Read idoma ĀCOHƐ́PƆ̄ 4 Bible Online

ĀCOHƐ́PƆ̄ 4 - idoma bible

ĀCOHƐ́PƆ̄ 4

¹Igbīhi nɛ̄ Éhūdu gekwú ā, ācɛ kú Ísrɛ̄lu klla le ɔdōbɔ̄bí yá ɛgiyí Óndú ā kpɔ́.

²Anɔ́ɔ Óndú ā cɛ̄ lɛ Ujabín, ɔcɛ́ kú Ukénan nōo gē gbō Uhásɔ ā kóō lɛ uwá yálé. Otrɛ̄yí kú aícɔ́ɔja kú Ujábín lé ka Usisɛ́ra, nōo lā Uharōssɛt-hagoyím ā.

³Ujabín lɛ aúgbɔ́ɔnya o kpɛ́fú kú oje úlā ɛpa cofɛhɔ̄ (900). Ó bī ɔnɔɔtū mɛ́mla abɔ̄fú le gbō ācɛ kú Ísrɛ̄lu iháyí ofu. Anɔ́ɔ ācɛ kú Ísrɛ̄lu le ikwū je klá Óndú ā kóō lɛ aá tábɔ̄ á.

⁴Eko ɔ́ɔmā, Udɛbɔ́ra, ɔnyā kú Ulápīdɔ́tu ā wɛ ɔ̄comɛ́ɛbɛ́. Anú wɛ otrɛ̄yí klla wɛ ɔ̄cohɛ́pɔ̄ ipú ācɛ Ísrɛ̄lu á.

⁵Ó gē cīce ɔkwu alī ɔtāhɛ̄ kú Uráma mɛ́mla Ubɛ́tɛlu, ɛyí ɛfu kú Ɛ́frem ā. Anɔ́ɔ ācɛ Ísrɛ̄lu gē ga ɛgiyí nū kóō hɛ́pɔ̄ lɛ uwá ā.

⁶Ɛ̄cī éyi, ó lɛ ɛhɔ̄ tū fu Ubárāki, ɔyí kú Abínōwam nōo ŋmá igelī nɛ̄hi kú Ukɛ́dɛssi, ipú ajɛ kú ipɔ́ɔma kú Unáfutāli ā. Anɔ́ɔ ó da ɔ́ kahíníī, “Óndú ā, nōo wɛ Ɔwɔicō kú Ísrɛ̄lu je ɔ́da nyā gā uwɔ á. Lɛ ācɛ úlā ofu cɛhɔ̄ (10,000) kpó ŋmá ipɔ́ɔma kú Unáfutāli mɛ́mla Usébūlɔn, cɛ́ɛ́ kú ā lɛ uwá kpó nyɔ̄ ɛyí ɛfu kú Utábɔ.

⁷N géē bī Usisɛ́ra, otrɛ̄yí kú aícɔ́ɔja kú Ujabín ā, wā í kpɛ́fú tá uwɔ okónu Ísu kú Ukíssɔn. Ó géē bī aúgbɔ́ɔnya o kpɛfú mɛ́mla aícɔ́ɔja kú nū, amáŋ n géē yá ká ā lɛ ɔ́ yálé.

⁸Anɔ́ɔ Ubárāki tá ɔ̄ ohi ka anúɔ géē nyɔ̄, ɔ́dāŋ ka ɔ́ɔ géē nyɔ̄ mɛ́mla anúɔ. Ó da ɔ́ ka ɔ́dāŋ nōó gáā nyɔ̄ mɛ́mla anúɔ ŋ́, anúɔ í gaá nyɔ̄ ŋ́.

⁹Anɔ́ɔ Udɛbɔ́ra tá ɔ̄ ohi ka anúɔ géē nyɔ̄ mɛ́mla anú, amáŋ é gáā je ojīlīma kú oyálé ā lɛ ɔ́ ŋ́. Ohígbū ka Óndú ā géē cɛ̄ lɛ ɔ̄cɛnyā éyi yá Usísɛ́ra lé. Anɔ́ɔ Udɛbɔ́ra gbɔɔ́ ō nyɔ̄ ga Ukɛ́dɛssi mɛ́mla Ubárāki á.

¹⁰Ubárāki lɛ ipɔ́ɔma kú Usébūlɔn mɛ́mla Unáfutāli kpó hīīgwú wā Ukɛ́dɛssi. Ācɛ úlā-ofu-cɛhɔ̄ yɛce ɔ́. Udɛbɔ́ra kē nyɔ̄ mɛ́mla anú dúú.

¹¹Eko nyā ā Uhɛ́ba, ɔ̄cɛ Ukéni ā, lɛ ɔlɛ́ nū gwó kwu Ukɛ́dɛssi ajaajɛ, ɔkwu ɔcí kú óokú nōo yɔ̄ kwu Usananím ā. Ó nyɛ̄ɛ̄ ŋmá ɛgiyí ācɛ Ukéni ohile, ipɔ́ɔma kú Uhóbābu, ɔyínɛ́ nɔ̄nyīlɔ kú ɔnyā kú Umósīsi ā.

¹²Eko nɛ̄ Usísɛ́ra le pó ka, Ubárāki ɔ́ɔ le tá Utábɔ ā,

¹³ó lɛ aúgbɔ́ɔnya o kpɛ́fú kú oje kú nū úlā-ɛpa-ce-ofɛhɔ̄ ā, mɛ́mla odúúdú aícɔ́ɔja kú ɔlɛ́ nū kpó tɛ̄hɔ̄ ŋmá Uharōssɛt-hagoyím, ga Ísu kú Ukíssɔn.

¹⁴Anɔ́ɔ Udɛbɔ́ra da Ubáraki kóō nyɔ̄ ka Óndú ā géē yɔ̄ mɛ́mla anú í bī ɔ̄ tá. Ó da ɔ́ ka Óndú ā ɔ́ɔ cɛ̄ lɛ ɔ́ lɛ Usisɛ́ra yálé ícíícɛ ɔ́ɔmā ɛɛ́. Anɔ́ɔ Ubárāki gā ajɛ ŋmá ɛyí ɛfu kú Utábɔ mɛ́mla aícɔ́ɔja úlā ofu-cɛhɔ̄ kú nū ā.

¹⁵Eko nɛ̄ Ubárāki mɛ́mla aícɔ́ɔja kú nū gbɔɔ́ ō kpɛ́fú tá uwā ā, Óndú ā lɛ ígbájí bī wā ɔtāhɛ̄ kú Usisɛ́ra mɛ́mla ācɛ opɛ́ úgbɔ́ɔnya o kpɛ́fú mɛ́mla odúúdú ācɛ ɔlɛ́ nū. Anɔ́ɔ Usísɛ́ra má hīlatá ŋmá ɛyí úgbɔ́ɔnya kú nū, gbɔɔ́ ō kwinya īkpó á.

¹⁶Ubárāki nū uwā inya jāā ga Uharōssɛt-hagoyím, anɔ́ɔ ó le odúúdú uwā kpó ŋmó á. Ɔ̄cɛ dúúmā kú uwā í hile ŋ́.

¹⁷Usisɛ́ra le kwu gaá tayínū ipú áklɔ̄kpɛ kú Ujáyɛ̄lu, ɔnyā kú Uhɛ́ba, ɔ̄cɛ Ukéni ā. Ohígbū ka ɛbɔ́ yɔ̄ ɔtāhɛ̄ kú Ujábin, ɔcɛ́ kú Uhásɔ mɛ́mla ipɔ́ɔ́nū kú ɔlɛ́ Uhɛ́ba.

¹⁸Ujáyɛ̄lu wā í jīla Usisɛ́ra ɔwɛ, anɔ́ɔ ó da ɔ́ ka, “Ɔkpani, le bēhé wā ipú áklɔ̄kpɛ kú um, ā híī yúúfi ŋ́” á. Ó le bēhé ā, anɔ́ɔ ɔnyā ā kwú ɔ̄ ú tayínū igbīhi ukɔ́tin kú ipú inu ɔlɛ́ nū á.

¹⁹Anɔ́ɔ ó da ɔnyā ā koó lɛ éŋkpɔ̄ je lɛ anúɔ ká anúɔ gwá, ohígbū ka ijēēnyi ɔ́ɔ gáā je anúɔ ŋmó ɛɛ́. Anɔ́ɔ ó le ɔjá kú ɔkpɛ́bɛ́ ā nwūla, lɛ enyāmɛ̄ ɛna hɛ́ ŋmá anú lɛ ɔ́ kóō gwá. Anɔ́ɔ ó kwú ɔ̄ ú tayínū kpɔ́ á.

²⁰Anɔ́ɔ ó klla da ɔnyā ā kóō háyi okómpīinu abɔ́ɔ, cɛ́ɛ́ ɔ́dāŋ ka ɔ̄cɛ dúúmā yɔ̄ gē wā í dɔɔ̄kā ka, ɔ̄cɛ dúúmā ɔ́ɔ yɔ̄ abɔ́ɔ, cɛ́ɛ́ kóō da ɔ́ ka ehée.

²¹Ɛ̄jɛ̄ le jɛ̄ Usiséra nɛ̄hi, anɔ́ɔ ó kwú iyɔ̄lā ú gbo bōōbū á. Anɔ́ɔ Ujáyɛ̄lu kwú omútāgā ú mɛ́mla oje nēé gē bī le pi áklɔ̄kpɛ kwu ajɛ ā, anɔ́ɔ ó le tá ɛgiyí nū ɛmɛɛma, le oje ā hɛ́ tū ɔ̄ ɛyí ŋmá āyā éyi ga ɔhá gaá kwu ajɛ á. Ó gekwú tá abɔ́ɔ.

²²Eko nɛ̄ Ubárāki yɔ̄ í dɔɔ̄kā Usisɛ́ra ā, Ujáyɛ̄lu wā í jīla nú ɔwɛ, anɔ́ɔ ó da ɔ́ kóō wā abɔ́ɔ, cɛ́ɛ́ ká anúɔ lɛ ɔ̄cɛ nɛ̄ ɔ́ɔ gē dɔɔ̄kā ā mafú lɛ ɔ́. Anɔ́ɔ ó le tá inu mɛ́mla anú, anɔ́ɔ ó má Usisɛ́ra abɔ̄ ó gekwú tá ajɛ, oje o bī pi áklɔ̄kpɛ kwu ajɛ ā kwu ɔ́ ɛyí bá ajɛ.

²³Ɛ̄cī ɔ́ɔmā Óndú ā cɛ̄ lɛ ācɛ Ísrɛ̄lu kéē le Ujabín, ɔcɛ́ kú Ukénan yálé.

²⁴É kpɛ́fú tá uwā lɔfú lɔfú jāā gbéeko nɛ̄ ācɛ kú Ísrɛ̄lu kwú uwā ú kpó yíífi.