Read idoma ĀCOHƐ́PƆ̄ 5 Bible Online

ĀCOHƐ́PƆ̄ 5 - idoma bible

ĀCOHƐ́PƆ̄ 5

¹Ícíícɛ ɔ́ɔmā, Udɛbɔ́ra mɛ́mla Ubárāki, ɔyí kú Abínōwam gwííjē nyā.

²“Cɛ̄tra Óndú ā! Ācɛ kú Ísrɛ̄lu le ɔtū kú uwā yéékpó kéē kpɛ́fú. Ācɛ ā fu iyī uwā ŋmá ɔtū kú uwā mɛ́mla éeyē, ɛ́ɛ́ nēé nyɔ̄ ga ɔgbɛ́fú á.

³Aá jāhɔ̄, aá nēe wɛ aɔ́cɛ́ ā. Aá jāhɔ̄, aá ācɛ nēe wɛ ācogbāajɛ ā. N géē gwííjē, n géē gwō ɔdā olɔnyɛ tū ijē lɛ Óndú ā, nōo wɛ Ɔwɔicō kú Ísrɛ̄lu ā.

⁴Óndú ā, eko nɛ̄ á ŋmá ɛfú kú Usɛye ā, eko nɛ̄ a bɛ̄cɛ ŋmá ajɛ kú Ɛ́dɔm ā, ɛcɛ le jíliyē, ɔwɔ le yā ŋmá ɔkpáncō. Éŋkpɔ̄ le pɛ wā ajɛ ŋmá ojuuja ɔkwɛ̄yi.

⁵Aɛ́fu le jíliyē iyɔ̄bū Óndú ā, nōo wɛ Ɔwɔicō kú Usínāyi, nōo kē wɛ Óndú ā, nōo wɛ Ɔwɔicō kú Ísrɛ̄lu ā.

⁶Ɛpléeko kú Usámga, ɔyí kú Ánati ā, ɛplá eko kú Ujáyɛ̄lu ā, ācɛ nōo ī ce kɔdúú mla aɔ́nya mɛ́mla aúgbɔ́ɔnya ī ga iyāwu ā, í klla bū ɔwɛ gbóóló ā, bū ipú ajɛ ā ɛ́ɛ́ gɛ ŋ́. Ācɛ o ga iyāwu bá ī hɛ́ bú ɔwɛ ipácí ā.

⁷Aígelī nɛ̄ŋcɛ́ kú Ísrɛ̄lu táncā, jāā gbéeko nɛ̄ ami, Udɛbɔ́ra wā bɛ̄ɛka ɛ́nɛ́ kú ācɛ Ísrɛ̄lu ā.

⁸Anɔ́ɔ é yɔ̄ gē kpɛ́fú ipú ajɛ ā eko nɛ̄ ācɛ kú Ísrɛ̄lu gbɔɔ́ ō gbā aɔ́wɔ ɔhá ɛ̄gbā ā á. Ipú ācɛ úlā ofɛhɔ̄ (40,000) kú Ísrɛ̄lu ā, ɔ̄cɛ dúúmā í bī ɔkplɛfú ámāŋ ka óbōŋ.

⁹Ɔtū he um mla aótrɛ̄yí kú aícɔ́ɔja kú Ísrɛ̄lu, mɛ́mla ācɛ nēe cɛ̄ mɛ́mla éeyē ga ɔgbɛ́fú ā. Aá cɛ̄tra Óndú!

¹⁰Aá nēe gē cīce ɛyí ijakī nɛ̄hɛ́, ɛyí īlī nēé o cɔkpɛ́nú nēe ī le klá anú ā, mɛ́mla aá nēe gē yɛ íkpó ga ɛga dúú nɛ̄ aá gē nyɔ̄ ā.

¹¹Aá jāhɔ̄, ɛwa nēe bá okónu aóbugā ā bá ī yúuya ā, é bá ī kɔ̄kā kú ɛ́gɛ́nɛ̄ nɛ̄ Óndú ā hímáyī yálé ā, mɛ́mla ɛ́gɛ́nɛ́ ācɛ nēe wɛ aófulajɛ kú ācɛ kú Ísrɛ̄lu yálɛ́ ā! Anɔ́ɔ ācɛ kú Óndú ā nɔwɔ wúlatū wā ŋmá aígelī kú uwā á.

¹²Le héyī, le héyī, Udɛbɔ́ra! Le héyī, le héyī, kú ā lɛ ijē éyi gwó. Cāŋ́jɛ, Ubárāki, ɔyí kú Abínōwam! Lɛ aálagbá kú ɛfú kú uwɔ kpó nyɔ̄

¹³Anɔ́ɔ ācɛ ohile ā gā ɛga aótrɛ̄yí kú uwā á. Ācɛ kú Óndú ā ga ɛgiyí nū, le tútū kéē kpɛ́fú.

¹⁴É wā ŋmá Ɛ́frem ga ipú ɔpɛ́ ā, igbīhi kú ipɔ́ɔma kú Ubɛ́njamīn mɛ́mla ācɛ kú nū. Aótrɛ̄yí kú aícɔ́ɔja ā wā ŋmá Umákiyɛ, aígabɔ̄ ā ŋmá Usébūlɔn.

¹⁵Aótrɛ̄yí kú Ísāka ā wā mɛ́mla Udɛbɔ́ra. Ācɛ Ísāaka wā, Ubárāki kē wā dúú. É yɛce ɔ́ ga ipú ajɛ ɔpɛ́ ā, Amáŋ ipɔ́ɔma kú Urúbɛ̄n le kɔ̄, é jē ŋ́ ɔ́dāŋ kéē géē wā nɛɛ ámāŋ kéē gāá wā ŋ́ nɛɛ ŋ́.

¹⁶Ɔdíyá nēé háyi igbīhi mɛ́mla aálá ā? Kéē jāhɔ̄ lɛ ācogbāálá abɔ̄ é gē hī aálá igwú nɛɛ? Urúbɛ̄n le kɔ̄ ɔkwɛ̄yi, é jé ŋ́ ɔ́dāŋ kéē géē wā, ámāŋ nēé gáā wā ŋ́ nɛɛ ŋ́.

¹⁷Ipɔ́ɔma kú Ugádi bá ɛnɔ̄ɔ̄cī kú Ujɔ́dan. Ipɔ́ɔma kú Udáni kē yɔ̄ pī aúgbéenyi. Ipɔ́ɔma kú Ássa klá okónu ísu, é lā bá okónu ísu ā.

¹⁸Amáŋ ācɛ kú Usébūlɔn mɛ́mla Unáfutāli kwú ɛyí ú cikwū ɔgbɛ́fú.

¹⁹Aɔ́cɛ́ wā gaá kpɛ́fú, Aɔ́cɛ́ kú Ukénan wā í kpɛ́fú Utáanāki, nōo yɔ̄ pī ɔkpá kú Umegído ā. Amáŋ é je oje nɛ̄hɛ́ dúúmā nyɔ̄ ŋ́.

²⁰Aínyílɔ́ɔwɔ bá ī nuunu ŋmá ɔkpáncō, abɔ̄ é bá ī wu ŋmá ābɔ̄ éyi ga ābɔ̄ ɔhá kú ɔkpáncō ā, é le unu nu tá Usisɛ́ra.

²¹Éŋkpɔ̄ ō cēnyi kú ísu kú Ukíssɔn lɛ uwá kpó, éŋkpɔ̄ kú Ukíssɔn ɔ́ɔmā nōó gē tɔ́pɛ́ nɛ̄hi ā. N géē nɔwɔ, n géē nɔwɔ gɔbū mla ɔfú iyē.

²²Aɔ́nya bá ī kwinya fíya fíya, bá ī lɛ āpīice kú uwā da ajɛ gligligli.

²³Alelékwū-ōtɛ̄hɔ̄ kú Óndú ā kahíníī, “Lɛ okónu tá lɛ Umérósi. Le okónu tá lɛ ācɛ nēe lā abɔ́ɔ ā. É wā gaá tá Óndú ā abɔ̄ ŋ́, é wā í kpɛ́fú lɛ ɔ́ bɛ̄ɛka aícɔ́ɔja ā ŋ́.”

²⁴Ɔnyā nɛ̄ ɛyí nū lɔhi fíyɛ́ dúú ā wɛ Ujáyɛ̄lu, ɔnyā kú Uhɛ́ba, ɔ̄cɛ Ukéni ā. Anú nɛ̄ ɛyí nū lɔhi fíyɛ́ dúú, ipú anyā nēe lā áklɔ̄kpɛ ā á.

²⁵Usisɛ́ra dɔɔ̄kā éŋkpɔ̄, amáŋ ó le enyāmɛ̄ ɛna je lɛ ɔ́, ó le enyāmɛ̄ ɛna bī gé lɛ ɔ́ ipú ocíbú olɔhi nɛ̄hi éyi.

²⁶Ó kwú oje o pi áklɔ̄kpɛ kwu ajɛ ú bī abɔ̄ éyi, klla kwú omútāgā ú bī abɔ̄ ɔhá. Ó lɛ ɔ́ hɛ́tū Usisɛ́ra ɛyí, le ɔ́ ákōklō-ɛyí ca, lɛ ɔ́ bū kwu ajɛ.

²⁷Usisɛ́ra kwú okwúukwu í kwu ajɛ, má gwōnū pī ikpō kú ɔnyā, anɔ́ɔ ó má tá cíí gekwú.

²⁸Ɛ́nɛ́ kú Usisɛ́ra le eyī bū uwíndo nēé yíifa ā. Ó leyīkwu ɔwɛ. Ó ka, “Ɔdí yá nɛ̄ úgbɔ́ɔnya ā í pīyɛyí ɛ́ɛ́ ŋ́ mā? Ɔdí yá nɛ̄ úgbɔ́ɔnya o kpɛ́fú kú nū í wā fíyaa ŋ́ mā.”

²⁹Anyā ojéeyī nɛ̄hi kú ɔlɛ́ nū ā tá ɔ̄ ohi, ó klla da īyī nū igbalɛwa ka,

³⁰“É bá gē dɔɔ̄kā kú ɔdā nēé géē mīyɛ klla kɔ̄ nɛɛ? Ɔnyɔɔnyɛ kú aícɔ́ɔja ā kē í lɛ ācɛnyā éyééye ámāŋ ka ɛpɛɛpa. Īlī ɛ́nɛ́nɛ̄ í wɛ ákú Usisɛ́ra, īlī nēé lɛ ijā he tū ɔ̄ ā, kē í wɛ ákú ɔkɔ kú ami nōo wɛ ɔcányā ā”

³¹Ka odúúdú aólɛlā kú uwɔ ké gekwú bɛ̄ɛka ɛ́gɛ́nɛ̄ Usisɛ́ra kwú ā, Óndú. Amáŋ ayípōklóbīya ɔlɛ́ uwɔ kéē fíyajɛ bɛ̄ɛka ɛnɔ ā!” Ɛbɔ́ yɔ̄ ipú ajɛ kú Ísrɛ̄lu iháyí ofɛpa.