Read idoma ĀCOHƐ́PƆ̄ 3 Bible Online

ĀCOHƐ́PƆ̄ 3 - idoma bible

ĀCOHƐ́PƆ̄ 3

¹Óndú ā mā aéwo ōhī tá ipú ajɛ ā, cɛ́ɛ́ kóō bī uwā le já ācɛ kú Ísrɛ̄lu nēé kpɛ́fú tū ācɛ Ukénan ŋ́ mā má.

²Ó yá ɛ̄nyā cɛ́ɛ́ kóō bī uwā le nwū ayááyí kú Ísrɛ̄lu nēé jɛ̄ ɛfú ō kpó ŋ́ mā ɔwɛ nēé gē kpɛ́fú lɛ ā ā.

³Ācɛ nēé mā uwā tá ipú ajɛ ā, wɛ aígelī nɛ̄hi ɛhɔ̄ kú ācɛ Ufilístiya ā, mɛ́mla odúúdú ācɛ Ukénan, Usídɔn, mɛ́mla Uhám nēe lā ikpɛ́fu kú Ulɛ́bānɔn, oŋmá ɛfu kú Ubaalu Uhámɔn jāā kwu Uhamát ā.

⁴É géē wɛ ɔdā nēé géē bī le jé ayí kú Ísrɛ̄lu má, ɔ́daŋ́ kéē géē lɛyítáajɛ lɛ íne kú Ɔwɔicō nōó je lɛ ádáádā uwā bū okónu kú Umósīsi ā.

⁵Anɔ́ɔ ācɛ kú Ísrɛ̄lu lā ipú ācɛ kú Ukénan, Uhɛ́ti, Ámɔ̄ri, Upɛ́risi, Uhám, mɛ́mla Ujɛ́būsi á.

⁶É gē lɛ ayí uwā nɔ̄nyā, klla ī pā aɛ́cí kú uwā.

⁷Ācɛ kú Ísrɛ̄lu kwú igbīhi í cē kwú Óndú ā, nōo wɛ Ɔwɔicō kú uwā ā. Anɔ́ɔ é le íne kú nū bīya á. É klla gbɔɔ́ ō pā aɛ́ci mɛ́mla aójibó nēé hī ka Ubáalu mɛ́mla Ássɛ̄ra ā.

⁸Ɔdā nēé yá nyā cɛ̄ lɛ Óndú ā kwú cɔ̄nū mla uwá, anɔ́ɔ ó cɛ̄ lɛ Ukússan-rissátém, ɔcɛ́ kú Umɛsopotámīya kóō lɛ uwá yálé á. É bá ɛháajɛ nū iháyí ahātá.

⁹Anɔ́ɔ ācɛ kú Ísrɛ̄lu le ikwū je klá Óndú ā, anɔ́ɔ ó le Otínīyɛlu tɛ̄hɔ̄ gāá lɛ uwá hɛ́tá á. Otínīyɛlu nyā wɛ ɔyí kú Ukɛ́nāsi nōo wɛ ɔyínɛ́ kú Ukálɛ̄bu ā.

¹⁰Alelékwū kú Óndú ā wā í kwú ɔ̄ ú, kwú ofú í tū ɔ̄ iyē á anɔ́ɔ ó kwú píya ɔ̄cohɛ́pɔ̄ kú Ísrɛ̄lu á. Otínīyɛlu le tá ɔnɛ̄fú anɔ́ɔ Óndú ā cɛ̄ lɛ ɔ́ le Ukússan-rissátém, ɔcɛ́ kú Umɛsopotámīya ā yálé á.

¹¹Anɔ́ɔ ɛbɔ́ gā ipú ajɛ ā iháyí ofɛpa. Anɔ́ɔ otínīyɛlu gekwú á.

¹²Anɔ́ɔ ācɛ kú Ísrɛ̄lu klla lɛ ɔdōbɔ̄bí yá ɛgiyí Óndú ā igbɔhá kpɔ́ á. Ohígbū ɔ́ɔmā, Óndú ā lɛ ɔfú tū Églɔn, ɔcɛ́ kú Umówābu iyē. Anɔ́ɔ ó kwú lɔfú fíyɛ́ ācɛ kú ācɛ Ísrɛ̄lu á.

¹³Anɔ́ɔ Églɔn mɛ́mla ācɛ kú Ámɔ̄ri mɛ́mla ācɛ Ámālɛ̄ki kwú píya tɔ̄há. Anɔ́ɔ é gaá le ɛfú kpó tá Ísrɛ̄lu á. É le ācɛ Ísrɛ̄lu yálé klla mīyɛ Ujérīko, igelī nɛ̄hi kú alī ā.

¹⁴Ísrɛ̄lu gaá bá ɛháajɛ kú Églɔn bá gē cɔ̄ɔfīyɛ kú nū iháyí igwáahātá.

¹⁵Anɔ́ɔ ācɛ kú Ísrɛ̄lu le ikwū je klá Óndú ā á. Anɔ́ɔ Óndú ā le ɔ̄cɛ éyi tɛ̄hɔ̄ í lɛ uwá hɛ́tá á. Ɔ̄cɛ nɛ̄ Óndú ā tɛ̄hɔ̄ nyā wɛ Éhūdu nōó gē yá abɔ̄lúfīyē ā. Ó wɛ ɔyí kú Ugɛ́ra nōo ŋmá ipɔ́ɔma kú Ubɛ́njamīn ā. Ācɛ kú Ísrɛ̄lu le Éhūdu tɛ̄hɔ̄ mɛ́mla ɛhi gé lɛ Églɔn ɔcɛ́ kú Umówābu ā.

¹⁶Éhūdu lɛ ɔkpacaŋ́gelī nōo lɛ eyī ɛpa, na lɛ iyī nū. Olīkpō kú nū lɛbɛ̄ɛka ikpó éyi ce āyā ā. Ó lɛ ɔkpacaŋ́gelī ā gbō bá ɛ́nyɔ́ abɔ̄lɔ́ná ipú ɔdōwīyē kú nū.

¹⁷Ó le ɛhi ā bī gé lɛ Églɔn, ɔcɛ́ ā, nōo jɔ̄kwū nɛ̄hi ā.

¹⁸Eko nɛ̄ Éhūdu lɛ ɛhi ā je lɛ Églɔn, ó da ācɛ nēe bī ɔdā ɛhi wā ā, kéē lɛ cīgbīhi ga ɔlɛ́ mɛ́ɛ́nɛ.

¹⁹Amáŋ Éhūdu abɔ̄yī nū, kwú pīyeyī ŋmá ɛgiyí ɛcɔ̄ nēé gbā kwaajɛ Ugílgalu ā. Anɔ́ɔ ó le cīgbīhi ga ɛgiyí Églɔn á, gaá lɛ Ágábáidu tá ɔ̄ á. Ó da ɔ́ ka anúɔ lɛ ɛhɔ̄ ōtayínū éyi nɛ̄ anúɔ gaá cɛ̄ lɛ ɔ́. Anɔ́ɔ Églɔn da ācocɛ̄hɔ̄ kú nū kéē lɛ pɛ́ gɛcɛ. Odúúdú uwā le pɛ́ gɛcɛ.

²⁰Anɔ́ɔ abɔ̄ Églɔn, ɔcɛ́ ā, cīce icō ɛyí inu kú ɔlɛ́ nū ōfōōfūnū ā, Éhūdu le tá ɛgiyí nū, anɔ́ɔ ó da ɔ́ ka Ɔwɔicō ɔ́ɔ tū anúɔ ɛhɔ̄ fu ɔ́. Anɔ́ɔ Églɔn, ɔcɛ́ ā, cāŋjɛ háyicō á.

²¹Anɔ́ɔ Éhūdu bī abɔ̄lúfīyē kú nū lɛ ɔkpacaŋ́gelī ā pi ŋmá apɛ́ abɔ̄lɔ́ná kú nū, le ɔ́ gwū ɔcɛ́ ā ipú plū.

²²Odúúdú ɔkpacaŋ́gelī ā, kwu ácí kú nū le pɛ́ tū ipú kú Églɔn, ɔcɛ́ ā. Anɔ́ɔ ijē le klá tū ɔkpacaŋ́gelī ā, nōó yá kú ɔ̄cɛ dúúmā kóō má oje kú ɔkpacaŋ́gelī ā glá ɛ́ɛ́ gɛ ŋ́. Éhūdu í pi ɔkpacaŋ́gelī ā wɛ̄ɛcɛ ŋ́. Ó wu Églɔn, ɔcɛ́ ā, ipú gāá bɛ̄cɛ igbīhi, anɔ́ɔ ubu kú nū kwú pɛ́ wɛ̄ɛcɛ á.

²³Anɔ́ɔ Éhūdu le bɛ̄cɛ lɛ ɔwɛ pi gwū, kwú igodó ú kwu ɔ́,

²⁴anɔ́ɔ ó nyɛ̄ɛ̄ á. Ācocɛ̄hɔ̄ kú Églɔn, ɔcɛ́ ā le pɛ́ wā, amáŋ é má abɔ̄ igodó kwu ɔwɛ ā, anɔ́ɔ é gbɛlá ka Églɔn, ɔcɛ́ ā ɔ́ɔ yɔ̄ ī mlɛ́nyɔ́.

²⁵Abɔ̄ é gbēyī gbóógbó, nōó nwūla ɔwɛ gɛ ŋ́ mā, é kwú ɔyíigodó ú le ɔwɛ ā nwūla. Anɔ́ɔ é le má abɔ̄ ɔkpani uwā gekwú tá ajɛ dímm.

²⁶Éhūdu nyɛ̄ɛ̄ eko nɛ̄ é bá ī gbēyī okómpinu ā. Ó gāá le bū ɛgiyí ɛcɔ̄ nēé gbā kwu ajɛ ā, le kwu ga Uséyíra.

²⁷Eko nōó gā ɛyí ɛfu kú Ɛ́frem ā, ó lɛ opo kú ɛfú tá lɛ ācɛ kú Ísrɛ̄lu ā, kéē wā í kpɛ́fú. Anɔ́ɔ ó le uwá kpó trɛ̄yí wā ajɛ ŋmá ɛyí aɛ́fu abɔ́ɔ á.

²⁸Ó da uwá kéē yɛce anúɔ, ohígbū ka Óndú ā ɔ́ɔ cɛ̄ lɛ uwá lɛ ācɛ Umówābu, aólɛlā kú uwā yálé ɛ́ɛ́. Anɔ́ɔ é yɛce Éhūdu gaá mīyɛ ɛga nɛ̄ ācɛ Umówābu gáā bēhé Ujɔ́dan ā. É cɛ̄ lɛ ɔ̄cɛ Umówābu dúúmā bēhé ísu kú Ujɔ́dan ā ŋ́.

²⁹Ícíícɛ ɔ́ɔmā, é ŋmó aícɔ́ɔja kú Umówābu bɛ̄ɛka ācɛ úlā ofu cɛhɔ̄ ā (10,000). Ɔ̄cɛ Umówābu dúúmā í kwu hɛ̄ uwā abɔ̄ tá ŋ́.

³⁰Ícíícɛ ɔ́ɔmā, ācɛ kú Ísrɛ̄lu lɛ ācɛ kú Umówābu yálé. Anɔ́ɔ ɛbɔ́ gā ipú ajɛ kú uwā iháyí ofɛnɛ á.

³¹Otrɛ̄yí nōo gboce Éhūdu ā wɛ Ussámga, ɔyí kú Ánāti. Anú ā hɛ́ ācɛ kú Ísrɛ̄lu tá á. Ó yá lɛ ā ŋmá lɛ ō bī ɔcí pílóó, nēé ī bī le kwu ɛna kóō yāwu ā, le ŋmó ācɛ ula ce ofigwó kú ācɛ Ufílistiya.