Read idoma ĀCOHƐ́PƆ̄ 18 Bible Online

ĀCOHƐ́PƆ̄ 18 - idoma bible

ĀCOHƐ́PƆ̄ 18

¹Ācɛ Ísrɛ̄lu í lɛ ɔcɛ́ dúúmā ō gbō uwā eko ɔ́ɔmā ŋ́. Anɔ́ɔ ipɔ́ɔma kú Udáni bá yɔ̄ ī tíne ajɛ nēé géē mīyɛ cɛ́ɛ́ kéē lā anú. Ohígbū ka é í lɛ ajɛ dúúmā kú abɔ̄yī uwā ipú aípɔ́ɔma kú Ísrɛ̄lu ɛ́ɛ́ ŋ́.

²Anɔ́ɔ ācɛ kú Udáni ā le ācɛ okpɔ́cíkpɔ́cí ɛhɔ̄ fu ŋmá ipú odúúdú aípɔ́ɔ́nū kú aípɔ́ɔma ā. Anɔ́ɔ é le uwá tɛ̄hɔ̄ ŋmá aígelī nɛ̄ŋcɛ́ kú Usóra mɛ́mla Essitawol, cɛ́ɛ́ kéē gāá lɛ ajɛ ā jīla wɛɛlɛ. Eko nɛ̄ é gā Ɛ́frem ā, é bá ɔlɛ́ Umíka.

³Eko nēé bá abɔ́ɔ ā, é pó ɔkɔ kú ɔyípōklóbīya kú Ulífāyi éyi, anɔ́ɔ é le pɛ́ tá ɛgiyí nū gāá le ɔ̄kā da ɔ́ ka ɔdí nɛ̄ ɔ́ɔ gē yá abɔ́ɔ āa? É ka ɔnyɛ̄ ɔ́ɔ bī ɔ̄ wā abɔ́ɔ ā?

⁴Anɔ́ɔ ó tá uwā ohi ka Umíka ɔ́ɔ le anúɔ pūla cɛ́ɛ́ kú anúɔ wɛ ɔ̄cogwɛ́ɛya kú nū. Ó ka ɔ́ɔ gē gbā ije lɛ anúɔ.

⁵Anɔ́ɔ é da ɔ́ kóō lɛ ɔ̄kā da Óndú ā lɛ aá, ɔ́dāŋ ka iyāwu kú aá ā géē lɔhi lɛ aá.

⁶Anɔ́ɔ ɔ̄cogwɛ́ɛya ā tá uwā ohi ka ɔdā dúú kóō je unwalu lɛ uwá ŋ́, ka Óndú ā ɔ́ɔ gē leyīkwu uwá ipú iyāwu kú uwā ā.

⁷Anɔ́ɔ ācɛ ɛhɔ̄ ā nyɛ̄ɛ̄ i tá igelī nɛ̄ŋcɛ́ kú Uláyīssi á. É le má ɛ́gɛ́nɛ̄ ācɛ ā lā ɛbɔ́ nɛ̄ abɔ́ í wā í kwu uwá glá ŋ́ bɛ̄ɛka ācɛ Usídɔn ā. É lā ligbóligbó ŋmá ɛgiyí ācɛ Usídɔn. É kōō tīpú tɔ̄há mɛ́mla ācɛ ɔhá dúúmā ŋ́. É lɛ ɔdā dóódu nōo ce uwá ɛgbá ā.

⁸Eko nɛ̄ ācɛ ɛhɔ̄ ā pīyɛyí wā ɛgiyí ācɛ ɔlɛ́ uwá Usóra mɛ́mla Éssitāwolu ā, ācɛ ɔlɛ́ uwā le ɔ̄kā kú ɔdā nēé má ā da uwá.

⁹É tá uwá ohi kéē wā ká aá gaá kpɛ́fú tā Uláyissi. É ka aá le ajɛ ā má ɛɛ́, ó kē lɔhi nɛ̄hi. É da uwá kéē bá abɔ́ɔ áncā ɛ́ɛ́ gɛ ŋ́, ká aá nyɔ̄ fíyaa. Cɛ́ɛ́ ká aá nyɔ̄ í mīyɛ ajɛ ā.

¹⁰É da uwá ka eko nɛ̄ ɛ́ɛ gā abɔ́ɔ, ɛ́ɛ géē má ka ācɛ ā í gáā leyīce ɔdā dúúmā ŋ́. Éwo ā ɔ́ɔ nwuné nɛ̄hi. Ɔdā dóódu nɛ̄ ɔ̄cɛ géē cɛgbá ā, ɛ́ɛ lɛ. É ka Ɔwɔicō ɔ́ɔ kwú uwā ú kpó lɛ aá ɛɛ́.

¹¹Anɔ́ɔ ācɛ úlā cofigwo le pɛ́ ŋmá ipɔ́ɔma kú Udáni gbɔɔ́ ŋmá Usóra mɛ́mla Éssitāwolu le tútū kéē kpɛ́fú.

¹²É nyɔ̄ ī le aáklɔ̄kpɛ kú ɛfú cēce ɛnɔ̄ɔ̄nɛ̄ kú Ukiríyat Ujēyarím, ipú ajɛ kú Ujúda. Ɔdā nōo yá ɛ́ɛ́ nēé gē hī abɔ́ɔ ka áaklɔ̄kpɛ kú ɛfú kú Udáni kwu eko nɛ̄ e tɔ́kpá nyā yɔ̄ abɔ́ɔ á.

¹³É nyɛ̄ɛ̄ ŋmá abɔ́ɔ le tá ajɛ ɛyí ɛfu kú Umíka nōo yɔ̄ Ɛ́frem ā.

¹⁴Anɔ́ɔ ācɛ ɛhɔ̄, nēé tū gāá jíla ajɛ ā wɛɛlɛ ā da aɔ́mpa uwā ka ɛ́ɛ jé ka ojibó éyi nēé gbā mla ɔcí, le oje nɛ̄hɛ́ ma plla anú mɛ́mla ɔdā ō bī gwɛ́ɛ́bā bá ipú inu āa? Ɔdí nɛ̄ ɛ́ɛ gbɛlá ká aá géē yá ā?

¹⁵É le tá ipú inu kú ɔlɛ Umíka, ɛga nɛ̄ ɔ̄cɛ Ulífāyi ā lā ā. Anɔ́ɔ é da ɔ́ ɔ̄kā ɛ́gɛ́nɛ̄ ó yɔ̄ lɛ ā.

¹⁶Amáŋ, aícɔ́ɔja ula cofigwó kú Udáni, nēe lɛ tútū kéē kpɛ́fú ā háyi okónɔɔwɛ kú igá ā bá ī gbāājɛ.

¹⁷Anɔ́ɔ ācɛ ɛhɔ̄ ā le tá inu ā gaá kwú ojibó nēé gbā, le oje nɛ̄hɛ́ ma plá anú ā, mɛ́mla aójibó ɔhá ā, eko nɛ̄ ɔ̄cogwɛ́ɛya ā háyi ɔwɛ kú igá kú ɔlɛ́ ā mɛ́mla ācɛ úlā cofigwó ā.

¹⁸Eko nɛ̄ ācɛ ā bēhé ga inu ɔlɛ́ Umíka ā, í je ɛcí ā kpó ā, ɔ̄cogwɛ́ɛya ā da uwá ɔ̄kā ka ɔdí nɛ̄ ɛ́ɛ gē yá abɔ́ɔ?

¹⁹É da ɔ́ kóō lɛ okónu klá cíí. Kóō híī ka ɔdā dúúmā ŋ́. Anɔ́ɔ é da ɔ́ kóō kwú pīya ɔ̄cogwɛ́ɛya kú aá mɛ́mla ɔ̄cɛ o nwū aá ɛlā. É da ɔ́ kóō géē lɔhi lɛ ɔ́ fíyɛ́ kóō kwú pīya ɔ̄cogwɛ́ɛya kú odúúdú ipɔ́ɔma éyi kú Ísrɛ̄lu, fíyɛ́ ō wɛ ɔ̄cogwɛ́ɛya kú ipú inu ékpónú ŋ́ nɛɛ?

²⁰Ɛlā nēé ka ā cɛ̄ lɛ ɔtū kwú he ɔ̄cogwɛ́ɛyá ā nɛ̄hi, anɔ́ɔ ó lɛ odúúdú ɛcí ā kpó le yɛ mɛ́mla uwá á.

²¹Anɔ́ɔ é leyī pīya gbɔɔ́ ō nyɔ̄ ga iyāwu kú uwā. Ayí ɔlɛ́ uwā mɛ́mla aɛ́na kú uwā gbɔbū lɛ uwá.

²²É le yɛ ligbó ŋmá ɔlɛ́ ā, ɛ́ɛ́ nɛ̄ Umíka hī aɔ́mpa nū igwú gbɔɔ́ ō nū uwā, cɛ́ɛ́ kéē kpɛ́fú tá uwā á. É lɛ ācɛ kú Udáni ā kwú,

²³anɔ́ɔ é le ɛgba dɛ̄ klá uwá á. Anɔ́ɔ ācɛ kú Udáni ā pīyeyī, da Umíka ɔ̄kā ka ɔdí nɛ̄? Ɔdí gbo nɛ̄ ɛwa ā ɛ́ɛ cē klá ɛcɛ gɛ?

²⁴Umíka tá uwā ohi da uwa ka ɔdí nēe gbɛlá ā, ɔdí wɛ unwalu kú uwā ā? Ó ka ɛ́ɛ kwú ɔ̄cogwɛ́ɛya kú anúɔ mɛ́mla ojibó nɛ̄ anúɔ yá ā ú kpó, klla nyɛ̄ɛ̄. Ó ka ɔdí nɛ̄ anúɔ lɛ hile ɛ́ɛ́ mā?

²⁵Anɔ́ɔ ācɛ kú Udáni ā da ɔ̄ ka ɔ́ɔ ka ɔdā dúúmā ɔhá ɛɛ́ gɛ ŋ́, ayíka ɔ́ɔ tíne ō yá ācɛ nēe bá abɔ́ɔ ā kéē cɔ̄nū cɛ́ɛ́ kéē lɛ ɔdéyi yá ɔ̄. Eko ɔ́ɔmā, anú mɛ́mla ācɛ ɔlɛ́ nū géē pɛ́ kwú.

²⁶Anɔ́ɔ é gbɔɔ́ ō gɔbu mla iyāwu kú uwā á. Umíka le má kéē le lɔfú fíyɛ́ anúɔ, anɔ́ɔ ó kwúcē ga ɔlɛ́ nū á.

²⁷Igbīhāajɛ ā, nɛ̄ ācɛ kú Udáni kwú ɔ̄cogwɛ́ɛya mɛ́mla ojibó nɛ̄ Umíka gbā ā ú kpó ā, é le ɛfú kpó tá Uláyīssi, ɔlɛ́ kú ɛbɔ́ ā mɛ́mla ācɛ kú ɛbɔ́, nēe lā ɔpɛ́ kú Ubɛ́trēhɔ̄bu ā. É le odúúdú ācɛ kú igelī nɛ̄hi ā kpó ŋmó klla le ɔlɛ́ uwā kpó tɔ̄lá.

²⁸Ɔ̄cɛ dúúmā í yɔ̄, nōo gē nya uwá tá ŋ́. Ohígbū ka ācɛ kú Usídɔn lā ligbó hɛ́ uwā tá. É klla lɛ ɛma mla ɔ̄cɛ dúúmā ɛ́ɛ́ nēé gē tá iyē kwu ācɛ ɔhá ŋ́. Anɔ́ɔ ācɛ kú Udáni lɛ igelī nɛ̄hi ā túgwó klla má lā anú.

²⁹Ācɛ kú Udáni lɛ iyē kú igelī nɛ̄hi ā pīyabɔ̄ ŋmá Uláyīssi ga Udáni, iyē kú ádáádā uwā, ɔyí kú Ujékɔ̄pu ā.

³⁰Anɔ́ɔ ācɛ kú Udáni kwú ojibó ā ú kpó kwu ajɛ gbɔɔ́ ō gbā ɔ̄ ɛ̄gbā á. Ujonátan, ɔyí kú Ugássɔm, ɔyí kú ɔyí kú Umósīsi ā wɛ ɔ̄cogwɛ́ɛya kú ipɔ́ɔma kú Udáni á. Ayí nū gē yúklɔ́ kú ācogwɛ́ɛya ā jāā gbéeko nēé je uwá kpó ga ajɛ kú ewɔ̄há.

³¹Ojibó kú Umíka ā kwu abɔ́ɔ eko dóódu, ɛ́gɛ́ eko nɛ̄ Áklɔ̄kpɛ kú Ɔwɔicō yɔ̄ Ussílo í kwu lɛ ā.