Usámsin ɔ̄kā ka iní nɛ̄ ɔfú kú nū ɔ́ɔ yɔ̄ ā mɛ́ɛ̄? Ó ka ɔ́dāŋ ka ɔ̄cɛ tíne ō kwú ɔ̄ kóō lɛ ɔ́ gbō, cɛ́ɛ́ ká ɔ̄ lɔfú ɛ́ɛ́ gɛ ŋ́, abɔ̄ ó géē yá lɛ āa?”

⁷Anɔ́ɔ Usámsin da ɔ́ ka ɔ́dāŋ kéē bī ɔ́ngbá ɛ̄yīpɛ̄ ahāapa nēé le gbō ɔdā dúú ɛ́ɛ́ ŋ́, nōó kē ŋmó kwɛyí ɛ́ɛ́ ŋ́, lɛ anúɔ gbō, anúɔ géē je kwáahi bɛ̄ɛka ācɛ ɔlamu ā.

⁸Aɔ́cɛ́ kú Ufilístiya ā le ɛdɔ ɔ́ngbá ɔ́ɔmā bī gé lɛ Udelíla, anɔ́ɔ ó le Usámsin gbō á.

⁹Ó le ācɛ ōhī kpó bá ipú inu ɔhá bá ī gbēyī ɔdā nōó gaá yá ā. Anɔ́ɔ ó le ɛgba dɛ̄ ka Usámsin, ācɛ Ufílístiya gē wā ɛɛ́! Anɔ́ɔ Usámsin kwú ɔ́ngbá ā ú kpó hɛ́ bɛ̄ɛka ɔdā nɛ̄ ɔlá je ɔ́ yi ŋmá abɔ̄ kú nū ā. Anɔ́ɔ é jé ɛga nɛ̄ ɔfú kú nū yɔ̄ á ɛ́ɛ́ ŋ́ má.

¹⁰Udelíla da Usámsin ka ɔ́ɔ le anúɔ plla le ɛ̄kɛ̄mgbɛ̄ kā lɛ anúɔ, klla le anúɔ yá bɛ̄ɛka olíla ā. Anɔ́ɔ ó klla da ɔ́ kóō lɛ ɛ́gɛ́nɛ̄ ɔ̄cɛ géē kwú ɔ́ lɛ, klla í gbō ɔ̄ ā ka lɛ anúɔ.

¹¹Anɔ́ɔ ó da ɔ́ ka ɔ́dāŋ kéē bī ɔ́ngbá nēé le gbō ɔdā dúú jéejée ɛ́ɛ́ ŋ́, lɛ anúɔ gbō, anúɔ géē je kwáahi bɛ̄ɛka ɔ̄cɛ ɔlamu ā.

¹²Anɔ́ɔ Udɛlíla bī ɛdɔ ɔńgbá ɔ́ɔmā le Usámsin gbō, anɔ́ɔ ó le ācɛ Ufilístiya kpó tayínū inu igbɔhá. Anɔ́ɔ ó le ɛgba dɛ̄ hī Usámsin ka ācɛ Ufilístiya í wā ɛɛ́. Amáŋ Usámsin lɛ ɔ́ngbá ā kpó hɛ́ ŋmá abɔ̄ bɛ̄ɛka owú ā.

¹³Udelíla klla da ɔ́ kpɔ́ ka ɔ́ɔ yɔ̄ ī plla anúɔ kpɔ́ ɛ́ɛ́. Ó kē kɛlā ɔkwɛ̄yi ā lɛ anúɔ ŋ́. Ká ɔ̄ da anúɔ ɛ́gɛ́nɛ̄ ɔ̄cɛ géē kwú ɔ̄ klla í gbō ɔ̄ āa. Anɔ́ɔ Usámsin da ɔ́ ka ɔ́dāŋ ka ɔ́ɔ lɛ ocucu ōgwá kú īnyīlɛyí kú anúɔ ahāapa ā yá, lɛ oje-oyɛ́yí kpó wu ɔ́ bá ajɛ. Anúɔ géē je kwáhi bɛ̄ɛka ɔ̄cɛ ɔlamu ā.

¹⁴Udelíla le ɔ́ já gwutá, anɔ́ɔ ó kwú iyɔ̄lā ú gbo. Anɔ́ɔ ó le ocucu ōgwá kú īnyīlɛyí kú nū ahāapa ā yá le oje-oyɛ́yí wu ɔ́ bá ajɛ. Anɔ́ɔ ó le ɛgba dɛ̄ ka Usámsin, ācɛ Ufilístiya ɔ́ɔ gē wā ɛɛ́. Anɔ́ɔ ó pi īnyīlɛyí kú nū ā gblúu, kwú ɔ̄ ú wī á.

¹⁵Anɔ́ɔ Udelíla da Usámsin ɔ̄kā ka abɔ̄ ó yá lɛ ɛ́ɛ́ nōó ka anúɔ yíihɔtū tá anúɔ, nōó je odo kú nū lɛ anúɔ ŋ́ māa? Ó klla ka ɔ́ɔ le anúɔ plla igbɛɛtá ɛɛ́, nɛ̄ ɔ́ɔ́ ka ɛga nɛ̄ ɔfú kú nū yɔ̄ ā lɛ anúɔ ŋ́ ɛɛ́.

¹⁶Eko nōó je unwalu kú ɛlā nyā lɛ ɔ́ oŋmá ɛ̄cī éyi ga ɛ̄cī ɔhá ā, anɔ́ɔ ɛ̄jɛ̄ unwalu ā le jɛ̄ Usámsin, anɔ́ɔ ó kwú cɔ̄nū nɛ̄ eyī kōō yá ɔ̄ kóō gekwú.

¹⁷Anɔ́ɔ ó lɛ odúúdú ɔtū kú nū nwūla lɛ ɔnyā á. Ó da ɔ́ ka ɔ̄cɛ dúú ɔ́ lɛ igwu kwu anúɔ ɛyí jéejée ɛ́ɛ́ ŋ́. Ohígbū ka anúɔ wɛ ɔ̄cɛ ígwu kú “Unásárēti” lɛ Ɔwɔicō, ŋmá ipú kú ɛ́nɛ́ anúɔ. Ó klla da ɔ́ ka ɔ́dāŋ kéē lɛ anúɔ ɛyí wā, ɔfú kú anúɔ géē nyɛ̄ɛ̄ ŋmá ɛgiyí anúɔ. Cɛ́ɛ́ anúɔ le kwáahi bɛ̄ɛka ācɛ ɔlamu ɔhá ā.

¹⁸Eko nɛ̄ Udelíla má ka ɔ́ɔ le odúúdú ɔtū kú nū ka lɛ anúɔ ɛ́ɛ́ mā. Ó le ɛhɔ̄ tū gāá lɛ aɔ́cɛ́ kú Ufilístiya ā kpó hīīgwú, anɔ́ɔ ó da uwá ka ɛ́ɛ wā kpɔ́ ɛ́ɛ́, ohígbū koó le odúúdú ɔtū kú nū kpó ka lɛ anúɔ ɛɛ́. Anɔ́ɔ é le pɛ́ wā mɛ́mla ije nēé gáā gbā lɛ ɔ́ ā.

¹⁹Udɛlíla le Usámsin já kwú Usámsin ɛyí ú ce átákwū le ɔ́ plla. Anɔ́ɔ ó kwú iyɔ̄lā ú gbo á. Anɔ́ɔ ó lɛ ɔ̄cɛ éyi hīīgwú, anɔ́ɔ ó le oōgwá kú ɛyí kú Usámsin ahāapa ā kpó wā á. Ɔnyā ā gbɔɔ́ ō yá ɔ̄ ōwē, ohígbū ka ɔfú nyɛ̄ɛ̄ hɛ̄ ɔ̄ tá ɛɛ́.

²⁰Anɔ́ɔ ɔnyā ā klla le ɛgba dɛ̄ ka Usámsin, ācɛ Ufilístiya ɔ́ɔ gē pɛ́ wā ɛɛ́. Anɔ́ɔ Usámsin le héyī, gbɛlá ka anúɔ lɔfú bɛ̄ɛka otɛtɛ ā kpɔ́ ɛ́ɛ́. Amáŋ ó jé ka Óndú ā ɔ́ɔ kwú igbīhi ú cē kwu anúɔ ɛ́ɛ́ ŋ́.

²¹Anɔ́ɔ ācɛ Ufilístiya gāá le ɔ́ kwú. É le ɔ́ īkpēyī kpó pu. É kwú ɔ̄ ú ga Ugása, le agbá kú oje udɔ kwu ɔ́ abɔ̄ wā ɔcí. Anɔ́ɔ é kwú ú tá kóō yɔ̄ ī gbā umu ɛgɔ̄ ínágbá kú uwā ā abɔ́ɔ á.

²²Amáŋ īnyīlɛ̄yí kú nū klla gbɔɔ́ ō bū igbɔhá igbīhāajɛ ā kpɔ́.

²³Aɔ́cɛ́ kú Ufilístiya ā le jīla tɔ̄há kéē gwɛ́ɛya lɛ ɛcí kú uwā, “Udágon.” É gwííjē ka ɔwɔ kú aá ɔ́ɔ cɛ̄ lɛ aá lɛ Usámsin, olɛlā kú aá yálé ɛɛ́.

²⁴Eko nēé klla pīyeyī má ɔ̄ ā, é cɛ̄tra ɔwɔ kú uwā kahíníī, “Ɔwɔ kú alɔ kwú olɛlā kú alɔ ú tá abɔ̄ kú alɔ ɛɛ́. Ó gwō alɔ ɔ́cí, lɛ ācɛ ɔlɛ́ alɔ kpó ŋmó kwɛyí.”

²⁵Eko nɛ̄ ɔtú yɔ̄ ī he uwá nɛ̄hi ā, é ka ɛ́ɛ lɛ Usámsin hīgwú lɛ aá, cɛ́ɛ́ kóō hiijā lɛ aá. Anɔ́ɔ é le Usámsin bī wɛ̄ɛcɛ ŋmá inu agbá ā. Anɔ́ɔ ó le ijā he lɛ uwá á. É cɛ̄ lɛ ɔ́ má háyi ɛplá ákanaba ɛpa kú ɛga nēé jīla bá ā.

²⁶Anɔ́ɔ Usámsin da ɔyípɛ̄ nōo lɛ abɔ̄ tū ɔ̄ abɔ̄ ā kóō yá ká anúɔ lɛ abɔ̄ bī ákanaba ɛplɛ́ɛpa nēe bī inu ā háyi ā. Ó ka anúɔ tíne ká anúɔ bayi ce ɔ́.

²⁷Inu ā le mu mla ācɛ. Kwu ācɛnyā mɛ́mla ācɛnyīlɔ, odúúdú aɔ́cɛ́ ɛhɔ̄ kú Ufilístiya ā bá abɔ́ɔ. Ācɛ nēé bá ɛyí inu ā bá ī má ijā kú Usámsin ā lɛbɛ̄ɛka, ācɛ ulá ahāapa ce ofigwó (3,000) ā.

²⁸Anɔ́ɔ Usámsin le ɔkɔ gbā lɛ Óndú ā ka anú nōo wɛ Óndú ā, nōo lɔfú fíyɛ́ dúú ā, kóō kóocōō blakwu anúɔ. Ɔwɔicō kú anúɔ kóō kóocōō kóō lɛ ɔfú tū anúɔ iyē igbɔhá kpɔ́, cɛ́ɛ́ ká anúɔ lɛ ulé kú eyī kú anúɔ nɛ̄ ācɛ Ufilístiya ɛ́ɛ kpó pu ā cílá igbeékpónú ā.

²⁹Anɔ́ɔ Usámsin kwú abɔ̄ ú bī ákanaba ɛpa nēe bī odúúdú inu ā hayi. Abɔ̄lɔ́ná kú nū bī ákanaba éyi, abɔ̄lúfīyē kú nū bī ákanaba ɔhá ā.

³⁰Anɔ́ɔ Usámsin le ɛgba dɛ̄ ka ká anúɔ gekwú mɛ́mla ācɛ Ufilístiya nēe bá āa. Anɔ́ɔ ó bī odúúdu ofú kú nū le abɔ kwu aákanba ā á. Anɔ́ɔ inu ā kwú wúla klá aɔ́cɛ́ ɛhɔ̄ ā mɛ́mla odúúdú ācɛ ohile ā. Ācɛ nɛ̄ Usámsin ŋmó eko nōó kwū ā, fíyɛ́ ācɛ nōó ŋmó eko nōó yēeyī á.

³¹Ayínɛ́ nū mɛ́mla ācɛ ɔlɛ́ nū ohile ā gāá kwú okwū kú nū ú cīgbīhi ga ɔlɛ́ uwā, gaá le ɔ́ nyi ɔtāhɛ̄ kú Usóra mɛ́mla Ɛ́ssitāwol, ipú únóji kú ádā nū, Umánōwa. Ó gbō ācɛ kú Ísrɛ̄lu iháyí ofu.