Read idoma ĀCOHƐ́PƆ̄ 17 Bible Online

ĀCOHƐ́PƆ̄ 17 - idoma bible

ĀCOHƐ́PƆ̄ 17

¹Ɔ̄cɛ éyi yɔ̄ nēé hī iyē nū ka Umíka. Ó lā ajɛ kú ɛyí ɛfu kú Ɛ́frem.

²Ó da ɛ́nɛ́ nū ka ɔ́ɔ blakwu eko nēé kpó oje nɛ̄hɛ́ kú nū ɛkpa igwóléyi uwī, nɛ̄ ɔ́ɔ tókónu lɛ ɔ̄cɛ ɔ́ɔmā ā ɛ́ɛ̄? Ó ka anúɔ pó abɔ́ɔ ɔ́ɔ tá okónu ā. Anɔ́ɔ ó da ɔ́ kóō má ɔ̄, ka anúɔ bī oje ā á. Ó klla ka anúɔ je ije ā á. Anɔ́ɔ ɛ́nɛ́ nū da ɔ́ɔ ka Óndú ā kóō hɔ́hā ce anú nōo wɛ ɔyí anúɔ ā.

³Ó kwú oje ā ú cīgbīhi lɛ ɛ́nɛ́ nū. Anɔ́ɔ ɛ́nɛ́ nū ka oyá ɛ́ɛ́ kú okónu nɛ̄ anúɔ tá ā kóō híī kwú ɔyí anúɔ ŋ́ mā, anúɔ abɔ̄yī anúɔ géē je oje ā tá Óndú ā ahínyá. Kéē géē bī ɔ̄ kéē lɛ ojibó kú ɔcí gbā, cɛ́ɛ́ kéē lɛ oje nɛ̄hɛ́ ā ma plá anú. Ó ka abālɔbányā, anúɔ géē je ije nɛ̄hɛ́ ā kwúcē lɛ ɔ́.

⁴Anɔ́ɔ ó kwu oje ā ú cīgbīhi lɛ ɛ́nɛ́ nū á. Ó le ɛkpa ɛpa kú oje nɛ̄hɛ́ ā kpó lɛ onɔwá éyi. Ó le ojibó ā gbā ŋmá ɔcí éyi, anɔ́ɔ ó lɛ oje nɛ̄hɛ́ ā ma plá anú á. É kwú ɔ̄ ú ce ipú inu ɔlɛ́ Umíka.

⁵Umíka lɛ ɛga o gbā ɛ̄gbā kú nū lɛ. Ó le ojibó kú nū ma klla le ɔdā ō bī gwɛ́ɛ́bā éyi yá. Anɔ́ɔ ó kwú éyi kú ayínɔ̄nyilɔ kú nū ú pīya ɔ̄cogwɛ́ɛya á.

⁶Eko nyā, ɔcɛ́ í yɔ̄ nōo gē gbō ajɛ kú Ísrɛ̄lu ŋ́. Ohígbū ɔ́ɔmā ɔnyɔɔnyɛ gē yá ɔdā nōo he ɔ́ ɔtū

⁷Ó le ɔyípōklóbīya éyi kú ipɔ́ɔma kú Ulífāyi, nōo húmáyī lā Ubɛ́tilɛhɛ̄m, igelī nɛ̄ŋcɛ́ kú Ujúda.

⁸Ó nyɛ̄ ŋmá Ubɛ́tilɛhɛ̄m nyɔ̄ í dɔɔ̄kā ɛga ɔhá kóō lā. Eko nōó yɔ̄ ī ga iyawu kú nū ā, ó ga ɔlɛ́ Umíka nōo yɔ̄ ajɛ ɛyí ɛfu kú Ɛ́frem ā.

⁹Umíka le ɔ̄kā ɛga nōó ŋmá ā da ɔ́. Anɔ́ɔ ó tá ɔ̄ ohi ka anúɔ wɛ ɔ̄cɛ Ulífāyi ŋmá Ubɛ́tilɛhɛ̄m, ipú ajɛ kú Ujúda. Ka anúɔ gē dɔɔ̄kā ɛga nɛ̄ anúɔ géē lā.

¹⁰Umíka da ɔ́ kóō lā mɛ́mla anúɔ, cɛ́ɛ́ kóō kwú pīya ɔ̄cɛ o nwū anúɔ ɛlā mɛ́mla ɔ̄cogwɛ́ɛya kú anúɔ. Ó da ɔ́ ka anúɔ géē cíla ɔ́ ije nɛ̄hɛ́ igwó ipú iháyí. Ka anúɔ klla í kpó īlī mɛ́mla ɔdōlé lɛ ɔ́.

¹¹Anɔ́ɔ ɔyípōklóbīya, ɔ̄cɛ Ulífāyi ā cɛ̄, anɔ́ɔ ó má lā mɛ́mla anú á. Ó lɛbɛ̄ɛka ɔyí nū ā.

¹²Umíka kwú ɔ̄ ú píya ɔ̄cogwɛ́ɛya kú ɔlɛ́ nū. Anɔ́ɔ ó lā ɔlɛ́ Umíka á.

¹³Umíka ka abɔ̄ nɛ̄ anúɔ lɛ ɔ̄cɛ Ulífāyi lɛ, ɔ̄cogwɛ́ɛya kú anúɔ ɛ́ɛ́ mā, anúɔ jé ka Óndú ā géē yá ká ɔdā dóódu kóō lɔhi lɛ anúɔ mɛ́ɛ́nɛ.