Read idoma ĀCOHƐ́PƆ̄ 19 Bible Online

ĀCOHƐ́PƆ̄ 19 - idoma bible

ĀCOHƐ́PƆ̄ 19

¹Ɛ̄cī éyi, ɛ́ɛ́ ká ācɛ Ísrɛ̄lu kéē lɛ ɔcɛ́ ā, ɔ̄cɛ kú Ulífāyi éyi lā ipú ajɛ ɛyí ɛfu kú ipɔɔ́ɔma kú Ɛ́frem. Ó lɛ odiyɔ éyi Ubɛ́tlɛhɛ̄m, ajɛ kú ipɔ́ɔma kú Ujúda.

²Amáŋ ɔnyā ā kwú cɔ̄nū mla anú, anɔ́ɔ ó kwúcē ga ɔlɛ́ ádā nū, Ubɛ́tlɛhɛ̄m gāá klá abɔ́ɔ ɔyā ɛnɛ á.

³Anɔ́ɔ ɔ̄cɛ Ulífāyi ā le ɔgwu nū tá nyɔ̄, cɛ́ɛ́ kóō lɛ ɔɔ́ bī wā ɔlɛ́ á. Ó le ācocɛ̄hɔ̄ kú nū ɛpa kpó mla aíjakī ɛpa. Ɔnyā ā lɛ ɔ̄cɛ Ulífāyi ā būla wā ɔlɛ́ ádā nū. Eko nɛ̄ ádā kú ɔyínɔ̄nya ā le ɔ́ má ā, ó le ɔ́ būla lɔɔlɔhi wā ɔlɛ́.

⁴Ádā odiyɔ̄ ā kóō yɔ̄ mla aá yɛɛ ɛɛ́, anɔ́ɔ ó yɔ̄ mla uwá ɛ̄cī ɛtá. É lé ɔdōlé klla gbo abɔ́ɔ ɛ̄cī ɛtá.

⁵Ɔcɔ̄ɔ̄cī kú ɛ̄cī ɔ́mɛɛnɛ ā, anú mɛ́mla ɔnyā ā le héyī ofúlɔ̄cī, le tútū kéē nyɔ̄ ga ɔlɛ́ uwā. Amáŋ ádā odiyɔ̄ ā da ɔ̄cɛ Ulífāyi ā kéē lɛ ɔdōlé lé ɛ́ɛ́ kéē nyɔ̄. Cɛ́ɛ́ ɛ́ɛ lɛ ɛ́nyɔ́ má ipú ɛ́ɛ́ kéē nyɔ̄ ɔlɛ́ uwā igbīhāajɛ.

⁶Anɔ́ɔ ācɛnyīlɔ ɛpa ā má cīce le ɔdōlé lé tɔ̄há, anɔ́ɔ ádā odiyɔ̄ ā da ɔ́ kéē klla lɛ gbo abɔ́ɔ gbɔ́ɔ̄cī, cɛ́ɛ́ kéē jɔ́ɔnyɛ kú īyī uwā kpɔ́ ɛ́ɛ́.

⁷Ɔ̄cɛ Ulífāyi ā cāŋjɛ kóō nyɔ̄, amáŋ ádā odiyɔ̄ ce ɔ́ ɛyí, ce ɔ́ ɔkɔ, anɔ́ɔ ó klla le gbo abɔ́ɔ kpɔ́ á.

⁸Ofúlɔ̄cī kú ɛci ɔmɛhɔ̄ ā, ó cāŋjɛ gbɔɔ́ ō nyɔ̄, amáŋ ádā odiyɔ̄ ā da ɔ́ kóō lɛ ɔdōlé lé ɛ́ɛ́. Kéē gbēyī lígíí ɛ́ɛ́ kéē nyɔ̄ igbīhāajɛ. Anɔ́ɔ ācɛnyīlɔ ɛpa ā lɛ ɔdōlé lé tɔ̄há á.

⁹Eko nɛ̄ ɔ̄cɛ ā, odiyɔ̄ ā, mɛ́mla ācocɛ̄hɔ̄ kú nū ɛpa nēe wā mɛ́mla anú ā gbɔɔ́ ō nyɔ̄ ā, ádā odiyɔ̄ ā da uwá ka ɛ́ɛ má ɔ̄, otú ɔ́ɔ le bī ɛɛ́. Kéē le gbo abɔ́ɔ gbɔ́ɔ̄cī kpɔ́. Ó ka ajɛ ɔ́ɔ kwú dobū ɛɛ́. Ó kéē bá abɔ́ɔ, cɛ́ɛ́ kéē jɔ́ɔnyɛ kú iyī uwā. Óócí ɛ́ɛ́ kéē cāŋjɛ ofúlɔ̄cī kéē nyɔ̄ iyāwu kú uwā ga ɔlɛ́ uwā.

¹⁰Amáŋ ɔ̄cɛ ā mɛ́mla ɔnyā odiyɔ ā í tíne ō gbo abɔ́ɔ igbɔhá ɛ́ɛ́ gɛ ŋ́. Anɔ́ɔ é gbo iyāwu kú uwā mɛ́mla ācocɛ̄hɔ̄ kú uwā ɛpa ā, mɛ́mla aíjakī ɛpa nēé lɛ anjámī wū uwā okónu ā.

¹¹Otú le bī uwā ɛ̄cī ɔ́ɔmā, eko nēé wā Ujɛ́būsi, (nōo wɛ Ujerúsālɛm ā) Anɔ́ɔ ācotɛ̄hɔ̄ ā da ɔkpani uwā ka aá le gbo igelī nɛ̄hi kú ācɛ Ujɛ́busi abɔ́ɔ gbɔ́ɔ̄cī.

¹²Amáŋ, ɔkpani uwā tá ɔ̄ ohi ka aá í gáā māháyi igelī nɛ̄hi, nɛ̄ ācɛ abɔ́ɔ í wɛ ācɛ Ísrɛ̄lu ŋ́ nɛɛ ŋ́.

¹³Ó ka aá yɛ gɔbū lígíí, gaá lɛ gbo Ugíbɛ̄ya ámāŋ ka Uráma.

¹⁴Anɔ́ɔ é le gwō ajɛ Ujɛ́busi tá gɔbū. Ɛnɔ yɔ̄ ī ga ajɛ ɛ́ɛ́ nēé wā ajɛ Ugíbɛ̄ya, ajɛ kú ipɔ́ɔma kú Ubɛ́njamīn ā á.

¹⁵É le nyā ŋmá ɔwɛ gā igelī nɛ̄hi ā gaá gbo. É le tá igelī ā gaá cīce ɛyɔ́pu kú ɔlɛ́ ā, amáŋ ɔ̄cɛ dúúmā í da uwá kéē wā í gbo ɔlɛ́ anúɔ ŋ́.

¹⁶Eko nēé cīce abɔ́ɔ ā, ókpílícī ɔnyīlɔ éyi ŋmá ɛhɔ̄ yɔ̄ í wā ɔlɛ́, ó wɛ ɔ̄cɛ ipɔ́ɔma kú Ɛ́frem, amáŋ ó lā Ugíbɛ̄ya abɔ́ɔ. (Ācɛ ohile kú ācɛ abɔ́ɔ ā wɛ ācɛ kú ipɔ́ɔma kú Ubɛ́njamīn.)

¹⁷Anɔ́ɔ ɔnyākwɔ́cɛ nyā le aúgbɔga ā má ɛyɔ́pu ā, anɔ́ɔ ó da uwá ɔ̄kā ɛga nēé ŋmá mɛ́mla ɛga nēé gē nyɔ̄ āa?

¹⁸Ɔ̄cɛ Ulífāyi ā tá ɔ̄ ohi ka aá ŋmá Ubɛ́tilɛhɛ̄m, ka aá kē ī ga ɔlɛ́ aá, ajɛ ɛyí ɛfu ā kú Ɛ́frem. Anɔ́ɔ ɔ̄cɛ dúúmā í mīyɛ aá wā ɔlɛ́ nū í gbo gbɔ́ɔ̄cī ɛ́ɛ́ ŋ́ máā.

¹⁹Ó ka aá bī ɔdā ō gwutá mɛ́mla ɔdōlé kú aíjakī kú aá, ka aá klla bī ɔdōlé nɛ̄ aá abɔ̄yī aá géē lé dúú. Ó da ɔ́ ka odúúdú ɔdā nɛ̄ aá cɛgbá ā, aá bī.

²⁰Ɔnyākwɔ́cɛ ā, da uwá kéē wā ɔlɛ́ anúɔ. Kéē híī gbo ɛyɔ́pu abɔ́ɔ ŋ́.

²¹Ó lɛ uwá kpó ga ɔlɛ́ nū, le ɔdōlé je lɛ aíjakī kú uwā, klla lɛ éŋkpɔ̄ je lɛ uwá le ikpó na. Ó klla le ɔdōlé je lɛ uwá i lé.

²²É bá ī jɔ́ɔnyɛ kú īyī uwā, anɔ́ɔ igbeékpónú odúúdú ācɛnyīlɔ nēe gē yá ɔdīcíci mɛ́mla īyī uwā ipú igelī nɛ̄ŋcɛ́ ɔ́ɔmā gaá gbɔɔ́ ō lɛ abɔ̄ tū ɔwɛ kú ɔlɛ́ ɔ̄cɛ ā. É da uwá kéē lɛ ɔ̄cɛnyílɔ nōo wā ɔlɛ́ nū ā bī wɛ̄ɛcɛ, ka aá ɔ́ɔ tíne ō cikpó nū.

²³Anɔ́ɔ óndú ɔlɛ́ ā le tá ɛcɛ ɛgiyí uwā gaá da uwá ka, ehée, aóklóbīya anúɔ kéē kóocōō kéē híī yá ɔdōbɔ̄bí ɛ́gɔ́ɔmā ŋ́. Ó da uwá ka ɔ̄cɛ ā wɛ ugbɔga kú ɔlɛ́ anúɔ nɛ.

²⁴Ó da uwá kéē mā ɔ̄ ɔnyā odiyɔ kú nū mɛ́mla ɔyínɔ̄nyā kú ɔlɛ́ anúɔ nōó jé ɔ̄cɛnyīlɔ jééjē ɛ́ɛ́ ŋ́. Ó ka anúɔ géē kpó uwā lɛ uwá, amáŋ kéē híī yá ɔdā uwēyī mɛ́mla ɔdōbɔ̄bí ɛ́gɔ́ɔ́mā tá ɔ̄cɛnyīlɔ ā ŋ́.

²⁵Amáŋ ācɛ ā í tíne ō jāhɔ̄ lɛ ɛlā kú nū ā ŋ́. Anɔ́ɔ ɔ̄cɛ Ulífāyi ā, kwú odiyɔ̄ kú nū ā ú tá ɛcɛ lɛ uwá. Anɔ́ɔ ācɛ kú igelī nɛ̄ŋcɛ́ ā gbɔɔ́ ō hɛ́ odiyɔ̄ ā báajɛ éyééye jāā gbɔ́ɔ̄cī á. Abɔ̄ eyī gbɔɔ́ ō nyā ā, é ma ɔnyā ā tá.

²⁶Ɔ̄cɔɔ̄cī ā, odiyɔ̄ ā wā gaá fīyajɛ okómpīinu kú ɛga nɛ̄ ɔbá nū yɔ̄ ā. Ó gwutá abɔ́ɔ í jé īyī nū ŋ́, jāā gbéeko nɛ̄ ɛnɔ gā ɛcɛ.

²⁷Eko nɛ̄ ɔbá nū ā lɛ ɔwɛ nwūla kóō gaá nyɔ̄ ā, ó má odiyɔ̄ kú nū ā gwutá okómpíinu lɛ eyī pīya klá ajɛ lɛ abɔ̄ nāŋdaa klá ajɛ gaá kwu ɔwɛ kú inu ā.

²⁸Ó da odiyɔ̄ ā kóō cāŋjɛ kú aá nyɔ̄ mɛ́ɛ̄ n. Amáŋ odiyɔ̄ í tá ohi glá ŋ́. Anɔ́ɔ ó kwú okwū kú odiyɔ̄ kú nū ú klá ɛyí ijakī, gbɔɔ́ ō ga ɔlɛ́ nū.

²⁹Eko nōó gā ɔlɛ́ nū ā, ó kwú ɛ̄wā ú le okwū kú odiyɔ̄ kú nū wā le ɔ́ kɔ̄ ɛga igwɛ́ɛpa. Ó le āyā kú nū éyééye tɛ̄hɔ̄ ga aípɔ́ɔma igwɛ́ɛpa kú Ísrɛ̄lu ā.

³⁰Ɔ̄cɛ dúúmā nōo le ɔ́ má gē ka ka aá í má ɔdā ɛ́gɛ́nyā jéjéee ɛ́ɛ́ ŋ́. Ɔdā ɛ́gɔ́ɔ́mā í yá ɔ̄cɛ kú Ísrɛ̄lu dúúmā jéjéee ɛ́ɛ́ ŋ́, ŋmíífī nɛ̄ aá bɛ̄cɛ ŋmá Íjīpiti ā. Anɔ́ɔ é ka aá géē yá odée lɛyíkwu ɛlā ā. É ka ɔdí nɛ̄ ɔdā ā gáā wɛ āa?