Read idoma ĀCOHƐ́PƆ̄ 7 Bible Online

ĀCOHƐ́PƆ̄ 7 - idoma bible

ĀCOHƐ́PƆ̄ 7

¹Ɛ̄cī éyi, Ugídīyɔn mɛ́mla odúúdú ācɛ ɔlɛ́ nū, cāŋjɛ ɔ̄cɔ̄ɔ̄cī gāá lɛ aáklɔ̄kpɛ kú ɛfú kwu pīya obugā kú Uhárɔ̄du. Aáklɔ̄kpɛ kú ɛfú kú ācɛ Umídiya ā bá ɔpɛ́, nōo ga ɛhíícō kú uwā pīya ɛfu kú Umɔ́re ā.

²Óndú ā da Ugídīyɔn ka ācɛ nɛ̄ ɔ́ɔ lɛ ā, le lɛwa fíyɛ́ ɔdā nɛ̄ anúɔ géē cɛ̄ lɛ ɔ́ yá ācɛ Umídiya ā lé. Ó ka ɔ́dāŋ kéē le lɛwa lɛ ā, ɛ́ɛ géē gbɛlá ka aá ɔ́ɔ yá ɛfú ā lé abɔ̄yī aá á.

³Ó klla da ɔ́ kóō le ka tɛ́ɛcɛ lɛ ācɛ ā ka ɔ̄cɛ dúúmā nōo gē yúúfi, kóō kwúcē ga ɔlɛ́, cɛ́ɛ́ aá ā ke í bá ɛfu abɔ́ɔ. Anɔ́ɔ ācɛ úlā ofɛpa-cigwó (22,000) le cīgbīhi ga ɔlɛ́ á. É gāá hile ācɛ úla ofu-cɛhɔ̄ (10,000).

⁴Anɔ́ɔ Óndú ā da Ugídīyɔn ka ācɛ ā ɛ́ɛ le ɛwa kpɔ́ ɛ́ɛ́. Kóō lɛ uwá kpó nyɔ̄ ɔkpá, cɛ́ɛ́ ká anúɔ lɛ uwá kɔ̄ hī ɔhá tá lɛ ɔ́ abɔ́ɔ. Ó ka ɔ́dāŋ ka anúɔ lɛ da ɔ́ ka, ɔ̄cɛ ɛ́gɛ́nyā géē nyɔ̄ mɛ́mla anú á, anú géē nyɔ̄ mɛ́mla anú á. Ɔ́dāŋ ka anúɔ ka ɔ̄cɛ dúúmā í gáā nyɔ̄ ŋ́, ó gáā nyɔ̄ ŋ́.

⁵Ugídīyɔn lɛ ācɛ ā kpó ga ɔkpá, anɔ́ɔ Óndú ā da ɔɔ́ kóō lɛ ācɛ nēe géē lɛ ígblɛ́nyī tá éŋkpɔ̄ bɛ̄ɛka ewō ā kɔ̄ hɛ̄ ācɛ nēe géē lɛ okwúukwu kwu ajɛ, ɛ́ɛ́ kéē gwá éŋkpɔ̄ ā tá.

⁶Ācɛ ofu igwɛ́ɛhɔ̄ le abɔ̄ hɛ́ éŋkpɔ̄ tū okónu gē gwá bɛ̄ɛka ewō ā á. Ācɛ ohile ɔhá dúú ā lɛ okwúukwu hɛ́ tū ajɛ ɛ́ɛ́ nēé gwá éŋkpɔ̄ á.

⁷Óndú ā da Ugídīyɔn ka anúɔ géē hɛ́ ɔ̄ tá klla í cɛ̄ lɛ ɔ́ yá ācɛ Umídiya lé mla ācɛ ofu igwɛ́ɛhɔ̄, nēe lɛ abɔ̄ hɛ́ éŋkpɔ̄ tū okónu gwá ā. Ó da ɔ́ kóō da ācɛ ohile ɔhá kpɛ́mm ā kéē kwúcē ga ɔlɛ́ uwā.

⁸Anɔ́ɔ Ugídīyɔn lɛ odúúdú ācɛ nēe hile ɔhá ā nū ga ɔlɛ́, gāá hile ācɛ ofu igwɛ́ɛhɔ̄ ōfōōfūnū á. Amáŋ é mīyɛ odúúdú iyɛ́fú kú ācɛ ā, mɛ́mla opo kú uwā ā. Aáklɔ̄kpɛ kú ɛfú kú ācɛ Umídiya yɔ̄ ɛháajɛ kú wā ɔpɛ́ ā.

⁹Otú ɔ́ɔmā, Óndú ā le ɔ́dā je lɛ Ugídīyɔn kéē cāŋjɛ kéē kpɛ́fú tá ācɛ kú Umídiya ā. Ka anúɔ géē cɛ̄ lɛ ɔ́ yá uwā lé.

¹⁰Ó da ɔ́ ka amáŋ ɔ́dāŋ ka ɔ́ɔ gē yúúfi ō kpɛ́fú ā nɛ, ɛmba anú mɛ́mla ɔ̄cocɛ̄hɔ̄ kú nū, Upúra, kéē lɛ pɛ́ ga aáklɔ̄kpɛ kú ɛfú kú ācɛ Umídīya.

¹¹Ó ka ɔ́ɔ géē pó ɔdā nɛ̄ é bá ī ka ā, cɛ́ɛ́ ɔ́ɔ géē lɔtū ō kpɛ́fú tá uwā. Anɔ́ɔ Ugídīyɔn mɛ́mla ɔ̄cocɛ̄hɔ̄ kú nū, Upúra le yɛ tá okónōgwu kú aáklɔ̄kpɛ kú ɛfú kú aólɛlā kú uwā á.

¹²Ācɛ kú Umídiya, Ámālɛ̄ki mɛ́mla aípɔ́ɔma kú ācɛ ɛnɔ̄ɔ̄cī ā, le pahīla bá ɛcɛ bɛ̄ɛka efūma ā, mɛ́mla aínyankūlūmī, aɔ́nya kú ɛfú kú uwā lɛ ɛwa bɛ̄ɛka ɔjɛ kú okónu ísu ā.

¹³Abɔ̄ Ugídīyɔn gā abɔ́ɔ ā, ó pó abɔ́ɔ ɔ̄cɛ éyi yɔ̄ gē da ɔ́mpa nū ɔ̄na nōó nā ā ka, anúɔ nɔ̄na, abɔ̄ igbō le míya wā ipú aáklɔ̄kpɛ kú ɛ́fú kú aá, gāá ce áklɔ̄kpɛ éyi, lɛ ɔ́ catāajɛ.

¹⁴Anɔ́ɔ ɔ́mpa nū ā tá ɔ̄ ohi ka ayíka ɔkpacaŋ́gelī kú ācɛ Ísrɛ̄lu nōo wɛ Ugídīyɔn, ɔyí kú Ujówāsi ā nɛ. Ó kóō gáā wɛ ɔdā ɔhá dúúmā ŋ́. Ka Óndú ā cɛ̄ lɛ ɔ́ lɛ ācɛ kú Umídiya mɛ́mla odúúdú aícɔ́ɔja kú alɔ kpó yálé ɛɛ́.

¹⁵Eko nɛ̄ Ugídīyɔn le ɔ̄nā nyā pó mɛ́mla ɛyí nū ā, ó le okwúukwu kpó kwaajɛ le ɛ̄gbā gbā Ɔwɔicō. Anɔ́ɔ ó kwúcē gā aáklɔ̄kpɛ ɛ́fú kú ācɛ kú Ísrɛ̄lu gaá da uwá kéē cāŋjɛ ohígbū ka Óndú ā ɔ́ɔ cɛ̄ lɛ aá lɛ aícɔ́ɔja kú Umídiya kpó yálé ɛɛ́.

¹⁶Ó lɛ ācɛ ofu igwɛ́ɛhɔ̄ kú nū ā kɔ̄ ígwu ɛtá, anɔ́ɔ ó lɛ opo mɛ́mla ɔjá nɛ̄ ɛmu o kwɔlá tá ipú nū ā kpó lɛ ɔnyɔɔnyɛ kú uwā á.

¹⁷Anɔ́ɔ ó da uwá ka eko nɛ̄ anúɔ gā okónōgwu kú aáklɔ̄kpɛ kú ɛfú kú aólɛlā ā, kéē má anúɔ, ɔdā dóódu nēé má anúɔ yɔ̄ ī yá ā, kéē yá lɛ ā.

¹⁸Ó ka eko nɛ̄ ígwu kú anúɔ ā lɛ opo kú uwā tá, kéē gbɔɔ́ ō tá ákú uwā, biílí ipú odúúdú ɛgiyí aáklɔ̄kpɛ kú ɛ́fú kú aólɛlā ā. Ó klla kéē dɛ̄gba ka, “Akú Óndú ā mɛ́mla Ugídīyɔn!”

¹⁹Ugídīyɔn mɛ́mla ācɛ ɔlɛ́ nū ā gā okónōgwu aáklɔ̄kpɛ kú ɛ́fú kú aólɛlā kú uwā yɛɛ ā, ɛ́ɛ́ nɛ̄ ahāpōtu yá á. Eko nēé lɛ ācɛ nōo gē gbāajɛ otú ā pīyabɔ̄ bōōbū ā. Anɔ́ɔ é lɛ opo tá, le ɔjá nēé bī abɔ̄ ā ca á.

²⁰Odúúdú ígwu ɔhá ā le yá lɛ ā. Odúúdú uwā bī ɛmu o kwɔlá abɔ̄lúfīyē mɛ́mla opo abɔ̄lɔ́ná. É klla le ɛgba dɛ̄ ka “Ɔkpácaŋgeli kú Óndú mɛ́mla ɔkpáncaŋgeli kú Ugídīyɔn!”

²¹Anɔ́ɔ odúúdú ācɛ Umídīya ā cāŋjɛ gbɔɔ́ ō dɛ̄gba klla bá í kwu á.

²²Eko nɛ̄ ācɛ kú ɔlɛ́ Ugídīyɔn bá ī tá opo kú uwā kpɔ́ ā. Óndú ā le yá kú aícɔ́ɔja kú aólɛlā ā, kéē lɛ eyī kpó pīya kwu iyī uwā, anɔ́ɔ é gbɔɔ́ ō ŋmó īyī uwā mla ɔkpacaŋ́gelī á. É gbɔɔ́ ō kwinya lɛyíkwu Usárētán jāā ga Ubɛti Ussíta, jāā ga igelī kú Ébɛ̄lu Umehóla nōo kwu Utábāti ajaajɛ ā.

²³Anɔ́ɔ é le ācɛ kú aípɔ́ɔma kú Unáfutāli, Ássa mɛ́mla āyā ɛplɛ́ɛpa kú Umanásɛ ā kpó hīīgwú wɛ̄ɛcɛ, kéē nū ācɛ kú Umídiya inya á.

²⁴Ugídīyɔn le ɛhɔ̄ tū fu odúúdú ācɛ kú ɔlɛ́ kú ɛyí ɛfú kú Ɛ́frem ā kéē wɛ̄ɛcɛ í kpɛ́fú tá ācɛ kú Umídiya. Ó kéē bū ísu kú Ujɔ́dan mɛ́mla áyɔ́kpá ā jāā ga Ubɛtibára, cɛ́ɛ́ kéē cɛ̄ lɛ ācɛ kú Umídiya bēhé ɔkpá ā ŋ́. É lɛ ācɛ kú Ɛ́frem ā hīīgwú tɔ̄há, anɔ́ɔ é bū ísu kú Ujɔ́dan mɛ́mla áyɔ́kpá ā jāā kwu Ubɛtibára ā.

²⁵É lɛ aɔ́cɛ́ kú Umídiya ɛpa, nēe lé ka Órebu mɛ́mla Usíibu, ā kwú. É le Órebu ŋmó ɛyí ápátɛ́cɔ̄ kú Órebu. É klla lɛ Usíibu ŋmó ɛga o pi ejé kú Usíibu. É klla yɔ̄ gē nū ācɛ kú Umídiya kpɔ́, anɔ́ɔ é le ikpɛ̄yí kú Órébu mɛ́mla ákú Usíibu kpó gé lɛ Ugídīyɔn, nōo yɔ̄ ɛnɔ̄ɔ̄cī kú Ujɔ́dan ā á.