Read idoma ĀCOHƐ́PƆ̄ 20 Bible Online

ĀCOHƐ́PƆ̄ 20 - idoma bible

ĀCOHƐ́PƆ̄ 20

¹Ɛ̄cí éyi, odúúdú ācɛ kú Ísrɛ̄lu, nēe ŋmá ipɔ́ɔma kú Udáni ɛhíícō kú Ubiyɛssɛ́ba nēe bá ɛháajɛ ā, mɛ́mla ācɛ nēe ŋmá Ugílɛ̄di, ɛnɔ̄ɔ̄cī ā mīyɛ olɛhɔ̄ kú Ulífāyi ā. Anɔ́ɔ odúúdú uwā le jīla tɔ̄há iyɔ̄bū Óndú ā Umíspa.

²Anɔ́ɔ odúúdú anyākwɔ́cɛ kú ācɛ kú Ísrɛ̄lu ā wā ōjīla kú ācɛ kú Óndú ā dúú á. Ɛwa kú aícɔ́ɔja ikpó nēe géē bī ɔkpacaŋ́gelī kpɛ́fú ā, nēe bá abɔ́ɔ ā wɛ, ulá bá ɛga ulá ɛpa ce ofigwó (400,000).

³Eko nyā, ācɛ Ubɛ́njamīn le pó ka, odúúdú Ísrɛ̄lu ɛ́ɛ le jīla Umíspa. Ācɛ Ísrɛ̄lu ā da ɔ̄cɛ Ulífāyi ā ɔ̄kā kóō ka lɛ aá ɛ́gɛ́nɛ̄ ācɛ abɔɔ́ ō yá ɔ̄ ɔdōbɔ̄bí ā lɛ ā.

⁴Anɔ́ɔ ɔ̄cɛ Ulífāyi nēé ŋmó ɔnyā nū ā, tá uwā ohi ka anúɔ mɛ́mla ɔnyā anúɔ nyɔ̄ ga ipɔ́ɔma kú Ubɛ́njamīn gáā gbo.

⁵Anɔ́ɔ ācɛ abɔ́ɔ ā wā kéē nuunu tá anúɔ, anɔ́ɔ é le inu nɛ̄ anúɔ yɔ̄ ā yɛ jīla tá otú á. Ó kéē tíne ō lɛ anúɔ ŋmó. Anɔ́ɔ ɛ́ɛ gbɔɔ́ ō hɛ́ odiyɔ̄ kú anúɔ bá ajɛ kwɛyí anúɔ jāā gbéeko nēé le odiyɔ̄ ā lá ŋmó á.

⁶Ɛ́ɛ́ nɛ̄ anúɔ le okwū kú ɔnyā anúɔ wá le ɛbɛ́ nū kpó kɔ̄ kwú ɔ̄ ú tɛ̄hɔ̄ ga ipɔ́ɔma éyééye kú Ísrɛ̄lu á. Ó ka ācɛ ā le ɔdōbɔ̄bí mɛ́mla ɔdā ecē yá ipú Ísrɛ̄lu.

⁷Ó da uwá ka odúúdú aá nēe bá ā wɛ ācɛ Ísrɛ̄lu, ɔdí nɛ̄ aá géē yá lɛyíkwu ɔdā nōo yá āa?

⁸Anɔ́ɔ odúúdú ācɛ ā cāŋjɛ tɔ̄há, tá ɔ̄ ohi ka ɔ̄cɛ dúúmā kú aá nōo yɔ̄ abɔ́ɔ ā, í gáā kwúcē ga ipú áklɔ̄kpɛ ámāŋ ka inu ɔlɛ́ nū ɛ́ɛ́ gɛ ŋ́.

⁹É ka ɔdā nɛ̄ aá gáā yá ā wɛ ka, aá kóō lɛ ūlī tá, cɛ́ɛ́ kú aá lɛ ācɛ nēe í nyɔ̄ í kpɛ́fú tá Ugíbɛya ā kpó fu.

¹⁰É ka aá géē fu ɔ̄cɛ éyi ŋmá ipú ācɛ kú ācɛ Ísrɛ̄lu kéē bī ɔdōlé lɛ aícɔ́ɔja ā, cɛ́ɛ́ ācɛ ohile ā kéē nyɔ̄ í le italā yá ācɛ kú Ugíbɛya ohígbū ucē obɔ̄bí nɛ̄hi nēé yá ipú Ísrɛ̄lu ā.

¹¹Anɔ́ɔ odúúdú ācɛ kú Ísrɛ̄lu le tútū kéē kpɛ́fú tá Ugíbɛ̄ya á.

¹²Aipɔ́ɔma kú Ísrɛ̄lu ohile ā lɛ ācotɛ̄hɔ̄ tū ga odúúdú ajɛ kú ipɔ́ɔma kú Ubɛ́njamīn ā kéē da uwá ɔ̄kā ka ɔdí nēé yá yɔ̄ ā dúú.

¹³É da uwá kéē lɛ ɛdɔ ācɛ obɔ̄bí ɛ́gɔ́ɔmā nēe bá Ugíbɛ̄ya ā kpó wɛ̄ɛcɛ, cɛ́ɛ́ ká aá lɛ uwá kpó ŋmó, cɛ́ɛ́ ká aá kwú ucē obɔ̄bí ā ú ŋmá Ísrɛ̄lu. Amáŋ ācɛ kú ipɔ́ɔma kú Ubɛ́njamīn ā í lɛ ɛlá wu ɛhɔ̄ nɛ̄ aípɔ́ɔma ohile kú Ísrɛ̄lu ā tū ā ŋ́.

¹⁴Anɔ́ɔ ikɔkɔ ɔ́ɔmā, ācɛ kú Ubénjamin le pɛ́ ŋmá odúúdú aígelī nɛ̄hi kú uwā, wā í le túbá Ugíbɛya cɛ́ɛ́ kéē kpɛ́fú tá ācɛ Ísrɛ̄lu ohile ā.

¹⁵É le aícɔ́ɔja úlā ofɛtá cɛhɔ̄ (26,000) hīīgwú wɛ̄ɛcɛ ŋmá aígelī nɛ̄hi kú uwā ɛ̄cī ɔ́ɔmā.

¹⁶Ācɛ kú Ugíbɛ̄ya lɛ ācɛ úlá ce ofu igwɛ́ɛhɔ̄ (700) nēe gē yá abɔ̄lúfīyē fu. Ɔnyɔɔnyɛ kú uwā lɔfú tá ɛcɔ̄ lɛ īnyīlɛyí ékpónú nōó gáā tá ɔ̄ ablɛ̄ glá ŋ́.

¹⁷Aípɔ́ɔma ohile kú Ísrɛ̄lu ā le aícɔ́ɔja kú uwā, úlā bá ɛga úlā ɛpa, cofigwó (400,000) tútū, kéē ga ɛfú.

¹⁸Ācɛ kú Ísrɛ̄lu le tá Ubɛ́tɛlu ɛga nɛ̄ ācɛ ī gbā Ɔwɔicō ɛ̄gbā ā, cɛ́ɛ́ kéē lɛ ɔ̄kā da Ɔwɔicō ka ipɔ́ɔma nyá géē cíkā ō kpɛ́fú tá ipɔ́ɔma kú Ubɛ́njamīn aflɛ́yí āa?

¹⁹Anɔ́ɔ ācɛ kú Ísrɛ̄lu gbɔɔ́ ŋmá ɔlɛ́ ɔ̄cɔ̄ɔ̄cī blibli, anɔ́ɔ é wā gáā le áklɔ̄kpɛ kú ɛ́fú kú uwá kwu pī igelī nɛ̄hi kú Ugíbɛ̄ya á.

²⁰É le tútū kéē kpɛ́fú tá aícɔ́ɔja kú Ubɛ́njamīn. Anɔ́ɔ é le aícɔ́ɔja kú uwā kpó kwāajɛ leyīkwū igelī nɛ̄hi kú Ugíbɛya.

²¹Aícɔ́ɔja kú Ubɛ́njamīn le pɛ́ bɛ̄cɛ wā í kpɛ́fú tá uwā. Ɛ́ɛ́ ká otú kóō bī ícíícɛ ɔ́ɔmā ā, ācɛ ipɔ́ɔma kú Ubɛ́njamīn le aícɔ́ɔja kú Ísrɛ̄lu úlā ofɛpa cigwɛ́ɛhɔ̄ (22,000) kpó ŋmó.

²²Anɔ́ɔ ācɛ kú Ísrɛ̄lu kwúcē ga Áklɔ̄kpɛ kú Óndú ā gāá le ikwū je ipéyī Óndú ā, jāā gbó ɔ̄nɔ̄ɔ̄nɛ̄ á.

²³Anɔ́ɔ é le ɔ̄kā da Óndú ā ka aá nyɔ̄ í kpɛ́fú tá ayínɛ́ aá, ācɛ ipɔ́ɔma kú Ubɛ́njamīn kpɔ́ ɔ̄? Anɔ́ɔ Óndú ā tá uwā ohi ka anúɔ cɛ̄ kéē nyɔ̄ ɛɛ́. Anɔ́ɔ ɔtū kú aícɔ́ɔja kú Ísrɛ̄lu le tú kwu ɔtū á. Anɔ́ɔ é le aícɔ́ɔja kú uwā kpó nyɔ̄ í kwāajɛ ɛga nēé tɛtɛ bá aflɛ́yí ā.

²⁴Anɔ́ɔ é gbɔɔ́ lɛyíkwu aícɔ́ɔja kú ipɔ́ɔma kú Ubɛ́njamīn ā igbo ɔ́mpa á.

²⁵Igbɛ́ɛ̄nyā ā, aícɔ́ɔja kú ipɔ́ɔma kú Ubɛ́njamīn ā klla le pɛ́ bɛ̄cɛ ŋmá Ugíbɛ̄ya, klla le aícɔ́ɔja kú Ísrɛ̄lu úlā ofɛpa cɛhɔ̄ (18,000) ŋmó kpɔ́.

²⁶Anɔ́ɔ odúúdú ācɛ kú Ísrɛ̄lu kwúcē ga Ubɛ́tɛlu ipú Áklɔ̄kpɛ kú Óndú ā, nyɔ̄ í jikwū. É lé ɔdōlé ŋ́ jāā gbó ɔ̄nɔ̄ɔ̄nɛ̄. É le ɛya kú ɛbɔ́ mɛ́mla ɛya o yɔlá dúúdú gwó lɛ Óndú ā abɔ́ɔ.

²⁷Ikpati kú ɛka kú Ondú ā yɔ̄ Ubɛ́tɛlu eko ɔ́ɔmā. Ufínɛ̄hasi, ɔyí kú Ɛlísaa, ɔyí kú ɔyí kú Árɔ̄n gē leyīkwu ɔ́ á.

²⁸Anɔ́ɔ ācɛ ā da Óndú ā ɔ̄kā igbɔhá kpɔ́ ka aá nyɔ̄ í kpɛ́fú tá ayínɛ́ aá, ācɛ ipɔ́ɔma kú Ubɛ́njamīn kpɔ́ɔ̄, kɛ̄ɛ kā aá kwúcē mɛ́ n? Anɔ́ɔ Óndú ā le ohi tá uwā kéē nyɔ̄ í kpɛ́fú. Ohígbū ka óócí ā, anúɔ géē cɛ̄ lɛ uwá yá uwā lé.

²⁹Anɔ́ɔ ācɛ kú Ísrɛ̄lu gaá lɛ aícɔ́ɔja ōhī kpó tayínū Ugíbɛ̄ya.

³⁰Ɛcī ɔ́mɛtá ā kpɔ́, é le aícɔ́ɔja kú uwā kpó ga ɛga ékpónú ɔ́ɔmā kpɔ́, lɛ eyī kpó kwu Ugíbɛ̄ya ɛ́gɛ́nɛ̄ é yá tɛtɛ ā.

³¹Ācɛ ipɔ́ɔma kú Ubɛ́njamīn ā klla le pɛ́ wɛ̄ɛcɛ kéē kpɛ́fú tá uwā. Anɔ́ɔ é le uwá já ŋmá ipú igelī nɛ̄hi ā. É klla gbɔɔ́ ō kpó ācɛ Ísrɛ̄lu ŋmó ɔwɛ nōo yɛ ga Ubɛ́tɛlu mɛ́mla ɔwɛ nōo yɛ ga Ugíbɛya ā. É ŋmó ācɛ kú Ísrɛ̄lu bɛ̄ɛka ofu cigwó ā.

³²Anɔ́ɔ ācɛ kú Ubɛ́njamīn ā ka aá le uwá yálé bɛ̄ɛka otɛtɛ ā ɛɛ́. Amáŋ ācɛ kú Ísrɛ̄lu ā le ojuju yá kéē lɛ uwá plla wɛ̄ɛcɛ ŋmá igelī nɛ̄hi kú uwā, wā ɔwɛ.

³³Anɔ́ɔ eko nɛ̄ aícɔ́ɔja kú Ísrɛ̄lu nēe lɛwa fíyɛ́ dúú ā le yɛ ɔkwɔɔkwu gaá le īyī uwā kɔ̄ ígwíígwu Ubáaltáma ā, anɔ́ɔ ācɛ kú Ísrɛ̄lu nēe tayínū yɛ jīla Ugíbɛ̄ya tá ā, le tá bɛ̄cɛ pláka acígilí ŋmá ɛga nēé tayínū kú uwā ipú ɛcɔ̄ kú ɛyí ɛfu kú igelī nɛ̄hi ā.

³⁴Odúúdú uwá wɛ ācɛ ulá ofu cɛhɔ̄ (10,000) nɛ̄ ācɛ Ísrɛ̄lu kpó tayínū á. É gbɔɔ́ ō kpɛ́fú tá Ugíbɛya. Ɛfú ā kwú hɔ́lá nɛ̄hi. Anɔ́ɔ ācɛ ipɔ́ɔma kú Ubɛ́njamīn ā le jé ka ɛfú ɔ́ɔ gáā lé aá ɛɛ́.

³⁵Óndú ā cɛ̄ lɛ aícɔ́ɔja kú Ísrɛ̄lu kéē lɛ aícɔ́ɔja kú Ubɛ́njamīn ā kpó yálé. Aícɔ́ɔja kú Ísrɛ̄lu ā ŋmó aícɔ́ɔja kú Ubɛ́njamīn úlā ofu ɛtá ce ulá ɛpa ce ofɛhɔ̄ (25,000) ɛ̄cī ɔ́ɔmā.

³⁶Anɔ́ɔ ācɛ ipɔ́ɔma kú Ubɛ́njamīn ā le jé ka ācɛ Ísrɛ̄lu ɔ́ɔ lɛ aá yálé ɛɛ́. Aícɔ́ɔja kú Ísrɛ̄lu abɔ̄yī uwā ā le kwu ŋmá ɛgiyí ācɛ ipɔ́ɔma kú Ubɛ́njamīn, ohígbū ka uwá le ɔtū kpó ce aícɔ́ɔja nēé kpó tayínū jīla Ugíbɛ̄ya tá ā.

³⁷Anɔ́ɔ ācɛ nēe tayínū ā le pɛ́ wɛ̄ɛcɛ fíyaa kwú pahīla tū ipú igelī nɛ̄hi kú Ugíbɛ̄ya ā. Anɔ́ɔ é le odúúdú ācɛ kú igelī nɛ̄hi ā kpó ŋmó.

³⁸Aícɔ́ɔja ohile kú Ísrɛ̄lu mɛ́mla aɛ́nɛ̄ e tayínū ā lɛ ɔdōcābɔ̄ je lɛ īyī uwā ka eko nɛ̄ aá lɛ ódūdū nɛ̄hi má yɔ̄ ī gicō bɛ̄ɛka ojuja ā, ŋmá igelī nɛ̄hi ā,

³⁹ayíka ācɛ Ísrɛ̄lu nēe bá ī kpɛ́fú ā kéē le pīyeyī. Eko ɔ́ɔmā, ācɛ kú Ubɛ́njamīn ā le ācɛ kú Ísrɛ̄lu ofu cigwó ŋmó klla bá í gwō ī ka ka aá le uwá yálé bɛ̄ɛka otɛtɛ ā ɛɛ́.

⁴⁰Anɔ́ɔ ɔdōcābɔ̄ ā gā ɛcɛ. Ódūdū gbɔɔ́ ō gicō ŋmá ipú igelī ā bɛ̄ɛka ojuja ā. Anɔ́ɔ ācɛ Ubɛ́njamīn ā pīyeyī má igbīhi, le kpó hídáagó bá í má ódūdū ā, ɔlɛ́ uwā yɔ̄ ī yɔlá.

⁴¹Anɔ́ɔ ācɛ kú Ísrɛ̄lu kwú pīyeyī, anɔ́ɔ ācɛ kú ipɔ́ɔma kú Ubɛ́njamīn í jé ɔdā ō yá ɛ́ɛ́ gɛ ŋ́ má, ohígbū kéē le jé ka Ísrɛ̄lu ɔ́ɔ gáā je aá kpó yífi ɛɛ́.

⁴²Anɔ́ɔ é gbɔɔ́ ō kwinya ga ɔlɛ́ ŋmá ō nū ācɛ kú Ísrɛ̄lu ā. Amáŋ é kwú uwā glá gɛ ŋ́. É kwu gaá tū aícɔ́ɔja kú Ísrɛ̄lu ā abɔ̄, ɛga ɛplɛ́ɛpa. Anɔ́ɔ Ísrɛ̄lu le uwá kpó yíífi ā.

⁴³Ācɛ kú Ísrɛ̄lu le aícɔ́ɔja kú aólɛla kú uwā gwōtū, anɔ́ɔ é mā ō nū uwā inya ŋ́ jāā ga ɛnɔ̄ɔ̄cī kú Ugíbɛya. É yɔ̄ ī ŋmó ācɛ kú Ubɛ́njamīn ā abɔ̄ é bá ī nū uwā inya ā.

⁴⁴É lɛ aícɔ́ɔja kú ipɔ́ɔma kú Ubɛ́njamīn úlā ofɛpa cɛhɔ̄ (18,000) kpó ŋmó.

⁴⁵Ācɛ ohile kú aícɔ́ɔja kú Ubɛ́njamīn ā le pɛ́ cīgbīhi anɔ́ɔ é le inya kwu lɛyíkwu ɛgiyí ɛcɔ̄ kú Urímon ā. Ísrɛ̄lu le ācɛ ulá igwɛ́ɛpa ce ofigwó (5,000) kú uwā ŋmó ɔwɛ. Ācɛ kú Ísrɛ̄lu nū uwā inya jāā ga Ugídɔm, klla le úlā ɛhɔ̄ (2,000) kú uwā ŋmó abɔ́ɔ.

⁴⁶Anɔ́ɔ odúúdú aícɔ́ɔja kú ipɔ́ɔma kú Ubɛ́njamīn nɛ̄ ācɛ Ísrɛ̄lu ŋmó ɛ̄cī ɔ́ɔmā ā wɛ úlā ofɛpa ce úlā ofu igwɛ́ɛhɔ̄ (25,000) á.

⁴⁷Amáŋ ācɛ ofu ɛhīlī kú uwā le kwu ga ɔlɛ́ kú ɛyí ɛfu kú Urímɔn ā. É bá abɔ́ɔ ɔyā ɛnɛ.

⁴⁸Anɔ́ɔ ācɛ kú Ísrɛ̄lu pīyɛyí wā ɛgiyí ācɛ ohile kú ipɔ́ɔma kú Ubɛ́njamīn ā, anɔ́ɔ é le odúúdú uwā kpó ŋmó, kwú ācɛnyā mɛ́mla ācɛnyīlɔ, kwu ayípɛ̄ mɛ́mla aɛ́bɛ́ ɔlɛ́ kú uwā dúú. Anɔ́ɔ é kwú ɔlɛ́ uwā ā tɔ̄lá á.