Read idoma ĀCOHƐ́PƆ̄ 6 Bible Online

ĀCOHƐ́PƆ̄ 6 - idoma bible

ĀCOHƐ́PƆ̄ 6

¹Ācɛ kú Ísrɛ̄lu le íne kú Óndú ā bīya kpɔ́, anɔ́ɔ ó cɛ̄ le ācɛ kú Umídiya lɛ uwá yálé klla gbō uwā iháyí ahāapa á.

²Ācɛ kú Umídiyan lɔfú fíyɛ́ ācɛ kú Ísrɛ̄lu á, ācɛ kú Ísrɛ̄lu le inya uwā kwu i pɛ́ tayínū ipú aɔ́gɛ̄cɔ̄ mɛ́mla ɛyí aɛ́fu.

³Eko dúúmā nɛ̄ ācɛ kú Ísrɛ̄lu lɛ ɔdɛ̄hɔ̄ nyi nɛɛ, ācɛ kú Umídiya gē wā mɛ́mla ācɛ kú Ámālɛ̄ki, mɛ́mla aípɔ́ɔma kú ācɛ ɛnɔ̄ɔ̄cī ā gē wā í kpɛ́fu tá uwā.

⁴É gē wā í lā ce uwá ɛyí jāā gbéeko nēé kwú ɔdɛ̄hɔ̄ nēé nyi ā í kpó yíífi ŋmá ajɛ, jāā ga Ugása. É gē kpó odúúdú aɛ́na, aálá, aíjakī kú uwā. É gáā mā ɔdā dúúmā tá lɛ ācɛ kú Ísrɛ̄lu kéē lé ŋ́.

⁵É gē wā mɛ́mla aɛ́na, mɛ́mla áklɔ̄kpɛ kú uwā. Ɛwa kú uwā nēe ī wā í tōō gbaáluka ŋ́ bɛɛ̄ka aéfūma ā. Ɛwa kú uwā mɛ́mla aínyankūlūmī kú uwā nēe pɛ́ wā ā í tōō gbaáluka ŋ́. É gē wā ī je ajɛ ā tá alácɛ̄.

⁶Ācɛ kú Umídiya le ācɛ kú Ísrɛ̄lu túwājɛ nɛ̄ɛ̄nɛ̄hi nōo yá kéē ka ɔdā dúúma glá ŋ́. Anɔ́ɔ ācɛ Ísrɛ̄lu le ikwū je klá Óndú ā kóō tá uwā abɔ̄.

⁷Eko nɛ̄ ācɛ Ísrɛ̄lu le ikwū je klá Óndú ā ohígbū ɔdā nɛ̄ ācɛ kú Umídiya yɔ̄ ī yá uwā ā,

⁸Óndú ā lɛ ɔ̄comɛ́ɛbɛ éyi tɛ̄hɔ̄ fu uwá. Ó bī ɛhɔ̄ nyā gé lɛ uwá ŋmá ɛgiyí Óndú ā, nōo wɛ Ɔwɔicō kú Ísrɛ̄lu ā. Óndú ā ka anúɔ kpó uwā bɛ̄cɛ ŋmá ajɛ kú ɔfiyɛ ajɛ Íjīpiti á.

⁹Ó klla ka anúɔ nya uwá tá ŋmá abɔ̄ kú ācɛ kú Íjīpiti mɛ́mla ācɛ nēe kpɛ́fú tá uwá ipú ajɛ ā á. Ó ka anúɔ le ācɛ ā kpó nū bɛ̄cɛ hīla uwá klla kwú ajɛ kú uwā ú lɛ uwá.

¹⁰Ka anúɔ da uwá ka anúɔ wɛ Óndú ā, nōo wɛ Ɔwɔicō nēé ī gbā á. Ka anúɔ da uwá kéē híī gbā aɔ́wɔ ɔhá ɛ̄gbā ŋ́, aɔ́wɔ kú ācɛ Ámɔ̄ri nɛ̄ ɛ́ɛ lā ipú ajɛ kú uwā ā. Amáŋ, é jāhɔ̄ lɛ anúɔ ŋ́.

¹¹Anɔ́ɔ alelékwū-ōtɛ̄hɔ̄ kú Óndú ā gā ipɔ́lɛ́ kú Ɔ́fra, gāá cīce ɔkwu ɔcí óokú, nōo wɛ ákú Ujówāsi, ɔ̄cɛ nōo ŋmá ipɔ́ɔma kú Abíyɛ̄sa ā. Ɔyí nū, Ugídīyɔn yɔ̄ gē wú īkpɔ̄dɛ̄hɔ̄ ipú ɔ̄gɔ̄, cɛ́ɛ́ ká ācɛ kú Umídiya kéē má ɔ̄ ŋ́.

¹²Alelékwū-ōtɛ̄hɔ̄ ā gā ɛgiyí nū abɔ́ɔ á, anɔ́ɔ ó da ɔ́ kahíníī, “Óndú ā ɔ́ɔ yɔ̄ mla uwɔ, a kē wɛ ɔ̄cɛnyīlɔ nōo lɔfú okpɛ́fú nɛ̄hi.”

¹³Ugídīyɔn da ɔ́ ka ɔkpani, ɔ́dāŋ ka anúɔ lɔfú da ɔ́ ɔ̄kā glá ā, ɔdí ɔ́ yá ɛ́ɛ́ nɛ̄ odúúdú ɔdā nēe bá nyā gē yá aá ā, ɔ́dāŋ ka Óndú ā yɔ̄ mɛ́mla aá kpɔ́. Ɔdā ohídáagó nɛ̄ ádáádā aá gē da aá ka, Ōndú ā ɔ́ɔ gē yá ā bɛ́ɛ, ɔwɛ nōó le kpó uwā bɛ̄cɛ ŋmá Íjīpiti ā bɛ́ɛ? Ó ka Óndú ā le igbīhi cē kwu aá, anɔ́ɔ ó mā aá tá ipú abɔ̄ kú ācɛ kú Umídiya kéē yá aá ɔdā nēe he uwá ɔtū á.

¹⁴Anɔ́ɔ Óndú ā le ɔ́dā je lɛ ɔ́ ka ó nyɔ̄ mla odúúdú ɔfú nɛ̄hi nōo lɛ nyā, kóō lɛ ācɛ kú Ísrɛ̄lu hɛ́tá ŋmá abɔ̄ kú ācɛ Umídiya. Ka anúɔ abɔ̄yī anúɔ ɔ́ɔ gē tū ɔ̄ ɛhɔ̄ á.

¹⁵Ugídīyɔn tá ɔ̄ ohi kahíníī, “Ɔwɛ nyá nɛ̄ um géē hɛ́ Ísrɛ̄lu tá glá āa? Ipɔ́ɔma kú um í lɔfú ŋ́ fíyɛ́ dúú ipú aípɔ́ɔma kú Umanásɛ á. Ami í kē cɛgbá ŋ́ fíyɛ́ dúú ipɔ́ɔnū kú ɔlɛ́ ádā um á.”

¹⁶Óndú ā tá ɔ̄ ohi ka ɔ́ɔ géē yá ɔ̄ glá, ohígbū ka anúɔ géē tá ɔ̄ abɔ̄. Ó klla da ɔ́ kóō géē yá ācɛ Umídiya lé bɛ̄ɛka ɔdā nēé wɛ ɔ̄cɛ ékpónú ā.

¹⁷Ugídīyɔn tá ɔ̄ ohi ka ɔ́dāŋ ka ó cɔ̄nū ŋ́, kóō lɛ ɔdōcābɔ̄ éyi je lɛ anúɔ nōo lɔfú mafú lɛ anúɔ ka anú wɛ Óndú ā ɔkwɛ̄yi á.

¹⁸Ó da ɔ́ kóō híī nyɛ̄ɛ̄ ŋ́ jāā gbéeko nɛ̄ anúɔ lɛ ɛ̄gbā kú ɔdōlé gbā ɔ̄. Anɔ́ɔ alelékwū-ōtɛ̄hɔ̄ ā tá ɔ̄ ohi ka anúɔ géē yɔ̄ abɔ́ɔ jāā gbéeko nōó gā.

¹⁹Ugídīyɔn le tá ipú inu, anɔ́ɔ ó le ɛdrɔ́ kú ɛwū éyi ŋmó, lɛ ɔ́ he, klla bī okoolo kú umu igwó lɛ igbō nōó gē nū ŋ́ mā yá. Ó kwú ɛbɛ́ ā ú kpó tū ómblí klla kwu igbō ā ú kpó tū ipú ɛbɛ́ ā, le bī gé lɛ alelékwū-ōtɛ̄hɔ̄ ā, ɔkwu ɔcí kú óoku abɔ́ɔ.

²⁰Alelékwū-ōtɛ̄hɔ̄ ā da ɔ́ kóō lɛ ɛbɛ́ mɛ́mla igbō ā kpó ce ɛyí ɛcɔ̄, ka ɔ́ɔ lɛ ɔhɔ̄ kú nū ā pīya klá anú. Anɔ́ɔ Ugídīyɔn le yá lɛ ā á.

²¹Anɔ́ɔ alelékwū-ōtɛ̄hɔ̄ ā lɛ ɔkwu kú ɔ́kpa nōó bī ā kwu ɛbɛ́ mɛ́mla igbō mɛ́mla anɔ̄ kú nū ā ɛyí ɛcɔ̄ á, anɔ́ɔ ɔlá le bɛ̄cɛ ŋmá ipú ɛcɔ̄ ā kwú ɛbɛ́ mɛ́mla igbō ā ú kpó yi. Anɔ́ɔ alelékwū-ōtɛ̄hɔ̄ ā gebí tāajɛ á.

²²Anɔ́ɔ Ugídīyɔn le jé ka alelékwū-ōtɛ̄hɔ̄ kú Óndú ā nɛ̄ anúɔ má á. Anɔ́ɔ ó ka ipú ufi ka anúɔ le alelékwū-ōtɛ̄hɔ̄ kú Óndú ā nōo nwuné fíyɛ́ dúú ā, má eyī ɔgābɔɔ ɛɛ́.

²³Óndú ā da ɔ́ ka ɛbɔ́ kóō yɔ̄ mla anú, ka ɔ́ɔ yúúfi ŋ́, kóō gáā kwú ŋ́.

²⁴Ugídīyɔn lɛ ede gwó lɛ Óndú ā abɔ́ɔ, anɔ́ɔ ó hī ɔ̄ ka, Óndú ā wɛ ɛbɔ́. Ó kē kwu Ɔ́fra, ipú ajɛ kú ipɔ́ɔma kú Abíyɛ̄sa abɔ́ɔ jāā kwu eko nɛ̄ é tɔ́kpá nyā ā.

²⁵Otú ɔ́ɔmā Óndú da Ugídīyɔn kóō kwú ɔbá ɛna kú ádā nū, nōo wɛ iháyí ahāapa ɔhá ú, cɛ́ɛ́ kóō lɛ ede kú ɛcí nēe hī ka Ubáalu kú ádā nū ā ú catāajɛ. Ó klla da ɔ́ kóō lɛ ɔcí ojibó kú ɛcínɔ̄nyā, nēé hī ka Ássɛ̄ra ā hɛ́ klá ajɛ.

²⁶Ó da ɔ́ kóō lɛ ede gwó lɔɔlɔhi lɛ Óndú ā, nōo wɛ Ɔwɔicō kú nū ā ɛyí ɛfu ɔ́ɔmā. Ó ka ɔ́ɔ kwú ɔbá ɛna ɔ́mpa ā ú, cɛ́ɛ́ kóō lɛ ɔ́ yɔlā dúúdú kóō wɛ ɛya. Ó ka ɔcí kú ojibó kú Ássɛ̄ra ɔ́ɔ géē wɛ ɛfú ō bī lɛ gwɔ́ɔ́lá kú nū á.

²⁷Anɔ́ɔ Ugídīyɔn le ācocɛ̄hɔ̄ kú nū igwó kpó, anɔ́ɔ ó le ɔdā nɛ̄ Óndú ā da ɔ́ ā yá á. Abɔ̄ ó gē yúufí kú ācɛ ɔlɛ́ nū mɛ́mla ācɛ ɔhá kú ipɔ́lɛ́ ā, ó yá ɔ̄ olɛ́ɛnɔ ŋ́, anɔ́ɔ ó le ɔ́ yá otú á.

²⁸Eko nɛ̄ ācɛ ā le héyī ɔcɔ̄ɔ̄cī ā, é má kéē lɛ ede kú ojibó kú Ubáalu mɛ́mla ɔcí kú ojibó kú Ássɛ̄ra ā wúlatāajɛ, é klla lɛ ɔbá ɛna ɔ́mpa ā gwɛ́ɛya o yɔlá dúúdú ɛyí ede, ɛ̄yīpɛ̄ nēé gwó kwu abɔ́ɔ ā.

²⁹É da īyī uwā ɔ̄kā ka ɔ̄nyɛ ɔ́ɔ yá ɔdā nyā ā. É le ɔkwu nū bū, anɔ́ɔ é le jé ka Ugídīyɔn, ɔyí kú Ujówāsi ɔɔ́ yá á.

³⁰Anɔ́ɔ é da Ujówāsi kóō lɛ ɔyí nū bī wɛ̄ɛcɛ cɛ́ɛ́ ká aá lɛ ɔ́ ŋmó, ohígbū kóō lɛ ede kú Ubáalu ā wúlatāajɛ, klla lɛ ɔcí kú ojibó kú Ássɛ̄ra nōo kwu igbīhi ede ā hɛ́ klá ajɛ.

³¹Anɔ́ɔ Ujówāsi da odúúdú ācɛ ā ɔ̄kā kéē gē cɛ̄pɔ̄ Ubáalu nɛɛ? Ó da uwá kéē gē nuunu lɛ ɔ́ nɛɛ? Ó ka ɔ̄cɛ dúú nɛ̄ ɔ́ɔ géē nuunu lɛ Ubáalu, é géē je ɔ́ ŋmó gbɔbū lɛ eyōōnyā ɔ̄cɔ̄ɔ̄cī óócí. Ó klla da uwá ka ɔ́dāŋ ka Ubáalu ɔ́ɔ wɛ ɔwɔ nɛɛ, kéē mā ɔ̄ tá kóō cɛ̄pɔ̄ īyī nū, ohígbū ka ede kú nū nēé je wúlatāajɛ á.

³²Oŋmá eko ɔ́ɔmā gɔbū ā, anɔ́ɔ é gbɔɔ́ ō hī Ugídīyɔn ka Ujɛ́rubáalu á, ohígbū ka Ujówāsi kéē mā Ubáalu tá kóō cɛ̄pɔ̄ īyī nū, ohígbū ka ede kú nū, nēé je wúlatāajɛ á.

³³Anɔ́ɔ odúúdú ācɛ kú Umídiya, Ámālɛ̄ki, mɛ́mla aípɔ́ɔma kú ɛnɔ̄ɔ̄cī ā le jīla, lɛ bēhé ísu kú Ujɔ́dan, gāá bá ɔpɛ́ kú Ujɛsríli á.

³⁴Ɔfú kú Óndú ā kwú Ugídīyɔn ú, anɔ́ɔ ó lɛ opo tá kóō hī ācɛ kú ipɔ́ɔma kú Abíyɛ̄sa igwú wā í yɛce ɔ́ á.

³⁵Ó lɛ ɛhɔ̄ tū ga āyā kú ipɔ́ɔma kú Umanásɛ dóódu ā, le uwá kpó hīīgwú, kéē yɛce ɔ́. Ó klla le ɛhɔ̄ tū fu ipɔ́ɔma kú Ássa, Usébūlɔn, Unáfutāli, anɔ́ɔ é wā í kwu uwá á.

³⁶Anɔ́ɔ Ugídīyɔn da Ɔwɔicō ka ɔ́ɔ le ka ka anúɔ géē bī anúɔ Ugídīyɔn yúklɔ́ o hɛ́ ācɛ kú Ísrɛ̄lu tá ā.

³⁷Ka ɔ́ɔ̄ má ɔ̄, anúɔ géē lɛ ɔnwū álá tá ajɛ ɛga nɛ̄ aá gē wú īkpɔ̄dɛ̄hɔ̄ ā. Ɔ́dāŋ ka ɔ̄cɔ̄ɔ̄cī nɛ̄ ébú ɔ́ɔ le cē klá ɔnwū álá ā, nōó lɛ iyē kwu ajɛ ā ŋ́, anúɔ géē jé ka ɔ́ɔ géē bī anúɔ le hɛ́ ācɛ kú Ísrɛ̄lu tá.

³⁸Ɔdā nōó ka nyā kē le yá lɛ ā. Ɔ̄cɔ̄ɔ̄cī eko nɛ̄ Ugídīyɔn cāŋjɛ ā, ó lɛ ɔnwū álá ā pí, anɔ́ɔ éŋkpɔ̄ kú ébú nōo pɛ́ ŋmá nú wā ajɛ ā le nwuné jɛ̄ nōó lɔfú mu ocíbú glá á.

³⁹Anɔ́ɔ Ugídīyɔn da Ɔwɔicō ka ɔ́ɔ̄ cɔ̄nū mla anúɔ ŋ́, cɛ́ɛ́ ká anúɔ lɛ ɛlā éyi ka kpɔ́. Ó ka ɔ́ɔ̄ lɛ ɔdōcābɔ̄ éyi yá kpɔ́ ɛ́ɛ́. Ka igbɛ́nyā ā, kóō le yá ka ɔnwū álá ā kóō lɛ ŋmó cɛ́ɛ́ ka éŋkpɔ̄ kú ébú ā kóō le yɛ jīla ajɛ ā tá.

⁴⁰Otú ɔ́ɔmā Ɔwɔicō klla lɛ ɔdā nōó ka ā yá. Ɔ̄cɔ̄ɔ̄cī ā, ɔnwū ā wɛ oōŋmó, amáŋ ébú lɛ cē klá ajɛ ā yɛ ɔnwū álá ā jīla tá biílí.